Maku 6:1-56
6 Miꞌi hawyi Iesui toto i raꞌyn uhyt Iairu etawa kaipyi towyriaꞌin wywo tomotag hap tawa hit Nasare kape.
2 Miꞌi hawyi Tupana motypot hap eꞌat pe Iesui henoi henoi tetawa Nasare piaria pe Tupana motypot yat pe. Miꞌi pote itotiaria teꞌeruwanetup kahato hawyi teꞌeroꞌe -Aikope pyi meiẽwat tuut iꞌatuꞌe. Aikope pyi so tohepap wakuap nug topowuat hap koꞌi iꞌatuꞌe. Aikope pyi iweꞌeg kahato hap aimuꞌe hamo iꞌatuꞌe. Uweĩ hum iꞌatuꞌe.
3 Miꞌi hawyi teꞌeroꞌe toꞌope -Yt saꞌawyꞌi wuat meiũpiat panꞌi panꞌi e hat i apo meiẽ iꞌatuꞌe. Yt mana Maria mepyt i apo miꞌi Miit iꞌatuꞌe. Yt Tiaku Iuse Iuta Simau ykeꞌet i apo miꞌi Miit Iesui iꞌatuꞌe. Iꞌewyte iwat yt Iesui inytꞌin i apo tukupteꞌen meiũpe iꞌatuꞌe toꞌope. Miꞌi hawyi yt taꞌatumohey hin i Iesui haype. Miꞌi pote yt teꞌeruwanetup teran i Iesui kape. -Yt toimoherep kuap i wakuap Tupana etiat iꞌatuꞌe toꞌope.
4 Miꞌi hawyi Iesui toꞌe -Tupana ehay moherep hat toꞌyat pe yn yt taꞌatumotypot i e. Maꞌato iraniaꞌin etawa pe miitꞌin imotypot haria wo teꞌeropyhuꞌat e.
5 Miꞌi pote kurin kurin tutunug tesaika wo tawa Nasare pe. Wẽtup ok wẽtup ok yn toimoehãite topo wo iꞌahuu rakaria. Katupono toꞌyat piaria yt imohey hin i haria wo miꞌiria.
6 Iesui tuwanetup kahato yt tomohey i haria kape. Tetama piaria toꞌyat piaria pykai yt imohey hin i haria wo tukupteꞌen.
Iesui Topotmuꞌeria Napin Hamuat Hap
7 Miꞌi turan Iesui tikay kay temiitꞌin tuwewowi. Miꞌi hawyi tutum naꞌyn tesaika hap ahiag sopo hamuat towyriaꞌin me 12 ok takaria pe. Miꞌi hawyi typy ok tuereto toiꞌatupoꞌoro iraniaꞌin tawa koꞌi upi Tupana ehay enoi hamuat.
8 Saꞌawyꞌi toiꞌatupoꞌoro hap owokai toiꞌatunapin. Mio tã e iꞌatuepe -Yt kat reiꞌo ewetioto eiwewywo muap upi. Yt ewetioto i eipoyha wyti iꞌewyte yt ehesokpe eiam i wyti iꞌewyte yt eimiꞌu i wyti iꞌewyte yt saꞌup i wyti ewetioto e toiꞌatunapin topotmuꞌeria toiꞌatupoꞌoro hap owokai te.
9 Waku epy sokpe epy etiat yn eweitioto. Iꞌewyte ehesokpe epiit ete wẽtup yn ehekamisa wato eweitioto e.
10 Miꞌi hawyi putꞌok eweiꞌe wẽtup tawa pe hawyi waku wuatꞌi eꞌat pe wẽtup netap we yn waku ewehenuk iꞌewyte eweiket e. Waku miꞌi pe eweikupteꞌen eito hap kape e.
11 Maꞌato tawa piaria yt iꞌatuwese i ehete yt teꞌeruwanetup teran i eimienoi uhetiat kape miꞌi pote eweiwat i raꞌyn iꞌatuetawa pyi e. Eiwenoꞌẽ hamo waku meiẽwat tawa sawiu eipy etiat koꞌi eiwepypitpitꞌok kahato iꞌatuehamo. Miꞌi tã ewetunug hawyi ti aru taꞌatukuap taꞌyn Tupana etiat yt taꞌatuwese i hap e Iesui topotpoꞌororia 12 ok takaria pe. Miꞌi hawyi tuwat raꞌyn typyꞌok tuereto tawa koꞌi upi Iesui yatypepyi ihay enoi hamo.
