Mateu 19:1-30
19 Miꞌi hawyi Iesui henoi yne raꞌyn miꞌi hap etiat hawyi toto raꞌyn yi Karireia pyi mekewat Iuteu eꞌyi kape mekewat aat wẽtem hap kawiatnuat Iutãu hy kape.
2 Miꞌi turan miitꞌin sem tuwat upi hawyi itote toiꞌatumoehãite kahato iꞌahuu rakaria.
3 Miꞌi turan iraniaꞌin Wariseuria tokokaꞌat Iesui kape katupono taꞌatukat kahato aikotã miat Iesui iꞌaparap hap Miꞌi haype apo iꞌatuꞌe -Pywo apo ainapin hap Muisei miwan me tohenoi karãpe ihainia toiat teran pote waku toipoꞌoro kuap apo pya teharyꞌi iꞌatuꞌe.
4 Maꞌato Iesui tiꞌatuwesat -Pyno miꞌi hap etiat apo yt uwe i imowẽpapꞌi mekewat miwan miat kat e som hap koꞌi e. Katupono saꞌawyꞌi Tupana tunug ihainia iꞌewyte haryporia.
5 Miꞌi tupono ti Tupana toꞌe -Miꞌi tupono waku ihainia toiat toꞌywot hawyi toty hawyi wẽtup miit yn naꞌyn toineꞌen teharyꞌi wywo toꞌotypyꞌok pykai tukupteꞌen wẽtup yn naꞌyn e. Miꞌi hawyi wẽtup miit ewy yn naꞌyn topyhuꞌat wẽtup ihainia wẽtup haryporia typy miit pykai e Iesui.
6 Katupono Tupana tunug miꞌiria wẽtup miit ewywuat e. Pyno ti toineꞌen yt typyꞌok miit hin i tukupteꞌen maꞌato wẽtup miit yn. Miꞌi tupono wyti yt uwe kuap i ipatꞌok aikotã Tupana mipehik koꞌi.
7 Miꞌi hawyi poꞌog Wariseuria apo iꞌatuꞌe -Kat pote som pyno mekewat Muisei miwan me tohenoi -Waku ihainia toiat teran teharyꞌi hap eꞌat pe waku tutunug miwan morekuat kape iꞌatuꞌe.
8 Mio tã iꞌatuꞌe pote Iesui tiꞌatuwesat -Katupono Muisei miwan me mio tã e eipyꞌaheg kahato pote. Maꞌato saꞌawyꞌi sese wyti haꞌawynug turan yt miꞌi tã hin i e.
9 Miꞌi tupono mio tã are ehepe Pyno karãpe ihainia toiat teran teharyꞌi yt kat i saꞌag tunug pykai maꞌato toineꞌen yt i weꞌeg rakatno hawyi totat wẽtup iraꞌyn teharyꞌi wo Miꞌi hat wyti aikotã waire waire nug hatno toineꞌen.
10 Miꞌi pote ipotmuꞌeria -Urumuꞌe hat iꞌatuꞌe pyno yt karãpe i waku uruiꞌatoiat urueharyꞌi hawyi poꞌog waku yt iharyꞌi i rakatno urutukupteꞌen sio yt iꞌatuꞌe.
11 -Maꞌato tukupteꞌen iharyꞌi kahato rakaria iꞌewyte tukupteꞌen yt iharyꞌi i rakanuat i mesuwat yi tote e. Yt yne tukupteꞌen kuap i yt kat i iharyꞌi wo yt kat i heꞌaito wo e.
12 Tukupteꞌen wyti ihainiaꞌin yt iharyꞌi rakat nuat i katupono taꞌatuhire pyi te yt iꞌatuꞌyp i rakaria e. Iꞌewyte ti tukupteꞌen miitꞌin minug misoꞌohep takat ewywuat koꞌi e. Iꞌewyte yt yne i maꞌato tukupteꞌen tuereto -Uito yt atikyꞌesat i uheharyꞌi katupono poꞌog waku yt iharyꞌi rakatno i areineꞌen neran Tupana ieineꞌen morekuatno hap etiat yn enoi hamo yn. Yt yne i wen maꞌato hoꞌokup mio tã e haria e. Aikotã eweiꞌe eiwanetup eipyꞌa pe ewy waku miꞌi tã hap ewy eweikupteꞌen e.
13 Miꞌi hawyi miitꞌin teꞌeropoꞌok teran hirokaria Iesui kape -Mehin iꞌatuꞌe ereponug no urumepytꞌin ete hawyi ehẽtup Tupana pe urumepytꞌin poityro hap iꞌatuꞌe. Miꞌi hawyi maꞌato ipotmuꞌeria tiꞌatupyhyp kahato hirokaria hewowi -Waĩ iꞌatuꞌe.
14 Miꞌi hawyi Iesui toꞌe -Yt eweiꞌatupyhyp teiꞌo hirokaria uhewowi paĩ e topotmuꞌeria pe. Katupono karãpe Tupana topyhuꞌat morekuatno mesuwe miꞌi hap eꞌat pe hirokaria ewywuaria yn teꞌeropyhuꞌat itote iꞌatuieineꞌen hap sese wo e Iesui temiitꞌin me.
