Mateu 12:1-50
12 Miꞌi hawyi Iesui toineꞌen porapꞌi itote hawyi Tupana motypot hap eꞌat pe Iesui toto raꞌyn awati ypia pyꞌasetpuo. Miꞌi turan hemiitꞌin iꞌatuesyꞌat kahato pote taꞌatuhoꞌopik taꞌyn awati hawyi teꞌerenuk taꞌyn awati ete.
2 Miꞌi turan iraniaꞌin Wariseuria tikuap taꞌyn hawyi teꞌeroꞌe raꞌyn Iesui pe -Etikuap apo aikotã emiitꞌin tunug yt hãpyk i mekewat aiwoꞌonapin hawe toꞌe pykai -Yt eipotpap teiꞌo Tupana motypot hap eꞌat pe iꞌatuꞌe.
3 Miꞌi hawyi Iesui iꞌatuwesat -Yt eiwemuꞌe i apo aikotã morekuat Tawi tunug saꞌawyꞌi temiitꞌin iꞌatuesyꞌat turan hap etiat.
4 Katupono saꞌawyꞌi morekuat Tawi teke Tupana motypot yat pe torannia temiitꞌin wywo hawyi teꞌerenuk man ete mekewat Tupana motypot hamuat iꞌatumiium ete.
5 Katupono paꞌi kororia iꞌatupotpap neꞌi Tupana motypot yat pe Tupana motypot hap eꞌat pe pykai yt uwe i waĩꞌe.
6 Pywo pe ti areꞌe ehepe toineꞌen wyti meiũpe eipyꞌasetpe wẽtup ok poꞌog wakuat Tupana motypot yat kawiat rakat e.
7 Maꞌato pywo eweikuap Tupana ehay miwan miat iꞌe hap pote eweikupteꞌen woꞌokyꞌe haria wo e. Katupono hũria wuk hap yt uimowepiit hin i e. Maꞌato eweikuap mekewat miwan miat pote yt naku i yt eweiꞌe hin i iraniaꞌin me yt iꞌaparap i haria pe.
8 Katupono ti Ihainia Saꞌyru toineꞌen Tupana motypot eꞌat kaꞌiwat.
9 Miꞌi hawyi Iesui toto raꞌyn itote pyi Tupana motypot yat kape.
10 Itote ti toineꞌen wẽtup ok miit ipo kĩꞌã rakat. Miꞌi pote iraniaꞌin apo iꞌatuꞌe Iesui pe ikuasa teran haype. -Waku apo etimoehãinte miit Tupana motypot hap eꞌat pe iꞌatuꞌe.
11 Miꞌi hawyi Iesui tiꞌatuwesat -Pyno karãpe wẽtup eihũ Uweiria taꞌat Tupana motypot hap Saputu eꞌat pe yi kaꞌa pe pote taꞌi eipotpap neꞌi ihep hap ete.
12 Maꞌato ti wẽtup ok miit poꞌog waku mekewat Uweiria kai. Miꞌi pote ti aiwoꞌonapin hawe waku watipowyro kuap iraniaꞌin Tupana motypot hap eꞌat pe.
13 Miꞌi hawyi toꞌe mekewat miit pe -Pyno erepoporok to uhyt e. Miꞌi hawyi toiporok taꞌyn hawyi ipo kokawiat ewy raꞌyn.
14 Miꞌi hawyi itotiaria Wariseuria tuwenoꞌẽ itote pyi hawyi taꞌatukat raꞌyn aikotã Iesui auka hamo.
15 Miꞌi hawyi Iesui tikuap taꞌyn miꞌi tã iꞌatuminug neran hap hawyi toto raꞌyn itote pyi. Maꞌato miꞌi turan typyꞌi kahato miitꞌin tuwat upi. Miꞌi hap upi toiꞌatumoehãite kahato miitꞌin iꞌahuu rakaria.
