Maku 12:1-44
12 Miꞌi hawyi Iesui henoi hãꞌãkap wuo iꞌatuepe sehay -Wẽtup eꞌat pe so wẽtup ok miit tuwanetup Uwa ypia nug tepiat hap ete e. Miꞌi hawyi toikoi hawyi toiꞌatupyhyp kurara wato pe hawyi tutunug nu kaꞌa wato Uwa hy sat hamuat e. Miꞌi hawyi so iꞌypia pyꞌasetpe tuwepytypnug ywaiti rakat surara eiam Uwa u haria pupi Uwa eroꞌok haria pupi e. Waku pe yne raꞌyn hawyi totopag no yn iꞌapykok haria po pe raꞌyn Uwa ypia e. Miꞌi hawyi so toto raꞌyn tewyry hamo e.
2 Meiũran haat hap eꞌat pe so toipoꞌoro wẽtup ok temiit Uwa poꞌok hamo e.
3 Miꞌi hawyi putꞌok e ipotpoꞌoro imikoi ypia pe maꞌato yt iꞌatuwese i raꞌyn imipoꞌoro ete. Yt taꞌatuium neran i raꞌyn taꞌatumipoꞌok e. Miꞌi hawyi taꞌatupytyk hawyi taꞌatupok pok kahato raꞌyn. Miꞌi hawyi taꞌatuporeraꞌaipok yt kat wywo i raꞌyn e.
4 Miꞌi hawyi wẽtup ok temiit i raꞌyn ikaꞌiwat tipoꞌoro maꞌato iꞌewyte miꞌi ipotpap takaria tiꞌahyk ahyk iꞌakag ete e. Miꞌi hawyi iꞌatumikyryꞌi wo neꞌi raꞌyn.
5 Miꞌi hawyi wẽtup ok temiit i raꞌyn toipoꞌoro. Miꞌi ti taꞌatuꞌauka raꞌyn e. Miꞌi hawyi iraniaꞌin i raꞌyn toiꞌatupoꞌoro maꞌato iꞌewyte te taꞌatuꞌatuuka taꞌatuꞌanug iraniaꞌin taꞌatuꞌahyk ahyk iraniaꞌin neꞌi raꞌyn e Iesui.
6 Miꞌi hawyi haꞌyru yn naꞌyn topyhuꞌat imikyꞌe kahato. Miꞌi ti maꞌato toipoꞌoro -Taꞌi uhaꞌyru sese tupono ti aru taꞌatumotypot kahato raꞌyn Miꞌi Miit paĩ e so tuwanetup hawe e.
7 Maꞌato ti yt hin i. Miꞌi hawyi teꞌeroꞌe toꞌope -Toꞌiro watiꞌauka iꞌypia kaꞌiwat saꞌyru iꞌatuꞌe. Katupono ti aru meiũran miꞌi raꞌyn ikaꞌiwat pakup mo iꞌatuꞌe. Watiꞌauka hawyi mono aipo pe yne raꞌyn topyhuꞌat mesuwat mikoi ypia iꞌatuꞌe neꞌi toꞌope e.
8 Miꞌi hawyi taꞌatuꞌauka raꞌyn haꞌyru hawyi taꞌatupugha ipiit mikoi iꞌypia kaipyi e.
9 Miꞌi hawyi Iesui toꞌe -Kat aru miꞌi hawyi mikoi ypia kaꞌiwat tunug tosaꞌyru auka haria ete e. Taꞌi tuut hawyi ti aru taꞌatuuka miꞌiria hawyi ti aru iraniaꞌin imiꞌairo kape toipuru teꞌyi e Iesui nagnia pe.
10 Miꞌi hawyi Iesui toꞌe iꞌatuepe -Yt karamuo i apo eiwemuꞌe miwan me aikotã Tupana toꞌe saꞌawyꞌi wuat hap ete -Meiũran aru Wẽtup ok Uimiꞌairo iꞌapyaha ewywuat netap nug haria yt tikyꞌesat i uimotypot yat nug hamo e Iesui. Miꞌi pykai miꞌi ti aru topyhuꞌat netap akywyt yp mo ipoꞌog hesaika iraniaꞌin kai e.