15 Miꞌi hawyi tuweponug hirokaria ete hawyi toto i raꞌyn Iesui itote pyi.
16 Miꞌi turan wẽtup ok kurum putꞌok e hawyi toꞌe Iesui pe -Woꞌomuꞌe hat waku sese ti En e. Uimuꞌe ro kat som waku atunug uheineꞌen wuatꞌi eꞌat piat hap puẽti hamo e.
17 -Kan hamo ten ehẽtup uhewowi wakuat hap etiat katupono Tupana yn ni wakuat sese kurum e Iesui wuatꞌi eꞌat piat ieineꞌen hap kyꞌesat hat pe. Maꞌato ereineꞌen hap wuatꞌi eꞌat piat etikyꞌesat pote etunug no yne Tupana mikyꞌesat miwan miat koꞌi hawyi waku pe ereineꞌen e.
18 -Pyno etimoherep to uhepe Uhyt kat imikyꞌesat koꞌi waku atunug hap e. -Taꞌi yt erepotꞌauka teiꞌo e yt ewary wary teiꞌo e yt seroꞌok ere teiꞌo yt etomaꞌat teiꞌo wẽtup ok ehay wo e.
19 Etomotypot ro eꞌywot ety e. Iꞌewyte etiꞌatukyꞌe ro iraniaꞌin aikotã ewekyꞌe hap oktan e. Etunug miꞌi tã pote waku pe ereineꞌen e.
20 -Maꞌato Uhyt e uihire pyi te ti mio tã e hap miwan miat atunug yne e. Kat e hap pyno miꞌi hawyi waku atunug uheineꞌen wuatꞌi eꞌat piat puẽti hamo e.
21 -Taꞌi maꞌato waku wẽtup te etunug e. Pyno ereto hawyi etum yne ekareꞌen ahyt hatek takaria pe hawyi ekat sese toineꞌen aru atipy pe e. Miꞌi tã etunug hawyi waku eraꞌaipok uhewowi ereto uhupi uhemiitno e.
22 Mio tã e hap toikuap hawyi ti tohatyꞌu raꞌyn topyꞌa pe hawyi toto raꞌyn katupono hekat kahato rakat toineꞌen maꞌato yt toimoꞌẽ teran i tekareꞌen sok yt hekat i rakaria pe haype.
23 Miꞌi hawyi Iesui toꞌe topotmuꞌeria pe -Are paĩ niatpo sese ti wekareꞌen kyꞌe haria tuwehytꞌok atipy pe aikope Tupana toineꞌen morekuatno hawe e.
24 Pywo ti niatpo kahato aikotã aihũ iwato rakat Kameru teke awi ehapo kaꞌa puo hap ewy e. Miꞌi hap ewy ti maꞌato poꞌog poꞌog niatpo hekat rakaria teꞌeruwehytꞌok Tupana etama pe e.
25 Mio tã e hawyi ipotmuꞌeria teꞌeruwanetup kahato uwe aru pyno iꞌatuehakyeraꞌat kuap mehin iꞌatuꞌe.
26 Miꞌi pote tehaꞌat kahato topotmuꞌeria kape hawyi toꞌe -Yt uwe i tuwehakyeraꞌat kuap e. Tupana yn ni miitꞌin ehakyeraꞌat kuap hat e. Yt kat i hin i ti niatpo inug kuap hamuat e.
27 Miꞌi hawyi Peteru toꞌe -Urumuꞌe hat e saꞌawyꞌi uruiꞌatoiat yne raꞌyn uruekat eupiat urutuwat hamo e. Pyno kat aru haꞌup etum uruepe e.
28 Miꞌi pote Iesui tiwesat -Karãpe yi ipakup turan karãpe Uito Eheykeꞌet araꞌapyk Morekuat eꞌamyap tote wuatꞌi miitꞌin miat uimotypot hamo miꞌi turan ti aru pywo eweikupteꞌen uiꞌyatype 12 morekuat eꞌamyap tote uiwywo aiꞌywania Isareu ywania tok pe wẽtup ywania wẽtup ywania porekuatno aru eweikupteꞌen uwe yt naku i uwe waku e hamo e.
29 Pywo ti rat uwe uwe uhehay upi uhupiat toto uhupiat haype iꞌatoiat toꞌyat toꞌywytꞌin tokywytꞌin toinytꞌin tosakiꞌytꞌin toꞌywotꞌin totyꞌin tomepytꞌin toko koꞌi tomikoi uimikyꞌesat nug hamo miꞌi hat ti aru poꞌog ipuẽti meimuẽwat tomiꞌatoiat koꞌi saꞌawyꞌi wuat kai. Taꞌi tomiꞌatoiat wẽtup kaipyi toipuẽti 100 raꞌyn mesuwe iꞌewyte ti aru toipuẽti wuatꞌi eꞌat piat toineꞌen hamuat e.
30 Iꞌewyte ti aru koran wuat uimohey haria -Uito poꞌog e haria poꞌog kurin nakaria wo teꞌeropyhuꞌat atipy pe maꞌato uhemiit wuatꞌi miitꞌin eropat hat wo koran te miꞌi haria miitꞌin akag wo aru tukupteꞌen atipy pe e Iesui Peteru pe iꞌewyte temiitꞌin me.
