Maku 4:1-41
4 Miꞌi hawyi Iesui toto i raꞌyn yi Karireia hyemyiꞌa eꞌyikytꞌok upi miitꞌin atumuꞌe hamo. Miꞌi hap tote typyꞌi rakaria teꞌeruwaꞌatunug hewowi. Miꞌi hawyi Iesui teke yara pe hawyi taꞌapyk yara pe yowa tote pywiat miitꞌin atumuꞌe hamo. Miꞌi pykai miitꞌin yi kyt upi tukupteꞌen.
2 Miꞌi hawyi tohenoi henoi sehay iãꞌãkap wuo iꞌatuepe.
3 -Eweiwanetup kahato o e. Wẽtup eꞌat pe so hãꞌỹi sytpok hat toto toko kape hãꞌỹi sytpok hamo e.
4 Putꞌok toꞌe raꞌyn go totiat hawyi tohytpok taꞌyn hãꞌỹi toko pe maꞌato yt yne i hãꞌỹi hewo go sese tote. Iraniaꞌin so hãꞌỹi hewo go puꞌap upi. Miꞌi koꞌi ti weitaria tuꞌu neꞌi e.
5 Maꞌato iraniaꞌin hãꞌỹi ti hewo yi hit nu totiat rote. Miꞌiria hẽtyt porapꞌi hap ewy. Yi yt pya hin i pote.
6 Miꞌi ti meremo hẽtyt maꞌato meiũran aat hakup hawyi ti ikuꞌuro raꞌyn itotiat hapo yt toto kuap i yi piit kapiat pote e.
7 Miꞌi hawyi so iraniaꞌin hãꞌỹi hewo tuereto iꞌanam me e. Miꞌi koꞌi so hẽtyt wen maꞌato iꞌanam wywo toꞌoꞌewy neꞌi. Miꞌi pote meiũran iꞌanam tohik neꞌi raꞌyn hawyi yt tuwenug i raꞌyn e.
8 Maꞌato iraniaꞌin hãꞌỹi yi wakuat rote go sese tote hewo e. Miꞌiria ti hẽtyt meremo hawyi ihãite kahato hawyi haat kahato e. Miꞌi koꞌi kaipyi toimorania haat koran koran iãꞌỹi hawyi toipuẽti 30 saka. Wẽtup sat kaipyi toipuẽti 60 saka. Wẽtup kaipyi 100 saka hap ewy e.
9 Uhytꞌiꞌin Manaꞌin ehewaure kaꞌa pote eweikuap to kat som areꞌe teran eimuꞌe hap uhehay iãꞌãkap wuo hap e Iesui yẽpe upiaria pe.
10 Tuwat porap i raꞌyn yne miitꞌin hawyi iwyriaꞌin 12 ok takaria apo iꞌatuꞌe Iesui pe -Urumuꞌe hat kat som ehenoi teran mekewat iãꞌãkap wua iꞌatuꞌe Iesui pe.
11 Miꞌi hawyi Iesui tiꞌatuwesat -Taꞌi uiwyriaꞌin ahenoi teran ehepe wuatꞌi mikuap yt heremo i aikotã Tupana topyhuꞌat irane Miitꞌin Porekuatno hap etiat e. Maꞌato iraniaꞌin me pya aikawiat haria pe yt uimohey teran i haria pe ahenoi teran sehay iãꞌãkap wuo e.
12 Miꞌi tupono uhehamo maꞌato yt taꞌatukuap i kat areꞌe sese hap miꞌiria e. Teꞌeraꞌakasa yne maꞌato yt heremo i rakat e. Miꞌi pote yt karãpe i teꞌeraꞌaipok Tupana kape taꞌatumohãpyk Tupana piat hamo e.
13 Pyno yt eweikuap apo mesuwat sehay iãꞌãkap wuo iꞌewyte yt eweikuap iraniaꞌin uimienoi iãꞌãkap ewywuaria apo e topotmuꞌeria pe.