11 Miꞌi wyti Aipotypot minug ikahu kahato rakat atipuẽti e. Miꞌi wyti aru akywyt yp mo ahaꞌawynug uimotypot yat sese uiꞌyat nug haria yt tikyꞌesat i pykai e ti miwan me e morekuat Tawi miwan 118.22 pe.
12 Mio tã e pote hewanikaptia teꞌeruwanetup kahato hawyi teꞌeroꞌe -Ahete ti mio ihay iꞌatuꞌe pote taꞌatupytyk teran wen maꞌato typyꞌi poityꞌi teꞌerewaꞌatunug hewowi pote teꞌerokenꞌẽ hawyi tuwat Iesui yatypepyi.
Waku Taꞌatuium Saꞌup Sesa Kape Sio Yt
13 Miꞌi hawyi meiũran morekuat Eroti emiit taꞌatupoꞌoro Iesui kape nagnia ehay enoi haria Iesui ehay aparap taꞌatuehay wuat hamo tuwat.
14 Miꞌi hawyi apo iꞌatuꞌe -Woꞌomuꞌe hat iꞌatuꞌe taꞌi uruikuap En. Pywo ti ehenoi hãpyk yn Tupana kapiat puꞌap wuatꞌi miitꞌin me katupono yt uwe pupi i erekenꞌẽ iꞌatuꞌe. Wẽtup ehay yn ehenoi wuatꞌi miitꞌin iꞌatuꞌe. Maꞌato wẽtup te uruikuap teran waku apo ahetineiru watipatꞌok morekuat wato Sesa pe sio yt iꞌatuꞌe Iesui pe.
15 Waku miꞌi tã urutunug sio yt apo iꞌatuꞌe. Maꞌato Iesui tikuap taꞌatuiãꞌãg neꞌi hap miitꞌin miium saꞌup mo morekuat Sesa kape. Miꞌi hawyi toiꞌatuwesat -Kat poteĩ mio tã eweiꞌe sio apo uhãꞌãg hap e. Eweterut ro uhepe tineiru iꞌape rakat araꞌakasa mono pyno e Iesui apo e haria pe.
16 Miꞌi hawyi taꞌatuꞌerut raꞌyn hawyi Iesui apo e iꞌatuepe -Uwe iãꞌãkap kahu pyno meiũ tineiru ete toset wywo e. Miꞌi hawyi taꞌatuwesat -Taꞌi morekuat wato Sesa iãꞌãkap ti iꞌatuꞌe.
17 Miꞌi hawyi Iesui toꞌe -Pyno waku ewetum morekuat wato pe iwatnuat koꞌi saꞌup e. Maꞌato Tupana watnuat koꞌi saꞌup waku watum Tupana pe e. Miꞌi hawyi mio tã e Iesui hawyi teꞌeruwanetup kahato iweꞌeg kahato hap kape aikotã toiwesat apo iꞌatuꞌe hap.
18 Wẽtup eꞌat pe hawyi tõꞌẽ Iesui kape woꞌomuꞌe haria. Miꞌiria so miitꞌin muꞌe aikuꞌuro hawyi ti yt kat i raꞌyn aheineꞌen pakup i hap e haria. Miꞌiria so apo iꞌatuꞌe Iesui pe.
19 -Woꞌomuꞌe hat nimo te Muisei miwan ainapin hap mio tã e -Karãpe eheykeꞌet ikuꞌuro maꞌato yt kat i imepyt miꞌi pote waku hehiwu iꞌywyt eharyꞌi wo ikuꞌuro rakat mepyt nug hamo e ti Muisei mienoi nimuat mekewat Muisei miwan miat Teturonamia 25.5 pe iꞌatuꞌe.
20 Miꞌi hawyi wẽtup eꞌat pe so iꞌywyt sem nakaria toineꞌen. Miꞌi hawyi so iꞌatuykeꞌet tipuẽti teharyꞌi maꞌato meiũran so ikuꞌuro yt imepyt i te turan iꞌatuꞌe.
21 Miꞌi hawyi so iꞌywyt wywo i raꞌyn hehiwu toineꞌen iꞌatuꞌe. Miꞌi iꞌewyte yt imepyt i te turan so ikuꞌuro raꞌyn iꞌatuꞌe.
