Maku 8:1-38
8 Miꞌi hawyi teꞌeruwaꞌatunug Iesui kape miitꞌin sok. Miꞌi hawyi myẽꞌym eꞌat Iesui tiꞌatumuꞌe aat kaꞌap hawyi yt kat i topyhuꞌat miitꞌin miꞌu wo. Miꞌi hawyi Iesui tikay kay raꞌyn temiitꞌin tuwewowi.
2 Miꞌi hawyi temiitꞌin me toꞌe raꞌyn -Uimimuꞌeria meiũpiaria ti myẽꞌym eꞌat pe raꞌyn myẽꞌym wãtym naꞌyn uhupi uhehay kuap hamo e. Miꞌi pote ti yt kat i raꞌyn topyhuꞌat iꞌatumiꞌu wuat e.
3 Koitywy ti yt naku i raꞌyn teꞌeraꞌaipok taꞌatuetawa koꞌi kape katupono pya kahato raꞌyn iꞌatuetawa koꞌi tukupteꞌen e. Taꞌi teꞌeropap muap upi syꞌat pono e. Yt naku i raꞌyn atiꞌatuporeraꞌaipok yt kat i iꞌatumiꞌu wywo i e Iesui.
4 Miꞌi hawyi hemiitꞌin teꞌeroꞌe Iesui pe -Pywo mehin maꞌato aikotã waku watiꞌatupoi mesuwe yahig wato tote iꞌatuꞌe. Yt kat i meiũpe man iꞌatupoi hamo iꞌatuꞌe Iesui pe.
5 Miꞌi hawyi apo e Iesui -Karania a kahu pyno man aiwat e. Mio tã e pote -Taꞌi 7 man yn Uhyt iꞌatuꞌe.
6 -Pyno eweiꞌapyk to yi upi e Iesui torannia miitꞌin me. Miꞌi hawyi Iesui waku e Tupana pe -Uruꞌywot atipy piat urutuwehum ewowi urupoi hap upi e hawyi toipik pik kahato raꞌyn mekewat 7 rakat man hawyi toimoꞌẽ kahato temiitꞌin me. Miꞌi hawyi hemiitꞌin iraniaꞌin me imoꞌẽ raꞌyn wy.
7 Iꞌewyte pira hit koꞌi toineꞌen itote. Miꞌiria wy totat hawyi waku e Tupana pe hawyi toipatꞌok kahato hawyi tutum temiitꞌin me hawyi -Eweimoꞌẽ o iraniaꞌin me e.
8 Miꞌi hawyi teꞌerenuk kahato raꞌyn hawyi iꞌatuꞌok taꞌyn. Miꞌi hawyi Iesui emiitꞌin 7 yrysakag howopy raꞌyn taꞌatupuẽti yne miitꞌin teꞌerenuk kahu hawyi.
9 Miitꞌin iꞌatu rakaria teꞌerenuk itote 4 miu ihainia. Teꞌerenuk hawyi Iesui tiꞌatupoꞌoro raꞌyn iꞌatuetawa pya rakat koꞌi kape.
10 Miꞌi hawyi toto i raꞌyn Iesui yara puo tama Taumanuta kape temiitꞌin wywo.
11 Putꞌok iꞌatuꞌe hawyi nagnia ehay enoi haria hãꞌãg Iesui taꞌatuehay wo -Heno pyno etomoherep esaika hap atipy kaipywiat iwato rakat iꞌatuꞌe.
12 Mio tã iꞌatuꞌe pote Iesui hatyꞌu kahato topyꞌa pe hawyi ahenꞌẽ poityꞌi hawyi toꞌe mio tã e haria pe -Kat poteĩ mesuwiaria tikyꞌesat kahato atimoherep yt miitꞌin misepap koꞌi ewywuat i uimohey hamo e. Eweikyꞌesat pykai yt atunug i e Iesui yt tomohey i haria tewanikaptia pe.
