Mateu 21:1-46
21 Miꞌi hap tote pyi Iesui toto i raꞌyn tawa wato Ierusarẽi kape towyriaꞌin wywo. Putꞌok taꞌatuꞌe raꞌyn tawa Pewake tote hawyi tuwat mekewat yityꞌok kape Uriweiria ypia e hap kape. Itote pyi Iesui tipoꞌoro typy ok temiit tawa hit kape.
2 -Uhytꞌiꞌin e eweiwat ro mekewat tawa hit kape aiꞌakasa hap kape e. Putꞌok eweiꞌe itote turan ti aru eweipuẽti iꞌatuhũ Iumentu toꞌasaity nug me tomepyt wywo e. Miꞌi koꞌi o eweiꞌatuꞌasaitypok hawyi eweteropoꞌok raꞌyn uhewowi e.
3 Maꞌato -Kan hamo ewetioto uruhũ iꞌatuꞌe pote o -Taꞌi Aikaꞌiwat wyti ipuru porapꞌi eihũ koꞌi eweiꞌe o miꞌi pote aru meremo -Hẽto pyno eweitioto ro iꞌatuꞌe aru ehepe e. Miꞌi hap ewy yne ti aru eweipuẽti itote e Iesui typy ok takaria tomipoꞌororia pe.
4 Saꞌawyꞌi wuat Tupana ehay enoi hat mio tã e tomiwan me Iesui etiat
5 -Tuut wyti aru Aipotypot sese aihũ Iumentu tote ahewowi eweiꞌe ro tawa Ierusarẽi miaria pe e. Yt morekuat ewy hin i tuut maꞌato paa e hat aihũ Iumentu mepyt hit tote e ti saꞌawyꞌi te wuat miwan me Isaia 62.11 pe Iesui etiat tohenoi.
6 Miꞌi hawyi tuwat raꞌyn ipotmuꞌeria typy ok hawyi aikotã Iesui henoi hap ewy raꞌyn taꞌatunug.
7 Miꞌi hawyi taꞌatuerut raꞌyn iꞌatuhũ Iumentu imepyt wywo Iesui kape. Miꞌi hawyi taꞌatuesokpe koꞌi taꞌatuporokpun Iumentu ok tote hawyi Iesui taꞌam naꞌyn apyk pe iꞌok tote.
8 Miꞌi hawyi iraniaꞌin miitꞌin typyꞌi rakaria tiporokpun taꞌatuesokpe koꞌi muap tote. Iraniaꞌin iporokpun muap upi ariaꞌyp iaga koꞌi imotypot hap.
9 Miꞌi hawyi typyꞌi rakaria watꞌypmo iꞌewyte yian miaria morekuat Tawi saipepiat iꞌatuꞌe taꞌatuehay pirik wo. Waku kahato En atipy kaipywiat iꞌatuꞌe. Taꞌi Tupana mimotypot kahato En iꞌatuꞌe. Waku sese waku sese Tupana iꞌatuꞌe.
10 Miꞌi hawyi putꞌok e Iesui tawa wato Ierusarẽi me hawyi itotiaria iraniaꞌin ikohyeputꞌi kohyeputꞌi kowoꞌi kowoꞌi -Uwe som Miꞌi Miit iꞌatuꞌe toꞌope.
11 -Taꞌi Miꞌi Miit ti mekewat Tupana ehay moherep hat yi Karireia tawa Nasare kaipywiat iꞌatuꞌe.
Iesui Teke Tupana Motypot Yat Pe Imohywytip Hamo
12 Miꞌi hawyi Iesui teke raꞌyn Tupana motypot yat koro pe hawyi toiꞌatusopo kahato kat koꞌi kat koꞌi weneru itotiat haria hawyi toiꞌatupugha kahato yparakai koꞌi. Toiꞌatuꞌãpeꞌokpun yne tineiru patꞌok patꞌok hap yparakai koꞌi. Iꞌewyte pykasu koꞌi weneru hap amyap koꞌi toiꞌatuꞌãpeꞌokpun iꞌatuepykasu koꞌi wywo.
