Maku 15:1-47
15 Miꞌi hawyi hunete aat wẽtem hawyi meremo teꞌeruwaꞌatunug paꞌi wato koꞌi nagnia miwan enoi haria yne yne iraniaꞌin woꞌonapin saꞌag haria wywo i raꞌyn teꞌeruwaꞌatunug. Miꞌi hawyi toꞌope toꞌoehay aikotã aikotã waku Iesui ete taꞌatunug hap koꞌi ete. Miꞌi hawyi taꞌatupoꞌi poꞌi hawyi taꞌatuereto hawyi taꞌatuium morekuat Piratu kape.
2 Miꞌi hawyi morekuat apo apo e Iesui pe -En apo Iuteu ywania Porekuat e. Miꞌi hawyi Iesui tiwesat -Pywo eꞌe hap ewy e.
3 Miꞌi hawyi paꞌi wato koꞌi tikuasa kahato raꞌyn Iesui.
4 Miꞌi hawyi morekuat Piratu apo e i Iesui pe -Ekuasa kahato miꞌiria Uhyt e. Yt kat ereꞌe i apo etiꞌatuwesat e.
5 Maꞌato yt kat e i poꞌog Iesui. Miꞌi pote morekuat tuwanetup kahato -Kat poteĩ yt toiꞌatuwesat i e tuwanetup hawe.
6 Yne 12 ewaty eꞌat pe ienuk hap eꞌat pe morekuat tiporenotem wẽtup ok woꞌopyhik hap wyi miitꞌin mikyꞌesat ewy.
7 Mekewat ewaty pe toineꞌen morekuat woꞌopyhik hawe wẽtup ok yt naku i rakat Parapa e hap. Miꞌi ti morekuat tipyhik saꞌawyꞌi katupono woꞌohoiro hap tote toiꞌauka wẽtup ok miit.
8 Miꞌi hawyi teꞌeruwaꞌatunug morekuat kape miitꞌin hawyi taꞌatuhẽtup -Morekuat etiporenotem i ro emipyhik wẽtup ok iꞌatuꞌe.
9 Miꞌi hawyi Piratu tiwesat -Eweikyꞌesat apo pyno atiporenotem eiꞌywania Porekuat Iesui hap e.
10 Mio tã e Piratu iꞌatuepe paꞌi akag koꞌi moweukaꞌi hamo katupono Piratu tikuap paꞌi koꞌi Iesui auka teran iꞌatupyꞌahak kahato hete miitꞌin miat ikyꞌe pote iꞌatuhayꞌywyi pote.
11 Miꞌi hawyi paꞌi akag koꞌi teꞌeroꞌe waꞌatunug haria pe -Pyno Parapa waku etiporenotem waku eweiꞌe iꞌatuꞌe itotiaria pe. Miꞌi hawyi -Yt etiporenotem neiꞌo Miꞌi Miit Iesui maꞌato etiporenotem emipyhik Parapa iꞌatuꞌe Paꞌi akag koꞌi mienoi ewy iꞌatuꞌe morekuat Piratu pe
12 Miꞌi hawyi Piratu toꞌe -Kat aru pyno atunug Eiꞌywania Porekuat ete e.
13 Miꞌi hawyi taꞌatuwesat taꞌatuehay pirik wo -Eweiꞌauka ro eweiꞌauka ro iꞌatuꞌe.
14 Miꞌi pote Piratu apo e -Kat poteĩ kat som tutunug yt naku i e. Miꞌi hawyi teꞌeroꞌe i poꞌog haty wo -Eweiꞌauka ro iꞌatuꞌe.
15 Miꞌi hawyi miꞌiria mowepiit hamo morekuat Piratu tiporenotem Parapa woꞌopyhyp hawyi. Miꞌi hawyi toipoꞌoro Iesui ipok pok hamo hawyi tutum tesuraraꞌin me ariaꞌyp posak etiat iꞌauka hamo.
Iesui Toineꞌen Suraraꞌin Miꞌahyk Ahyk Hamuat
16 Miꞌi hawyi suraraꞌin tioto Iesui aikope morekuat mipyhik haria satyꞌi satyꞌi hamuat hap kape. Miꞌi tote hawyi hereto haria tiꞌatukay kay iraniaꞌin suraraꞌin koꞌi Iesui moweukaꞌi hamo.
17 Miꞌi hawyi taꞌatupag Iesui piit pe sokpe hupꞌi morekuat ewy. Miꞌi hawyi taꞌatupiꞌig morekuat eꞌamatap maꞌato hu kawiat neꞌi. Miꞌi hawyi taꞌatupag iꞌakag me taꞌatumikyryꞌi hap.