13 Miꞌi hawyi tohokꞌiwat hawyi toto i raꞌyn temiitꞌin wywo ihyemyiꞌa sakpo i raꞌyn.
Iesui Henoi Temiitꞌin Me Nagnia Sehay Yt Hãpyk I Rakat Etiat
14 Maꞌato hemiitꞌin tiwaure taꞌatumiꞌu man. Miꞌi pote taꞌatukat man yara pe muap upi maꞌato wẽtup man yn taꞌatupuẽti.
15 Miꞌi hawyi Iesui tiꞌatunapin -Eiweꞌeg wo o nagnia ehay enoi haria mani puk hap ewywuaria pupi e. Iꞌewyte morekuat Eroti mani puk hap ewywuat pupi e.
16 Miꞌi hawyi teꞌeroꞌe toꞌope -Pyno aheman watiwaure pote mio tã e.
17 Miꞌi hawyi Iesui tikuap hawyi toꞌe iꞌatuepe -Kat pote aheman yt iwato i eweiꞌe eiwoꞌope e. Yt eweikuap i te uhetiat hap. Eipyꞌa heg kahato te apo e.
18 Yt eheha pytig i te apo e. Yt ehewaure kaꞌa i te apo e.
19 Eweiwaure raꞌyn apo aikotã saꞌawyꞌi miitꞌin atiꞌatupoi 5 man wo yn 5 miu rakaria hap e. Miꞌi hawyi karania yrysakag koꞌi eweipuẽti man ieĩpyt koꞌi apo e. Miꞌi hawyi taꞌatuwesat -12 yrysakag ieĩpyt watipuẽti iꞌatuꞌe.
20 Miꞌi hawyi 7 man wo atopoi 4 miu miit hawyi karania yrysakag ne topyhuꞌat miꞌu ieĩpyt apo e. -Taꞌi 7 eꞌyrysakag ne ti topyhuꞌat iꞌatuꞌe.
21 Miꞌi hawyi Iesui toꞌe -Yt eweikuap i apo kat etiat som ahenoi teran e.
Yt Iha Pytig I Rakat Moehãite Hap
22 Miꞌi hawyi putꞌok iꞌatuꞌe ysakpo tawa Pesaita pe. Miꞌi turan so taꞌatuerut Iesui ewowi yt iha pytig i rakat -Pyno uruhẽtup kahato ehewowi meiũwat yt iha pytig i rakat imoehãite hamuat iꞌatuꞌe.
23 Miꞌi hawyi Iesui tiꞌykesat ereto raꞌyn yt iha pytig i rakat tawa pyi. Miꞌi hap tote iha pe kuitu e raꞌyn hawyi totemig topo wo. Miꞌi hawyi apo e yt ihapytig rakat pe -Ereꞌakasa raꞌyn apo e.
24 Miꞌi hawyi tehaꞌat hawyi toiwesat -Hẽ porap waku Uhyt e maꞌato meimuẽwat miitꞌin hewyry rakaria wyti ariaꞌyp koꞌi ewy neꞌi e.
25 Miꞌi hawyi Iesui temig i topuiꞌiã wo iha hawyi waku raꞌyn yne taꞌakasa raꞌyn ihatꞌok yne raꞌyn. Miꞌi hawyi Iesui toꞌe tope -Pyno waku raꞌyn eete koitywy uhyt e.
26 Eraꞌaipok to eꞌyat kape wẽtup muap upi e. Yt erokosap teiꞌo tawa kape emoehãite hap enoi hamo e Iesui tomimoehapytig me.
27 Miꞌi hawyi Iesui ipotꞌam towyriaꞌin wywo yi Sesareia piat tawa Wiripi kape tawa koꞌi upi toto temiitꞌin wywo. Miꞌi hawyi muap upi Iesui apo e towyriaꞌin me -Uwe som pono Uito iraniaꞌin wanetup hawe e.
