Maku 5:1-43
5 Miꞌi hawyi Iesui hakpo temiitꞌin wywo yi Karireia hyemyiꞌa. Miꞌi hawyi putꞌok iꞌatuꞌe yi Kerasa wã tote teꞌeruwehik taꞌyn.
2 Miꞌi hawyi Iesui tuwẽtem yara pyi yi kape. Miꞌi hawyi putꞌok e hewowi ihainia ahiag ipiit piat rakat.
3 Miꞌi so nimo raꞌyn toineꞌen woꞌosyp hawe yt uwe i ipyhik kuap. Korente wo taꞌatuhãꞌãg ipyhik hamo wen maꞌato meremo toitek tek topoꞌi poꞌi hap.
4 Haꞌawyte raꞌyn karania wo neꞌi raꞌyn taꞌatupyhik woꞌopyhik hawe wen maꞌato so toipirik neꞌi topyhik hap koꞌi. Taꞌi korente wo topo koꞌi ete topy koꞌi ete taꞌatupyhik maꞌato toitek tek neꞌi. Miꞌi hawyi yt uwe i imoperupꞌi hamo topyhuꞌat.
5 Miꞌi tã ti mekewat ahiag ipiit piat rakat wãtym muo ihatꞌok puo miit syp hawe yityꞌok tote toineꞌen. Kak e kak e yityꞌok upi tuwewitwit nu koꞌi wo hawyi haty kahato raꞌyn tuwete.
6 Miꞌi turan so taꞌakasa Iesui kape pya pyi hawyi so teput raꞌyn. Miꞌi hawyi putꞌok e Iesui ete hawyi tuwepỹꞌãtutuk howa kape.
7 Miꞌi hawyi Iesui pe toꞌe tehay pirik wo -Kat som etunug neran uhete Iesui Tupana ywaiti piat Saꞌyru e. Yt atikyꞌesat uhatyꞌi uhatyꞌi hap e.
8 Miꞌi tã e katupono Iesui toꞌe raꞌyn paꞌãu saꞌag me -Erẽtem no meiũwat miit piit pyi e.
9 Miꞌi hawyi Iesui apo e mekewat miit piit piat ahiag me -Kat eĩ pyno ehet e Iesui ahiag me.
10 Mio tã e hawyi taꞌatuwesat -Isem e uruwat uruset Uhyt iꞌatuꞌe katupono urutypyi kahato uruto pote. Pyno yt urupoꞌoro teiꞌo pya meiũpe pyi Uhyt iꞌatuꞌe mekewat miit ahiagnia ipiit piat rakat wẽ pyi.
11 Miꞌi turan hamaut koꞌi typyꞌi rakaria tukupteꞌen mekewat yityꞌok tote teꞌerenuk hap tote.
12 Miꞌi hawyi ahiagnia hẽtup Iesui pe -Meimuẽwat hamaut asuwai koꞌi kape ro urupoꞌoro iꞌatuꞌe. Miꞌiria pe mono urutuwehytꞌok iꞌatuꞌe raꞌyn.
13 Miꞌi hawyi Iesui toꞌe -Eweiwat ro pyno e. Mio tã e hawyi tuwenoꞌẽ raꞌyn ahiagnia mekewat miit piit pyi hawyi tuwehytꞌok taꞌyn hamaut asuwai koꞌi 2 miu rakaria piit pe raꞌyn tuwehytꞌok. Miꞌi hawyi hamaut koꞌi ikohyeputꞌi kohyeputꞌi yityꞌok tote pyi hawyi tuwehytꞌok yꞌy pe hawyi topap yne raꞌyn.
14 Miꞌi hawyi hamaut sem apykok haria ikohyeput raꞌyn tawa kape henoi hamo. Iꞌewyte aikowo aikowo taꞌatukosap hap upi taꞌatuhenoi raꞌyn aikotã Iesui tunug hap etiat. Katarenu etawa koꞌi upi go koꞌi upi iraniaꞌin miat henoi hamo. Miꞌi hawyi so tuwat yne miitꞌin Iesui kapiat teꞌeraꞌakasa hamo.