22 Meiũran 7 ok takat topap yne taꞌatuehiwu yatype maꞌato yt wẽtup ok i imepyt topyhuꞌat iꞌatuꞌe Iesui pe. Miꞌi hawyi so ikuꞌuro raꞌyn iꞌatuehiwu iꞌatuꞌe.
23 Miꞌi hawyi apo iꞌatuꞌe Iesui pe -Atipy pe hawyi mekewat hiwu uwe teꞌaito wywo toineꞌen kat pote 7 heꞌaito toineꞌen mesuwe pote.
24 Miꞌi hawyi Iesui tiꞌatuwesat -Taꞌi eweiꞌaparap kahato wyti katupono yt eweiwanetup hãpyk hin i wyti uhytꞌiꞌin e katupono Tupana mienoi yt eweikuap i kahato iꞌewyte Tupana esaika hap yt eweikuap i kahato e iꞌatuepe.
25 Karapeĩ tuwenoꞌẽ guꞌuro pyi miitꞌin miꞌi hawyi ti aikotã Tupana emiitꞌin atipy piaria ewy teꞌeropyhuꞌat. Maꞌato yt heꞌaito rakaria i yt iwary rakaria wo i raꞌyn tukupteꞌen itote e.
26 Miꞌi hawyi Iesui toꞌe -Eipe ti aikuꞌuro hawyi ti yt kat i raꞌyn aheineꞌen pakup i hap e haria e. Pyno ahenoi teran wẽtup sehay ehepe guꞌuro pywiat aheineꞌen pakup i hap e. Yt karamuo i apo eiwemuꞌe Muisei miwan ete aikotã ariaꞌyp wukꞌe hat kaipyi toꞌe Tupana Muisei pe -Uito ti Aparãu eTupana Isaki eTupana Iako eTupana Uito e Tupana Muisei pe saꞌawyꞌi e Esutu 3.6 pe.
27 Miꞌi tupono areꞌe ehepe Tupana ti yt map haria eTupana i ti. Taꞌi uhytꞌiꞌin Tupana ti ieineꞌen haria eTupana yn hap watikuap e. Miꞌi pote Aparãu Isaki Iako yt karãpiat i ikuꞌuro rakanuaria maꞌato wuatꞌi eꞌat piat ieineꞌen hanuaria miꞌiria e Iesui. Eipe eweiꞌaparap kahato eiwanetup hawe e.
Kat Napin Hap Tupana Wat Poꞌog Iraniaꞌin Kai
28 Miꞌi turan wẽtup ok miwan enoi hat tikuap yne Iesui wesat waku hap koꞌi pote apo e Iesui pe -Uhyt e kat e hap som ewanetup hawe iraniaꞌin kai poꞌog iwato Tupana woꞌonapin hap e.
29 Miꞌi hawyi Iesui tiwesat -Pyno ahenoi poꞌog iwato rakat epe e. Mio tã e ti miwan me tohenoi Isareu ywania pe -Aikaꞌiwat aheTupana wẽtup yn ni toineꞌen e Aipotypotno e.
30 Eweikyꞌe kahato yne yne eipyꞌa pe yne yne eipaꞌãu wo hawyi yne yne eiwanetup hawe iꞌewyte yne ehesaika wo e Muisei tomiwan Teturonamia 6.5 pe e Iesui tope.
31 Iꞌewyte toineꞌen wẽtup iꞌewywuat rẽ e -Etikyꞌe o ewy eweikyꞌe hap ewy e hap e. Miꞌi rẽ ti yt kat i raꞌyn poꞌog wẽtup iwato rakat ainapin hap Muisei miwan Irewitiku 19.18 pe.
32 Miꞌi hawyi iwan enoi hat toꞌe -Taꞌi waku kahato ti ereꞌe woꞌomuꞌe hat e. Pywo kahato ti miꞌi yn waku rakat. Yt uwe i raꞌyn miꞌi rẽ iꞌewywuat e.
33 -Taꞌi waku ti watikyꞌe Tupana yne aipyꞌa pe aiwanetup hawe aiweꞌeg hawe e iꞌewyte iraniaꞌin waku watiꞌatukyꞌe aiwekyꞌe hap ewy e. Pywo pe ti miꞌi ti poꞌog waku watunug ikamhigse wuk hamuat sio aihũ aimiium Tupana piat kai e Iesui pe.
