Mateu 25:1-46
25 Miꞌi hawyi poꞌog Iesui henoi aikotã Tupana topyhuꞌat aru Aiporekuatno hap. -Miꞌi hap ewy ti aru topyhuꞌat e Iesui aikotã ahetama puo haryporiaꞌin 10 ok yt heꞌaito i te rakaria tuwat taꞌatueꞌariãty wywo wãtym muo taꞌatuwyꞌok eꞌaito wuat puẽti hamo e.
2 Ipatꞌok 5 ok takaria hepap takaria katupono miꞌiria iꞌatueꞌariãty ipytꞌat kahato rakaria tuwat maꞌato ipatꞌok yt hepap haria i e.
3 Maꞌato iraniaꞌin 5 ok takaria eꞌariãty ti yt ipytꞌat kahato rakaria i e. Yt taꞌatuereto poꞌog ihy meiũran wuat ikahuro hap kape.
4 Maꞌato ipatꞌok iweꞌeg nakaria iꞌatueꞌariãty eiam howopy taꞌatueroto maꞌato iraniaꞌin yt.
5 Yt tuut i te iꞌatuwyꞌok eꞌaito te pote iꞌatuket aat raꞌyn.
6 Miꞌi turan wãtym hake miitꞌin teꞌeruwatka raꞌyn taꞌatuehay pirik wo -Meipe raꞌyn tuut raꞌyn seꞌaito iꞌatuꞌe. Eweiwat ro ipuẽti hamo iꞌatuꞌe.
7 Miꞌi pote piꞌã hin koꞌi ti teꞌerehymut iꞌatupoĩꞌam 10 ok takaria seꞌaito wuat ekatup haria. Miꞌi hawyi taꞌatunug hãpyk kahato yne taꞌatueꞌariãty iun koꞌi.
8 Maꞌato iraniaꞌin -Ewehoꞌopuru uruepe eheꞌariãty hy iꞌatuꞌe kat pote sio uruket kai hasep taꞌyn urueꞌariãty hy porap ikahuro raꞌyn pote iꞌatuꞌe.
9 Maꞌato so -U an yt raꞌyn iꞌatuꞌe neꞌi raꞌyn iꞌatuꞌe maꞌato uruhoꞌoium uruwat urueꞌariãty hy pote taren uruwat muap upiat hamo yt putꞌok e i raꞌyn iꞌatuꞌe. Eweiwat ro ihy weneru haria kape miꞌi hawyi eweikyiꞌat ro eiwatno eheꞌariãty hy wo iꞌatuꞌe 5 ok takaria hẽtup haria pe.
10 Miꞌi hawyi tuwat raꞌyn ariãty hy kyiꞌat hamo maꞌato miꞌi pykai ti iraniaꞌin tuwat raꞌyn seꞌaito wywuat kape. Miꞌi hawyi tuwehytꞌok taꞌyn woꞌokyiꞌat hap yat pe hawyi taꞌatuokenhyp taꞌyn.
11 Meiũran hawyi putꞌok iꞌatuꞌe iraniaꞌin 5 ok takaria ariãty hy soꞌokyiꞌat hamuat aipok haria. Maꞌato taꞌatuꞌokenhyp taꞌyn pote teꞌeruwẽpowat -Mimi mimi ehoꞌokenhypꞌok to eꞌyat uruepe iꞌatuꞌe.
12 Maꞌato Seꞌaito -Pywo yt worohoꞌokuap i eipe e.
13 Pyno miꞌi hap ewy o eiweꞌeg wo eweikupteꞌen uhuut hap ekatup haype. Katupono yt eweikuap i Eheykeꞌet uut hamuat kat eꞌat pe sio kat eꞌora pe putꞌok e.
Iãꞌãkap Puo Iesui Henoi Aikotã Morekuat Hekat Tutum Heropat Haria Pe Ito Hap Owakai
14 Miꞌi hawyi wẽtup sehay iãꞌãkap i raꞌyn tohenoi. -Saꞌawyꞌi so wẽtup ok miit toto teran pya wuat setama kape e. Maꞌato so toto hap owakai te toiꞌatukay kay tuwewowi toterepat haria. Miꞌi hawyi so toiꞌatupuru porapꞌi tetineiru iꞌatuepe.
15 Wẽtup ok pe so tutum 500 iꞌa rakaria uru kawiat. Miꞌi hawyi wẽtup ok pe tutum 200 iꞌa rakaria uru kawiat. Miꞌi hawyi wẽtup ok pe ti tutum 100 iꞌa rakaria uru kawiat. Miꞌi hawyi iꞌatukaꞌiwat tuwat raꞌyn ewyry hap upi.
16 Miꞌi hawyi mekewat 500 iꞌa rakaria topo piat tuweꞌeg hap ewy tutunug. Miꞌi ti imowato kahato tokaꞌiwat etineiru iꞌoktan ne toiwyꞌinug. Miꞌi hawyi 1 miu iꞌa rakaria tuwemowato raꞌyn.
