Maku 14:1-72
14 Typy eꞌat man teneg u hap eꞌat koꞌi owakai te paꞌi akag koꞌi miwan enoi haria wywo teꞌeruwaꞌatunug tawa wato Ierusarẽi kape saꞌawyꞌi wuat Iuteu ywania ehakyeraꞌat hap taꞌatuewanikaptia Esituꞌin po pyi eꞌat kapiat watetup hamo teꞌeruwaꞌatunug itote. Miꞌi hawyi teꞌeroꞌe toꞌope -Aikotã som pyno waku watipyhik hawyi watiꞌauka Iesui yt uwe mikuap mo i iꞌatuꞌe.
2 Yt naku i watipyhik aheman teneg u hap eꞌat koꞌi pe katupono wuꞌuka hap neꞌi raꞌyn topyhuꞌat miitꞌin me iꞌatu kahato Iesui mohey haria pote iꞌatuꞌe.
3 Miꞌi turan toineꞌen Iesui saꞌawyꞌi wuat hepihi pihi rakat Simau yat pe tawa Petania pe. Miꞌi hawyi teꞌerenuk turan wẽtup ok haryporia tuut Iesui ewowi mohag hy Natu kawiat okpun Iesui asap ete hamo. Haꞌup woity kahato rakat toterut. Miꞌi hawyi toiꞌokpik heiam hekat rakat nu Arapatu kawiat hawyi toiꞌokpun Iesui asap ete.
4 Miꞌi pote iraniaꞌin ienuk haria iꞌatupyꞌahak kahato haryporia ete hawyi teꞌeroꞌe toꞌope -Taꞌi haꞌup woity kahato ti mekewat iꞌatuꞌe.
5 Yt naku i ti mohag hy moma yne hat haryporia iꞌatuꞌe. Waku poꞌog ti toiweneru hawyi ti haꞌup iwato yt hekat i rakaria pe toimoꞌẽ iꞌatuꞌe. Taꞌi haꞌup 300 ape parata kawiat iꞌatuꞌe. Miꞌi pote -Yt naku i etunug iꞌatuꞌe haryporia pe
6 Maꞌato Iesui toꞌe -Kat poteĩ ewehatyꞌi hatyꞌi mesup haryporia. Tero tutunug wakuap uhepe e.
7 Yt hekat i rakaria ti aru tukupteꞌen wuatꞌi eꞌat pe eiwywo e. Karãpe ewetunug waku teran miꞌiria pe miꞌi pote waku eweimoꞌẽ ehekat miꞌiria pe wuatꞌi eꞌat pe wen maꞌato Uito ti yt areineꞌen motꞌi i eiwywo e.
8 Taꞌi mesuwat haryporia tiꞌokpun howakai te raꞌyn uipiit ete mohag hy uhyp hap eꞌyian mete e. Miꞌi ti inug waku uhepe tomikuap oktan e.
9 Miꞌi pote pywo pe ti areꞌe ehepe aikope aikope ti aru mesuwat yi wato hap oktan miitꞌin henoi Tupana ehay wakuat miꞌi hap iꞌewyte te ti aru mesuwat haryporia minug wakuap uhepiat hap taꞌatuhenoi wuatꞌi ywania pe. Yt karãpe i waure wo miitꞌin wanetup hawe uhetiat taꞌatuhenoi uhetiat turan e.
Iesui Maꞌat Hap Etiat
10 Miꞌi hawyi suraraꞌin tikat kahato Iesui iꞌauka hamo maꞌato yt taꞌatupuẽti i. Miꞌi hawyi wẽtup ok hemiit Iuta Ikarioti e hap 12 ok hap toto paꞌi wato koꞌi kape Iesui maꞌat hamo.
11 Miꞌi hawyi Paꞌi kororia iꞌatuwepiit kahato Iuta mienoi hap ete. Miꞌi hawyi teꞌeroꞌe Iuta pe -Taꞌi uruhaꞌup nug eminug hap ete iꞌatuꞌe. Miꞌi hawyi Iuta tikat aat kaꞌap aikotã waku suraraꞌin po piat hum hamuat hap.
Man U Hap Eꞌat Putꞌok E Raꞌyn
12 Miꞌi hawyi mekewat man teneg u hap eꞌat putꞌok e hawyi mekewat iꞌatuhũ Kuteiru mepyt auka hap eꞌat putꞌok e raꞌyn hawyi hemiitꞌin apo iꞌatuꞌe Iesui pe -Aikopeĩ etikyꞌesat koitywy urutunug aheman teneg u hap eꞌat mesuwat ewãtym Mehin iꞌatuꞌe Iesui pe.
