Maku 3:1-35
3 Miꞌi hawyi Tupana motypot hap eꞌat pe Iesui teke i Tupana ehay enoi hawe. Miꞌi hawyi itotiaria wywo toineꞌen ipo kĩꞌã rakat.
2 Miꞌi hawyi teꞌeruwanetup -Iesui timoehãite apo ipo kĩꞌã rakat yt aipotpap i hap eꞌat pe. Miꞌiria teꞌerahaꞌat kahato Iesui kape ikuasa te hamo.
3 Miꞌi hawyi Iesui tikay kay tuwewowi ipo kag motꞌi rakat -Uhytꞌi eriot ro meikowo e. Epoĩꞌam no meiũpe miitꞌin pyꞌasetpe e.
4 Miꞌi hawyi toꞌe Iesui itotiaria pe -Koran wyti Tupana motypot hap eꞌat e. Miꞌi pote apo are ehepe waku som mesuwat eꞌat pe wakuap watunug sio apo yt naku i e. Waku apo mesup eꞌat pe watunug miitꞌin kyꞌe hap sio miitꞌin atuuka hap watunug e. Miꞌi hawyi maꞌato yt taꞌatuwesat hin i Iesui atunik neꞌi raꞌyn.
5 Miꞌi pote Iesui ipyꞌahak iꞌatupyꞌa heg nakaria ete maꞌato paa e hap wywo katupono yt imohey haria hin i tukupteꞌen. Miꞌi hawyi toꞌe i ipo kĩꞌã rakat pe -Erepotorok to uhyt e. Miꞌi hawyi toitorok taꞌyn hawyi ipo kokawiat ewy raꞌyn.
6 Miꞌi hawyi nagnia ehay enoi haria tuwat raꞌyn Iesui yatype pyi. Miꞌi hawyi tuwat raꞌyn morekuat Eroti esuraraꞌin kape. Miꞌi hawyi miꞌiria wywo taꞌatukat aikotã waku Iesui auka hamuat hap.
7 Miꞌi hawyi Iesui toto raꞌyn topotmuꞌeria wywo tawa Karireia hyemyiꞌa kape. Miꞌi hap upi typyꞌi kahato miitꞌin tuwat hupi tawa Karireia kaipywiaria.
8 Miitꞌin tawa Iuteu kaipywiaria Itumeiꞌa kaipywiaria iꞌewyte Ierusarẽi kaipywiaria iꞌewyte Iutãu hy sakpo puaria tuwat Iesui kape. Iꞌewyte iraniaꞌin Tawa Tiro kaipywiaria hawyi tawa Sitau kaipywiaria putꞌok iꞌatuꞌe Iesui ete. Taꞌatukuap yne raꞌyn iminug koꞌi etiat pote.
9 Miꞌi hawyi miitꞌin iꞌatu pote Iesui toꞌe temiitꞌin me -Eweterut ro meikowo yara katupono ti miitꞌin uiꞌakit kuap neꞌi raꞌyn e.
10 Iesui toiꞌatumoehãite raꞌyn iꞌatu rakaria pote putꞌok iꞌatuꞌe poꞌog kahato raꞌyn wuatꞌi miitꞌin iꞌahuu rakaria. Miꞌi pote miitꞌin typyꞌi kahato raꞌyn hemig teran haria.
11 Iꞌewyte maꞌãu saꞌag koꞌi ipiit piat rakaria tõꞌẽ Iesui ewowi. Miꞌi hawyi teꞌerehaꞌat Iesui kape hawyi ahiag koꞌi kak iꞌatuꞌe. Taꞌatuewo yi kape raꞌyn Iesui yatype hawyi taꞌatuehay pirik wo -Tupana saꞌyru ti en iꞌatuꞌe.
12 Miꞌi pote Iesui waĩꞌe ahiagnia pe -Eipoꞌinik to e. Yt ewehenoi teiꞌo eimikuap uwe Uito hap e Iesui ahiagnia pe.
Iesui Tiꞌairo Raꞌyn Topotmuꞌeria
13 Miꞌi tote pyi Iesui taꞌam naꞌyn yityꞌok tote. Miꞌi tote pyi toiꞌatukay kay temiitꞌin towywuat ieineꞌen haria
14 Miꞌi hawyi 12 ok takaria toiꞌatuꞌairo temiitꞌin sese wo tehay moherep wuatꞌi puat hamo.
15 Miꞌi hawyi toꞌe 12 ok takaria pe -Eweikupteꞌen miitꞌin muꞌe hamo uhehay henoi hamo. Iꞌewyte atum ehepe ehesaika hap ahiag miit piit pywiat sopo hamo e.
16 Saꞌawyꞌi toiꞌairo Simau. Miꞌi hawyi tutum het pakup Simau me Peteru Nu e.
17 Miꞌi hawyi toiꞌairo Tiaku hawyi Iuwãu Sepeteu saꞌyruꞌin Miꞌi hawyi miꞌiria pe Iesui tum iꞌatuset pakup Ipuehay rakaria huru huruꞌe e hap ewy e maꞌato Iesui pusu puo Puaneke e.
18 Miꞌi hawyi toiꞌatuꞌairo temiitꞌin Ãtere hawyi Wiripi hawyi Patorumeu. Miꞌi hawyi toiꞌairo Mateu hawyi Tume. Miꞌi hawyi toiꞌairo Tiaku Auweu saꞌyru hawyi Tateu hawyi Simau. Miꞌi ti toineꞌen hesaika rakat kat kat koꞌi nug hamuat ete.