14 Pyno mekewat iãꞌỹi sytpok hat ti Tupana ehay moherep hat e.
15 Miꞌi hawyi mekewat go puꞌap ẽpe upiat ti hewo. Miꞌiria tote hawyi Tupana ehay hewo mikoi hãꞌỹi ewy maꞌato taꞌatukuap saꞌag hawyi meremo ahiag tihep teꞌen teꞌen iꞌatupyꞌa pyi Tupana ehay e.
16 Iꞌewyte ti mekewat iãꞌỹi nu totiat ti taꞌatuwanetup hawyi meremo iꞌatuwepiit waku kahato taꞌatupuẽti e.
17 Maꞌato yt taꞌatusopo i pote yt toineꞌen motꞌi e. Meiũran iraniaꞌin miat taꞌatusatyꞌi satyꞌi Tupana ehay mohey iꞌatuꞌe piat pote sio yt naku i hap koꞌi putꞌok iꞌatuete pote meremo taꞌatuꞌatoiat Tupana ehay e. Saꞌawyꞌi iꞌatuwepiit kahato maꞌato iraniaꞌin toꞌokyryꞌi e i hawyi meremo taꞌatuwaure raꞌyn e.
18 Iꞌewyte ti mekewat hu ypia piat ewy toineꞌen e. Miꞌiria teꞌeruwanetup Tupana ehay kape.
19 Maꞌato meiũran hawyi teꞌeruwanetup taꞌatupotpap iwato hap kape taꞌatuekareꞌen iwato hap kape. Taꞌatumikyꞌesat wuatꞌi hap kape yn teꞌeruwanetup hawyi Tupana ehay wehik hamuat topyhuꞌat hu koꞌi ewy.
20 Miꞌi pote Tupana ehay yt tuwenug i e. Maꞌato mekewat yi wakuat upiat ti wẽtup ok wẽtup ok wanetup haria ewy e. Saꞌawyꞌi taꞌatuwanetup Tupana ehay kapiat hawyi taꞌatukyꞌesat kahato. Miꞌiria tuwenug naꞌyn e. Taꞌi aikotã wẽtup ok 30 saka hap ewy saꞌawyꞌi wuat wẽtup saka ewy toikoi hawyi. Miꞌi hawyi wẽtup ok 60 saka hap ewy tomikoi kaipyi toipuẽti hawyi wẽtup ok 100 saka hap ewy raꞌyn toipuẽti. Miꞌiria Tupana ehay pywo iꞌatuꞌe pote tuwenug kahato raꞌyn iꞌatuieineꞌen hap tote e Iesui topotmuꞌeria pe.
Iãꞌãkap Enoi Hap Ariãty Hap Etiat
21 Miꞌi hawyi Iesui henoi wẽtup iãꞌãkap sehay tekatuwyriaꞌin me -Wãtym mote wyti miitꞌin topag ariãty ywaiti heiam note taꞌatupag hẽtyhot hamo e. Maꞌato yt uwe i ariãty ipag neran yrysakag ywytꞌokpype e. Yt naku i miꞌi tã. Iwat heiam me yn waku ariãty e. Heiam me hawyi yne heremo raꞌyn.
22 Katupono meiũran imierewyi tuwemoherep e iꞌewyte huwy piat meiũran heremo aikotã ariãty timoherep yne hap ewy.
23 Ehewaure kaꞌa pote eweikuap to uiwyriaꞌin e Iesui tomohey haria pe.
24 Eweiwanetup to sehay kape e. Katupono eweikuap kahato hawyi poꞌog naꞌyn eiwatno topyhuꞌat eimikuap wo e.
25 Uwe uwe uhehay kape teꞌeruwanetup kahato pote miꞌiria kape poꞌog taꞌatukuap. Maꞌato mekewaria yt teꞌeruwanetup teran i uhehay kape pote kat som iꞌatumikuap koꞌi tuweityk taꞌyn e.
Iãꞌãkap Enoi Hap Iãꞌỹi Koꞌi Etiat
26 -Taꞌi miꞌi tã ti Tupana topyhuꞌat irane Miitꞌin Porekuat no aikotã hãꞌỹi koi hat ewy ti aru e.