13 Miꞌi hawyi Iesui tipoꞌoro typy ok temiit tawa Ierusarẽi kape maꞌato saꞌawyꞌi toiꞌatunapin aikotã som waku taꞌatunug hap. Mio tã e typy ok pe -Pyno eweiwat ro eipe tawa kape e. Putꞌok eweiꞌe hawyi te ti aru eweipuẽti wẽtup ok ihainia kamuti piat yꞌy soꞌosat hat e. Miꞌi ewatꞌypmo eweiwat e.
14 Miꞌi upi o eweiwat hawyi ti aru putꞌok eweiꞌe heineꞌen hap tote. Miꞌi tote hawyi ehẽtup mekewat netap kaꞌiwat pe -Aiũwat akipy keĩ waku woꞌomuꞌe hat temiitꞌin nywo teman teneg u wãtym muo mesup eweiꞌe o netap kaꞌiwat pe e.
15 Mio tã apo eweiꞌe hawyi netap kaꞌiwat tomoherep ehepe akipy ywaiti rakat waku yne raꞌyn toineꞌen e. Miꞌi pe o eweiporokpun yparakai mesa tote aimiꞌu koꞌi e Iesui temiit typy ok takaria pe.
16 Miꞌi hawyi tuwat raꞌyn tawa kape. Miꞌi hawyi ti aikotã Iesui henoi iꞌatuepe saꞌawyꞌi hap ewy yne raꞌyn taꞌatupuẽti. Miꞌi hawyi akipy pe taꞌatuporokpun yparakai tote taꞌatumiꞌu koꞌi.
17 Miꞌi hawyi ti wãtym i turan ni putꞌok e raꞌyn Iesui temiitꞌin 12 ok takaria wywo akipy ete.
Uwe Toineꞌen Iesui Maꞌat Hatno
18 Miꞌi hawyi taꞌatuenuk hap turan Iesui toꞌe temiitꞌin me -Pywo pe ti areꞌe wẽtup ok ti aipyꞌasetpe ahenuk tuwy uhenoi aru wanikaptia suraraꞌin po piat uiium hanuat e.
19 Mio tã e pote ti hemiitꞌin hatyꞌu kahato taꞌatupyꞌa pe hawyi wẽtup ok tuereto apo e taꞌatumuꞌe hat pe -Urumuꞌe hat uito apo emaꞌat hat apo iꞌatuꞌe tuereto.
20 Miꞌi hawyi Iesui tiꞌatuwesat -Eipe 12 ok hap wyti mekewat mikau piat uiwywuat man pag hat kuiꞌa piat wyti uimaꞌat hat toineꞌen e.
21 Taꞌi Miitꞌin Ykeꞌet wyti ikuꞌuro irane aikotã saꞌawyꞌi Tupana ehay enoi haria henoi hap ewy ti raꞌyn e Iesui. Maꞌato ti aru yt naku i yn naꞌyn Miitꞌin Ykeꞌet maꞌat hat topyhuꞌat wuatꞌi eꞌat pe e. Taꞌi waku poꞌog uimaꞌat hat yt karãpe i saꞌawyꞌi iꞌywaĩꞌĩ hap eꞌat piat toineꞌen e Iesui temiit Iuta piat.
Iesui Temiitꞌin Wywo Man U Hap Eꞌat Turan
22 Miꞌi hawyi teꞌerenuk hamo Iesui tat wẽtup a man hawyi waku e Tupana pe hawyi toipik pik hawyi toimoꞌẽ temiitꞌin me. Miꞌi hawyi toꞌe iꞌatuepe -Ewetuꞌu ro man pik pik e. Miꞌi ti uipiit e.
23 Miꞌi hawyi ihy kuiꞌa piat totat hawyi waku e Tupana pe hawyi toimoꞌẽ iꞌatuepe. Miꞌi hawyi yne teꞌereꞌyꞌu ihy wo e.
24 -Miꞌi ti uhuu aat hap miitꞌin iꞌatu rakaria woꞌowehik Tupana wywuat hamuat hap e.
25 Pywo ti areꞌe ehepe miꞌi hawyi ti aru yt areꞌyꞌu i raꞌyn sapo hy mesuwe eiwywo maꞌato karãpe Tupana toineꞌen Morekuatno miꞌi hap eꞌat pe ti aru watuweꞌyꞌu i raꞌyn e Iesui.
