Mateu 18:1-35
18 Meke turan ipotmuꞌeria tõꞌẽ Iesui kape hawyi apo iꞌatuꞌe -Uwe aru poꞌog iwato rakatno toineꞌen aikope Tupana toineꞌen morekuatno hap tote.
2 Mio tã iꞌatuꞌe hawyi Iesui tikay kay wẽtup hirokat hawyi toiporokpun iꞌatupyꞌasetpe
3 Hawyi toꞌe -Pywo pe ti areꞌe ehepe. Pyno waku eiwemorem eiminug saꞌag kaipyi hawyi eweikupteꞌen aikotã hirokaria tukupteꞌen yt teꞌeruwanetup hin i yt naku i aru hap koꞌi kape. Maꞌato yt miꞌi tã eweikupteꞌen pote yt karãpe eiwehytꞌok kuap i Tupana ieineꞌen morekuatno hap tote.
4 Pyno uwe teke teran Tupana toineꞌen morekuatno hap tote rakat wyti tuwemohit kahato hat yt tuwemowato hin i rakatno toineꞌen. Uito poꞌog yt e hin i hat. Waku hirokat ewywuat yt tuwepe wanetup hat ewy.
5 Pyno uwe meiũ hirokat piat ereke ro e hat wyti uhepiat ereke ro e hat.
6 Pywo pe ti tukupteꞌen meimuẽwaria hirokaria uimohey haria iꞌatumaꞌat uimohey hap iꞌatuepiat hap atoiat hamo pote poꞌog waku miꞌiria nu wato hutꞌypy ete hawyi waku mipugha raꞌyn ihy pya piat pe.
7 Tukupteꞌen miitꞌin mesuwat rotiaria miitꞌin yt naku i nug haria. Miitꞌin maꞌat uimohey hap atoiat hap kyewi rakaria. Miꞌi hat wyti poꞌog topyhuꞌat yt naku i sese rakatno.
8 Pyno toineꞌen typy epo iꞌewyte typy epy. Wẽtup epo wo sio wẽtup epy wo emaꞌat saꞌag nug hamo mote waku miꞌi wẽtup etitek hawyi etipun. Katupono poꞌog waku ereke aikope Tupana toineꞌen morekuatno wuatꞌi eꞌat piat ieineꞌen hap tote wẽtup epo wywo yn sio wẽtup epy wywo yn. Maꞌato typy epo wẽtup emaꞌat hatno hawyi typy epy wẽtup emaꞌat hatno wywo ereke aria wato wuatꞌi eꞌat piat hap kape hoꞌopot hawe e.
9 Iꞌewyte wẽtup eha emaꞌat hawyi waku etihep eha hawyi etipun. Poꞌog waku ereke wuatꞌi eꞌat piat Tupana ieineꞌen hap tote wẽtup eha wywo yn. Maꞌato typy eha wẽtup emaꞌat hatno ereke aria wato wuatꞌi eꞌat piat hap kape.
10 Miꞌi tupono eiweꞌeg wo eweikupteꞌen. Yt naku i ereineꞌen wẽtup ok hirokaria maꞌat hatno. Pywo pe ti areꞌe ehepe wuatꞌi eꞌat tukupteꞌen atipy piaria iꞌatuꞌapykok haria tukupteꞌen uiꞌywot pyꞌasetpe atipy pe.
11 Kat pote ti Ihainia Saꞌyru tuut howosat rakaria ehakyeraꞌat hamo.
12 Aikotã ten eweipuẽti koran pe wẽtup ok ihainia hũ toineꞌen 100 Uweiria maꞌato wẽtup ok howosat sio aten waku raꞌyn 99 yn terenuk mopep yityꞌok tote yt toikat i aten tohũ Uweiria howosat rakat.
13 Pywo pe ti areꞌe ehepe pyno miꞌi hap ewy ti karãpe ikaꞌiwat tipuẽti iraꞌyn howosat rakat hawyi iwepiit kahato raꞌyn saꞌawyꞌi wuat 99 yn toineꞌen rakaria etiat hap kai.
14 Miꞌi hap ewy kahato ti uiꞌywot atipy piat yt toikyꞌesat i wẽtup ok hirokat howosat rakat topyhuꞌat.
15 Pyno karãpe ewyꞌok tunug yt naku i hap epe miꞌi pote waku ereto hawyi waku etimoherep kat som iminug yt naku i hap. Maꞌato waku miꞌi tã etunug migꞌi wo. Waku eiwoꞌope yn waku eweimohãpyk maꞌato miꞌi tã hap epiat tonapin hap kape tuwanetup mekewat miit hawyi pywo e hawyi toineꞌen ewyꞌok wo iraꞌyn.
16 Maꞌato yt tuwanetup teran i epiat tonapin hap kape pote waku etioto ewewywo wẽtup sio typy ok inapin hamo kat e som miwan miat e hap ewy. Katupono mekewat miwan me toꞌe -Pyno karãpe wẽtup ok taꞌatukuasa miꞌi pote waku typy ok akasa sese haria wẽ piat waku etimohey.
17 Maꞌato mekewat miit iꞌaparap hat yt tuwanetup teran i ehehay kape miꞌi pote waku ehenoi torannia Iesui mohey haria pe. Maꞌato miꞌi pykai yt tuwanetup teran i Iesui mohey haria ehay kape miꞌi hat wyti toineꞌen aikotã wẽtup ok yt hetupana rakat i ewy. Iꞌewyte aikotã wẽtup ok saꞌup sat iraniaꞌin ywania kaipywiat hat ewy.