13 Miꞌi waku hawyi Iesui toꞌe haty wo iꞌatuepe -Mio tã toꞌe Tupana saꞌawyꞌi miwan me --Uiꞌyat wyti meiũ e. Miꞌi ti atikyꞌesat miitꞌin uhewowiat iꞌatuehay hamuat e ti Tupana miwan me e. Maꞌato mesup ti Tupana motypot yat koro topyhuꞌat seroꞌok e haria yat koro wo neꞌi raꞌyn e.
14 Toiꞌatusopo Tupana motypot yat pyi hawyi yt ihapytig i rakaria yt ipoĩꞌam kuap i rakaria tõꞌẽ tõꞌẽ hewowi hawyi toiꞌatumoehãite raꞌyn ihakyꞌeꞌi rakaria itote.
15 Miꞌi pote paꞌi kororia waĩꞌe hap enoi haria teꞌerahaꞌat kahato iminug wakuap kape. Iꞌewyte taꞌatukuap hirokaria piat -Waku kahato En morekuat Tawi saipepiat iꞌatuꞌe hap. Miꞌi pote iꞌatupyꞌahak kahato raꞌyn paꞌi koro koꞌi
16 -Yt etikuap i apo hirokaria kat iꞌatuꞌe kat iꞌatuꞌe ewowiat hap iꞌatuꞌe Iesui pe. Miꞌi hawyi toiꞌatuwesat -Yt eiwemuꞌe i te apo Tupana miwan saꞌawyꞌi wuat ete aikotã toꞌe -Hirokaria hit koꞌi Tupana mimuꞌeria wo teꞌeropyhuꞌat imotypot hamuat.
17 Mio tã toꞌe hawyi toto raꞌyn tawa Ierusarẽi myi tawa hit Petania kape. Miꞌi hawyi toket itote.
18 Itote pyi mukiꞌite hunete taꞌaipok i raꞌyn tawa wato Ierusarẽi kape. Miꞌi turan muap upi Iesui hesyꞌat kahato raꞌyn.
19 Miꞌi turan taꞌakasa Wiku yp muap ẽpeke hawyi toto haat kyewi maꞌato iꞌyhop yn toipuẽti. Miꞌi pote toꞌe Wiku yp we -Pyno koitywy ti aru yt sake i raꞌyn esat e. Mio tã e hap hawyi meremo iꞌyp gag naꞌyn.
20 Miꞌi hap kape ipotmuꞌeria teꞌerahaꞌat hawyi ikuꞌuro raꞌyn pote teꞌeroꞌe -Urumuꞌe hat iꞌatuꞌe emisatyꞌi satyꞌi ikuꞌuro raꞌyn iꞌatuꞌe.
21 -Uiwyriaꞌin e eweimohey ro Tupana haty wo yt kat i eweimohey saꞌag neꞌi wywo uiminug ewywuat ewetunug kuap hamo e. Maꞌato poꞌog iwato uiminug kai ewetunug kuap e. Taꞌi uwe uwe meiũwat yityꞌok pe toꞌe -Ereto ro meiũpe pyi yꞌy wato kape hawyi minꞌere ro yꞌy pe eweiꞌe Tupana mohey hap yn nywo miꞌi pote ti aru toto raꞌyn meremo eiꞌe hap ewy imohey hap ewy e.
22 Miꞌi tupono kat eweiꞌe ehẽtup Tupana kape imohey sese hap wywo miꞌi eiꞌe hap ewy kahato ti aru topyhuꞌat e Iesui.
23 Miꞌi hawyi putꞌok e i raꞌyn Iesui Tupana motypot hap yat koro pe hawyi toiꞌatumuꞌe i raꞌyn. Miꞌi turan tõꞌẽ tõꞌẽ paꞌi akag koꞌi Iuteu ywania akag koꞌi apo iꞌatuꞌe hamo -Uwe kahu epoꞌoro hat toineꞌen. Uwe kahu hum miꞌi nug hamo.
24 -Pyno apo are ehepe ewehenoi mono uwe eipoꞌoro hat toineꞌen. Ehenoi pote Uito iꞌewyte ahenoi uwe uipoꞌoro hap e.
25 Uwe pyno woꞌosetꞌok hat Iuwãu poꞌoro hat sio Tupana ipoꞌoro sio miitꞌin ipoꞌoro haria e. Mio tã pote teꞌeruwanetup toꞌoꞌewowi -Taꞌi Tupana mipoꞌoro Iuwãu aiꞌe pote aru kat poteĩ pyno yt eweimohey i e aru iꞌatuꞌe.