12 Putꞌok taꞌatuꞌe miitꞌin muꞌe hamo tawa koꞌi pe hawyi mio tã iꞌatuꞌe miitꞌin me -Koitywy eweiꞌatoiat ro yt nakuap i eiminug koꞌi hawyi eweiꞌaipok to Tupana etiat kuap hamo iꞌatuꞌe miitꞌin me.
13 Miꞌi hawyi iꞌewyte ahiag koꞌi taꞌatuꞌatusopo miitꞌin piit pyi. Iꞌewyte ikap takat wo taꞌatupen iꞌahuu rakaria akag hawyi iꞌatuehãite raꞌyn.
Iuwãu Woꞌosetꞌok Hat Ikuꞌuro Raꞌyn
14 Miꞌi hawyi miitꞌin tikuap taꞌyn Iesui etiat. Iꞌewyte mio tã hap morekuat Eroti tikuap Iesui etiat. Miꞌi hawyi iraniaꞌin -Iuwãu taꞌaipok taꞌyn guꞌuro pyi e. Iesui wyti woꞌosetꞌok hat Iuwãu toineꞌen i raꞌyn guꞌuro pyi e. Miꞌi tupono ti totereko hesaika hap iraniaꞌin iꞌatuꞌe.
15 Miꞌi hawyi wẽtup ok wẽtup ok toꞌe -Iesui wyti Tupana ehay moherep nimuat hat Eria iꞌatuꞌe. Maꞌato iraniaꞌin -Taꞌi Iesui wẽtup ok Tupana ehay moherep hat saꞌawyꞌi wuat toineꞌen iraꞌyn iꞌatuꞌe.
16 Maꞌato morekuat Eroti tikuap yne miꞌi e hap hawyi toꞌe -Are paĩ atikuap wyti uwe sese hap e. Taꞌi Iuwãu uimiꞌakag tek wyti toineꞌen i raꞌyn guꞌuro pyi e.
17 Morekuat Eroti toꞌywyt Wiripi eharyꞌi wywo mana Erotia e hap het rakat wywo toineꞌen. Iuwãu iminug saꞌag hap toimoherep hawyi morekuat Eroti tipytyk Iuwãu hawyi toipyhik taꞌyn.
18 Miꞌi tã tutunug pote karania wo ahetꞌok hat Iuwãu toꞌe morekuat pe -Waĩꞌe yt naku i ti ereineꞌen eꞌywyt eharyꞌi wywo neꞌi e tope.
19 Miꞌi hawyi morekuat eharyꞌi pakup Erotia yt iwese hin i Iuwãu ete. Toiꞌauka teran maꞌato yt toiꞌauka kuap i katupono Iuwãu pupi heꞌaito tokenꞌẽ kahato.
20 Morekuat Eroti tikuap taꞌyn Iuwãu wakuat kahato hap. Miꞌi hawyi toikawiatno Iuwãu katupono morekuat tikuap teran Iuwãu ehay aikotã kahato hap. Toikuap hawyi ikenmuꞌe kahato tuwete.
21 Miꞌi hawyi wẽtup eꞌat pe morekuat Eroti ywãꞌĩ hap kapiat waꞌatunug hap eꞌat pe tõꞌẽ tõꞌẽ hesuraraꞌin akagnia teꞌerenuk hamo. Teꞌeruwaꞌatunug tuꞌisaria yne yi Karireia kaipywiaria tõꞌẽ tõꞌẽ. Mekewat eꞌat Erotia morekuat haryporia kawiat tipuẽti raꞌyn muap Iuwãu auka hamo.
22 Miꞌi hawyi iꞌatuwaꞌatunug hawe teke iharyꞌi hit Erotia mepyt ikahu rakat tehairu tuweran hamo. Miꞌi hawyi tehairu waku raꞌyn hawyi morekuat Eroti iwepiit kahato ienuk haria wywo. Miꞌi hawyi toꞌe piꞌã makuptia pe -Ehairu hap ikahu kahato piꞌã e. Pyno ehẽtup to kat som etikyꞌesat e. Kat emiẽtup atum epe e piꞌã pe.
23 Pywo pe ti uhehay moheg hamuat atum aru emiẽtup hamuat hap e. Taꞌi etikyꞌesat pote uheꞌyi ipatꞌok atum epe piꞌã e morekuat ihairu rakat pe.
24 Miꞌi hawyi piꞌã toto toty kape ihay kuap hamo hawyi toꞌe -Mamai e kat som waku ahẽtup morekuat pe e. Miꞌi pote ity toꞌe e -Pyno waku pyno ehẽtup to miitꞌin setꞌok hat Iuwãu akag e mana Erotia tomepyt pe.