18 Pywo pe ti areꞌe ehepe -Pyno eiperia miitꞌin pyhyp haria wo eweikupteꞌen mesuwat yi tote miꞌi pote iꞌewyte miitꞌin pyhyp atipy kapiat haria eweikupteꞌen. Maꞌato mesuwat yi totiaria miitꞌin aro haria wo eweikupteꞌen pote iꞌewyte atipy kapiat miitꞌin aro haria wo eweikupteꞌen.
19 Pywo pe ti areꞌe ehepe pyno karãpe ewehẽtup eiwoꞌotypy ok takaria mesuwat yi tote turan eweihẽtup eipyꞌa pyi kahato uiꞌywot atipy piat set upi hawyi tutunug kahato eimiẽtup ewy.
20 Katupono aiũpe eiwaꞌatunug sio typy ok sio myẽꞌym ok uhet upi miꞌi haria wywo areineꞌen.
Karania Waure Wo Areineꞌen Uiwy Inug Saꞌag Uhete Peteru Apoꞌe Iesui Pe
21 Miꞌi hawyi Peteru tokosap Iesui kape hawyi apo e -Uikaꞌiwat e karania wo som waku uiwy minug saꞌag uhetiat atimohãpyk sio 7 wo waku e.
22 Yt rat poꞌog poꞌog 7 wo hap kape maꞌato 490 wo hap kape etimohãpyk wẽtup ok piat emaꞌat hap koꞌi e.
23 Kat pote ti mekewat Tupana toineꞌen morekuatno hap wyti aikotã mesuwat rotiat motpap haria iꞌatukaꞌiwat imohãpyk yne temiitꞌin mipuru koꞌi hap ewy.
24 Miꞌi turan wẽtup ok taꞌatuerut kaꞌiwat kape turan iweteweru hap iwato kahato raꞌyn karania ape parata kat piat neꞌi.
25 Maꞌato wyti mekewat ipotpap nug hat yt haꞌup kuap i raꞌyn. Yt kat i raꞌyn hesaꞌup tokaꞌiwat piat teweteweru hap saꞌup nug hamuat. Miꞌi hawyi ikaꞌiwat tipoꞌoro raꞌyn mekewat temiitꞌin ipotpap nug yt kat saꞌup etiat i haria weneru hamo. Torannia hemiitꞌin iꞌewyte iharyꞌi iꞌewyte imepytꞌin iꞌewyte torannia hekat iꞌyat piat toiweneru teweteweru saꞌup mo.
26 Maꞌato mekewat ipotpap nug hat tuwepỹꞌãtutuk tekaꞌiwat kape hawyi mio tã e -Pyno yt atikyꞌesat i epyꞌahak uhete katupono ahaꞌup nug yne aru epe uiweteweru hap uikaꞌiwat e.
27 Mio tã e hawyi ikaꞌiwat tehaꞌat hawyi toikyꞌe kahato hawyi toimohãpyk taꞌyn iweteweru hap koꞌi hawyi waku ereto raꞌyn yt kat i eweterut hap wywo e.
28 Miꞌi tã e hawyi mekewat ipotpap nug hat toto raꞌyn hawyi teke tetereropat haria kape. Miꞌi turan wẽtup ok toineꞌen weteweru hat 100 iꞌape parata kawiat hawyi totat temiit hutꞌypy ete hawyi toꞌe -Ehaꞌup nug no eweterut uhepiat hap e.
29 Miꞌi tã tutunug hawyi mekewat weteweru hat tuwepỹꞌãtutuk hawyi toꞌe -Yt epyꞌahak teiꞌo uhete katupono ahaꞌup nug yne aru uiweteweru hap koꞌi e.
30 Maꞌato yt toimohey hin i haype toipoꞌoro woꞌopyhik hap kape raꞌyn karamuo iweteweru hap saꞌup nug yne hap kape.
31 Miꞌi turan iraniaꞌin teꞌeropat haria motpap haria teꞌerehaꞌat raꞌyn miꞌi tã hap iminug koꞌi kape hawyi iꞌatupyꞌahak kahato raꞌyn taꞌatupoꞌoro hat ete hawyi tuwat raꞌyn taꞌatukaꞌiwat kape yne taꞌatupoꞌoro hat minug enoi hamuat.
32 Miꞌi hawyi meremo iꞌatukaꞌiwat tikay kay raꞌyn mekewat topotpap nug hat hawyi toꞌe -En wyti uipotpap nug hat pykai yt naku i kahato etunug e. Katupono saꞌawyꞌi ehẽtup uhepe miꞌi hap atiwaure yne raꞌyn eweterut hap koꞌi.
33 Miꞌi tupono waku etikyꞌe mekewat ewat epiat weteweru hat aikotã uito worokyꞌe kahato hap ewy.
34 Maꞌato ikaꞌiwat ipyꞌahak kahato raꞌyn hawyi toipoꞌoro raꞌyn topotpap nug hat woꞌopyhik hap kape toimosoꞌopot itote koran muo iweteweru hap saꞌup nug yne hap kape.
35 Miꞌi hawyi Iesui ihay kahu raꞌyn hawyi toꞌe -Pyno miꞌi tã ti uiꞌywot atipy piat tunug torannia ehete yt eweimohãpyk i eiminug yt naku i hap eiwyꞌok wywo pote.