26 Maꞌato miitꞌin mipoꞌoro ti Iuwãu aiꞌe pote ti aru miitꞌin iꞌatupyꞌahak kahato ahete katupono iraniaꞌin Iuwãu ti Tupana ehay moherep hat e haria tukupteꞌen iꞌatuꞌe.
27 Miꞌi hawyi -U paĩ uhyt yt uruikuap i sese wyti uwe mipoꞌoro Iuwãu iꞌatuꞌe. -Pyno yt uiwesat i pote Uito iꞌewyte yt worohoꞌowesat kuap i uwe ehay pyi miꞌi tã atunug hap e.
28 Maꞌato waku eiwanetup uimienoi kape e. Saꞌawyꞌi so wẽtup ok miit typy ok haꞌyru rakat toineꞌen. Miꞌi hawyi wẽtup eꞌat pe so toꞌe tosaꞌyru yian me -Uhaꞌyru e atikyꞌesat wyti koitywy epotpap uimikoi ypia pe e.
29 Maꞌato so -Yt uipopap i rat papai e. Maꞌato meiũran tuwanetup hawyi paa e toꞌywot ehay pun hap ete. Miꞌi pote yt uipopap i rat toꞌe pykai toto raꞌyn toꞌywot mikoi ypia kape.
30 Miꞌi hawyi so iꞌywyt pe -Uhaꞌyru e atikyꞌesat wyti koitywy epotpap uimikoi ypia pe e. Miꞌi hawyi -Taꞌi papai areto meremo e maꞌato yt toto hin i mio tã toꞌe pykai e.
31 Miꞌi pote apo are ehepe uwe som pyno toꞌywot mikyꞌesat nug hat sio watꞌyp sio yian e Iesui Tupana motypot yat piaria akag koꞌi pe. Miꞌi hawyi taꞌatuwesat -Taꞌi yian yn inug toꞌywot mikyꞌesat iꞌatuꞌe. -Pywo pe ti miꞌi tã e Iesui. Pywo pe ti miitꞌin morekuat saꞌup sat haria iꞌewyte haryporia yt iweꞌeg i rakaria teꞌeruwehytꞌok Tupana etama pe eiꞌowokai te e.
32 Ahetꞌok hat Iuwãu putꞌok toꞌe hawyi eimuꞌe kahato Tupana kapiat muap ete e. Miꞌi hawyi ti yt nakuaria i -Pywo iꞌatuꞌe raꞌyn hawyi tuwat kahato Tupana kape e. Maꞌato eiperia ti yt eweiwat hin i Tupana kape Iuwãu mienoi upi e. Maꞌato iraniaꞌin meimuẽwat haryporiaꞌin yt iweꞌeg i rakaria paa iꞌatuꞌe iꞌewyte mekewat ahewanikaptia saꞌup poreraꞌat haria paa iꞌatuꞌe. Miꞌi haria kape eweiꞌakasa yne raꞌyn pykai yt paa eweiꞌe hin i eipyꞌa pe.
Iesui Henoi Uwa Ypia Etiat Yt Nakuaria I Ypia Apykok Haria Etiat
33 Miꞌi hawyi -Pyno wẽtup sehay ahenoi ehepe hãꞌãkap wuat e paꞌi kororia pe toꞌywania akag koꞌi pe. Saꞌawyꞌi so toineꞌen wẽtup ok miit yi wato kaꞌiwat e. Miꞌi hawyi so ihay raꞌyn Uwa ypia nug hap ete e. Miꞌi hawyi so toikoi hawyi toipyhyp yne raꞌyn heꞌeroꞌok haria pupi tutunug nu kaꞌa Uwa tok hamo Uwa hy nug hamo e. Miꞌi hawyi so iꞌypia pyꞌasetpe Uwa iꞌapykok haria yat ywaiti rakat tutunug teꞌerehaꞌat mikoi eroꞌok haria piat waĩꞌe hamo. Hãpyk yne hawyi so toipuru toꞌywania pe Uwa ypia iꞌapykok kuap haria pe hawyi so toto raꞌyn iꞌypia wato kaꞌiwat wẽtup setama kape raꞌyn toto.