34 Miꞌi hawyi Iesui tipuẽti iwesat hamuat ikahu rakat sehay. Miꞌi hawyi Iesui toꞌe tope -Taꞌi porap yn naꞌyn ni en Tupana emiitno e Iesui miwan enoi hat pe. Miꞌi hawyi yt taꞌatuhãꞌãg poꞌog i Iesui ehay aparap taꞌatuehay wuat hamo katupono iwesat hap pupi teꞌeremoti raꞌyn iwesat hap waku yne yne pote.
35 Miꞌi hawyi toꞌe Iesui Tupana motypot yat piaria pe -Kat poteĩ einapin haria mio tã iꞌatuꞌe ehepe -Wẽtup ok morekuat Tawi emiariru aru topyhuꞌat Wuatꞌi Miitꞌin Porekuat no iꞌatuꞌe ehepe e.
36 Maꞌato nimo te Tupana Paꞌãu mikuap morekuat Tawi toꞌe -Uikaꞌiwat ti toꞌe Uikaꞌiwat pe -Eraꞌapyk to uipo sese kai e. Miꞌi hawyi ti aru atiꞌatuꞌakit torannia eꞌakit reran haria e. Miꞌi hawyi ti aru yt kat iꞌatuꞌe i raꞌyn ewanikaptia aru katupono atunik yne raꞌyn e wyti Tupana uhepe e morekuat Tawi e Iesui.
37 -Kat poteĩ pyno Tawi emiariru yn topyhuꞌat Wuatꞌi Porekuat no eweiꞌe maꞌato Tawi toꞌe -Uikaꞌiwat ti toꞌe Uhekaꞌiwat pe e e Iesui. Miꞌi hawyi mio tã e Iesui pote ti Tupana motypot hawiaria -Taꞌi ihay se kahato ti Iesui iꞌatuꞌe raꞌyn toꞌope.
38 Miꞌi hawyi Iesui toꞌe -Eiweꞌeg wo o einapin haria ran mupi e. Katupono sokpe kahuria puo teran ikohyewyry miitꞌin koꞌi upi e. Miꞌi hawyi taꞌatukyꞌesat miitꞌin wẽpowat kahuria iꞌatuꞌekareꞌen kyiꞌat hap upi e.
39 Iꞌewyte Tupana motypot hawe hawyi ienuk turan taꞌatueiam nug poꞌog waku iraniaꞌin kawiat hap taꞌatukyꞌesat e.
40 Miꞌi hawyi hiwuria ekareꞌen koꞌi taꞌatueroꞌok iꞌatuꞌyat piat koꞌi iꞌatumaꞌat wo. Miꞌi haype ti iꞌatuehay ywop kahato Tupana kape yt pywo pe i. Miꞌiria aru meiũran poꞌog Tupana tiꞌatumosoꞌopot iraniaꞌin kai e Iesui itotiaria pe.
41 Iesui henoi kahu raꞌyn hawyi taꞌapyk towyriaꞌin nywo Tupana piat miium eiam yatype. Miꞌi hawyi miitꞌin terut terut taꞌatumiium Tupana piatnuat koꞌi. Miꞌi hap kape Iesui ihaꞌat. Miꞌi turan hekat rakaria miium iwato raꞌyn.
42 Miꞌi turan wẽtup ok hiwu yt hekat i rakat iꞌatupyꞌasetpe hum tomiium kurin typy ape hit rakat yn tutum.
43 Miꞌi hawyi Iesui tehaꞌat kahato hawyi tekatuwyria toiꞌatukay kay hawyi toꞌe iꞌatuepe -Ewehaꞌat ro mekewat haryporia hiwu kape e. Pywo pe ti areꞌe ehepe mekewat hiwu yt hekat i rakat miium poꞌog iwato Tupana pe hekat rakaria wat kai e.
44 Katupono hekat rakaria wyti hum Tupana pe taꞌatuetineiru ieĩpyt yn maꞌato mekewat hiwu tutum yne kat som toineꞌen topo piat yne Tupana kape e. Tuwemiꞌu kyiꞌat hamuat tutum yne yne Tupana pe e Iesui towyriaꞌin me.
