Mateu 17:1-27
17 Miꞌi hawyi 6 eꞌat tokosap hawyi Iesui toto raꞌyn yityꞌok ywaiti kahato rakat kape. Miꞌi turan tuwewywo totioto Peteru hawyi toꞌywytꞌin Tiaku hawyi Iuwãu.
2 Itote ti teꞌereꞌakasa Iesui kape tuweupi kahato hewa imohit kahato aikotã aat ewy. Hesokpe ikytsig kahato aikotã ariãtyhot ewy
3 Hawyi temiitꞌin teꞌereꞌakasa Muisei hawyi Eria kape iꞌatuehay Iesui wywo.
4 Miꞌi pote Peteru toꞌe Iesui pe -Pyno waku kahato meiũpe watoineꞌen. Miꞌi pote etikyꞌesat pote urutunug kuap myẽꞌym eheꞌog meiũpe e wẽtup ewatno wẽtup Muisei watno hawyi wẽtup Eria watno e Peteru.
5 Mio tã e Peteru ihay turan ywyhig putꞌok e imohit kahato rakat putꞌok e hawyi yt heremo i tukupteꞌen itote. Miꞌi kaipyi tuut sehay mio tã e hap -Meiẽ ti Uhaꞌyru uimikyꞌe kahato uimowepiit sese hat. Pyno waku eweiwanetup kahato o kat e som iꞌe hap kape
6 Maꞌato karãpe hemiitꞌin tikuap taꞌyn sehay hawyi teꞌerokenꞌẽ kahato raꞌyn itote hawyi teꞌerepỹꞌãtutuk hawyi porag iꞌatuꞌe taꞌatuewa wo yi tote.
7 Miꞌi turan Iesui tokosap iꞌatuewowi hawyi toiꞌatuemig hawyi toꞌe -Eipoĩꞌam no. Yt eweikenꞌẽ teiꞌo e.
8 Miꞌi hawyi teꞌerehaꞌat taꞌatusaipe pe turan yt uwe i raꞌyn iraniaꞌin itote. Maꞌato Iesui yn naꞌyn toineꞌen.
9 Miꞌi hawyi tõꞌẽ iraꞌyn yityꞌok kaipyi turan muap upi toꞌe temiitꞌin me -Yt uwe pe teiꞌo ewehenoi eiꞌakasa hap koꞌi e. Maꞌato karãpe Ihainia Saꞌyru tuwẽtem iraꞌyn guꞌuro pyi hawyi waku raꞌyn ewehenoi.
10 Mio tã e pote hemiitꞌin apo iꞌatuꞌe -Kat pote som mekewat woꞌomuꞌe koro haria teꞌeroꞌe -Taꞌi saꞌawyꞌi te ti Eria ti hamuat putꞌok e Tupana saꞌyru uut hap eꞌyian mete iꞌatuꞌe apo iꞌatuꞌe tope
11 Miꞌi hawyi toiꞌatuwesat -Pywo pe ti areꞌe taꞌi tuut hamuat wyti Eria torannia piat muap mohãpyk hamuat.
12 Miꞌi pote pywo pe areꞌe ehepe taꞌi pywo ti rat Eria tuut hamuat maꞌato yt uwe i ikuap. Maꞌato taꞌatumosoꞌopot kahato taꞌatumikyꞌesat ewy aikotã Ihainia Saꞌyru mosoꞌopot hap ewy.
13 Taꞌi uruikuap taꞌyn koitywy kat eꞌe hap iꞌatuꞌe. Taꞌi mekewat woꞌosetꞌok hat Iuwãu wyti saꞌawyꞌi wuat Tupana ehay moherep hat Eria ereꞌe hawe ti iꞌatuꞌe.
14 Miꞌi hawyi karãpe putꞌok iꞌatuꞌe raꞌyn mekewat miitꞌin sem ete turan tokosap wẽtup ok ihainia Iesui kape hawyi tuwepỹꞌãtutuk hewowi
15 Hawyi toꞌe -Uikaꞌiwat e waku erewanetup uimepyt kyꞌe hap ete. Katupono miꞌi ti ikuꞌuro kuꞌuro tuereto rakat haty wo. Karania wo neꞌi raꞌyn taꞌat aria pe iꞌewyte yꞌy pe.
