Mateu 14:1-36
14 Mekewat eꞌat pe ti Eroti toineꞌen morekuatno Karireia pe. Miꞌi turan toikuap taꞌyn aikotã Iesui minug koꞌi etiat.
2 Miꞌi hawyi toꞌe temiitꞌin me -Miꞌi ti Iuwãu woꞌosetꞌok hat raꞌyn tuwẽtem guꞌuro pyi. Miꞌi pote ti miꞌi miit hesaika kahato tomisepap moherep hamo.
3 Saꞌawyꞌi Eroti tiꞌatupoꞌoro raꞌyn Iuwãu pyhik hamo. Taꞌatupopoi hawyi taꞌatupag naꞌyn woꞌopyhik hawe. Miꞌi tã tutunug toꞌywyt Wiripi ehayryꞌi tomisat mikyꞌesat ewy.
4 Miꞌi hawyi miꞌi etiat Iuwãu woꞌosetꞌok hat toꞌe karania wo neꞌi Eroti pe. Mio tã e -Pyno mekewat ainapin hap hawe tohenoi yt kan hamo i etat eharyꞌi wo Erotia e.
5 Miꞌi hap kaipyi Eroti tiꞌauka teran Iuwãu woꞌosetꞌok hat maꞌato tokenꞌẽ miitꞌin pupi katupono iꞌatuwanetup hawe taꞌatupuẽti Iuwãu woꞌosetꞌok hatno wyti Tupana ehay moherep hat toineꞌen.
6 Maꞌato mekewat morekuat Eroti ywãꞌĩ hap mowepiit hap eꞌat pe ti mekewat Erotia mepyt ihairu torannia miitꞌin ehamo. Miꞌi hap ti morekuat tipuẽti ikahu kahato.
7 Miꞌi Pote toꞌe piꞌã pe -Kat som emikyꞌesat ehẽtup uhepe pote atum epe emikyꞌesat ewy e.
8 Miꞌi hawyi mio tã e hawyi toto raꞌyn toty kape -Kat som waku ahẽtup toꞌe toty piat hamo. Miꞌi hawyi tohẽtup -Atikyꞌesat wyti Iuwãu woꞌosetꞌok hat akag kuiꞌa pe.
9 Mio tã toꞌe hap ewy tutunug naꞌyn mekewat piꞌã miẽtup ewy pote morekuat Eroti iꞌarot kahato raꞌyn maꞌato ti toꞌe raꞌyn saꞌawyꞌi torannia tomiwẽka koꞌi ehamo miꞌi hap ewy tutunug naꞌyn mekewat piꞌã mikyꞌesat ewy.
10 Miꞌi hawyi toipoꞌoro raꞌyn temiit woꞌopyhik hawe Iuwãu woꞌosetꞌok hat akag tek hamo
11 Hawyi taꞌatuerut raꞌyn Iuwãu woꞌosetꞌok hat akag kuiꞌa pe hawyi taꞌatuium naꞌyn piꞌã pe hawyi totioto raꞌyn toty kape.
12 Miꞌi hawyi Iuwãu emiitꞌin tõꞌẽ raꞌyn hawyi taꞌatuereto raꞌyn ipiit iꞌasyp hamo hawyi tuwat raꞌyn Iesui piat henoi hamo.
13 Miꞌi hawyi Iesui tikuap taꞌyn Iuwãu etiat hawyi Iesui tuwẽtem iraꞌyn yara puo hawyi toto raꞌyn tuweran aikope miitꞌin yt uwe i hap kape. Maꞌato miitꞌin sem tikuap aiũpe toineꞌen hap hawyi tuwat raꞌyn typyꞌi kahato yi upi Iesui upi.
14 Maꞌato karãpe Iesui tuwẽtem naꞌyn yara pyi turan taꞌakasa raꞌyn miitꞌin sem õꞌẽ tewowiat haria kape hawyi toiꞌatukyꞌe kahato hawyi toiꞌatumoehãite kahato iꞌatuhuu rakaria itotiaria.
15 Miꞌi hawyi wãtymꞌi turan hemiitꞌin tõꞌẽ raꞌyn Iesui kape hawyi teꞌeroꞌe -Pyno wãtym naꞌyn mio meiũpe yahig wato tote uhyt iꞌatuꞌe. Miꞌi tupono etiꞌatupoꞌoro i ro miitꞌin meiũpe pyi hawyi waku tuwat taꞌatumiꞌu wuat soꞌokyiꞌat hamo iꞌatuꞌe.
