Mateu 24:1-51
24 Iesui tuwẽtem Tupana motypot yat pyi hawyi ipotmuꞌeria tokokaꞌat hewowi teꞌeroꞌe hamo -Mehin uruimoherep teran meiẽwat Tupana motypot yat nu kawiat iwato rakat iꞌatuꞌe.
2 Miꞌi hawyi Iesui tiꞌatuwesat -Taꞌi iwato kahato ti nu kawiat toꞌotote tote. Maꞌato areꞌe ehepe pywo pe ti meiũran ti aru meimuẽwat toꞌotiat toꞌotiat rakaria yt wẽtup i topyhuꞌat e. Meiũran ti aru wanikaptia hytpok yne nu wato koꞌi e.
3 Miꞌi hawyi tuwat Uriweiria ypia eꞌyityꞌok kape. Miꞌi tote taꞌapyk hawyi ipotmuꞌeria tokokaꞌat hewowi 12 ok takaria. Miꞌi hawyi apo iꞌatuꞌe Iesui pe -Karãpe aru taꞌatupugha meiẽwat Tupana motypot yat iꞌatuꞌe. Karamuo aru putꞌok e eꞌaipok mesuwat yi kapiat hap eꞌat iꞌatuꞌe. Karãpe aru yi kahuro hap putꞌok e iꞌatuꞌe. Kat koꞌi kat koꞌi aru tuwemoherep mesuwe putꞌok e hap eꞌyian mete iꞌatuꞌe.
4 -Pyno eiweꞌeg wo o uiwyriaꞌin katupono tõꞌẽ tõꞌẽ kahato ti aru eimaꞌat teran haria e.
5 Uhet eroꞌok hap kaipyi ti aru mio tã iꞌatuꞌe -Uito ti Tupana mipoꞌoro eiporekuat nuat iꞌatuꞌe.
6 Heꞌat ete i ti aru aikotã aikotã neꞌi eweikuap wuatꞌi kaipyi woꞌoꞌauka hap wuꞌuka hap ti aru eweikuap yne tama kaipyi e. Pyno mekewat sehay eweikuap hawyi o yt eiwanetup teiꞌo gyt eiꞌe hap kape neꞌi e. Katupono pywo ti aru putꞌok e heꞌat miꞌi tã hamuat hap e. Taꞌi miꞌi hap ti aru eipyꞌasetpe eweikuap yne hamo e. Maꞌato ti aru yt heꞌat ete i te e.
7 Miꞌi turan ti aru wẽtup ok wẽtup ok morekuaria emiitꞌin tuꞌuka tuꞌuka toꞌope toꞌope yi wato hap oktan e. Mekewat eꞌat pe ti aru yt kat i hin i miꞌu topyhuꞌat mesuwarote e. Iꞌewyte ti aru yi tyryꞌe kahato mekewat eꞌat pe aikope aikope wẽtup tama pe wẽtup tama pe e. Miꞌi hawyi aru yt kat i miꞌu topyhuꞌat e.
8 Miꞌi hap koꞌi ti aru pyno haꞌawynug hap taꞌyn miꞌi tã taꞌatunug e. Maꞌato ti aru yt hoꞌopot hap sese i te e.
9 Miꞌi hawyi ti aru eimaꞌat haria ehum naꞌyn hoꞌopot hamuat hawe eiꞌauka hamuat kape e. Mekewat eꞌat pe ti aru yne iꞌatupyꞌahak ehete. Yt iꞌatuwese i ehete are katupono eipe uimohey haria pote e.
10 Taꞌi mekewat eꞌat pe ti aru ipoityꞌi kahato saꞌawyꞌi wuat uimohey haria ete maꞌato wemoti uipupiat haria ti aru waureꞌe uimohey hap ete e. Miꞌi hawyi ti aru woꞌomaꞌatꞌi maꞌatꞌi haria wo teꞌeropyhuꞌat iꞌatuwoꞌope mekewat eꞌat pe.
11 Miꞌi hawyi ti aru wẽtup ok wẽtup ok tuwemowato -Uito ti meiũ Tupana mipoꞌoro tehay enoi hanuat iꞌatuꞌe aikowo aikowo tuwemowato maꞌato ti aru yt pywo pe ti e. Iꞌatu rakaria maꞌat haria wo teꞌeropyhuꞌat. Ipotmuꞌeria ti aru iꞌatu kahato e.