Katarenu Piaria Taꞌatupoꞌoro Raꞌyn Iesui Itote Pyi
15 Miꞌi hawyi teꞌeraꞌakasa mekewat miit Iesui yatype apyk pe raꞌyn waku i raꞌyn tuwepainug me raꞌyn toineꞌen yt kat i raꞌyn ahiagnia ipiit pe.
16 Miꞌi hawyi ti mekewat õꞌẽ haria pe akasa haria henoi yne raꞌyn aikotã aikotã mekewat ahiagnia ipiit piat rakat etiat hamaut asuwai koꞌi topap yne hap etiat.
17 Miꞌi hawyi teꞌerokenꞌẽ Iesui pupi pote taꞌatuhẽtup hẽtup i Iesui pe -Uhyt Mimi iꞌatuꞌe motoro meiũwat uruetama pyi iꞌatuꞌe.
18 Miꞌi hawyi Iesui teke yara pe turan mekewat saꞌawyꞌi wuat ahiagnia ipiit piat rakat imimoehãite tuwẽpowat Iesui kape -Uipap kahato eupi Mehin e.
19 Maꞌato Iesui tiwesat -Yt wyti waku poꞌog ni eraꞌaipok i raꞌyn eꞌyat kape hawyi ehenoi henoi mesuwarotiaria pe aikotã Uito Ekaꞌiwat pakup ekyꞌe hap aikotã enug waku hap ewyriaꞌin miat hap ti atikyꞌesat uhaꞌyru e Iesui.
20 Miꞌi hawyi ti toto raꞌyn Iesui yatypepyi hawyi wuatꞌi 10 tawa puaria piat henoi henoi aikotã wakuap Iesui tunug tetiat hap. Miꞌi hawyi ikuap haria teꞌeruwanetup kahato Iesui etiat iminug hap etiat.
Katarenu Piaria Taꞌatupoꞌoro Raꞌyn Iesui Itote Pyi
21 Miꞌi hawyi Iesui toto i raꞌyn temiitꞌin nywo yara puo yi Karireia hyemyiꞌa wato sakpo. Miꞌi hawyi putꞌok iꞌatuꞌe hawyi miitꞌin tõꞌẽ tõꞌẽ hewowi yẽpeke yi kyt hap upi.
22 Miꞌi hawyi miitꞌin sem raꞌyn tukupteꞌen yẽpeke. Miꞌi hawyi Tupana motypot yat kaꞌiwat wẽtup ok Tupana motypot yat akag uhyt Iairu tuut Iesui kape.
23 Miꞌi hawyi tuwepỹꞌãtutuk Iesui Ewa kape hawyi tohẽtup Iesui pe haty wo -Mehin e uhakiꞌyt ikuꞌuro irane Uhyt e. Pyno toꞌiro meremo imoehãite hamo e. Ereponug itote hawyi mono ihãite hawyi uhakiꞌyt yt ikuꞌuro i e.
24 Miꞌi hawyi toto Iesui Iairu upi. Maꞌato mekewat typyꞌi rakaria tuwat yne hupi. Miꞌi hawyi muap upi taꞌatupyhuhik neꞌi Iesui.
25 Miꞌi hawyi tuwat turan ti wẽtup ok haryporia huu wato rakat toineꞌen iꞌatuwywo. Miꞌi wyti nimo kahato raꞌyn iꞌahuu. Miꞌi wyti 12 anu raꞌyn tohoꞌopot mekewat toꞌahu hap.
26 Miꞌi so hewyry mohag nug haria upi. Tutum yne raꞌyn tekareꞌen mohag nug haria pe. Tohoꞌopot kahato taꞌatuminug hap upi hawyi poꞌog yt naku i neꞌi tuwete.
27 Miꞌi wyti toikuap taꞌyn Iesui etiat hawyi ti tuut raꞌyn hawyi teke raꞌyn hupi hawyi totemig naꞌyn hesokpe.
28 Miꞌi hawyi toꞌe -Hesokpe yn atemig pykai waku raꞌyn uhete an e. Miꞌi hawyi totemig naꞌyn hesokpe ete.
29 Miꞌi hawyi meremo waku tuwete hawyi mekewat haryporia tikuap taꞌyn tehãite hap. Toikuap tetiat yt tosuu wato i raꞌyn hap.
