Maku 7:1-37
7 Wẽtup eꞌat pe teꞌeruwaꞌatunug kahato Iesui kape nagnia ehay enoi haria iꞌewyte miwan enoi haria tawa wato Ierusarẽi kaipywiaria wywo.
2 Miꞌi hawyi taꞌatuenuk hap tote teꞌeraꞌakasa wẽtup tuereto Iesui ekatuwyriaꞌin yt teꞌeruweposei i nagnia mienoi yt ewy i.
3 Miꞌi hawyi teꞌerahaꞌat kahato katupono yne Iuteu ywania teꞌeruweposei yne teꞌerenuk hamo saꞌawyꞌi wuat nagnia napin hap ewy.
4 Putꞌok iꞌatuꞌe woꞌokyiꞌat hap kaipyi hawyi teꞌeruweposei raꞌyn teꞌerenuk hap owokai. Iꞌatu kahato iꞌatuminug hap koꞌi taꞌatukuap toꞌywotꞌin napin hap kaipyi. Aikotã yne parata koꞌi toiꞌatukoho nagnia inug saꞌawyꞌi hap ewy taꞌatunug.
5 Saꞌawyꞌi wuat napin hap enoi haria iꞌewyte woꞌonapin haria apo iꞌatuꞌe Iesui pe -Kat pote epotmuꞌeria yt taꞌatunug saꞌawyꞌi wuaria ainapin haria ewy katupono epotmuꞌeria teꞌerenuk yt teꞌeruweposei i pykai ainapin hap ewy iꞌatuꞌe.
6 Miꞌi pote Iesui tiꞌatuwesat -Nimo te ti aseꞌi Isaia henoi tomiwan me ehetiat typy ihay rakat etiat. Mio tã e Isaia -Miꞌi tã haria Tupana motypot taꞌatuwẽ pywiat haria yn miꞌiria maꞌato yt taꞌatupyꞌa pyi i taꞌatumotypot Tupana e Isaia 29.13 pe.
7 Taꞌi miꞌiria ti Tupana motypot saꞌag neꞌi katupono yt taꞌatuhenoi Tupana ehay sese i maꞌato miitꞌin kaipywiat sehay yn taꞌatuhenoi e ti Isaia henoi ehetiat e Iesui.
8 Miꞌi hawyi poꞌog toꞌe -Taꞌi Tupana ehay atoiat haria ti eipe katupono nagnia eko yn miitꞌin muꞌe hamo maꞌato Tupana e hap yt kat i eipyꞌa piat miitꞌin muꞌe hamo e.
9 Taꞌi apuete eweiꞌe ti Tupana mikyꞌesat koꞌi nug hawe hawyi eimikyꞌesat yn ewetunug aat kaꞌap. Tupana ehay aikotã waku watunug e hap pun haria eipe wen maꞌato eiꞌe hap aikotã waku watunug e hap ewetunug kahato.
10 Pyno saꞌawyꞌi Muisei ainapin Tupana kaipywiat hap mio tã e -Pyno waku etimotypot ro eꞌywot ety e maꞌato uwe inug saꞌag neꞌi toꞌywot pe toty pe miꞌi hawyi waku topyhuꞌat miꞌauka wo e e Tupana saꞌawyꞌi Muisei pe mekewat Esutu 20.12 piat pe.
11 Maꞌato eipe wẽtup sehay eweiꞌe miitꞌin muꞌe hamo. Mio tã eweiꞌe -Waku Tupana yn watimotypot. Miꞌi pote waku watum aity aiꞌywot saꞌup Tupana pe eweiꞌe saꞌag e. Aimiium aiꞌywotꞌin me Tupana watnuat eweiꞌe saꞌag yn eimuꞌe haria pe e Iesui.
12 Yt naku i ti eimienoi katupono -Yt watipowyro i aiꞌywotꞌin pote waku katupono Tupana pe watum naꞌyn eweiꞌe.
13 Taꞌi Tupana ehay sese ti yt kat no i ewetunug. Eiwat eimikyꞌesat neꞌi ewetunug teran haype. Eiwekaipywiat wyti eweimowato kahato e. Miꞌi hawyi ti ewetunug iꞌatu raꞌyn eiko ewywuat koꞌi miitꞌin muꞌe hamuat e Iesui Iuteu ywania muꞌe haria pe iꞌewyte miwan enoi haria pe.
14 Miꞌi hawyi Iesui tiꞌatukay kay tuwewowi iraniaꞌin miitꞌin miat henoi hamo. Miꞌi hawyi toꞌe iꞌatuepe -Koitywy eweiwanetup to uimienoi hap kape e.
15 Kat kat koꞌi teke eipiit pe eiwẽ pe yt eimohun hin i hap topyhuꞌat e. Maꞌato kat som eipyꞌa kaipywiat wẽtem hap eimohun hap topyhuꞌat e.
16 Pywo pe ti ehewaure kaꞌa pote eweiwanetup to uimienoi kape e.
17 Miꞌi hawyi Iesui toto temiitꞌin wywo miitꞌin typyꞌi rakaria pyꞌasetpyi hawyi teke wẽtup netap we. Miꞌi hawyi meiũran hemiitꞌin apo iꞌatuꞌe Iesui pe -Kat ereĩ sehay hãꞌãkap wuo ehenoi Mehin iꞌatuꞌe.
18 Miꞌi hawyi Iesui tiꞌatuwesat -Are paĩ yt eweikuap i apo uhehay e. Pyno yt eweikuap i apo kat som teke eimeꞌen me miꞌu yt eimohun kuap maꞌato eiwẽ pywiat ehehay eimohun kuap e. Yt miitꞌin miꞌu kaipyi i ti tuwenug yt naku i hap e.