26 Miꞌi hawyi teꞌeruwepy Tupana kape hawyi tuwat Uriweiria yp eꞌyityꞌok kape i raꞌyn.
27 Miꞌi hawyi Iesui toꞌe towyriaꞌin me -Eiwesytpok yne ti aru uiꞌyatypepyi mesup ewãtym e. Taꞌi uiꞌatoiat yne eipe aikotã iwan me saꞌawyꞌi tohenoi hap ewy ti aru -Taꞌatukaꞌiwat auka hawyi ihũ koꞌi tuwesytpok yne e miwan me e Iesui towyriaꞌin me.
28 -Maꞌato uimoieineꞌen i hap hawyi ti aru areto eheꞌyian me Karireia kape e. Miꞌi hap tote ti aru watoꞌopuẽti i raꞌyn e.
29 Miꞌi hawyi Peteru toꞌe Iesui pe -Iraniaꞌin eꞌatoiat yne mesup ewãtym mote uito yt woroꞌatoiat hin i e Peteru Iesui pe.
30 Maꞌato Iesui toꞌe -Pywo pe ti mesup ewãtym naꞌyn ni aru waipaka ehay typuat hap owakai ti aru -Yt atikuap i Iesui ereꞌe irane iraniaꞌin me myẽꞌym mo e Iesui Peteru pe.
31 Miꞌi hawyi tehay pirik wo Peteru toꞌe -Yt nyti yt nyti e. Uiꞌauka iraniaꞌin ewywo pykai yt woroꞌatoiat i En e Peteru Iesui pe. Iꞌewyte iraniaꞌin hemiitꞌin Peteru ehay ewyte teꞌeroꞌe.
Iesui Topotmuꞌeria Wywo Toto Raꞌyn Uriweiru Ypia Kape
32 Miꞌi hawyi toto Iesui towyriaꞌin wywo mikoi ypia ikahu rakat Kesemani e hap kape. Miꞌi hawyi toꞌe towyriaꞌin me -Eweiꞌapyk to meiũpe uhehay Tupana wywuat turan e.
33 Miꞌi hawyi totioto Peteru Tiaku Iuwãu tuwewywo. Miꞌi hap tote Iesui hatyꞌu kahato topyꞌa pe.
34 Tohatyꞌu tuwanetup kahato hawyi toꞌe myẽꞌym ok takaria tomiereto haria pe -Uiwyriaꞌin Uito ti ahatyꞌu kahato raꞌyn uipyꞌa pe e. Taꞌi ipoityꞌi kahato ti uhete e. Yt uipyꞌa wasu i hap porap uiꞌauka e. Eweikupteꞌen meiũpe ewehaꞌat hamo e myẽꞌym ok takaria pe.
35 Miꞌi hawyi toto porap i hawyi poragꞌe tewa pua tehay Tupana kapiat hamo. Miꞌi hawyi toꞌe -Uiꞌywot e etikyꞌesat pote etihep o meikoran muo uikaipyi e.
36 Uiꞌywot wuatꞌi nug kuap hat En miꞌi tupono etat teran uipo pyi meikowat kuiꞌa miꞌi pote etat maꞌato yt pote yt e. Waku emikyꞌesat ewy atunug e.
37 Miꞌi tã toꞌe kahu hawyi taꞌaipok taꞌyn towyriaꞌin myẽꞌym ok takaria kape. Miꞌi hawyi taꞌakasa towyriaꞌin kape miꞌi turan iwyriaꞌin teꞌeroket neꞌi raꞌyn. Miꞌi hawyi toꞌe Peteru pe -Uhyt Simau ereket apo e. Yt erehaꞌat i apo uhekawiatno e.
38 Yt eweiket neꞌi teiꞌo maꞌato ewehẽtup o Tupana kape koran tiꞌitu ahiag ehãꞌãg hawyi ewetunug yt naku i hap e. Taꞌi ewetunug neran ni Tupana mikyꞌesat ewy eipyꞌa pe ehesaika kahato wen maꞌato ti eipiit wyti iperup kahato hap ewy toineꞌen e Iesui Peteruꞌin me.
39 Miꞌi hawyi toto i raꞌyn Iesui Tupana wywo tehay hamo -Papai e etikyꞌesat pote etihep o uipo pyi meikowat kuiꞌa maꞌato yt pote yt e.
40 Tehay kahu hawyi taꞌaipok i raꞌyn towyriaꞌin kape. Miꞌi turan ni teꞌeroket i typy wo raꞌyn yt mehit iꞌatuꞌe kuap i raꞌyn. Miꞌi hawyi yt kat iꞌatuꞌe kuap i raꞌyn teꞌeruwemoti i raꞌyn haype.
