Maku 11:1-33
11 Miꞌi hawyi Iesui toto i raꞌyn tawa wato Ierusarẽi kape towyriaꞌin wywo. Putꞌok toꞌe mekewat yityꞌok Uriweiria ypia yityꞌok hap het rakat tote hawyi teꞌeraꞌam hawyi teꞌeropyhuꞌat mekewat yityꞌok tote. Yt pya hin i raꞌyn tawa wato Ierusarẽi kai tawa Pewake kai tawa Petania kai tukupteꞌen itote.
2 Miꞌi tote pyi toiꞌatupoꞌoro typy ok temiit tawa Ierusarẽi kape -Eweiwat ro mekewat tawa kape hawyi putꞌok eweiꞌe hawyi aru eweiꞌakasa aru wẽtup iꞌatuhũ Iumentu mepyt taꞌasaity piat eweipuẽti aru e. Mekewat iꞌatuhũ Iumentu mepyt pakup toineꞌen katupono yt uwe i hewyry itotiat rakat te toineꞌen e. Pyno miꞌi hawyi o waku eweiꞌasaitypok hawyi o eweterut raꞌyn uhewowi typy ok temiitꞌin me.
3 Miꞌi hawyi toꞌe i tomipoꞌoro koꞌi pe -Taꞌatukuap teran aru kat hamoĩ ewetioto iꞌatuhũ hawyi waku eweiꞌe aru -Aikaꞌiwat wyti ipuru porapꞌi eihũ uhytꞌiꞌin waku eweiꞌe o ikaꞌiwaria pe e Iesui typy ok tomipoꞌororia pe.
4 Miꞌi hawyi tuwat raꞌyn hawyi miꞌi Iesui e hap ewy raꞌyn taꞌatupuẽti itote iꞌatuhũ Iumentu taꞌasaity pe muap tote oken note. Miꞌi hawyi taꞌatusaitypot hawyi ikaꞌiwaria kat hamo iꞌatuꞌe.
5 Taꞌatuꞌasaitypok pote itotiaria apo iꞌatuꞌe -Kat hamoĩ ewetioto uruhũ iꞌatuꞌe.
6 Miꞌi hawyi taꞌatuwesat -Aikaꞌiwat Iesui wyti ipuru parapꞌi iꞌatuꞌe. Miꞌi hawyi so -Pyno waku iꞌatuꞌe.
7 Miꞌi hawyi ti tuwat raꞌyn iꞌatuhũ wywo Iesui kape. Putꞌok iꞌatuꞌe hawyi taꞌatuporokpun iꞌok tote taꞌatuesokpe koꞌi iꞌatuhũ tote. Miꞌi hawyi Iesui taꞌam naꞌyn apyk pe mekewat Iumentu pakup ok tote.
8 Miꞌi hawyi iraniaꞌin iporokpun taꞌatuesokpe yi upi. Taꞌatuterek iꞌyhop gaꞌapy koꞌi haga piat koꞌi hawyi taꞌatuporokpun hewa kai ipuꞌap yian mokahu hamo morekuaria puꞌap ewy.
9 Miꞌi hawyi miaria watꞌypmuaria teꞌerehum taꞌatuehay wepiit wywo -Taꞌi waku kahato ti Tupana iꞌatuꞌe. Meiũwat Miit ti tuut raꞌyn Tupana Mimotypot set upi iꞌatuꞌe.
10 -Meiũwat Miit ri Tupana Mipoꞌoro Aiporekuat nuat aikotã morekuat Tawi ewywatnuat iꞌatuꞌe. Toꞌiro Tupana Mipoꞌoro Morekuat Tawi Saipepiat sese motypot hamo iꞌatuꞌe mekewat muap upiaria sem tuwat tuwat Iesui upi -Wakuat kahato En atipy piat pe iꞌatuꞌe.
11 Putꞌok e tawa wato Ierusarẽi me hawyi Iesui teke Tupana motypot hawe. Miꞌi hawyi tehaꞌat yne hawyi toto i tawa wato Ierusarẽi myi wãtym neran moityꞌi pote toto mekewat tawa hit Petania kape temiitꞌin 12 ok takaria wywo.
Iesui Wikeiru Yp Mosaty Satyꞌi Hamo
12 Heꞌihatꞌok pe tawa Petania kaipyi taꞌaipok i raꞌyn Ierusarẽi kape. Miꞌi hap tote muap upi Iesui hesyꞌat kahato raꞌyn.
13 Miꞌi hawyi taꞌakasa Wiku yp kape pya wuat kape iꞌyhop kahuria rakat kape. Miꞌi hawyi toto haat kyewi maꞌato yt kat i haat toipuẽti. Iꞌyhop yn toipuẽti hesyꞌat turan. Yt heꞌat i te pote.
14 Miꞌi hawyi Iesui toꞌe Wiku yp we hawyi -Are paĩ e pyno miꞌi hawyi wyti aru yt sake i raꞌyn esat e. Yt uwe i raꞌyn ti aru esatꞌu e tesyꞌat hap wywo te. Mio tã e hap hemiitꞌin tikuap.
Iesui Tupana Yat Mohywytip Hamuat
15 Miꞌi hawyi Iesui toto temiitꞌin wywo i raꞌyn Ierusarẽi kape. Putꞌok taꞌatuꞌe hawyi tuwehytꞌok i raꞌyn Tupana motypot yat wato pe. Miꞌi turan kareꞌen kyiꞌat haria weneruꞌi weneruꞌi e haria tukupteꞌen itote typyꞌi kahato toipuẽti. Miꞌi hawyi Iesui tiꞌatuporenotem i raꞌyn miꞌiria Tupana motypot yat wato pyi. Miꞌi hawyi Iesui iꞌatuetineiru patꞌok patꞌok hap mesa yparakai koꞌi tohytpok yne. Miꞌi hawyi pykasu weneru haria eꞌamyap koꞌi taꞌatuekat tohytpok yne. Toiꞌatusopo yne weneru haria.