19 Miꞌi hawyi wẽtup te Iesui tiꞌairo Iuta Ikarioti. Miꞌi ti meiũran Iesui maꞌat hatno topyhuꞌat.
20 Miꞌi hawyi Iesui taꞌaipok i raꞌyn yityꞌok kaipyi netap kape towyriaꞌin wywo. Miꞌi hawyi teꞌeruwaꞌatunug kahato i raꞌyn hewowi typyꞌi kahato. Miꞌi pote yt teꞌerenuk kuap i.
21 Miꞌi hap ti iꞌywytꞌin tikuap taꞌyn hawyi teꞌeroꞌe toꞌope -Meiẽ Aheykeꞌet Iesui wyti hesoꞌok taꞌyn yt tenuk i pote iꞌatuꞌe toꞌope. Miꞌi hawyi tuwat raꞌyn Taꞌatuykeꞌet Iesui enotem hamo. Waku watioto i aiꞌyat kape kat pote ti hesoꞌok taꞌyn iꞌatuꞌe.
22 Iꞌewyte miwan enoi haria Ierusarẽi kaipywiaria toꞌoehay toꞌope -Taꞌi watikuap taꞌyn Iesui hepap ahiag porenotem miitꞌin pywiat hap iꞌatuꞌe. Taꞌi ahiagnia porekuat aipusu puo Pesepu toineꞌen Iesui piit pe pote toiꞌatupoꞌoro kuap ahiagnia saꞌag iꞌatuꞌe toꞌope.
23 Miꞌi pote Iesui tiꞌatukay kay miitꞌin tuwewowi hawyi iꞌãꞌãkap wuo toꞌe iꞌatuepe -Aikotã som ahiag porekuat tiꞌatusopo kuap ahiagnia temiitꞌin sese miitꞌin piit pyi e.
24 Yt aikotã kuap i wyti ren e. Katupono yt karãpe i tuwesopo kuap miit piit pyi ahiag e. Katupono karãpe wẽtup setama pe miitꞌin tuꞌuka tuꞌuka toꞌope meiũran ti mekewat setama pe yt uwe i raꞌyn topyhuꞌat e. Kat pote toꞌoꞌatoiat yne yne e yt kat i woꞌowese hap itote pote e.
25 Iꞌewyte ti karãpe miitꞌin wẽtup yat pe tuꞌuka tuꞌuka toꞌope meiũran ti yt uwe i raꞌyn topyhuꞌat mekewat yat pe toꞌoꞌatuꞌuka pote e.
26 Miꞌi hap ewy kahato karãpe ahiag tuꞌuka toꞌope hawyi meiũran toꞌomoma yne raꞌyn e.
27 Iꞌewyte seroꞌok e hat yt teke kuap i wẽtup ok hesaika rakat yat pe hekareꞌen eroꞌok hamo e. Maꞌato saꞌawyꞌi toipoꞌi poꞌi hesaika rakat miꞌi hawyi ti toteroꞌok kuap hekareꞌen e.
28 Pywo ti areꞌe ehepe yne miitꞌin iꞌatuehay saꞌag yt nakuat i sese Tupana tomohãpyk kuap e.
29 Maꞌato miitꞌin iꞌatuehay saꞌag Tupana Paꞌãu uhetiat tohenoi pote miꞌi iꞌatuehay hap Tupana yt timohãpyk kuap i. Miitꞌin iꞌatuehay saꞌag Tupana Paꞌãu kape yt karãpe i Tupana timoweityk kuap e. Miꞌi e hat wuatꞌi eꞌat piat Tupana miꞌapiheg wuatnuat topyhuꞌat e Iesui.
30 Iesui toꞌe mio tã e katupono Iesui ete teꞌeroꞌe -Paꞌãu saꞌag toineꞌen Iesui piit pe iꞌatuꞌe pote.
Iesui Emiitꞌin Sese Putꞌok E Raꞌyn
31 Miꞌi turan putꞌok iꞌatuꞌe Iesui ywytꞌin ity wywo Taꞌatuykeꞌet ereto tawa Nasare kapiat hamo. Miꞌi hawyi typyꞌi kahato Iesui apypueri wo pote ityꞌin yt tuwehytꞌok kuap i Iesui ewowi. Miꞌi pote sehay taꞌatupoꞌoro Iesui kay kay hamo oken kape ipotmuꞌeria pyꞌasetpyi.
32 Miꞌi hawyi Iesui apypueri haria henoi tope -Urumuꞌe hat ety eꞌywytꞌin eiywytꞌin ekay kay oken kape iꞌatuꞌe.
33 Miꞌi hawyi Iesui tiꞌatuwesat -Uweĩ uity e uweĩ uheꞌywytꞌin e uweĩ uheinytꞌin e.
34 Miꞌi hawyi tehaꞌat taꞌapypueri haria kape tomohey haria kape hawyi toꞌe
35 -Meiũpe ti uity uheꞌywytꞌin uheinytꞌin e. Katupono Tupana ehay pe pywo e haria wyti uheꞌywytꞌin uheinytꞌin uityꞌin e. Uiꞌywot mikyꞌesat nug haria eipe pote Uheꞌywytꞌin uheinytꞌin uityꞌin wo eweipyhuꞌat e Iesui taꞌapypueri haria pe.