41 Miꞌi hawyi toto hawyi kat e saꞌawyꞌi ihay miꞌi e hap ewy te ihay hawyi taꞌaipok hawyi toiꞌatupuẽti i raꞌyn iꞌatuket kai myẽꞌym mo. Miꞌi hawyi toꞌe iꞌatuepe -Pyno waku raꞌyn uimaꞌat hamuat hap putꞌok e raꞌyn e iꞌatuepe. Miꞌi hawyi yt nakuaria po pe raꞌyn areineꞌen e.
42 Pyno toran naꞌyn e. Eweipoĩꞌam no ewehaꞌat ro meikowo uimaꞌat hat tuut raꞌyn e.
Taꞌatupytyk Taꞌyn Iesui
43 Mio tã e turan wẽtup ok hemiit Iuta 12 ok hap tuut. Miꞌi wywo typyꞌi kahato raꞌyn suraraꞌin tõꞌẽ tõꞌẽ Iesui pyhik hanuaria. Iraniaꞌin ariaꞌyp akun koꞌi wywo iraniaꞌin kyseꞌyp wywo tõꞌẽ tõꞌẽ. Paꞌi koro miwan enoi haria nagnia mipoꞌororia tõꞌẽ tõꞌẽ hemiit Iuta upi.
44 Saꞌawyꞌi maꞌato Iuta henoi suraraꞌin me -Aiũwat uimiꞌãpysig ewetopytyk e katupono ti aru Iesui raꞌyn Miꞌi Miit e. Miꞌi ti aru eweiꞌapytyk o hawyi ewetioto o e Iuta saꞌawyꞌi suraraꞌin me.
45 Miꞌi hawyi putꞌok toꞌe hawyi Iuta tokosap Iesui kape hawyi toiꞌãpysig -Uimuꞌe hat toꞌe hawyi.
46 Miꞌi hawyi suraraꞌin topytyk taꞌyn Iesui.
47 Miꞌi pote wẽtup ok Iesui emiit iꞌyatypiat iherep taꞌyn towape pyi kyseꞌyp hawyi toiꞌahape hep taꞌyn paꞌi akag emiit.
48 Miꞌi hawyi topyhik teran haria pe toꞌe Iesui -Seroꞌok e hat Uito miꞌi pote apo eweĩꞌẽ uipyhik hamo kyseꞌyp koꞌi wywo ariaꞌyp akun koꞌi wywo e.
49 Haꞌawyte areineꞌen aat eiwywo Tupana motypot yat pe wuatꞌi eꞌat pe eimuꞌe hamo maꞌato mekewat eꞌat pe yt uipytyk hin i eipe e. Maꞌato mesup ti aikotã nimo tohenoi yian me miwan me uhetiat hap ewy ti raꞌyn uipytyk eipe e topyhik haria pe.
50 Miꞌi hawyi iwyriaꞌin yne tiꞌatoiat raꞌyn Iesui. Teꞌeruwesytpok yne ipytyk hawyi.
51 Miꞌi hawyi maꞌato wẽtup kurum iwasu toto Iesui upi tuwesuwy puo yn. Miꞌi ti surara taꞌatuhãꞌãg ipytyk hamo.
52 Taꞌatupytyk teran pykai kurum iwasu hesokpe ete maꞌato totoiat tuwesuwy hap iꞌatupo pe hawyi topopy raꞌyn yt kat i topiit piat sokpe wywo i teput.
Iesui Toineꞌen Paꞌi Kororia Pyꞌasetpe
53 Miꞌi hawyi taꞌatuereto Iesui paꞌi akag koro kape. Miꞌi hawyi yne nagnia paꞌi wato koꞌi miwan enoi haria teꞌeruwaꞌatunug naꞌyn.
54 Miꞌi hap kape toto Iesui upi Peteru maꞌato yt heremo i. Miꞌi hawyi tokosap Iesui upi paꞌi wato eꞌokenꞌypy kape. Miꞌi hawyi taꞌapyk suraraꞌin pyꞌasetpe aria kupyke tuwemope hamo.
55 Miꞌi hawyi paꞌi wato emiitꞌin tuꞌisaria wywo taꞌatukat Iesui kuasa te haria iꞌauka hamo. Taꞌatukat kahato iꞌaparap hap iꞌauka hamo maꞌato yt taꞌatupuẽti i.