12 Miꞌi hawyi ti aru poꞌog naꞌyn yt naku i nug hap koꞌi topyhuꞌat mesuwarote. Miꞌi kai pun aru iraniaꞌin uimohey haria saꞌawyꞌi wuat uikyꞌe haria woꞌowese haria iraꞌak takaria wo taꞌatupyꞌa piat pe. Iperup takaria wo teꞌeropyhuꞌat.
13 Maꞌato uwe uwe yt ipun i uikyꞌe hap aat kaꞌap mekewat eꞌat kape miꞌi haria ti aru teꞌeropyhuꞌat Tupana miehakyeraꞌat koꞌi wuat e.
14 Mekewat eꞌat pe owokai uhehay wakuat aikotã Tupana topyhuꞌat Morekuatno wuatꞌi miitꞌin muo yi wato hap oktan hap tuwemoherep. Miꞌi hap kaipyi ti aru yne ywania tikuap taꞌyn uhetiat e. Miꞌi hap koꞌi toran naꞌyn hawyi ti miꞌi ti aru ikahuro hap eꞌat sese putꞌok e raꞌyn e Iesui.
Iesui Henoi Hoꞌopot Mesuwat Mytyyp Totiat Etiat
15 Aikotã saꞌawyꞌi wuat Tupana ehay moherep hat Tanieu e hap ewy aru putꞌok e mio tã e -Meiũran ti aru tuwemopoĩꞌam Tupana motypot yat wato pe poꞌog yt nakuat i wuatꞌi kawiat rakat. Yne Tupana sese etiat mohit hamuat -Uito ti Tupana e hat e. Waku eweikuap kat som Tupana ihay mesuwat iwan me hap e.
16 Mekewat yt nakuat i sese wemopoĩꞌam hat eweiꞌakasa raꞌyn hawyi o eikohyeput raꞌyn yi Iuteu pyi yityꞌok koꞌi kape e.
17 Eihyha wo o. Aikope aikope ereineꞌen eꞌyat pe meremo erẽtem no. Yt eraꞌaipok iraꞌyn o kat kat koꞌi sat hamo e.
18 Taꞌi eipotpap eiko etiat turan wuat pykai pote o yt eweiꞌaipok iraꞌyn eiꞌyat kape eiwesokpe sat hamo e.
19 Taꞌi mekewat eꞌat pe ti aru niatpo kahato haryporia mepytꞌa rakaria ete iꞌewyte haryporiaꞌin iꞌatumepytꞌin mi ete te rakaria e.
20 Pyno o ewehẽtup Tupana pe -Yt etipoꞌoro teiꞌo uruepiat hoꞌopot hap eꞌat iꞌaman mot eꞌat pe eweiꞌe e. Iꞌewyte yt etipoꞌoro teiꞌo uruepiat hoꞌopot hap eꞌat emotypot hap eꞌat pe aiwemohey hap eꞌat pe e.
21 Miꞌi hawyi ti aru poꞌog poꞌog topyhuꞌat hoꞌopot hap wuatꞌi eꞌat piat kai e. Taꞌi mekewat eꞌat pe ti aru Tupana piat yi nug saꞌawyꞌi te hap turan wuat eꞌat yt ewywuat i wataꞌakasa hoꞌopot hap e.
22 Pyno mekewat eꞌat pe ti aru iwato kahato hoꞌopot hap topyhuꞌat e. Miꞌi hap ti aru maꞌato Tupana timopytuꞌu e. Maꞌato yt toimopytuꞌu i mekewat pote ti ten topap yne miitꞌin e. Miꞌi tupono tomikyꞌe tomiꞌairoria etiatno yn toimopytuꞌu e.
23 Mekewat eꞌat tokosap taꞌyn hawyi ti aru teꞌeroꞌe iraniaꞌin ehepe -Iuẽ putꞌok e raꞌyn Tupana mipoꞌoro aiporekuat nuat iꞌatuꞌe ti aru maꞌato o yt eweiꞌatumohey teiꞌo eimaꞌat hap e.
24 Taꞌi -Eheso i rat eweiꞌe yn o are katupono Tupana mipoꞌoro eiporekuat nuat raꞌyn uruto e haria iꞌatuꞌe ti aru teꞌeruwemoherep e. -Uruto Tupana mipoꞌoro tehay enoi hanuat iꞌatuꞌe yt pywo pe i e. Miꞌiria ti aru taꞌatumisepap iwato kahato inug wy miitꞌin miat taꞌatuehay mohey hamuat e. Maꞌato miꞌiria miitꞌin maꞌat hamuat neꞌi e. Iꞌewyte ti Tupana miꞌairoria imohey sese haria maꞌat reran haype e.