18 Miꞌi hawyi teꞌeruwẽpowat taꞌatumikyryꞌi hap -Wakuat wakuat En Iuteu ywania porekuat iꞌatuꞌe saꞌag imohit hap neꞌi maꞌato.
19 Miꞌi hawyi teꞌeropoityk pina wyꞌyp koꞌi wo iꞌakag ete hawyi kuitu iꞌatuꞌe tuwete hawyi teꞌeruwepỹꞌãtutuk taꞌatumotypot yt pywo pe i hamo.
20 Taꞌatumikyryꞌi kahu hawyi taꞌatuhep i raꞌyn taꞌatumipag sokpe hupꞌi morekuat ewy hap hawyi taꞌatupag iwat hesokpe sese i raꞌyn. Miꞌi hap tote pyi taꞌatuereto ariaꞌyp posak etiat iꞌauka hamo.
Taꞌatuꞌauka Raꞌyn Iesui
21 Miꞌi hawyi muap upi Simau yi Sireneu kaipywiat mekewat Aresãtere ywot Huwu ywot tuut toko kaipyi. Miꞌi hawyi tokosap hawyi suraraꞌin teꞌeroꞌe tope -Etipowyro ro Iesui heꞌariaꞌyp posak ereto hap ete iꞌatuꞌe mekewat Simau me.
22 Miꞌi hawyi taꞌatueroto Iesui Iꞌakag Kag e hap eꞌyityꞌok kape maꞌato Iesui pusu puo Koukota e hap kape.
23 Putꞌok taꞌatuꞌe hawyi taꞌatuium neran Iesui pe mohag Mira e hap Uwa hy Mira puo haty monik hamo maꞌato yt tutuꞌu i.
24 Miꞌi hawyi taꞌatuhep i raꞌyn hesokpe hawyi taꞌatupehik taꞌyn ariaꞌyp posak ete hawyi teꞌeruwemahara raꞌyn aikotã waku hesokpe taꞌatupatꞌok patꞌok hamo toꞌope.
25 Miꞌi hawyi ihatꞌok poꞌog naꞌyn hawyi taꞌatupehik taꞌyn ariaꞌyp posak ete.
26 Miꞌi hawyi toineꞌen miwan kat pote Iesui auka hap enoi hap ariaꞌyp posak tote. Miꞌi ti henoi miitꞌin me -Miꞌi Miit Iuteu Ywania Porekuat e.
27 Iꞌewyte typy ok iwywo taꞌatupehik iꞌatueꞌariaꞌyp posak ete seroꞌok e haria miitꞌin atuuka haria ipo ran kai ipo sese kai.
28 -Yt nakuaria i pyꞌasetpiat ikuꞌuro pote Miꞌi Miit iꞌewyte yt naku i teꞌeruwanetup hawe e Tupana ehay moherep hat Isaia tomiwan 53.12 pe.
29 Miꞌi hawyi gosap haria teꞌeruwemokoꞌi mokoꞌi howawi taꞌatuehay mikyryꞌi tuwete -Meiẽ Tupana motypot yat ok hytpun hat hawyi myẽꞌym eꞌat piat yn inug pakup i hat iꞌatuꞌe.
30 -Erehakyeraꞌat ro iꞌatuꞌe. Eraꞌapyk to eꞌariaꞌyp posak pyi iꞌatuꞌe.
31 Iꞌewyte paꞌi watoria miwan enoi haria toꞌokyryꞌi tuete -Taꞌi iraniaꞌin ni toiꞌatuehakyeraꞌat kuap maꞌato tuwewi ti yt tuwehakyeraꞌat kuap hin i iꞌatuꞌe.
32 Miꞌi hawyi teꞌeroꞌe taꞌatuehay mikyryꞌi hap wywo Iesui pe -Pyno En Tupana Mipoꞌoro Aiporekuat nuat pote waku eraꞌapyk to ariaꞌyp posak tote pyi iꞌatuꞌe. Taꞌi eꞌapyk hap ariaꞌyp posak pyi urutaꞌakasa pote ti aru uruimohey raꞌyn En yt pote yt iꞌatuꞌe Iesui pe imoweukaꞌi haype. Miꞌi hawyi iꞌyatypiaria mipehik koꞌi teꞌeroꞌe yt naku i tope iraniaꞌin ehay ewy.