30 Miꞌi hawyi maꞌato meremo tuwewi Iesui tikuap tesaika wẽtem topiit pywiat miitꞌin moehãite hamuat hap koꞌi. Miꞌi pote tuwemorem naꞌyn hawyi apo e topyhuhik haria pe -Uwe kahu uhesokpe emig e.
31 Mio tã e pote ipotmuꞌeria teꞌeroꞌe -Urumuꞌe hat meiũpe ti miitꞌin sem me watukupteꞌen typyꞌi poityꞌi emig haria iꞌatuꞌe. Kat poteĩ -Uwe uhesokpe emig ere iꞌatuꞌe.
32 Maꞌato Iesui tehaꞌat yne iꞌatuewa pe. Toikat temig hat uwe hap.
33 Miꞌi hawyi haryporia tikuap taꞌyn tomoehãite hap pote tuut i raꞌyn hawyi tuwepỹꞌãtutuk howa kape tyry toꞌe wywo hawyi tohenoi raꞌyn Iesui piat tomoehãite hap.
34 Miꞌi hawyi Iesui toꞌe -Uheinyt ewat uimohey hap emoehãite raꞌyn e. Miꞌi hawyi ti aru ehãite raꞌyn e. Miꞌi tupono ewepiit ro katupono yt kat i raꞌyn ehoꞌopat hap.
Iairu Sakiꞌyt Waku Raꞌyn
35 Miꞌi turan Tupana motypot yat akag uhyt Iairu emiitꞌin tõꞌẽ raꞌyn iꞌyat kaipyi. Miꞌi hawyi taꞌatuhenoi Iairu pe -Urukaꞌiwat iꞌatuꞌe yt naku i kahato raꞌyn. Yt kat hamo i raꞌyn wyti Woꞌomuꞌe hat etikyꞌesat katupono ti esakiꞌyt wyti ikuꞌuro sese raꞌyn iꞌatuꞌe iꞌywot Iairu pe.
36 Maꞌato Iesui tikuap hawyi toꞌe iꞌywot pe -Yt erekenꞌẽ teiꞌo e. Eremohey ro e.
37 Miꞌi hawyi typyꞌi rakaria iraniaꞌin Iesui yt tikyꞌesat i tuwat yne hap. Temiitꞌin yn Peteru Tiaku iꞌywyt Iuwãu wywo yn toikyꞌesat tuwat hap.
38 Miꞌi hawyi putꞌok iꞌatuꞌe raꞌyn Iairu yat kape. Miꞌi tote taꞌatupuẽti miitꞌin typyꞌi poityꞌi wak haria.
39 Teꞌeruwak ihay pirik kahato piꞌã hin ikuꞌuro pote. Iesui teke hawyi toꞌe wak haria pe -Kat poteĩ eweiwak e. Kat poteĩ ehehay pirik e. Yt ikuꞌuro i ti piꞌã maꞌato toket neꞌi ti e.
40 Mio tã e pote wak haria toꞌokyryꞌi Iesui ete. Miꞌi pote wak haria Iesui tiꞌatusopo raꞌyn iꞌyat pyi. Miꞌi hawyi tokokaꞌat ity iꞌywot Iuwãu Tiaku Peteru wywo yn naꞌyn piꞌã eꞌokipy kape.
41 Miꞌi hawyi Iesui piꞌã topopytyk hawyi toꞌe -Tarita Kumi e. Mio tã piꞌã pusu puo -Piꞌã epoĩꞌam no e.
42 Miꞌi hawyi meremo piꞌã hin 12 anu rakat ipoĩꞌam naꞌyn hewyry i raꞌyn. Miꞌi pote teꞌerahaꞌat kahato teꞌeruwanetup kahato raꞌyn.
43 Miꞌi hawyi Iesui tiꞌatunapin -Pyno ewetopoi ro eimepyt e. Maꞌato o yt ewehenoi teiꞌo piꞌã hin ieineꞌen i hap iraniaꞌin me e iꞌatuepe.
