Mateu 16:1-28
16 Miꞌi hawyi iraniaꞌin Wariseuria iꞌewyte iraniaꞌin Satuseuria tuwat Iesui kape taꞌatuehay hamo katupono taꞌatukyꞌesat taꞌatuꞌe hamuat Iesui tunug tomisepap hap koꞌi ikuasa teran haype. Miꞌi haype teꞌeroꞌe -Waku koran wẽtup etimoherep yt uwe misepap i nug hap pote uruimohey raꞌyn Tupana kaipywiat esaika hap iꞌatuꞌe.
2 Maꞌato Iesui tiꞌatuwesat -Wãtymꞌi turan wuat wyti eweikuap hawyi eweiꞌe --Taꞌi koitywy ti mukiꞌite aat kahu kahato hamuat katupono atipy ihup pote eweiꞌe.
3 Pyno mukiꞌite hune ete eiwehaꞌat atipy kape turan ihup hawyi --Yt aat kahu hin i raꞌyn maꞌato iꞌaman hamuat hap eweiꞌe. Miꞌi hap koꞌi eweikuap kahato pykai uimimoherep ehepiat koꞌi yt eweikuap hin i aikotã aru Tupana topyhuꞌat morekuatno hap e.
4 Miꞌi hap ewy wyti koran miitꞌin yt nakuaria i yt uimohey i haria. Miꞌi kaipyi ti ewehẽtup uhepe yt uwe misepap i moherep ehepiat hap. Maꞌato mekewat Iona etiat yn topyhuꞌat eimikuap aikotã wyti aru uhetiat hap e. Mio tã toꞌe hawyi tuwẽtem iraꞌyn itote pyi hawyi toto raꞌyn.
5 Miꞌi hawyi karãpe hemiitꞌin teꞌereꞌysakpo raꞌyn mekewat hyemyiꞌa mekewat aat wẽtem kawiatno. Miꞌi turan taꞌatuwaure taꞌatueman koꞌi.
6 Miꞌi hawyi Iesui toꞌe temiitꞌin me -Pyno waku eiweꞌeg wo eweikupteꞌen mekewat aikotã man apopyt ewywuaria Wariseuria iꞌewyte Satuseuria pupi e.
7 Mio tã e pote hemiitꞌin teꞌeroꞌe toꞌope toꞌope -Mio tã e yt waterut i aheman hap pote iꞌatuꞌe toꞌope.
8 Maꞌato Iesui tikuap mio tã iꞌatuꞌe hawyi apo e -Kat poteĩ ehehay yt waterut i aheman hap mio tã e eweiꞌe. Kat pote uimohey hap kurin kahato toineꞌen eikai e.
9 Maꞌato yt eweikuap te apo mekewat 5 man atimowato 5 miu ihainia poi hamuat hap. Miꞌi kaipyi karania yrysakag ieĩpyt eweipuẽti.
10 Iꞌewyte mekewat 7 a man kaipyi 4 miu ihainiaꞌin teꞌerenuk miꞌi kaipyi apo karania yrysakag me heĩpyt eweipuẽti e.
11 Miꞌi tupono apo yt uwe kuap i apo yt man ete i uhehay hap e. Mio tã are eiweꞌeg wo o mekewat Wariseuria iꞌewyte Satuseuria tukupteꞌen man apopyt ewywuaria hap pupi are.
12 Mio tã e hawyi hemiitꞌin tikuap taꞌyn yt mekewat man sese apopyt yt ete i ihay hap maꞌato taꞌatukuap taꞌyn mekewat aikotã Wariseuria iꞌewyte Satuseuria tukupteꞌen hap etiat tohenoi hap.
13 Miꞌi hawyi Iesui toto raꞌyn mekewat yi yt pya hin i mekewat tawa Sesareia Wiripi ieineꞌen hap kape. Itote apo e temiitꞌin me -Uweꞌin som teꞌeroꞌe meiẽ ti Tupana Saꞌyru iꞌatuꞌe uhepe.
14 Mio tã e pote taꞌatuwesat -Taꞌi En wyti iraniaꞌin me Iuwãu woꞌosetꞌok meiẽ iꞌatuꞌe maꞌato iraniaꞌin wyti meiẽ ti Eria iꞌatuꞌe maꞌato iraniaꞌin wyti meiẽ ti Ieremia iꞌatuꞌe iꞌewyte iraniaꞌin wyti meiẽ ti wẽtup ok saꞌawyꞌi wuat Tupana ehay moherep hat iꞌatuꞌe.
15 Maꞌato ehepe apo uweĩ uito e Iesui apo e.
16 Mio tã e pote mekewat Simau e hap wẽtup het Peteru tiwesat -Taꞌi En wyti urukaꞌiwat Nesia e hap Tupana wuatꞌi eꞌat piat ieineꞌen hat Saꞌyru e.