17 Miꞌi hawyi iꞌewyte wẽtup ok 200 iꞌa rakaria ipo pe 400 iꞌa rakaria teꞌeropyhuꞌat tuwemowato.
18 Maꞌato mekewat 100 iꞌa rakat topo pe yt toimowato i tokaꞌiwat miium maꞌato toiꞌasyp yi pe. Toterowyi neꞌi.
19 Miꞌi hawyi ti iꞌatukaꞌiwat potꞌi tewyry hawyi tuut i raꞌyn. Putꞌok toꞌe hawyi temiitꞌin myẽꞌym ok takaria toiꞌatukay kay i raꞌyn tuwewowi mekewat tetineiru wywuat haria.
20 Saꞌawyꞌi wuat 500 iꞌa rakaria ipo piat toꞌe tokaꞌiwat pe -Uhyt e poꞌog naꞌyn ti mekewat emiium 500 iꞌa rakaria kaipyi atipuẽti 1 miu iꞌa rakaria raꞌyn uikaꞌiwat e.
21 -Pyno waku kahato en. Ehepap kahato ti e. Pyno en wakuat kahato. Miꞌi tupono meiũran ti aru poꞌog uhekareꞌen apykok hamo raꞌyn woroporokpun e. Miꞌi tupono koitywy uhekareꞌen epo pe e. Pyno koitywy toꞌiro watuwemowepiit raꞌyn e.
22 Miꞌi hawyi wẽtup ok i 200 iꞌa topo piat putꞌok e hawyi toꞌe -Uikaꞌiwat e saꞌawyꞌi kue etum 200 iꞌa rakaria etineiru uhepe e. Pyno koitywy ti maꞌato poꞌog naꞌyn emiium 200 rakaria kaipyi ti 400 iꞌa rakaria raꞌyn toineꞌen e.
23 Miꞌi hat pe ikaꞌiwat toꞌe -Pyno waku kahato en e. Pyno en ipotpap kahato rakat e. Yt uimaꞌat hin hat i e. Katupono uimiꞌatoiat epo piat etimowato kahato raꞌyn. Miꞌi tupono poꞌog atum epe uhetineiru imowato hamuat e. Koitywy waku watuwemowepiit hamuat e.
24 Miꞌi hawyi mekewat 100 iꞌa rakaria wywuat myhuꞌat hat putꞌok e raꞌyn hawyi toꞌe -Uikaꞌiwat taꞌi epo potyi hap ewy toineꞌen emotpap hap ete. Worokuap kahato en yt ewat i emikoi terek hat ewy ereineꞌen. Ehoꞌohep meketã yt emikoi koꞌi kaipyi e.
25 Miꞌi tupono arekenꞌẽ kahato raꞌyn epupi e. Miꞌi pote ti mekewat etineiru 100 iꞌa rakaria atiꞌasyp neꞌi yi pe e. Meiũ raꞌyn etineiru emiium uhepiat hap oktan ne e.
26 Miꞌi hawyi ipyꞌahak ikaꞌiwat hawyi toꞌe haty wo -Yt naku i kahato en. Eperup kahato rasig motpap nug hamo e. Pyno etikuap taꞌyn uito atiterek yt uimikoi wuat i aikope yt atikoi koꞌi i kaipyi atitetek etikuap taꞌyn.
27 Kat poteĩ uhetineiru yt etipuru i iraniaꞌin me imowato hamuat e.
28 Miꞌi hawyi iraniaꞌin temiitꞌin me -Pyno eweihep to mekewat yt weꞌeg i hat po pyi imisyp hawyi ewetum no mekewat 1 miu iꞌa rakat pe e.
29 Pywo pe ti miꞌi hap ewy ti aru topyhuꞌat. Katupono uwe uwe ipo piat tokaꞌiwat miium koꞌi tuwemowato raꞌyn miꞌi pe poꞌog poꞌog towatnuat topyhuꞌat maꞌato uwe uwe yt iweꞌeg i rakat ewy topyhuꞌat miꞌi kat som kurin kat topo piat tokaꞌiwat tihep wyti aru e.
30 Miꞌi tokaꞌiwat toꞌe terepat hat pe. -Waku pyno mekewat uimiium syp hat yt weꞌeg i hat etipun iꞌypyryp kape aikope iꞌatuwoꞌokakꞌi hap kape aikope taꞌatuiãi ete kyryet kyryet iꞌatuꞌe hap kape e.
Miitꞌin Ykeꞌet Toineꞌen Wyti Aru Uwe Waku Uwe Yt E Hamo
31 Meiũran ti aru putꞌok e Eheykeꞌet Morekuat koro torannia atipy piaria wywo mesuwat yi tote woꞌomotypot kahato hawe. Miꞌi turan taꞌapyk morekuat eiam note hẽtyhot kahato rakatno e.