25 Miꞌi hawyi piꞌã taꞌaipok meremo raꞌyn morekuat piat henoi hamo. Putꞌok toꞌe hawyi piꞌã toꞌe -Pyno mesup uito atikyꞌesat warupy hit piat Iuwãu akag e.
26 Mio tã e pote morekuat iperup taꞌyn yt iwepiit hin i raꞌyn. Yt toiꞌauka teran i Iuwãu haype maꞌato saꞌawyꞌi mio tã e piꞌã piat hap iwywuat ienuk haria tikuap taꞌyn kat e hap.
27 Miꞌi pote toipoꞌoro raꞌyn wẽtup ok surara Iuwãu auka hamo hawyi waku toterut Iuwãu akag hewowi warupy hit pe. Miꞌi surara toto raꞌyn woꞌopyhik hap kape iꞌauka hamo.
28 Toiꞌauka hawyi toterut warupy hit pe imiẽtup Iuwãu akag hawyi tutum naꞌyn piꞌã pe. Miꞌi hawyi piꞌã tioto toty kape.
29 Miꞌi hawyi Iuwãu potmuꞌeria tikuap taꞌyn iꞌauka hap hawyi tõꞌẽ raꞌyn hyp nu kaꞌa piat hamo.
30 Miꞌi hawyi imipoꞌororia 12 ok takaria teꞌeraꞌaipok i raꞌyn Iesui ewowi woꞌopotmuꞌe haria wuatꞌi tawa kaipyi. Miꞌi hawyi taꞌatuhenoi henoi Iesui pe aikotã taꞌatuminug koꞌi iꞌewyte taꞌatumienoi wuatꞌi tawa puat koꞌi.
31 Miꞌi hawyi typyꞌi kahato õꞌẽ haria tukupteꞌen itote miꞌi pote yt teꞌerenuk kuap i raꞌyn typyꞌi poityꞌi pote. Miꞌi pote Iesui toꞌe topotmuꞌeria pe -Toꞌiro uhupi eiweran aikope yt uwe i miitꞌin hap kape eiwemohy hamo e.
32 Miꞌi hawyi typyꞌi rakaria kaipyi Iesui toto raꞌyn temiitꞌin wywo yara puo yt uwe i hap kape teꞌerewemohy hamo.
33 Maꞌato iraniaꞌin tikuap taꞌyn iwat hap hawyi yi upi wuatꞌi kaipyi miitꞌin teꞌeruwaꞌatunug aikowo Iesui toto hap kape. Putꞌok iꞌatuꞌe Iesui uut hap owokai te.
34 Miꞌi hawyi Iesui tuwehik hawyi tuwẽtem yara pyi. Miꞌi turan yahig note yẽpeke toiꞌatupuẽti miitꞌin typyꞌi kahato hawyi toiꞌatukyꞌe kahato katupono toiꞌatupuẽti aikotã hũria Uweiria koꞌi ewy aikotã yt ikaꞌiwat rakaria i ewy toiꞌatupuẽti. Miꞌi hawyi Iesui tiꞌatumuꞌe.
35 Wãtym irane raꞌyn hawyi Iesui potmuꞌeria tõꞌẽ Iesui kape teꞌeroꞌe hamo -Wãtym irane raꞌyn wyti Uhyt iꞌatuꞌe.
36 Yahig note neꞌi ti watukupteꞌen miꞌi pote waku etiꞌatupoꞌoro i ro iꞌatuetawa koꞌi kape miꞌu puẽti hamo iꞌatuꞌe.
37 Maꞌato Iesui tiꞌatuwesat -Pyno waku eipe eweiꞌatupoi o e. Miꞌi hawyi taꞌatuwesat -Aikotã etikyꞌesat Mehin miitꞌin sem poi hap iꞌatuꞌe. Etikyꞌesat man iwato watikyiꞌat miitꞌin miꞌu wo iꞌatuꞌe. Katupono 200 a ahetineiru yn waku iꞌatupoi saꞌup mo iꞌatuꞌe. Karania ewaty motpap hap upi miꞌi tã hap ewy puẽti hamo iꞌatuꞌe.
38 Miꞌi hawyi Iesui toꞌe temiitꞌin me -Karania a pyno aheman e. Eweiꞌakasa ro pyno e. Taꞌatukuap hawyi taꞌatuhenoi -5 man typy pira yn Uhyt iꞌatuꞌe.
