Mateu 15:1-39
15 Miꞌi hawyi iraniaꞌin Wariseuria iꞌewyte iraniaꞌin mekewat woꞌomuꞌe koro haria tõꞌẽ Ierusarẽi kaipyi taꞌatuehay Iesui wywuat hamo hawyi apo iꞌatuꞌe Iesui pe.
2 -Kat pote som ewat emiitꞌin teꞌerenuk yt teꞌereposei rakirẽ i Miꞌi tã neꞌi taꞌatunug pote yt taꞌatumotypot hin i saꞌawyꞌi wuat aimuꞌe hap koꞌi iꞌatuꞌe.
3 Mio tã iꞌatuꞌe pote Iesui tiꞌatuwesat -Kat pote som pyno eipe yt eweitunug i Tupana woꞌonapin hap koꞌi. Katupono ti eipe ewetunug eiwekaipywiat eiwoꞌomuꞌe hap yn.
4 Katupono Tupana toꞌe ehepe -Eweimotypot ro eiꞌywotꞌin iꞌewyte eityꞌin. Iꞌewyte toꞌe wy -Iꞌewyte uwe ihay saꞌag toꞌywot toty etiat hat waku iꞌauka wo topyhuꞌat aikotã Tupana toꞌe hap ewy e.
5 Maꞌato eiperia ti eiwoꞌomuꞌe mio tã eweiꞌe -Waku ti karãpe toineꞌen aimiium aiꞌywot powyro hamuat yt watum i raꞌyn katupono mio tã eweiꞌe eiꞌywotꞌin me -Pywo uimiium epiatnuat epowyro hamuat wyti atum yne raꞌyn Tupana pe eweiꞌe iꞌatuepe.
6 Miꞌi tã eweitunug mote -Yt uruipowyro kuap i uruꞌywotꞌin eweiꞌe. Miꞌi tã neꞌi ewetunug pote Tupana ehay pun haria wo neꞌi eweikupteꞌen eiwat eiwekaipywiat eiwoꞌomuꞌe hap kaipywiat.
7 Miꞌi tã nug haria wyti typy ihay rakaria tukupteꞌen. Pywo pe kahato saꞌawyꞌi Isaia henoi raꞌyn ehetiat.
8 Miꞌiria pe Tupana toꞌe -Meimewuaria miitꞌin wyti taꞌatuwẽ pyi neꞌi uimotypot maꞌato iꞌatupyꞌa wyti pya kahato uikai toineꞌen.
9 Pyno iꞌatunapin hap koꞌi yt putꞌok e hin i uimotypot hamo katupono miꞌiria woꞌonapin hap wyti mesuwat miitꞌin wanetup hap koꞌi kaipyi maꞌato Tupana woꞌonapin hap eweiꞌe. E ti Tupana ehepiat pe Isaia miwan 29.13 pe e Iesui apo e haria pe.
10 Miꞌi hawyi Iesui tiꞌatukay kay raꞌyn miitꞌin sem hawyi toꞌe iꞌatuepe -Eiwanetup hawyi eweikuap to uiꞌe hap.
11 Pyno ti mekewat eiwẽ pywiat eimiꞌu wyti yt eimohun kuap i maꞌato mekewat eiwẽ pywiat sehay yt naku i hap wyti topyhuꞌat eimohun hap.
12 Miꞌi hawyi ipotmuꞌeria tokokaꞌat hewowi hawyi apo iꞌatuꞌe -Etikuap apo mekewat Wariseuria mopyꞌahak neꞌi ehay hap koꞌi iꞌatuꞌe.
13 Miꞌi hawyi Iesui tiꞌatuwesat -Pyno torannia mikoi koꞌi mekewat uiꞌywot atipy piat yt imikoi koꞌi pote miꞌiria toipuruk yne hamuat e.
14 Pyno yt arewanetup teran i poꞌog Wariseuria kape katupono miꞌiria ti tukupteꞌen yt iha pytig i rakaria ewy. Miꞌiria ti karãpe yt iha pytig rakaria i toꞌoporereto iraniaꞌin hawyi meremo hewo yne yi kaꞌa pe.
15 Miꞌi hawyi Peteru toꞌe Iesui pe -Ehenoi ro mekewat saꞌawyꞌi wuat ereꞌe hap koꞌi.
16 Mio tã e pote Iesui tiwesat -Yt eipe wyti te apo pyno eweikuap e. Miꞌi hawyi Iesui tiꞌatuwesat -Uiwyriaꞌin yt eweikuap i te apo uiꞌe hap e. Pyno iꞌapyryp we te eiwanetup hawe e.
17 Pyno kat som watuꞌu aiwẽ puo hawyi toto aimeꞌen kape hawyi tuwẽtem aipiit puo yn e.
18 Maꞌato aipyꞌa pywiat aiwẽ puo tuwẽtem miꞌi wyti topyhuꞌat miitꞌin mohun hamo e.
19 Kat pote ti aipyꞌa pyi tuwẽtem wanetup saꞌag hap kaipyi. Miit auka hap iꞌewyte yt weꞌeg i hap hawyi yt naku i eiminug eipiit iraniaꞌin wywuat hap etiat rakat. Iꞌewyte sereꞌokꞌe hat Iꞌewyte heso rakaria iꞌewyte ihay tupap kahato rakaria.
20 Pyno meimewat koꞌi nug hap kaipyi ti miit mohun topyhuꞌat maꞌato mekewat watenuk yt watiposei wywuat hap wyti yt kat i topyhuꞌat imohun hap.