16 Miꞌi ti aterut epotmuꞌeria kape imoehãite hamo wen maꞌato yt taꞌatumoehãite kuap i.
17 Miꞌi hawyi Iesui itotiaria pe toꞌe -Pyno eiperia miitꞌin yt uimohey haria i. Areineꞌen motꞌi apo eiwywo pykai yt uimohey i te. Miꞌi hawyi toꞌe -Eterut ro meikowo kurum hin e.
18 Miꞌi hawyi toꞌe wẽtup tehay wo yn hiag me hawyi meremo tuwẽtem naꞌyn ahiag hawyi meremo kurum hin waku iraꞌyn.
19 Miꞌi tã tutunug hawyi meremo hemiitꞌin tokokaꞌat Iesui kape teꞌeruweran hawyi apo iꞌatuꞌe -Kat pote som uruto yt uruiputsit kuap i mekewat ahiag iꞌatuꞌe.
20 Mio tã iꞌatuꞌe pote Iesui tiꞌatuwesat -Taꞌi kat pote ti eiperia yt uimohey kahato i pote. Pywo pe ti areꞌe ehepe uimohey ehepiat aikotã mekewat mikoi Mutata iãꞌỹi kurin kat ewywuaria eweikupteꞌen pote karãpe eweiꞌe -Ereto ro meiũpe pyi eweiꞌe mekewat yityꞌok pe pote meremo toto raꞌyn e. Pyno miꞌi tã uimohey ehepiat hap pote pywo ehesaika hap putꞌok e yne nug hamo e.
21 Maꞌato meiũwat ahiag putsit hamo pote ti waku saꞌawyꞌi ehẽtup kahato ewemosyꞌat wywo pote yn.
22 Wẽtup eꞌat pe Iesui potmuꞌeria teꞌeraꞌatunug mekewat yi Karireia pe. Miꞌi turan Iesui toꞌe iꞌatuepe -Pyno Ihainia Saꞌyru ti aru taꞌatuium naꞌyn suraraꞌin po pe.
23 Hawyi ti aru taꞌatuꞌauka raꞌyn maꞌato ti aru myẽꞌym eꞌat hap ete tuwehymut iraꞌyn. Mio tã e pote ipotmuꞌeria iꞌatuꞌarot kahato raꞌyn.
24 Miꞌi hawyi karãpe Iesui putꞌok e raꞌyn temiitꞌin wywo mekewat tawa Kawanaum pe. Miꞌi turan mekewat Tupana motypot yat piat saꞌup atunug hat apo e tuweran turan Peteru pe. Miꞌi tã e -Eiwat eimuꞌe hat apo yt haꞌupnug hin i Tupana motypot yat pe.
25 Mio tã e pote Peteru -Taꞌi tohaꞌup nug nat mehin e. Mio tã toꞌe hawyi Peteru teke raꞌyn netap maꞌato yian mete Iesui henoi ti raꞌyn aikotã hamuat hap. Mio tã toꞌe Simau me -Aikotã etipuẽti en uweĩ haꞌup nug kuap mesuwat yi totiat morekuat pe sio iraniaꞌin ywania sio itotiaria yn e.
26 Miꞌi pote Peteru toꞌe -Iraniaꞌin yt mesuwat yi ieineꞌen haria kaipyi taꞌatusat e. Miꞌi hawyi Iesui toꞌe -Pyno miꞌi pote mesuwat tawa totiaria yt taꞌatuhaꞌup nug i.
27 Maꞌato aito yt watiꞌaparap teran i mesuwaria eꞌe hap ete. Miꞌi pote waku ereto ro ihyemyiꞌa kape hawyi etipun epina yꞌy pe hawyi waku saꞌawyꞌi etekyi pira hawyi etat miꞌi turan aru etipuẽti iwẽ pe wẽtup saꞌup iꞌape rakat hawyi waku ereto miꞌi wywo hawyi ehaꞌup nug aiweupi.
