Mateu 23:1-39
23 Miꞌi hawyi Iesui toꞌe miitꞌin sem me iꞌewyte topotmuꞌeria pe
2 -Uiwyriaꞌin meimuẽwat Tupana ehay miwan miat kuap haria ti woꞌomuꞌe haria te teꞌeropyhuꞌat Muisei ehay wuat aimuꞌe haria.
3 Miꞌi tupono waku watunug o kat e kat e iꞌatuꞌe ainapin hap Muisei kaipywiat hap ewy e. Maꞌato o yt iꞌatueko ewy neꞌi teiꞌo eweikupteꞌen e. Katupono iꞌatuwẽ pywiat mienoi ti hãpyk takat maꞌato iꞌatueko ti iꞌatuminug koꞌi yt hãpyk hin i e.
4 Katupono yrysakag ipotyi rakat miitꞌin okpe tote hap ewy taꞌatunug maꞌato ti miitꞌin yt taꞌatuhupit kuap i ipotyi poityꞌi iꞌatuꞌakit hap ewy neꞌi wen maꞌato miꞌiria yt miitꞌin powyro hin i hupit hamo. Yt wẽtup puiꞌiã wo te wy miitꞌin powyro haria teꞌeropyhuꞌat.
5 Taꞌi miꞌiria ti ikat miitꞌin upi wuatꞌi piat -En wyti waku kahato uhyt e hap taꞌatukyꞌesat. Miitꞌin ehamo yn wakuap nug hap taꞌatumoherep taꞌatumotypot hamuat e. Taꞌatuesokpe iꞌywop takat ete taꞌatupag ikahu rakat koꞌi tuwemotypot hamo. Miꞌiria ti ikytyt Tupana ehay taꞌatuewatuꞌa ete iꞌewyte taꞌatupo ete. Yne miꞌi taꞌatunug miitꞌin mimotypot haria wo taꞌatukyꞌesat.
6 Miꞌiria ti ikyꞌesat ienuk turan teꞌeraꞌapyk poꞌog taꞌatuꞌe hawe iraniaꞌin kai morekuat eꞌamyap ewywuat tote. Iꞌewyte Tupana motypot hawe taꞌatukyꞌesat aikotã morekuat eiam ewywuat tote poꞌog iraniaꞌin kai hap enoi hamo hap yn taꞌatukyꞌesat.
7 Miꞌi hawyi taꞌatuewyry turan -Ihatꞌok urumuꞌe hat koro iꞌatuꞌe iraniaꞌin hap taꞌatukyꞌesat miitꞌin kaipyi. -Hẽ aimuꞌe sese hat tuut raꞌyn e hap taꞌatukyꞌesat.
8 Miꞌi pote yt ewetunug neiꞌo miꞌi tã hap iꞌatuꞌewy e Iesui temiitꞌin me. Katupono -Meiẽ aimuꞌe hat sese yt eweiꞌe teiꞌo eiwoꞌope neꞌi e. Katupono wẽtup ok yn ni toineꞌen eimuꞌe hat sese. Waku eweipyhuꞌat eipe eiwoꞌowyriaꞌin wo yn naꞌyn.
9 Katupono wẽtup yn Aiꞌywot waku eweiꞌe eiwoꞌope. Miꞌi ti eheTupana sese eweiꞌe o. Miꞌi pote yt karãpe i wẽtup ok pe -En ni uiꞌywot uipaꞌãu muꞌe hamo yt eweiꞌe i wẽtup ok pe.
10 Iꞌewyte yt naku i wẽtup ok pe -En uimuꞌe hat sese aikotã waku yne uheineꞌen hap etiat enoi hamo yt eweiꞌe wẽtup ok pe katupono Tupana Mipoꞌoro eiporekuatno yn eimuꞌe hat sese aikotã waku eimoieineꞌen hamuat hap enoi hamo are.
11 Pyno uwe uwe toineꞌen eipyꞌasetpe miitꞌin eheropat haria wo poꞌog poꞌog eipowyro iraniaꞌin kai miꞌiria ti poꞌog poꞌog iraniaꞌin kai toineꞌen Tupana wanetup hawe e. Miitꞌin eropat haria wo eweikupteꞌen hap kaipyi eimowato hap sese topyhuꞌat Tupana wywo e.
12 Maꞌato uwe -Uito poꞌog eikai e hat ti aru Tupana mimohit wo topyhuꞌat. Maꞌato uwe wẽtup ok tuwemohit hat ti aru iwato rakatno topyhuꞌat Tupana mimowato wo.