16 Miꞌi hawyi toiꞌatupoꞌoro raꞌyn toran toꞌe iꞌatuepe -Yt uwe pe teiꞌo ewehenoi uwe uito e hap e.
17 Pyno miꞌi tã ti tutunug aikotã saꞌawyꞌi Tupana ehay moherep hat Isaia e hap ewy.
18 Mio tã e Isaia miwan me -Meiũ ti uhemiit sese uimiꞌairo uimikyꞌe kahato iꞌewyte uimowepiit kahato uipyꞌa piat hat. Miꞌi pote atum kahato uipaꞌãu uhehay moherep wuatꞌi miitꞌin piat hamo.
19 Miꞌi ti yt toꞌoehay toꞌoehay hin i miitꞌin nywo kat koꞌi kat koꞌi ete. Yt tehay pirik wo hin i. Muap upi hewyry pykai yt uwe i ihay kuap.
20 Ihakyꞌeꞌi rakaria wyti tukupteꞌen aikotã ariaꞌyp iaga yt hesaika i rakaria ewywuaria maꞌato miꞌi yt toipik hin i. Iꞌewyte yt hesaika i rakaria ariãty yt hẽtyhot esaika i rakat ewy yt tohasep hin i. Maꞌato miꞌiria wyti tutunug waku pe iꞌatuieineꞌen hap.
21 Miꞌi wyti aru wuatꞌi ywania miekatup wo topyhuꞌat. Miꞌi hap ewy ti saꞌawyꞌi Tupana ehay moherep hat Isaia e hap ewy.
Patꞌok Hap Eꞌyat Pe Pote Yt Eweikupteꞌen Kuap I
22 Miꞌi hawyi wẽtup ok miit taꞌatuereto Iesui kape yt iha pytig i rakat iꞌewyte yt ihay kuap i rakat mekewat ahiag ipiit piat rakat hawyi Iesui timoehãite hawyi meremo taꞌakasa iraꞌyn iꞌewyte ihay kuap i raꞌyn.
23 Miꞌi tã tutunug hawyi miitꞌin sem teꞌerehaꞌat kahato iminug kape hawyi apo iꞌatuꞌe -Meiẽ miit apo Tawi emiariru raꞌyn apo iꞌatuꞌe.
24 Maꞌato iraniaꞌin Wariseuria tikuap hawyi teꞌeroꞌe -Taꞌi mekewat Pesepu ahiagnia porekuat esaika hap kaipyi meiẽwat miit piit pe ahiag sopo hamuat iꞌatuꞌe.
25 Maꞌato Iesui tikuap iꞌatuwanetup hap hawyi toꞌe -Taꞌi aikotã iraniaꞌin ywania toꞌopatꞌok patꞌok hawyi tuuka tuuka toꞌope hawyi meremo toꞌomoma hap topyhuꞌat. Iꞌewyte iraniaꞌin tawa piaria iꞌewyte toꞌopatꞌok patꞌok hawyi tuuka tuuka toꞌope hawyi iꞌewyte toꞌomoma raꞌyn wy.
26 Iꞌewyte ahiag potpoꞌororia tuwepatꞌok patꞌok hawyi tuuka tuuka toꞌope toꞌope hawyi iꞌatumoma hap topyhuꞌat.
27 Taꞌi uito ti atiputsit kuap ahiag mekewat Pesepu e hap esaika hap kaipyi eweiꞌe wen maꞌato mio tã pote aikotã epotmuꞌeria taꞌatuputsit kuap ahiagnia e. Eiꞌe hap kaipyi eimepytꞌin maꞌat haria wo eweipyhuꞌat. Miꞌi hawyi taꞌatuhenoi kuap eiminug saꞌag hap etiat.
28 Maꞌato uito ti pywo sese atihep ahiag miitꞌin piit pyi Tupana esaika hap kaipyi pote eweikuap taꞌyn mesup taꞌyn Tupana toineꞌen morekuatno hap putꞌok e raꞌyn ehete.
29 Pyno yt uwe i ti teke kuap hesaika rakat yat pe hekareꞌen sat hamo maꞌato saꞌawyꞌi teke raꞌyn mekewat yat kaꞌiwat poꞌi poꞌi hamo hawyi totat kuap hekareꞌen iꞌyat pyi.