28 Apo e hawyi taꞌatuwesat -U paĩ woꞌosetꞌok hat Iuwãu raso Eria raso Tupana ehay moherep hat raso iꞌatuꞌe
29 Miꞌi hawyi toꞌe -Maꞌato apo uwe Uito eiwanetup hawe e. Miꞌi pote mekewat Peteru e hap het rakat tiwesat -Woꞌoehakyeraꞌat hat Tupana Mipoꞌoro uruporekuat nuat rat En Uhyt e.
30 Miꞌi hawyi Iesui tiꞌatunapin -Yt ewehenoi teiꞌo koitywy uikuap ehepiat hap iraniaꞌin me e temiitꞌin sese pe.
Iesui Henoi Raꞌyn Tokuꞌuro Hap Etiat
31 Pywo ti Uito Wuatꞌi Miitꞌin Ykeꞌet wen maꞌato miꞌi pykai nagnia yt uikyꞌesat hin haria i e. Taꞌi paꞌi kororia miwan enoi haria iꞌewyte uhehay pun haria neꞌi e. Pywo ti Uito Eheykeꞌet taꞌatuꞌauka irane e. Ahoꞌopot kahato uiꞌauka hap turan maꞌato uiꞌauka saꞌag hawyi uikuꞌuro sese hawyi myẽꞌym eꞌat yn uisyp hawe areineꞌen hawyi Tupana uihep guꞌuro po pyi Eheykeꞌet e Iesui towyriaꞌin me.
32 Mio tã e pote Peteru tikay kay Iesui tuwewowi waĩ toꞌe hamo -Uhyt e yt naku i ti ehenoi eꞌauka hamuat hap e.
33 Maꞌato Iesui tuwemorem topotmuꞌeria kape Peteru satyꞌi satyꞌi hamo hawyi toꞌe Peteru pe -Erepik to ahiag e. Uinapin saꞌag neꞌi yt Tupana uinapin hap ewy i raꞌyn maꞌato miitꞌin woꞌonapin hap ewy neꞌi raꞌyn uinapin en e.
34 Miꞌi hawyi Iesui tiꞌatukay kay tuwewowi iraniaꞌin muap upiaria iꞌewyte topotmuꞌeria iꞌatumuꞌe hamo -Pywo ti rat eweiwat teran uhupiat pote eweitoiat ro eimikyꞌesat koꞌi yt Tupana mikyꞌesat koꞌi hawyi eweiwat ro uhupi eheꞌariaꞌyp posak wywo e.
35 Uwe uwe ikuꞌuro uhehay wakuat enoi hap upi pote uikyꞌe haria wo topyhuꞌat e. Miꞌi haria ti aru wuatꞌi eꞌat piat ieineꞌen hap sese puẽti hanuaria e. Maꞌato iraniaꞌin mesuwat rotiat ieineꞌen hap yn kyꞌesat haria ti aru ieineꞌen hap sese pun hanuaria wo hoꞌowasat rakaria neꞌi tukupteꞌen e.
36 Kat hamo ten eweikyiꞌat yne yne mesuwat yi totiat eheineꞌen hap sese saꞌup mo e.
37 Maꞌato mesuwarotiat kyiꞌat hap kape yn eiwanetup aat kaꞌap hawyi aru aikotã eweikyiꞌat kuap wuatꞌi eꞌat piat ikahu sese rakat ehekareꞌen Tupana wuat hap e. Miꞌi hawyi eheineꞌen wuatꞌi eꞌat piat hap koꞌi eimipun no topyhuꞌat e.
38 Pywo pe ti uwe uwe mesuwat yt naku i hap eꞌat koꞌi turan uhehay pupi tuwemoti yt uimohey haria i. Miꞌi haria pupi ti aru uito iꞌewyte aremoti wy mekewat eꞌat pe karãpe uito eheykeꞌetno ariot i raꞌyn Morekuatno atipy piaria wywo Tupana wat hẽtyhot rakat pe imehit rakat piat turan. Miꞌi hap eꞌat pe ti aru uito Eheykeꞌet aremoti uipupiat wemoti haria pupi e Iesui muap upiaria pe.