13 Miꞌi hawyi Iesui toꞌe miwan kuap haria pe iꞌewyte woꞌomuꞌe haria pe -Taꞌi heso rakaria ti eipe typy hẽku rakaria e Tupana ehay kuap ran haria pe. Yt eweikyꞌesat i ti miitꞌin tuwat aikope Tupana toineꞌen Morekuatno hap kape e. Taꞌi eweiꞌatupyhyp kahato ti miitꞌin ipap Tupana etawa kapiat rakaria e. Iꞌewyte ti eipe yt eweiwat teran hin i. Miꞌi pote ti iraniaꞌin yt tuwat i eiꞌewy e.
14 -Taꞌi eiperia Tupana etiat miitꞌin woꞌonapin haria wen maꞌato typy hẽku rakaria eiperia. Katupono -Waku kahato uruto eweiꞌe. Ehehay kahato Tupana kape wen maꞌato yt eipyꞌa pyi. Eiperia waku e hap eweikyꞌesat miitꞌin kaipyi wehaꞌat haria kaipyi. Iꞌewyte hiwu koꞌi maꞌat haria wo eiperia. Eweiꞌatusat kahato iꞌatuekat heso hap upi. Miꞌi pote eweipyhuꞌat Tupana miꞌapiheg haria wo.
15 Taꞌi Tupana miꞌapiheg wuatꞌi eꞌat piaria ti eipe katupono typy hẽku rakaria woꞌomuꞌe haria mienoi kuap haria heso rakaria eipe pote e. Taꞌi eikohyewyry kahato ti miitꞌin muꞌe hamo. Ysakpo iꞌewyte yi upi yne muap upi eweikat kahato wẽtup miit wẽtup miit ehay upiat myhuꞌat hat wyti e. Miꞌi hawyi eimimuꞌe haria teꞌeropyhuꞌat poꞌog poꞌog naꞌyn saꞌag saꞌawyꞌi wuat yt ehehay kuap i te turanuat kai e. Miꞌi hawyi miꞌiria eimimuꞌe hap kaipyi poꞌog poꞌog eikai Tupana miꞌapiheg haria wo teꞌeropyhuꞌat e Iesui typy sehay upi enoi haria pe.
16 Pywo pe ti eiminapin hap koꞌi yt hãpyk hin i maꞌato ti yt ihapytig i rakaria ewywuat eipe. Eiperia eweiꞌatumuꞌe miitꞌin me -Pyno Tupana motypot yat iheg me hap upi uito atunug wyti aru uiꞌe hap ewy eweiꞌe pykai waku yt etunug i eꞌe hap pote waku eweiꞌe. Maꞌato Tupana motypot kat koꞌi kat koꞌi uru kawiat hap upi atunug wyti aru uiꞌe hap ewy eweiꞌe pote waku etunug eꞌe hap ewy eweiꞌe Eweimoheg eꞌe hap uru upi Tupana motypot piat koꞌi upi hawyi yt naku i yt etunug i eꞌe hap pote eweiꞌe.
17 Yt eiweꞌeg hin i eiꞌe hap upi kat e hap kat e hap ete. Katupono Tupana motypot yat topyhuꞌat uru kawiat koꞌi mowaku hap.
18 Iꞌewyte mio tã eweiꞌe eimimuꞌeria pe iꞌatuꞌe hap moheg hamuat hap etiat -Pyno pe ti miitꞌin ehamo yparakai uimiium Tupana pe imotypot hamo hap upi atunug aru uiꞌe hap ewy toꞌe pote yt tutunug i iꞌe hap ewy pote waku eweiꞌe. Maꞌato iꞌewyte eweiꞌe miitꞌin me -Atimoheg atunug aru uiꞌe hap mekewat uimiium uihũ Tupana piat hap upi eweiꞌe pote yt etunug pote yt naku i eweiꞌe. Emiium Tupana piat hap upi e pote etunug no eweiꞌe.
19 Eiperia yt ehehapytig hin i rakaria ewy eweikupteꞌen. Kat som poꞌog waku eimiium ehũ yparakai sio yparakai poꞌog waku eimiium kai. Yt eweikuap apo yparakai eimiium koꞌi mowaku hap toineꞌen are e. Yparakai poꞌog waku eimiium koꞌi kai are e.
20 Miꞌi pote Tupana yparakai wakuat upi ehay moheg hamuat pote iꞌewyte kat som itotiat emiium kape hap wakuat wy toineꞌen are e. Katupono yparakai wakuat Tupana wanetup hawe pote iꞌewyte eihũ eimiium wakuat wy toineꞌen are e.