27 Saꞌawyꞌi toikoi hawyi tuwewi hẽtyt raꞌyn maꞌato ikoi hat toineꞌen toꞌyat pe turan miꞌi hẽtyt raꞌyn e. Miꞌi hawyi itag naꞌyn miꞌi hawyi haat raꞌyn maꞌato ikoi hat yt uwe i itote pykai iꞌewyte yt taꞌakasa hin i aikotã itag hap kape pykai e.
28 Taꞌi mekewat aat esaika hap upi mekewat iãꞌỹi tuwemoehãite raꞌyn tuwewi e. Mekewat go koi hat yt uwe i turan hẽtyt raꞌyn tuwemotag naꞌyn haat raꞌyn tuwewi e.
29 Waku yne hawyi toiterek kyseꞌyp wo e. Pywo waku raꞌyn hawyi go terek hap eꞌat putꞌok e raꞌyn e.
30 Miꞌi hawyi Iesui henoi poꞌog naꞌyn wẽtup iãꞌãkap sehay towyriaꞌin me -Are paĩ aikotã Tupana topyhuꞌat Miitꞌin Porekuatno. Miꞌi hap ete ahenoi teran ehepe sehay iãꞌãkap wuo e.
31 Taꞌi eimikoi iãꞌỹi kurin kat Mutata poꞌog kurin yne iãꞌỹi kai miꞌi e.
32 Eweikoi yi pe hawyi hẽtyt hawyi meremo topyhuꞌat itag iꞌyp e. Ywaiti raꞌyn hawyi weitaria teꞌeruwesoknug naꞌyn haga tote iꞌyhop og me.
33 Miitꞌin me Iesui henoi henoi kahato sehay hãꞌãkap wuo yn tohenoi yt iꞌatumikuap wuo i.
34 Yne Iesui miitꞌin muꞌe hap koꞌi iãꞌãkap wuo yn tohenoi maꞌato tuweran hawyi topotmuꞌeria sese pe tohenoi sese kat e kat e tohenoi hãꞌãkap wuo hap.
35 Mekewat eꞌat pe aat minꞌe turan Iesui toꞌe -Toꞌiro ysakpo uhytꞌiꞌin mesuwat yara puo e.
36 Miꞌi hawyi toto raꞌyn topotmuꞌeria wywo ysakpo yara puo maꞌato ipatꞌok iraniaꞌin tuwat hupi hewatꞌypmo yara koꞌi puo.
37 Miꞌi hawyi tuwat turan ywytu kahato raꞌyn ywytu uato kahato raꞌyn. Miꞌi hawyi yꞌy teke teke raꞌyn iꞌatueꞌyara pe.
38 Miꞌi turan Iesui toket neꞌi raꞌyn yara etuꞌa pe toꞌakag pysop tote. Miꞌi hawyi hemiitꞌin toꞌokakꞌi teꞌeraꞌapyꞌat irane ihy wato taꞌatueꞌyara piat pote. Miꞌi hawyi meremo teꞌeruwẽpowat taꞌatuehay pirik wo Iesui kape -Urumuꞌe hat erehymut ro iꞌatuꞌe. Yt urukyꞌe i apo En iꞌatuꞌe. Urutopap hamuat raꞌyn wyti iꞌatuꞌe min watoꞌe Uhyt iꞌatuꞌe Iesui pe.
39 Miꞌi hawyi Iesui ipoĩꞌam naꞌyn hawyi toꞌe ywytu uato pe ihy esaika rakat pe -Epoꞌinik to yꞌy e epohep to wasere e. Miꞌi hawyi meremo wasere ipohep hawyi yꞌy iꞌewyte ipoꞌinik taꞌyn. Miꞌi hawyi ihy nik kahato raꞌyn.
40 Miꞌi hawyi toꞌe towyriaꞌin me -Uhytꞌiꞌin e kat poteĩ eweikenꞌẽ uimohey haria eipe pykai e.
41 Miꞌi hawyi teꞌerokenꞌẽ poꞌog neꞌi hawyi apo iꞌatuꞌe toꞌope -Uweĩ miꞌi iꞌatuꞌe. Yt uwe i mesuwat yi tote Miꞌi Miit Iesui ewywuat iꞌatuꞌe. Taꞌi ywytu yꞌy tunug kahato Aimuꞌe hat Iesui mipoꞌoro ewy iꞌatuꞌe.