56 Miꞌi pote heso rakaria yn naꞌyn henoi ikuasa hap itote maꞌato yt iꞌewy i raꞌyn taꞌatuhenoi saꞌag.
57 Miꞌi hawyi ikuasa haria wẽtup ok wẽtup ok iꞌatupoĩꞌam taꞌatuehay hamo.
58 -Yt naku i miꞌi iꞌatuꞌe katupono watikuap iꞌe hap. --Pyno Tupana motypot yat atimoma raꞌyn wen maꞌato myẽꞌym eꞌat pe hawyi atunug iraꞌyn yt miitꞌin po wo i toꞌe saꞌag iꞌatuꞌe.
59 Maꞌato yne iꞌatuꞌe hap koꞌi yt toꞌoꞌewy i taꞌatuhenoi.
60 Miꞌi hawyi ipoĩꞌam naꞌyn paꞌi akag koro apo toꞌe Iesui piat hamo -Taꞌatuhenoi kahato eminug yt naku i hap koꞌi maꞌato yt kat ereꞌe i e. Etiꞌatuwesat ro pywo apo taꞌatuhenoi sio yt e.
61 Maꞌato ipoꞌinik neꞌi raꞌyn Iesui. Yt kat e i hawyi paꞌi akag i raꞌyn apo e tope -En apo Tupana Mipoꞌoro Miitꞌin Porekuat nuat sio yt e. En apo Tupana Wakuat Sese rakat Saꞌyru e.
62 Miꞌi hawyi ti Iesui tiwesat -Taꞌi Uito Miꞌi Miit eꞌe hap ewy e. Meiũran ti aru eweiꞌakasa Uito Miitꞌin Ykeꞌet Tupana hesaika poꞌog nakat po sese kai apyk pe e. Taꞌi eweiꞌakasa ti aru uhuut turan atipy kaipyi ywyhig kytsig me e.
63 Mio tã e Iesui pote paꞌi akag koro totat tesokpe hawyi toihiot raꞌyn topyꞌahak Iesui etiat moherep hap hawyi toꞌe -Pyno yt watikyꞌesat i poꞌog miitꞌin ehay Iesui etiat meiũpe katupono iwẽ pyi yne ahehamo yt naku i mio tã e saꞌag ihay e.
64 Miꞌi hawyi iraniaꞌin tiwesat -Pywo mio watikuap taꞌyn aikotã ihay saꞌag hap etiat iꞌatuꞌe. Kat som waku watunug e. Teꞌeruwanetup hawyi -Pywo waku watiꞌauka iꞌe hap upi iꞌatuꞌe.
65 Miꞌi hawyi iraniaꞌin kuitu iꞌatuꞌe Iesui ete hawyi iraniaꞌin ihahik iꞌahyk ahyk hamo hawyi teꞌeroꞌe -Etikuap yne pote uwe mio eꞌahyk ahyk apo iꞌatuꞌe Iesui pe. Iꞌewyte suraraꞌin howa petek tuereto Iesui piit ete.
66 Miꞌi turan Peteru toineꞌen oken note aria kupyke tuwemope turan ni wẽtup paꞌi koro emiit haryporia tuut.
67 Miꞌi taꞌakasa Peteru kape aria kupyke hawyi tehaꞌat hawyi toꞌe -Are an worokuap en tawa Nasare piat Iesui emiit keĩ en e.
68 Maꞌato Peteru toꞌe -U paĩ yt atikuap i kat ereꞌe mana e. Miꞌi hawyi Peteru toto kurara eꞌokenꞌypy wato kape.
69 Haryporia taꞌakasa Peteru kape iraꞌyn hawyi toꞌe i -Pywo miꞌi ti meiũ Iesui emiit e.
70 Maꞌato Peteru iraꞌyn -Yt uito i rat e. Meiũran iꞌyatypiaria iꞌewyte teꞌeroꞌe -Pywo En ni wẽtup ok hemiit katupono tama Karireia kaipywiat en iꞌatuꞌe.
71 Maꞌato Peteru tiwesat -Yt uheso i ti. Uheso pote waku raꞌyn Tupana uhatyꞌi hatyꞌi e. Pywo rat yt atikuap i Miꞌi Miit Iesui ti rat e Peteru.
72 Mio tã e hawyi ihay raꞌyn mekewat waipaka. Miꞌi pote Peteru iwatetup Iesui ehay saꞌawyꞌi wuat kape -Waipaka ehay typuat hap owakai te --Yt atikuap i Miꞌi Miit ereꞌe aru uhepiat myẽꞌym mo iraniaꞌin me e Iesui Peteru pe saꞌawyꞌi. Miꞌi Iesui e hap kape iwatetup Peteru teso hap kape hawyi tuwak kahato haty wo tuwemoti kahato haype.