21 Iꞌewyte karãpe eweiꞌe wuatꞌi ehamo -Atunug aru uiꞌe hap ewy Tupana motypot yat iheg nakat upi eweiꞌe. Maꞌato miꞌi tã eweiꞌe pote yt Tupana yat yn ni katupono miꞌi ti Tupana ieineꞌen hap sese toineꞌen. Miꞌi pote Tupana yat iꞌewyte Tupana sese wy eiꞌe moheg hamuat hap topyhuꞌat.
22 Pywo pe ti karãpe eweiꞌe wuatꞌi ehamo -Pywo atunug aru uiꞌe hap ewy atipy piat toineꞌen sese hap upi eweiꞌe miitꞌin ehamo. Miꞌi tã eweiꞌe pote yt eiweꞌeg hin i rakaria wo eiperia katupono atipy piat hap upi eweiꞌe pote Tupana sese teamyꞌap tote toineꞌen hap atipy piat e.
23 Taꞌi eipe ti woꞌomuꞌe haria wanꞌi wanꞌi eharia Tupana kuasa haria typy hẽku rakaria -Taꞌi atum kahato ti wuatꞌi Tupana kape e haria ti eipe. Pywo eimiꞌu mosẽꞌẽ hap koꞌi wyti eweipatꞌok kahato Tupana watnuat iꞌewyte ti Kumiu iꞌewyte eimiꞌu apopyt koꞌi e. Miꞌi hap ti waku wen maꞌato ti mekewat poꞌog iwato rakat eimuꞌe hap eweiwaure kahato e. Aikotã aru eiminug koꞌi Tupana tomoherep waku hap sio yt naku i hap eiꞌe hap ti eweiwaure raꞌyn e. Iꞌewyte aikotã Tupana iwese yt nakuaria i ete hap eweiwaure raꞌyn e. Miꞌi pote Tupana woꞌonapin hap poꞌog waku ewetunug e.
24 Pywo pe ti yt ihapytig i rakaria ewy eiperia. Eiweꞌeg kahato yne Tupana napin kurin hap koꞌi ete nug hamuat. Aikotã Win hit ehesapo hy ewywuat hawyi meremo etihep yt ewetohon i. Yt eweiꞌaparap neran i mekewat kurin koꞌi ete. Maꞌato kat koꞌi kat koꞌi woꞌonapin hap yt hãpyk i rakat aikotã Kameru yt naku i eimiꞌu wo pykai meremo ewetohon.
25 Eipe ti yt nakuaria i kahato iwan miat Tupana ehay enoi haria woꞌomuꞌe haria e. Katupono yt ewetunug i ti miitꞌin napin ehepiat hap eiwẽ pywiat hap eimienoi koꞌi yt ewetunug hin i e. Eiperia aikotã kuiꞌa eweikoho iwa pe neꞌi maꞌato hãꞌũmpype ipit pit sese. Miꞌi hap ewy ti eiwa pe eipainug hap waku kahato maꞌato ehãꞌũmpype ti yt nakuap i yn topyhuꞌat e. Miitꞌin maꞌat haria wo eiperia eimikyꞌesat ewy sat hamo. Miitꞌin mosoꞌopot hanuaria wo eweikupteꞌen wy e.
26 Pyno miitꞌin woꞌonapin haria yt ehehapytig hin rakaria e. Taꞌi kuiꞌa ihaꞌumpype ipit pit hap ewy topyhuꞌat ehewa ikahu wen. Pyno waku saꞌawyꞌi eipyꞌa eweikoho yt naku i nug hap koꞌi moweityk hamo e. Miꞌi hawyi ten eiminug hap koꞌi iꞌewyte waku raꞌyn topyhuꞌat e.
27 Pyno eiperia miitꞌin woꞌomuꞌe haria iꞌewyte Tupana ehay moherep hanuaria typy hẽku rakaria eweikupteꞌen aikotã miitꞌin woꞌosyp hawe katupono woꞌosyp hawe eweipen hawyi watehaꞌat hawyi ikytsig kahato teꞌeropyhuꞌat. Maꞌato hãꞌũmpype nem yn. Ikuꞌuro rakaria kag koꞌi yn topyhuꞌat. Yt ikahu hin i ipuo.
28 Miꞌi hap ewy eweikupteꞌen katupono eipiit ete ikytsig wen maꞌato eipyꞌa pe ipit pit hap neꞌi e. Ehãꞌũmpype wyti miitꞌin maꞌat haria wo eiperia heso rakaria.