Iesui Ikuꞌuro Sese Raꞌyn
33 Atposake hawyi aat minꞌe hap kape iꞌypyryp kahato wãtym ewy raꞌyn yne mesuwat yi tote topyhuꞌat.
34 Myẽꞌym ura hawyi Iesui iwẽpapꞌi tehay pirik wo -Uhetupana Uhetupana kat pote uiꞌatoiat En e. Maꞌato topusu puo toꞌe -Erui Erui irama sapatani e.
35 Miꞌi hawyi sehaꞌat haria teꞌeroꞌe -Meiẽ toikay kay saꞌawyꞌi wuat aseꞌi Eria topowyro hamuat iꞌatuꞌe.
36 Miꞌi hawyi wẽtup ok teput amukiusu ap ewywuat kape hawyi toipoꞌi pina wyꞌyp ãpo ete hawyi toipuka ihy haiug nakat pe. Miꞌi hawyi tutum Iesui pe ihy sym hamo. Miꞌi hawyi toꞌe iraniaꞌin me -Apuete toꞌiro watehaꞌat sio Eria tuut imoꞌapyk ariaꞌyp posak pywiat hamo sio yt e.
37 Miꞌi hawyi Iesui kak e haty wo hawyi ipyhu tekꞌe raꞌyn ikuꞌuro sese raꞌyn.
38 Miꞌi hawyi Tupana motypot yat wato eꞌokenhyp wato sokpe iꞌanam kawiat miitꞌin pyhyp hap Tupana kapiat hap hiotꞌe raꞌyn atipy kaipyi okenꞌypy yi kape.
39 Miꞌi hawyi surara akag Iesui owa kaipyi taꞌakasa yne aikotã Iesui ikuꞌuro hap hawyi toꞌe -Pywo rasig Meiẽ Ihainia ti Tupana Saꞌyru sese e.
40 Tukupteꞌen itote haryporiaꞌin tawa Ierusarẽi kaipywiaria teꞌeraꞌakasa pya pyi Iesui auka hap kape. Miꞌi haria pyꞌasetpe tukupteꞌen mana Sarume mana Maria Matarena hawyi Sarume hawyi mana Maria Iuse ty iꞌewyte Tiaku ty. Tiaku Iuse saꞌyru iwatꞌypꞌi toineꞌen.
41 Miꞌiria saꞌawyꞌi Iesui ieineꞌen tama Karireia piat turan tuwat Iesui upi heropat hamo. Yt miꞌiria yn i maꞌato iꞌatu haryporia tõꞌẽ Iesui upi Ierusarẽi kape. Miꞌi pote tukupteꞌen itote mekewat eꞌat pe iꞌauka hamuat turan.
Taꞌatusyp Taꞌyn Iesui
42 Tupana motypot hap eꞌat owakai te wãtymꞌi naꞌyn pote taꞌatunug neran yn waku raꞌyn yt Iuteu ywania yt ipotpap i hap eꞌat owakai.
43 Miꞌi pote wãtymꞌi turan pote Iuse tawa Arimateia kaipywiat tiꞌasyp teran naꞌyn Iesui piit meremo aat minꞌe hap yian mete. Iuse ti Iuteu ywania atunapin hat akag waku sese rakat. Miitꞌin mimotypotno Iuse. Miꞌi ti hekatup kahato karamuo Morekuatno Tupana tuut hap eꞌat. Miꞌi ti toto morekuat Piratu kape Iesui piit ẽtup hamo hyp hamo.
44 Miꞌi hawyi morekuat Piratu tuwanetup -Ikuꞌuro raꞌyn koity puo yt paĩ e tuwanetup hawe. Miꞌi pote toikay kay tesurara akag hawyi apo e tope -Ikuꞌuro raꞌyn apo Iesui sio yt e.
45 Miꞌi hawyi toiwesat -Taꞌi ikuꞌuro sese raꞌyn e. Miꞌi pote morekuat tum naꞌyn Iuse pe Iesui piit.
46 Miꞌi hawyi Iuse toto sokpe kytꞌi kype kyiꞌat hamo. Miꞌi hawyi toimoꞌapyk Iesui piit ariaꞌyp posak pyi. Miꞌi hawyi tohuwy ipiit mekewat sokpe kype kytꞌi wo. Miꞌi hawyi totopag ipiit woꞌosyp pakup we nu kaꞌa pe. Miꞌi hawyi tohoꞌokenhyp taꞌyn nu wato wo raꞌyn.
47 Miꞌi turan Mana Maria Matarena mana Maria Iuse ty teꞌeraꞌakasa yne Iesui syp hap aikopiat hyp hap.