25 Pyno eiweꞌeg wo o miꞌiria pupi katupono ahenoi raꞌyn yian mete iꞌatuetiat e.
26 Mio tã iꞌatuꞌe ti aru -Yahig kape iuẽpe raꞌyn ti tuwemoherep Tupana mipoꞌoro aiporekuat nuat iꞌatuꞌe ehepe pote o yt eweiwat reiꞌo miꞌiria eimaꞌat teran haria upi areꞌe. -Taꞌi migꞌi wo toineꞌen itote iꞌatuꞌe pykai yt eweiwat e Iesui temiitꞌin me.
27 Katupono Uito Eheykeꞌet sese ti aru ariot turan wuatꞌi miitꞌin teꞌeraꞌakasa e. Miꞌi ti aru aikotã merepꞌe hap ewy aremoherep wuatꞌi puo e. Miꞌi ti aru heremo yne aat wẽtem hap tote pyi yne aat minꞌe hap kape e. Taꞌi miꞌi hap ewy ti aru araꞌaipok e.
28 Eweikuap Eheykeꞌet putꞌok e aru e hap aikotã eweikuap uruwu putꞌok iꞌatuꞌe hap toineꞌen iꞌokpuk hap pote e.
Iesui Toꞌaipok Irane Hap Etiat Tohenoi
29 Miꞌi hawyi mekewat eꞌat tokosap taꞌyn hoꞌopot hap hawyi ti aru aat iꞌypyryp taꞌyn iꞌewyte waty iꞌypyryp taꞌyn iꞌewyte ti aru waikiru hewo hewo taꞌatueiam myi e. Iꞌewyte atipy ti aru miꞌi turan yt iheg i raꞌyn hurukꞌe raꞌyn e.
30 Miꞌi hawyi ti aru yne ywania miitꞌin toꞌokakꞌi katupono Eheykeꞌet uut hap eꞌat pe heremo kahato ywyhig muo meremo tuut e. Yne ti aru teꞌeraꞌakasa miꞌi tesaika hap wuat ẽtyhot hap wuat huut hap kape e.
31 Miꞌi hawyi ti aru temiitꞌin atipy piaria toiꞌatupoꞌoro hu hu iꞌatuꞌe hamo e. Miꞌi hawyi ti aru taꞌatuꞌatunug hewowi imiꞌairoria e. Taꞌatuꞌatunug ni aru aikope pyi aikope pyi wasere tuut hap kaipyi aat wẽtem hap kaipyi aat minꞌe hap kaipyi yne yne kaipyi taꞌatuꞌatunug imiꞌairoria hewowi yi sasat hap kaipyi aikope aikope miitꞌin tukupteꞌen hap kaipyi.
32 Pyno eweikuap taꞌyn Wiku yp ete. Wiku iꞌyhop kyt hap kaipyi eweikuap taꞌyn merep hamuat raꞌyn aat hakup hamuat hap eꞌat yt pya hin i raꞌyn.
33 Miꞌi hap ewy ti aru karãpe eweiꞌakasa yne raꞌyn uiꞌe hap koꞌi hawyi eweikuap taꞌyn yt pya i raꞌyn. Aikotã okenꞌypy ete toineꞌen e.
34 Tukupteꞌen ne miitꞌin mekewat eꞌat piat yne uimoherep hap koꞌi akasa haria yt ikuꞌuro i te turan.
Yt Uwe I Ikuap Kat Eꞌat Kat E Ora Toꞌaipok Toꞌywot Yn Ikuap
35 Pyno waikiru aat yi tuweityk yne hamuat maꞌato uiat uimienoi uhehay yt sake i tuweityk e Iesui.
36 Yt uwe i ti uhuut hap eꞌat kuap hat. Taꞌi Uito yt atikuap i wy iꞌewyte atipy piaria iꞌewyte yt taꞌatukuap i. Maꞌato wẽtup yn ikuap hat. Uiꞌywot atipy piat yn ikuap karãpe aru araꞌaipok meikowo hap eꞌat e Iesui.