29 Taꞌi hoꞌopot haria wo eweikupteꞌen aru e Iesui waĩꞌe haria pe woꞌomuꞌe haria pe typy hẽku rakaria. Saꞌawyꞌi wuaria Tupana ehay moherep haria syp hap ewetunug ikahu kahato e. Wakuaria syp hap eweipen kahato ipainug hap imokahu hap.
30 Eweikuap taꞌyn aikotã saꞌawyꞌi wuaria nagnia aiꞌywania miꞌatuuka koꞌi ti miꞌiria wen maꞌato mio miꞌi tã eweiꞌe -Pywo pe ti aito ten koran miꞌiria tukupteꞌen turan yt watiꞌatuuka i raꞌyn eweiꞌe ti e.
31 -Taꞌi aiꞌywotꞌin miꞌatuuka ti miꞌiria maꞌato aito ti koran yt raꞌyn eweiꞌe eiwoꞌope. Mio tã eiꞌe hap kaipyi uruikuap taꞌyn mekewat mipoꞌororia saꞌawyꞌi wuaria atuuka haria saꞌyruꞌin ne eipe hap katupono eiꞌywotꞌin woꞌoꞌatuuka haria eiꞌe hap kaipyi.
32 Miꞌi hawyi eiwemotag eiꞌywotꞌin minug saꞌag koꞌi ewy e. Katupono Tupana mipoꞌororia saꞌawyꞌi wuaria atuuka haria saipepiaria sese te eipe.
33 Moĩ satek mepytꞌin ewywuaria ti eipe eweikupteꞌen e. Miꞌi tupono ti eipe torannia aria miꞌu wo eweipyhuꞌat. Yt sake i wyti aru eiwenoꞌẽ kuap e Iesui.
34 Pywo ti aru atiꞌatupoꞌoro ehewowi uhehay moherep haria weꞌeg haria Tupana ehay kuap haria woꞌomuꞌe haria maꞌato ti aru ipatꞌok eweiꞌatuuka neꞌi e. Ipatꞌok ti aru ariaꞌyp posak ete eweiꞌauka e. Ipatꞌok ti aru eweiꞌahyk ahyk Tupana motypot hawe e. Ipatꞌok ti aru eweiꞌatumohan mohan tawa koꞌi kape iꞌatuuka teran haype e miwan me.
35 Taꞌi saꞌawyꞌi wuat Tupana miꞌatupoꞌororia suu ti topyhuꞌat kahato eiꞌywotꞌin po ete. Miꞌi pote mesup eipe iꞌewyte eweikupteꞌen aikotã saꞌawyꞌi te Kaĩ tiꞌauka toꞌywyt Apeu wakuat pykai toiꞌatuuka e. Yne saꞌawyꞌi wuat Tupana miꞌatupoꞌororia atuuka haria te ti eipe e. Saꞌawyꞌi wuat Tupana ehay enoi hat Sakaria mekewat Parakia saꞌyru eweiꞌauka Tupana motypot koro wywuat aihũ wuk hawe e. Pywo ti torannia miꞌiria suu topyhuꞌat eipo ete te e.
36 Pywo pe ti yt uheso i Tupana miꞌapiheg wuaria eweipyhuꞌat e eiꞌywotꞌin apiheg hap ahyt topyhuꞌat ehepe.
Iesui Tuwak Tehaꞌat Ierusarẽi Kape Turan
37 Ierusarẽi miaria Tupana mipoꞌororia atuuka haria kahato ti eipe e. Atiꞌatupoꞌoro kahato ti uhemiitꞌin eimuꞌe hamo maꞌato ti yne miꞌiria eweiꞌatuuka nu wo e Iesui. Miꞌi rẽ Uito iraꞌyn meiũ iꞌatusaipe kai areineꞌen eipyꞌasetpe e. Aikotã waipaka ty tomepytꞌin atukay kay tepiat iꞌatukyꞌe haype hap ewy Uito worohoꞌokay kay maꞌato yt eweikokaꞌat teran i uhewowi. Uipopesap ywytꞌokpype ro eweikupteꞌen are maꞌato yt eweĩꞌẽ teran i e.
38 Miꞌi tupono ti aru yt uwe i topyhuꞌat aru eiꞌyat pe e.
39 Miꞌi hawyi yt karamuo i eiwaꞌakasa uhewowi. Arẽtem naꞌyn eipyꞌasetpyi Ierusarẽi miaria. Maꞌato meiũran ariot kuap iraꞌyn karãpe eiperia -Wakuat kahato En eweiꞌe. Pywo urueTupana wo En urukaꞌiwat sese eweiꞌe turan araꞌaipok ehewowi are e.