19 Katupono kat som teke eiwẽ pe yt putꞌok e hin i eipyꞌa piat pe maꞌato eimeꞌen pe putꞌok e hawyi tuwẽtem iraꞌyn eipiit pyi e.
20 Miꞌi hawyi Iesui toꞌe -Uiwyriaꞌin miitꞌin minug yt nakuat i tuwẽtem iꞌatupyꞌa pyi ti e. Pywo pe ti miitꞌin pya pyi tuwẽtem wanetup yt nakuat i hap e.
21 Tuwepyi tutunug yt nakuap i e. Wuatꞌi haryporiaꞌin nywo e seroꞌok e miit auka wẽtup ok ti seꞌaito wywo uito e hat wẽtup ok ti seharyꞌi wywo uito e hat miitꞌin pya pyi tuwẽtem
22 Iꞌewyte uiatno yn iraniaꞌin ekareꞌen e hat atiꞌatumoweukaꞌi mo uito iraniaꞌin e hat atimaꞌat sehay wo wẽtup ok e hat uito ti poꞌog uhewaku iraniaꞌin kai e hat ti Tupana ehay etiat wekyryꞌi hat yt iweꞌeg i rakat. Tuwepyi taꞌatuehay taꞌatupyꞌa pywiat taꞌatunug yt naku i e.
23 Pyno uiwyriaꞌin eweikuap taꞌyn som miit pya pyi tuwẽtem wanetup hap yt naku i hap. Miꞌi wo ti yt naku i tuwenug tuwemohun e Iesui temiitꞌin me.
Haryporia Tohẽtup Tomepyt Moehãtie Hap
24 Miꞌi hawyi Iesui toto pya kahato tetama pyi wẽtup ywania etama kape i raꞌyn wẽtup setama pya wuat kape. Miꞌi hap tote putꞌok e raꞌyn iꞌatuetama Tiro piat hawyi iheg me raꞌyn toineꞌen. Katupono yt toikyꞌesat i miitꞌin miat tokuap hap. Maꞌato yt aikotã me kuap i tuwemig.
25 Miꞌi hawyi wẽtup ok haryporia tikuap Iesui etiat hawyi toikat raꞌyn Iesui. Katupono ti ahiag toineꞌen imepyt ipiit pe.
26 Taꞌi tomepyt piit piat ahiag putsit hamo toikat Iesui. Miꞌi haryporia so yt Iesui ywania i raꞌyn. Wẽtup setama pywiat mekewat yi Siru-Wenisia pywiat. Miꞌi hawyi toipuẽti Iesui hawyi haty wo toꞌe -Mimi e etihep o ten ahiag uimepyt piit piat e haty wo.
27 Miꞌi hawyi Iesui tiwesat -Apuete mana e saꞌawyꞌi ti atiꞌatupoi teran uiꞌywania e katupono yt naku i hirokaria miꞌu wo urutopoi Awareria neꞌi e.
28 Miꞌi hawyi toꞌe Iesui pe haryporia -Are an miꞌi tã ti Mimi e maꞌato ti iꞌewyte Awareria koꞌi tuꞌu miꞌu kuꞌi hewo rakat mesa kaipyi eꞌywania mepytꞌin teꞌerenuk turan e.
29 Mio tã e pote Iesui tiwesat -Pywo uiwesat hap upi atisopo raꞌyn ahiag emepyt piit pyi e. Pyno eraꞌaipok i ro emepyt kape katupono koitywy ti yt kat i raꞌyn ahiag emepyt piit pe areꞌe hap ewy e.
30 Miꞌi hawyi ity taꞌaipok taꞌyn tomepyt kape. Putꞌok e toꞌyat pe hawyi toipuẽti raꞌyn tomepyt yni pe waku pe i raꞌyn. Miꞌi hawyi ti ity tikuap taꞌyn tomepyt piit pywiat ahiag wẽtem hap.
31 Miꞌi hawyi Iesui toto Tiro pyi yi Sitau kaipyi yꞌy wato Karireia kape iraꞌyn mekewat tama aikope 10 tawa koꞌi itote.
32 Miꞌi hap tote taꞌatuerut raꞌyn Iesui kape wẽtup ok hewaure rakat yt ihay hãpyk kuap i rakat. Miꞌi hawyi taꞌatuhẽtup Iesui pe imoehãite topo wuat hamo.
33 Miꞌi hawyi Iesui tioto hewaure rakat miitꞌin tok pyi hawyi totemig naꞌyn hewaure kaꞌa koꞌi hawyi kuitu e raꞌyn hawyi tohẽku pen tẽty hy wo.
34 Miꞌi hawyi Iesui ihaꞌat atipy kape hawyi kyn kyn e -Etimoewaure kaꞌa i ro meiũwat miit Tupana e. Maꞌato towat topusu puo Iesui toꞌe tope -Ewata e.
35 Miꞌi hawyi meremo hewaure kaꞌa i raꞌyn ihay kuap wuatꞌi ewy raꞌyn.
36 Miꞌi hawyi Iesui waĩꞌe iraniaꞌin me haty wo -Yt ewehenoi teiꞌo uhepiat imoehãite hap iraniaꞌin me e wen maꞌato taꞌatuhenoi henoi raꞌyn wuatꞌi puo raꞌyn yt Iesui mikyꞌesat ewy hin i raꞌyn.
37 Miꞌi hawyi taꞌatukuap wuatꞌi puo raꞌyn Iesui piat hewaure rakat moehãite hap hawyi teꞌeroꞌe toꞌope -Waku kahato Iesui tunug iꞌatuꞌe. Hewaure rakaria wyti tutunug hewaure kaꞌa raꞌyn iꞌatuꞌe. Yt ihay kuap i rakaria tutunug ihay kuap raꞌyn iꞌatuꞌe.