34 Miꞌi pote iꞌypia sat hap eꞌat putꞌok e raꞌyn hawyi toiꞌatupoꞌoro temiitꞌin tomikoi ypia apykok haria kape tomikoi saꞌup patꞌok sat hamo e.
35 Maꞌato so iꞌapykok haria yt hoꞌoium neran hin i raꞌyn. Miꞌi hawyi so imipoꞌororia taꞌatupytyk hawyi taꞌatuꞌahyk ahyk neꞌi e. Wẽtup ok taꞌatuꞌauka wẽtup ok kape ti nu koꞌi wo mak mak iꞌatuꞌe.
36 Maꞌato poꞌog toiꞌatupoꞌoro temiitꞌin saꞌup sat hamo maꞌato so iꞌewyte taꞌatunug iꞌatuete e.
37 -Pyno watꞌypmo atipoꞌoro uhaꞌyru sese e. Uhaꞌyru sese tupono ti aru taꞌatumotypot rat paĩ e so tuwanetup hawe e.
38 Miꞌi hawyi so putꞌok e raꞌyn watꞌypmuat hawyi yi wato imipuru apykok haria teꞌerahaꞌat hewowi hawyi teꞌeroꞌe toꞌope -Meiẽ raꞌyn ti tuut yi kaꞌiwat saipepiat iꞌatuꞌe. Pyno waku watiꞌauka meiẽwat haꞌyru hawyi iꞌywot mikoi ypia aiwatno topyhuꞌat iꞌatuꞌe toꞌope.
39 Mio tã iꞌatuꞌe turan putꞌok e haꞌyru hawyi taꞌatupytyk hawyi taꞌatupun iꞌywot eꞌyi ekuekai hawyi taꞌatuꞌauka raꞌyn haꞌyru imipoꞌoro e Iesui.
40 Pyno apo are ehepe aikotã aru ikaꞌiwat tunug meimuẽwat tosaꞌyru auka haria ete taꞌaipok i raꞌyn tomikoi ypia kape hawyi e.
41 Miꞌi pote paꞌi kororia tiwesat -Taꞌi tuut hawyi ti aru toiꞌatuꞌatuuka meimuẽwat yt naku i nug haria iꞌatuꞌe. Miꞌi hawyi ti aru wẽtup ywania pe haat hap eꞌat piat haꞌup ium kuap haria pe raꞌyn tutum i teꞌyi tomikoi ypia iꞌatuꞌe.
42 -Taꞌi pywo kahato ti uiwesat. Eiꞌe hap ewy ti aru topyhuꞌat ehete are aikotã saꞌawyꞌi Tupana toꞌe hap ewy -Nu poꞌog waku rakat uiꞌyat nug hanuaria aru taꞌatupun. Miꞌi pote miꞌi Nu iꞌatumipun wo ti aru ahaꞌawynug uiꞌyat poꞌog ikahu sese rakat e Tupana. Miꞌi ti iminug waku sese topyhuꞌat aru e. Yt karamuo i apo eiwemuꞌe miꞌi e hap miwan me Isaia 28.16 pe e.
43 Miꞌi e hap ewy kahato ti aru topyhuꞌat mesuwe katupono Tupana tihep aru eipo pyi morekuatno toineꞌen hap hawyi ti aru tutum wẽtup ywania kape raꞌyn tomikoi ypia hawyi tuwenug kahato haat koꞌi e.
44 Uwe uwe taꞌat mekewat Nu miitꞌin mipun ete miꞌiria ti aru wepik pik sese haria wo teꞌeropyhuꞌat. Uwe uwe pe mekewat Nu taꞌat itotiaria pe miꞌi haria ti aru ikuꞌi kuꞌi wo teꞌeropyhuꞌat e.
45 Mio tã e pote paꞌi kororia -Yt naku i ihay iꞌatuꞌe. Katupono ahete aimohit hap mio hãꞌãkap tohenoi iꞌatuꞌe.
46 Miꞌi pote taꞌatupyhyp teran Iesui wen maꞌato typyꞌi kahato miitꞌin Iesui apypueri wo tukupteꞌen pote teꞌerokenꞌẽ neꞌi ipyhyp hamo -Iesui ti Tupana ehay moherep hat sese toineꞌen iꞌatuꞌe iꞌapypueri haria pote teꞌerokenꞌẽ miꞌiria mopyꞌahak hap pupi.