37 Saꞌawyꞌi te ahaꞌaseꞌi Nuꞌe eꞌat pe hap ewywuat tukupteꞌen aru miitꞌin uhuut hap eꞌat turan e.
38 Miꞌi hap eꞌat pe iwato kahato ienuk hap itote. Sapo u haria wo teꞌeropyhuꞌat. Toꞌokyiꞌat kyiꞌat hap koꞌi itote e. Mekewat eꞌat Nuꞌe teke raꞌyn towyriaꞌin wywo yara wato pe turan miitꞌin saꞌag nug haria wo te teꞌeropyhuꞌat.
39 Miitꞌin yt taꞌatukuap hin i mekewat Tupana minug hap etiat yi minꞌe hap ete. Taꞌi mekewat turan wuat ewy te aru Eheykeꞌet uut hap eꞌat turan e.
40 Miꞌi turan ti aru typyꞌok Tupana tipuẽti taꞌatuko tote. Miꞌiria ti aru wẽtup ok totioto hawyi wẽtup ok topyhuꞌat e.
41 Iꞌewyte ti aru haryporiaꞌin typyꞌok mani pe wat haria miꞌiria toiꞌatupuẽti. Miꞌiria ti aru wẽtup ok totioto maꞌato wẽtup ok tuweran topyhuꞌat aru paĩ e.
42 Miꞌi tupono eiweꞌeg wo o katupono yt eweikuap i kat eꞌat putꞌok e Eheykeꞌet hap e. Sehaꞌat uhuut hap kapiat hap ewy o eweikupteꞌen e.
43 Pyno eweikuap o hãꞌãkap e. Saꞌawyꞌi so toineꞌen hekat rakat toꞌyat ikahu rakat pe maꞌato so meiũran wãtym muo putꞌok e seroꞌok e hat hawyi toteroꞌok yne hekareꞌen iket kai e. Maꞌato toikuap huut hap pote teneke yt toket i e. Miꞌi hap ewy ti areꞌe ehepe.
44 Miꞌi tupono eiweꞌeg wo o uhuut hap eꞌat kape e. Katupono ti seroꞌok e hat ewy aru Eheykeꞌet tuut e. Yt uwe mikuap mo i putꞌok e Eheykeꞌet aikotã seroꞌok e hanuat putꞌok e hap ewy.
45 Pywo watikuap taꞌyn uwe uwe som topyhuꞌat tekaꞌiwat ekatup hap eꞌat miꞌi ti hemiitꞌin apykok hamuat topyhuꞌat. -Tuut ti aru uikaꞌiwat e yn hat ewy. -Miꞌi pote waku atiꞌatupoi wuatꞌi eꞌat pe hemiitꞌin miꞌu wo e. Pyno waku pe yn iꞌyat huut turan uikaꞌiwat uut hap eꞌat pe turan e.
46 Miꞌi tã nug hat wyti aru iwepiit kahato tokaꞌiwat putꞌok e turan katupono wakuap nug turan ikaꞌiwat tipuẽti pote e. Miꞌi pote tokaꞌiwat wakuat tutunug wyti aru mekewat waku nug hat ete.
47 Miꞌi hat pe ti aru -Pyno woronug en yne uhekareꞌen koꞌi apykok hamo e waku nug hat pe.
48 Maꞌato wẽtup ok wyti aru -Taꞌi motꞌi hap ewy pya toineꞌen uikaꞌiwat e tuwepe. Yt meremo i taꞌaipok meikowo toꞌyat kape e.
49 Miꞌi haype ti aru toiꞌahyk ahyk neꞌi taꞌatukaꞌiwat emiitꞌin. Miꞌi haype ti aru mio tã e hat ienuk hap tutunug tewyriaꞌin wywo. Iꞌewyte mahy u kahato hawyi imopẽꞌã rakat topyhuꞌat.
50 Miꞌi ti aru yt iweꞌeg wuat turan hin i putꞌok e e ekaꞌiwat.
51 Miꞌi hawyi tekaꞌiwat putꞌok e hawyi haiwot kahato topyhuꞌat temiit ete. Miꞌi hawyi toimosoꞌopot sehay wo hawyi ti aru toipoꞌoro raꞌyn aikope tukupteꞌen miitꞌin typy iwẽ piat sehay rakaria eiam me e. Aikope miitꞌin teꞌeruwak kyryet kyryet iꞌatuꞌe taꞌatuiãi ete hap kape raꞌyn e Iesui.