16 Miꞌi hawyi herut haria toiꞌatupyhyp taꞌyn yt toikyꞌesat i raꞌyn Tupana motypot yat wato eꞌokipy sakpo tokokaꞌat.
17 Miꞌi hawyi miꞌi haria toiꞌatunapin haty wo -Yt eweikuap i apo aikotã Tupana toꞌe Isaia miwan me -Uiꞌyat ri atikyꞌesat wuatꞌi ywania ehay uhewowiat hamuat e. Maꞌato ti Tupana motypot yat ewetunug seroꞌok e haria yatno neꞌi are e. Yt naku i kahato ewetunug are e Iesui Tupana motypot yat piaria kareꞌen weneru haria pe.
18 Miꞌi tã naꞌyn tutunug mote miwan enoi haria paꞌi akagnia tikat kahato raꞌyn aikotã miat iꞌauka hamuat maꞌato teꞌerokenꞌẽ Iesui pupi kat pote typyꞌi poityꞌi ihay upiaria pote.
19 Miꞌi hawyi wãtymꞌi irane hawyi toto Iesui tawa Ierusarẽi myi temiitꞌin wywo.
Kat Som Taꞌatukuap Mohey Hap Kurin Hap Wywo
20 Miꞌi hawyi heꞌihatꞌok pe hunete Iesui toto i raꞌyn towyriaꞌin nywo Ierusarẽi kape. Miꞌi hawyi muap upi iwyriaꞌin teꞌerahaꞌat i mekewat Wiku yp kape. Miꞌi turan iꞌyp gag naꞌyn hapo wywo raꞌyn.
21 Miꞌi hawyi ti Peteru toꞌe -Urumuꞌe hat mekewat Wiku yp ikuꞌuro raꞌyn emisatyꞌi satyꞌi e.
22 Miꞌi hawyi Iesui tiꞌatunapin -Taꞌi eweimohey ro Tupana haty wo e.
23 Pywo pe ti areꞌe ehepe uwe uwe meiũwat yityꞌok wato rakat ewywuat pe toꞌe -Ereto ro meiũpe pyi yꞌy wato kape hawyi minꞌere ro yꞌy wato pe imohey hap wywo yn miꞌi pote ti aru topopy raꞌyn meremo yityꞌok yꞌy wato kape hawyi minꞌe imohey hap oktan are e.
24 Miꞌi tupono ti karapeĩ eimikyꞌesat ehẽtup Tupana pe imohey hap wywo eweiꞌe ro eipyꞌa pe pote toineꞌen naꞌyn eipo pe raꞌyn emiẽtup ewywuat are. Katupono imohey hap wywo ehẽtup Tupana pe pote eimiẽtup ewy tutunug ehepiat tomohey hap oktan tutunug. Pywo ewehẽtup uimohey hap wywo pote putꞌok e eimikyꞌesat koꞌi e.
25 Pyno Tupana kapiat ehehay hamo eweimohãpyk to eipyꞌa piat yt eiwoꞌowese i hap koꞌi miꞌi pote ti aru Eiꞌywot atipy piat timohãpyk yne eiminug yt nakuap i koꞌi e.
26 Maꞌato yt waure wo i eweikupteꞌen miitꞌin minug saꞌag ewowi hawyi iꞌewyte Eiꞌywot atipy piat yt waure wo i toineꞌen eiminug saꞌag koꞌi ete e Iesui temiitꞌin me.
27 Miꞌi hawyi putꞌok e i raꞌyn Iesui tawa wato Ierusarẽi me. Miꞌi hawyi Tupana motypot hap yat puo hewyry. Miꞌi hawyi paꞌi akag koꞌi seko miwan enoi haria iꞌewyte nagnia tipuẽti Iesui itote.
28 Miꞌi hawyi apo iꞌatuꞌe Iesui pe -Uweĩ epoꞌoro gaꞌatpo meketã nug hamo iꞌatuꞌe. Uweĩ hum epe meketã nug hamo iꞌatuꞌe.
29 Miꞌi hawyi Iesui tiꞌatuwesat -Pyno apo are ehepe wy e. Uiwesat hawyi ahenoi ehepe uwe uipoꞌoro hap kaipyi atunug e.
30 Pyno atikuap teran Iuwãu woꞌosetꞌok hat Tupana mipoꞌoro inug hamo sio miitꞌin kaipyi iminug hap koꞌi apo e. Ehenoi o e apo e haria pe.
31 Miꞌi hawyi taꞌatukat Iesui wesat hamuat hap. Miꞌi hawyi teꞌeruwanetup -Kat watoꞌe som waku watiwesat iꞌatuꞌe. Sio Tupana ti Iuwãu poꞌoro hat watoꞌe pote ti ren -Kat poteĩ pyno yt eweimohey i Iuwãu e aru ahepe.
32 Maꞌato miitꞌin mipoꞌoro ti Iuwãu watoꞌe pote aru iꞌatupyꞌahak ahete iraniaꞌin katupono iraniaꞌin Iuwãu mohey haria tukupteꞌen iꞌatuꞌe toꞌope.
33 Miꞌi hawyi taꞌatuwesat Iesui -Uhyt yt uruikuap iꞌatuꞌe. Miꞌi pote Iesui tiꞌatuwesat -Yt uiwesat i pote miꞌi hawyi yt ahenoi i ehepe uwe ehay kaipyi Uito atunug miꞌi hap koꞌi e apo e haria pe.