39 Miꞌi hawyi Iesui toꞌe temiitꞌin me -Eweiꞌapyk to mopep hyp tote eweiꞌe ro miitꞌin me e.
40 Miꞌi hawyi teꞌeraꞌapyk taꞌyn kowo 50 ok kowo 50 ok kowo 100 ok kowo 100 ok mopep hyp tote.
41 Waku hawyi Iesui tat 5 man typy pira hit topo pe hawyi ihaꞌat ywaipe hawyi toꞌe -Waku kahato En Tupana e. Urupoi kahato hat En e. Miꞌi hawyi toipatꞌok kahato mekewat 5 a man 2 pira hit rakat towyriaꞌin me. Miꞌi hawyi miꞌiria imoꞌẽ iraniaꞌin me. Miꞌi tote toiꞌatumoꞌẽ 5 man typy pira yne miitꞌin miꞌu wo
42 Toiꞌatumiꞌumowato kahato raꞌyn. Miꞌi hawyi ti teꞌerenuk kahato raꞌyn hawyi iꞌatuꞌok kahato raꞌyn tukupteꞌen.
43 Miꞌi hawyi iꞌatumiꞌu ieĩpyt topyhuꞌat rẽ 12 eꞌyrysakag ne.
44 Mekewat eꞌat pe Iesui tiꞌatupoi 5 miu ihainia 5 man wo typy pira wo.
Iesui Hewyry Yꞌy Totiat
45 Teꞌerenuk waku hawyi Iesui tiꞌatupoꞌoro raꞌyn temiitꞌin ihyemyiꞌa sakpo tawa Pesaita kape. Miꞌi hawyi iraniaꞌin tomipoi koꞌi iꞌewyte toiꞌatupoꞌoro iꞌatuetawa koꞌi kape.
46 Toiꞌatupoꞌoro yne hawyi Iesui toto raꞌyn yityꞌok kape. Miꞌi hap tote tuweran naꞌyn hawyi ihay Tupana wywo.
47 Wãtym irane hawyi ihyemyiꞌa pyꞌasetpe tukupteꞌen towyriaꞌin yara puo. Miꞌi turan Iesui yi pe te tuweran toineꞌen.
48 Tehaꞌat turan toikuap taꞌyn wasere kahato iꞌatuewa kapiat. Taꞌatuhãꞌãg kahato apokuita wo hewyry hap upi maꞌato yt iꞌatuhyha i iwyriaꞌin ihaꞌat turan. Miꞌi hawyi waipaka ehay hap owakai Iesui toto raꞌyn temiitꞌin me maꞌato tokosap iꞌatueyian me yowa tote.
49 Maꞌato teꞌeraꞌakasa Iesui kapiat hawyi toꞌokakꞌi -Kat kahu meke iꞌatuꞌe. Miit ehog keĩ iꞌatuꞌe.
50 Miꞌi hawyi iꞌatuwuwu kahato raꞌyn. Miꞌi hawyi Iesui toꞌe -Uiwyriaꞌin eiwemoesaika o e. Uito e. Yt eweikenꞌẽ teiꞌo e.
51 Mio tã toꞌe hawyi Iesui teke raꞌyn yara pe temiitꞌin wywuat pe raꞌyn. Teke hawyi meremo ywytu ipohep taꞌyn. Miꞌi pote teꞌeruwanetup aikotã aikotã Iesui minug hap etiat.
52 Katupono saꞌawyꞌi teꞌeraꞌakasa Iesui minug koꞌi 5 man etiat maꞌato yt taꞌatukuap i uwe sese Iesui hap iꞌatupyꞌa heg mote yt taꞌatumohey kuap i.
53 Miꞌi hawyi putꞌok iꞌatuꞌe tama Kenesare wã tote i raꞌyn.
54 Teꞌeruwehik yẽpeke hawyi tuwẽtem naꞌyn yara pyi. Miꞌi hawyi meremo yi Kenesare piaria tikuap Iesui uut hap
55 Miꞌi pote ko pe pyi ko pe pyi iꞌahuu rakaria taꞌatueropoꞌok Iesui kape iꞌatuoehãite hamo. Iraniaꞌin yni puo taꞌatuerut Iesui kape.
56 Miꞌi hawyi aikope aikope hewyry hap upi kat etawa pe kat kyiꞌat hap tote kat etama pe iꞌewyte yahig note itotiaria iꞌahuu rakaria taꞌatunug muap upi Iesui mimoehãite wo. Miꞌi turan taꞌatuẽtup kahato hewowi -Waku esokpe urutemig hawyi uruikuap taꞌyn urumoehãite hap topyhuꞌat iꞌatuꞌe. Miꞌi hawyi iꞌahuu rakaria hesokpe emig haria meremo iꞌatuehãite raꞌyn.