30 Miꞌi tupono uwe toineꞌen yt uiꞌe hap upi i miꞌi wyti ipyꞌahak uhetiat rakat. Iꞌewyte uwe yt uipowyro teran i miꞌiria ti miitꞌin sytpok haria wo neꞌi tukupteꞌen. Yt taꞌatukyi hin i miitꞌin uhewowi uimohey hamuat e.
Yt Kat I Ehehakyeraꞌat Hamuat Hap Motꞌi Hap Ereineꞌen Tupana Paꞌãu Mohit Hat Pote
31 Miꞌi pote ti pywo pe areꞌe ehepe -Pyno uwe uwe waure wo toineꞌen kat koꞌi kat koꞌi tominug saꞌag kai miꞌi hat wyti iwaure kuap tominug saꞌag. Maꞌato uwe uwe tuwekyryꞌi Tupana Paꞌãu wakuat ete miꞌi hat minug saꞌag wyti yt karãpe i toimohãpyk kuap i.
32 Iꞌewyte uwe uwe toineꞌen ihay saꞌag Miitꞌin Saꞌyru ete miꞌi hat wyti toimohãpyk kuap maꞌato uwe uwe ihay saꞌag Tupana Paꞌãu wakuat ete miꞌi hat wyti yt toimohãpyk kuap koran iꞌewyte meiũran e.
Ariaꞌyp Koꞌi Watikuap Kat Kat Ywa Kaipyi
33 Pyno toineꞌen eimikoi ywa wakuat kahato. Miꞌi kaipyi tuwẽtem mikoꞌi ywa wakuat sese rakat. Maꞌato toineꞌen eimikoi yp yt naku i rakat eweikuap haat yt naku i hap. Katupono iꞌatusat koꞌi tuweupi weupi. Miꞌi hap ete eweikuap mikoi ywa waku rakat iꞌewyte yt naku i rakat.
34 Pyno eiperia ti yt naku i nug haria aikotã moĩ satek kahato toineꞌen hap ewywuaria eweikupteꞌen. Yt kat i hin i tuwẽtem eiwẽ pyi waku rakat katupono howopy raꞌyn eipyꞌa yt nakuap i wo pote. Miꞌi kaipyi tuwẽtem eiꞌe hap yt naku i rakat.
35 Pyno eipyꞌa piat wakuat kaipyi tuwẽtem wakuap ti wen maꞌato yt nakuat i hap eipyꞌa piat kaipyi ti tuwẽtem yt nakuap i ti raꞌyn e.
36 Pywo pe ti mekewat woꞌoꞌairo hap sese eꞌat pe ti aru eiperia eiꞌe hap saꞌag kat eweiꞌe hap upi Tupana tiꞌapiheg ti aru. Miꞌi hawyi ti aru torannia kat eweiꞌe kat eweiꞌe hap yt naku i rakat upi Tupana tiꞌatuꞌapiheg hamuat.
37 Katupono mekewat eꞌat pe ti aru kat koꞌi kat koꞌi tuwẽtem eiwẽ pyi Tupana tikuap en waku sio yt hap koꞌi.
38 Miꞌi hawyi iraniaꞌin mekewat woꞌomuꞌe koro haria iꞌewyte mekewat Wariseuria teꞌeroꞌe Iesui pe -Urukaꞌiwat iꞌatuꞌe waku etimoherep uruepe yt uwe minug kuap i wataꞌakasa hamo iꞌatuꞌe.
39 Miꞌi hawyi Iesui tiꞌatuwesat -Aikotã ten koran eiperia yt uimohey i pykai ewehẽtup uhepe uiminug wakuat e. Maꞌato wẽtup yn Tupana mimoherep hap mekewat Tupana ehay moherep hat Iona etiat. Miꞌi yn atimoherep e.