17 Miꞌi hawyi Iesui tiwesat -Pywo kahato e hawyi toꞌe -Simau Iuwãu saꞌyru e en wyti iwepiit sese rakat kat pote pywo en yt mesuwat rotiaria i yt mimuꞌe hin i maꞌato ti tuut emuꞌe hap uiꞌywot atipy piat kaipyi.
18 Miꞌi tupono areꞌe ehepe eset wyti Peteru Iuwãu saꞌyru nu hit e hap. Meiũwat uito areineꞌen nu wato kawiat netap ãkukag ewy. Miꞌi tote ti aru atunug kahato uimohey haria uimohey iheg miat haria. Miꞌi pote ahiag esaika hap putꞌok e iꞌatuete pykai yt toimoma kuap uimohey iꞌatuepiat hap.
19 Miꞌi tupono atum naꞌyn epe miitꞌin porerokosap Tupana toineꞌen morekuatno hap kapiat hanuat. Mesuwat yi totiaria miitꞌin airo hatno ereineꞌen pote iꞌewyte atipy kapiat miitꞌin aro hatno ereineꞌen e.
20 Miꞌi hawyi Iesui toꞌe temiitꞌin me -Yt uwe pe teiꞌo ewehenoi miꞌi ti Nesia aimiekatup taꞌyn aipotypot wuat yt eweiꞌe teiꞌo.
Iesui Tokuꞌuro Hap Iꞌewyte Guꞌuro Kaipywiat Wẽtem Hap Etiat Tohenoi
21 Miꞌi turan eꞌyian mete Iesui henoi raꞌyn aikotã aru topyhuꞌat tetiat hap koꞌi temiitꞌin me -Pyno waku areto Ierusarẽi kape maꞌato itote ti aru Iuteuria akagnia iꞌewyte paꞌi koro koꞌi akag koꞌi iꞌewyte mekewat Muisei miwan kuap kahato haria ti aru uimosoꞌopot kahato itote hawyi ti aru uiꞌauka raꞌyn. Maꞌato ti aru myẽꞌym eꞌat hap ete arẽtem iraꞌyn guꞌuro pyi.
22 Miꞌi hawyi Peteru tikay kay tuwatꞌi te miꞌi hawyi mio tã e -Taꞌi Tupana yt ti aro i miꞌi tã hap pote. Yt karãpe i taꞌatunug kuap miꞌi tã hap eete.
23 Mio tã e pote Iesui tuwemorem Peteru kape hawyi toꞌe -Erẽtem no uikaipyi ahiag e katupono en wyti aikotã nu toineꞌen muap tote aipysatpun hanuat ewy neꞌi. Miꞌi tupono ti ewat ewanetup hap mesuwat rotiaria miitꞌin wanetup hap ewy neꞌi. Yt Tupana woꞌonapin hap ewy hin i.
24 Mio tã toꞌe hawyi Iesui toꞌe temiitꞌin me -Pyno uwe uwe toto teran uhupi miꞌi haria waku iꞌatoiat yne towat tomikyꞌesat koꞌi e hawyi waku eꞌauka hap topyhuꞌat uimohey upi. Taꞌi uiꞌauka pote waku uiꞌauka katupono iheg me areineꞌen Tupana imohey hamuat hap upi waku eweiꞌe.
25 Maꞌato uwe uwe poꞌog inug teran tomikyꞌesat yn miꞌi hat yt karãpe i ipuẽti kuap toieineꞌen sese hap. Maꞌato uwe iwaure tomikyꞌesat nug hap uimikyꞌesat nug hamuat miꞌi hat yn ipuẽti kuap toieineꞌen hap sese e.
26 Maꞌato uwe tuwehamanaꞌi mesuwat rotiat tekat puẽti hamuat kape yn tuwanetup pote miꞌi hat ipun neꞌi toieineꞌen hap sese. Katupono ti yt kat i mesuwat rotiat putꞌok e kuap eieineꞌen saꞌup nug hamo.
27 Katupono ti aru Ihainia Saꞌyru taꞌaipok meremo toꞌywot esaika wywo iꞌewyte temiitꞌin atipy piaria nywo. Miꞌi hap eꞌat pe ti aru torannia imoherep taꞌatuminug koꞌi mekewat eꞌat pe.
28 Pywo pe ti areꞌe ehepe mesuwat uiꞌe hap wyti pywuat sese rakat tukupteꞌen wyti aru iraniaꞌin mesuwat rote yt ikuꞌuro i te rakaria Iesui yt kuꞌuro i te turanuat haria ti aru teꞌeraꞌakasa te Ihainia Saꞌyru tuut morekuatno hap kape.