Haryporia Kanaꞌã Kaipyi Timohey Kahato Iesui
21 Mio tã toꞌe hawyi Iesui toto raꞌyn mekewat wẽtup yi mekewat tawa Tiro iꞌewyte tawa Sitau kawiat yt pya hin i rakat kape.
22 Miꞌi turan toineꞌen wẽtup ok haryporia Kananeu ywania mekewat yi tote. Miꞌi ti tuut hewowi hawyi iwẽpapꞌi tehay pirik wo itote -Uikaꞌiwat Tawi emiariru erehaꞌat ro uikyꞌe hap wywo uhewowi katupono uimepyt wyti yt naku i kahato toineꞌen ahiag tipun tipun kahato tuereto.
23 Maꞌato Iesui yt tiwesat hin i miꞌi pote hemiitꞌin tokokaꞌat hewowi hawyi teꞌeroꞌe -Etipoꞌoro ro meiẽwat haryporia katupono ihay pirik kahato raꞌyn iꞌatuꞌe.
24 Miꞌi hawyi Iesui tiwesat mekewat haryporia -Pyno uito wyti ariot meikowo mekewat Uweiria howosat rakaria ewywuaria Isareu ywania kape yn e.
25 Maꞌato mio tã e Iesui pykai tokosap haryporia hawyi tuwepỹꞌãtutuk ipy ywytpe hawyi toꞌe -Uikaꞌiwat uipowyro ro en.
26 Maꞌato mio tã e Iesui iwesat -Yt naku i ti watum aimepytꞌin miꞌu wuat awareria miꞌu wo neꞌi e.
27 Maꞌato mio tã e pote haryporia tiwesat -Pywo kahato mimi maꞌato kue awareria tuꞌu tokaꞌiwat miꞌu koꞌi hewo rakat yparakai ywytꞌokpypiat an e haryporia.
28 Miꞌi hawyi Iesui toꞌe -Taꞌi uimohey kahato hat en haryporia. Pyno mio waku raꞌyn atunug kat som emikyꞌesat ewy. Mio tã e turan imepyt waku iraꞌyn.
29 Miꞌi hawyi Iesui toto iraꞌyn itote pyi mekewat yi Karireia hyemyiꞌa kape hawyi itote pyi ipoĩꞌam naꞌyn yityꞌok kape hawyi taꞌapyk itote.
30 Miꞌi turan miitꞌin sem tuwat kahato raꞌyn Iesui kape turan taꞌatueropoꞌok kahato ipy kĩꞌã rakaria iꞌewyte ipiit heg nakaria iꞌewyte yt iha pytig i rakaria iꞌewyte yt ihay kuap i rakaria. Iꞌatu kahato taꞌatuereto aikotã aikotã iꞌahuu rakaria. Miꞌi koꞌi taꞌatuporokpun ipy yatype. Miꞌiria toiꞌatumog yne itote.
31 Miꞌi tã tutunug mote miitꞌin teꞌeruwanetup kahato mekewat yt ihay kuap rakaria iꞌatuehay iraꞌyn pote. Iꞌewyte ipiit heg nakaria toimog naꞌyn pote. Iꞌewyte ipy kĩꞌã rakaria iꞌatuewyry iraꞌyn pote iꞌewyte yt iha pytig i rakaria teꞌereꞌakasa iraꞌyn pote. Miꞌi hawyi itotiaria miitꞌin teꞌerehum kahato -Waku kahato en Isareu eTupana iꞌatuꞌe.
Iesui 4 Miu Miitꞌin Toipoꞌi 7 Man Pira Kurin Wywo
32 Miꞌi hawyi Iesui tiꞌatukay kay temiitꞌin hawyi toꞌe iꞌatuepe -Taꞌi atiꞌatukyꞌe kahato meimewaria miitꞌin kat pote ti myẽꞌym eꞌat naꞌyn tukupteꞌen uiwywo meiũpe maꞌato yt kat i hin i iꞌatumiꞌu wuat koꞌi. Yt atiꞌatupoꞌoro teran hin i iꞌatuesyꞌat wywo katupono iꞌatuesyꞌat wywo neꞌi tuwat pote ti ren teꞌereꞌat iꞌatuperup neꞌi muap upi e.
33 Mio tã pote hemiitꞌin apo iꞌatuꞌe Iesui pe -Aikotã ten watipuẽti meiũpe yahig wato tote iꞌatupoi hamuat iꞌatuꞌe.
34 Karania pyno toineꞌen eheman e Iesui apo e. Miꞌi pote taꞌatuwesat -Taꞌi toineꞌen 7 a yn man iꞌewyte toineꞌen pira hit koi yn iꞌatuꞌe.
35 Miꞌi hawyi Iesui toꞌe miitꞌin me -Eiweꞌapyk to yi upi e.
36 Mio tã toꞌe hawyi totat 7 man iꞌewyte pira hit koꞌi hawyi waku kahato e Tupana pe. Mio tã toꞌe hawyi toipotꞌok hawyi tutum temiitꞌin me hawyi taꞌatumoꞌẽ raꞌyn miitꞌin me.
37 Miꞌi hawyi torannia teꞌerenuk itote hawyi iꞌatuꞌok kahato raꞌyn hawyi hemiitꞌin tiporeraꞌat raꞌyn iꞌatumiꞌu ieĩpyt koꞌi. 7 yrysakag ieĩpyt koꞌi taꞌatupuẽti.
38 Mekewaria ieinuk haria tukupteꞌen 4 miu ihainiaꞌin maꞌato haryporiaꞌin iꞌewyte hirokaria yt uwe i imorania.
39 Miꞌi hawyi Iesui tiꞌatupoꞌoro iraꞌyn miitꞌin hawyi toto iraꞌyn yara puo mekewat yi Makata e hap kape.