40 Kat pote ti miꞌi tã aikotã Iona toineꞌen myẽꞌym eꞌat myẽꞌym ewãtym pira wato ymyẽpe miꞌi hap ewy ti aru Ihainia Saꞌyru topyhuꞌat myẽꞌym eꞌat myẽꞌym ewãtym iꞌasyp hawe.
41 Mekewat eꞌat pe woꞌoꞌairo hap eꞌat pe ti tawa Niniwe piaria yt nakuaria i eipe iꞌatuꞌe katupono miꞌiria taꞌatuꞌatoiat taꞌatuminug saꞌag koꞌi karãpe taꞌatukuap taꞌyn Iona henoi Tupana ehay hawyi. Maꞌato eweikuap pykai yt eiwemorem hin i Tupana kape. Pywo pe areꞌe ehepe koran ti toineꞌen meiũpe poꞌog Iona kawiat rakat.
42 Iꞌewyte mekewat woꞌoꞌairo eꞌat pe mekewat morekuat haryporia kawiat tama Sapa piat pe yt naku i rakaria eipe e katupono miꞌi tuut pya pyi kahato Sarumau iweꞌeg kahato rakat ehay kuap hamo. Maꞌato pywo pe areꞌe ehepe mio meiũpe toineꞌen poꞌog wakuat Sarumau kawiat rakat e.
Maꞌãu Saꞌag Taꞌaipok Saꞌawyꞌi Wuat Ieineꞌen Hap Kape Poꞌog Yt Nakuaria I Wywo Ikytsig Toipuẽti Hawyi
43 Miꞌi hawyi poꞌog Iesui toꞌe -Pyno eiweweꞌeg wo eweikupteꞌen katupono karãpe maꞌãu saꞌag tuwẽtem wẽtup ok piit pyi hawyi toto raꞌyn aikowo aikowo eiam kat hamo. Aiũpe tuwemohy hap kat hamo maꞌato yt toipuẽti kuap i.
44 Miꞌi hawyi toꞌe -Pyno waku araꞌaipok i raꞌyn saꞌawyꞌi wuat uiꞌyat aiũpe pyi uiwẽtem hap kape. Mio tã toꞌe hawyi taꞌaipok iraꞌyn. Miꞌi turan toineꞌen iꞌyat yt uwe wywo i. Ikahu kahato te waku pe kahato toineꞌen.
45 Tehaꞌat hawyi taꞌaipok towyriaꞌin wẽka hamo hawyi toterepoꞌok 7 maꞌãu saꞌag koꞌi poꞌog naꞌyn yt naku i saꞌawyꞌi wuat kai hawyi tukupteꞌen itote raꞌyn. Miꞌi hap kaipyi ti aru mekewat miit ete poꞌog naꞌyn yt naku i hap topyhuꞌat saꞌawyꞌi wuat heineꞌen hap kai. Miꞌi tã ti tuwemoherep koran wuaria miitꞌin yt nakuaria i ete.
46 Mio tã e Iesui ihay miitꞌin kapiat turan ity iꞌewyte iꞌywytꞌin tõꞌẽ raꞌyn hawyi tukupteꞌen oken note. Miꞌi hawyi teꞌeroꞌe -Uruehay teran Iesui wywo iꞌatuꞌe.
47 Mio tã e hawyi wẽtup ok henoi raꞌyn Iesui pe -Pyno waku erewanetup katupono ety iꞌewyte eꞌywytꞌin nuẽpe tukupteꞌen oken note iꞌatuehay ewywo mehin iꞌatuꞌe.
48 Maꞌato Iesui tiꞌatuwesat -Uweĩ uity sese iꞌewyte uweꞌin uheꞌywytꞌin sese.
49 Miꞌi hawyi Iesui topoha temiitꞌin kape. Miꞌi hawyi toꞌe -Pyno eweihaꞌat ro meiũpe katupono meiũpe tukupteꞌen uity sese iꞌewyte uheꞌywytꞌin sese
50 Katupono uwe uwe inug uiꞌywot mikyꞌesat nug haria ti tukupteꞌen uity sese uheꞌywytꞌin sese uheinytꞌin sese e.