16 Maꞌato Iesui tiꞌatuwesat -Yt atiꞌatupoꞌoro i miitꞌin katupono waku eipe eweimoꞌẽ ro iꞌatumiꞌu wuat koꞌi e.
17 Maꞌato teꞌeroꞌe -Maꞌato toineꞌen miꞌu 5 man hawyi typy pira yn urukaꞌiwat iꞌatuꞌe.
18 Mio tã iꞌatuꞌe pote Iesui toꞌe -Pyno eweterut ro meikowo uhewowi.
19 Miꞌi hawyi toꞌe miitꞌin sem me -eweiꞌapyk to meiũpe mopep hawe e. Mio tã toꞌe hawyi Iesui tat raꞌyn 5 a man iꞌewyte typy pira hawyi tehaꞌat ywaipe hawyi waku kahato e Tupana pe hawyi toipatꞌok patꞌok taꞌyn man hawyi tutum naꞌyn temiitꞌin me. Pyno eweimoꞌẽ ro miitꞌin.
20 Miꞌi hawyi torannia teꞌerenuk taꞌyn hawyi iꞌatuꞌok kahato raꞌyn hawyi hemiitꞌin tiporeraꞌat iꞌatumiꞌu ieĩpyt koꞌi 12 eꞌyrysakag howopy te.
21 Miꞌi hawyi teꞌerenuk 5 miu ihainia maꞌato haryporiaꞌin iꞌewyte hirokaria yt uwe i morania.
Iesui Hewyry Raꞌyn Yꞌy Totiat
22 Miꞌi hawyi Iesui toꞌe temiitꞌin -Eweiwat ro yara puo uheꞌyian me mekewat ihyemyiꞌa ysakpo. Miꞌi hawyi toiꞌatupoꞌoro raꞌyn temiitꞌin hawyi iꞌewyte miitꞌin sem tuwat iraꞌyn wy.
23 Miꞌi hawyi Iesui tiꞌatupoꞌoro iraꞌyn miitꞌin hawyi Iesui toto raꞌyn yityꞌok kape tuweran tupana wywuat tehay hamo. Wãtym kaꞌap tuweran toineꞌen itote.
24 Meke turan ni yara toto ihy pyꞌasetpuo raꞌyn turan ihytꞌokmoĩ tipemak pemak kahato haty wo kahato yara kat pote ywytu esaika hap putꞌok e tuete.
25 Miꞌi turan ihatꞌok kai i myẽꞌym ora pyi 6 ora kapiat turan Iesui toto raꞌyn iꞌatuewowi maꞌato toto yawa upi
26 Miꞌi turan hemiitꞌin teꞌerehaꞌat turan Iesui tuut yawa tote raꞌyn hawyi toꞌogyt toꞌogyt neꞌi -Uweĩ meiẽ iꞌatuꞌe. Sio miit ehog neꞌi iꞌatuꞌe hawyi toꞌopytitꞌi itote genꞌẽ pono.
27 Miꞌi turan Iesui tiwẽpowat iꞌatuewowi -Yt eweikenꞌẽ teiꞌo uipupi uito rat e.
28 Miꞌi Hawyi Peteru toꞌe -Pyno uikaꞌiwat apo en miꞌi pote uikay kay ro ewewowi e hawyi mono areto yawa tote ewowi uikaꞌiwat e.
29 Miꞌi hawyi Iesui tiwesat -Eriot ro pyno e. Mio tã e hawyi Peteru tuwẽtem yara pyi hawyi hewyry raꞌyn yawa upi toto hãpyk Iesui ewowi.
30 Maꞌato miꞌi pykai karãpe toto turan toikuap ywytu hesaika hap hawyi tokenꞌẽ kahato hawyi meremo minꞌe neꞌi. Miꞌi pote iwẽpapꞌi tehay pirik wo -Uipowyro en uikaꞌiwat e
31 Mio tã e hawyi Iesui topoha raꞌyn hawyi toꞌykesat Peteru hawyi toꞌe -Katupono kurin kahato epiat uimohey hap kat poteĩ erewanetup koꞌi koꞌi neꞌi e.
32 Miꞌi hawyi typyꞌok tuwat raꞌyn yara puo turan ywytu nik taꞌyn.
33 Miꞌi pote hemiitꞌin timotypot kahato raꞌyn Iesui hawyi teꞌeroꞌe -Taꞌi pywo ti rat en Tupana Saꞌyru mehin iꞌatuꞌe.
34 Miꞌi hawyi Iesui iꞌewyte hemiitꞌin teꞌereꞌysakpo raꞌyn hawyi putꞌok iꞌatuꞌe raꞌyn mekewat yi Kenesare tote raꞌyn.
35 Miꞌi tote wuatꞌi miitꞌin tikuap taꞌyn Iesui putꞌok e hap hawyi torannia iꞌahuu rakaria mekewat yi tote pywiat yt pya hin i ieineꞌen haria henoi henoi raꞌyn hawyi taꞌatukuap taꞌyn. Miꞌi pote typyꞌi kahato taꞌatuerepoꞌok iꞌahuu rakaria hewowi.
36 Miꞌi hawyi taꞌatuhẽtup Iesui pe -Pyno mesuwe uruiꞌatuporokpun iꞌahuu rakaria esokpe emig hap kyewi iꞌatuꞌe hawyi mekewat esokpe emig haria torannia iꞌatuehãite raꞌyn.