32 Miꞌi hawyi ti aru miꞌi seiam tote pyi toiꞌatukay kay raꞌyn uhewowi torannia ywania. Miꞌiria ti aru aikotã ihũria toꞌopype pype tukupteꞌen hap ewy. Maꞌato imohey haria toiꞌatuhep iraniaꞌin kaipyi mekewaria yt imohey pyꞌasetpyi. Aikotã Uweiria apykok hat toihep Uweiria koꞌi mekewaria Poti pyꞌasetpyi hap ewy e.
33 Miꞌi hawyi ti aru ipo sese kawiatno wakuaria raꞌyn e. Maꞌato mekewat yt nakuaria i ti aru kowo ipo ran kai raꞌyn toiꞌatunug e.
34 Miꞌi hawyi ti aru itote uipo sese kawiaria pe Morekuat koro toꞌe ipo ran koꞌi kape -Eweĩꞌẽ ro meikowo Uiꞌywot miꞌatukyꞌe koꞌi e. Atum neran ti Tupana etama ehepe e. Katupono yi nug hawyi te ti mekewat atum teran kahato ehepe are e.
35 Katupono saꞌawyꞌi uhesyꞌat kahato turan ti ewetum eimiꞌu uhepe e. Iꞌewyte areꞌyꞌutui kahato turan ewetum uhepe yꞌy uiweꞌyꞌu hamo e. Iꞌewyte yt uikuap pykai i ti -Ereke ro ereineꞌen mesuwe Uhyt Mimi eweiꞌe uhepe e.
36 Iꞌewyte yt uhesokpe hin i turan kue ewehoꞌoium uhepe ehesokpe e. Iꞌewyte kue uiꞌahuu turan uipowyro eipe e. Iꞌewyte kue uipyhik piat areineꞌen turan eipe ehehay uiwywuat hamo eweĩꞌẽ uhewowi e. Taꞌi mio tã e ti aru ipo sese koꞌi kawiat pe e.
37 Mio tã e pote aru ipo sese kawiaria teꞌeroꞌe -Karapeĩ esyꞌat turan uruipuẽti hawyi uruipoi En iꞌatuꞌe aru. Karapeĩ ereꞌyꞌutui turan uruipuẽti hawyi uruhoꞌoium epe Uhyt Mimi iꞌatuꞌe irane.
38 -Karapeĩ ereke o urutoꞌe epe yt ekuap i pykai sio yt esokpe i ereineꞌen turan uruhoꞌoium sokpe epe iꞌatuꞌe morekuat pe.
39 Iꞌewyte urutuwat woꞌopyhik hap kape epyhik piat eꞌahuu ereineꞌen turan epowyro hamo yt urutaꞌakasa hin i En iꞌatuꞌe irane morekuat pe ipo sese kawiaria.
40 Miꞌi hawyi iꞌatuporekuat tiꞌatuwesat -Yt uhepe i maꞌato uhemiitꞌin ihakyꞌeꞌi rakaria yt iwy rakaria i powyro haria ti eipe. Miꞌi kaipyi iꞌewyte uipowyro haria eipe yt eweikuap i pykai e aru iꞌatuepe.
41 Maꞌato iraniaꞌin uipo ran kawiaria pe ti aru toꞌe -Eweiwat ro uiꞌyatypepyi Tupana miꞌuhu koꞌi eipe are e. Eiwehytꞌok to aikope aria yt hasep i rakat pe Tupana minug hoꞌopot hamuat hap kape ahiag toineꞌen hap kape. Iꞌewyte ahiag powyro haria haiwot rakaria tukupteꞌen hap kape are ti aru uipo ran kawiaria pe.
42 Katupono saꞌawyꞌi areineꞌen eipyꞌasetpiat turan uhesyꞌat kahato hap wywo areineꞌen maꞌato yt uipoi hin i eipe eimiꞌu wo e. Uiweꞌyꞌutui kahato turan eipe yt uimueyꞌu hin i e.
43 Iꞌewyte yt uwe piat i uikuap turan -Ereke ro Mimi Uhyt yt eweiꞌe hin i uhepe. Iꞌewyte areineꞌen eitokpe yt uhesokpe hin wywo i. Miꞌi turan yt ewetum hin i uhepe sokpe. Uiꞌahuu turan uipyhik piat turan yt eweĩꞌẽ hin i uimowepiit hamo uipowyro hamo e.
44 Miꞌi hawyi ti aru pyno apo iꞌatuꞌe miꞌiria -Karapeĩ miꞌi tã Mimi Uhyt iꞌatuꞌe. Karapeĩ ereineꞌen uruwywo hesyꞌat hawyi yt urupoi i en. Karapeĩ yt esokpe i rakatno iꞌahuu rakatno epyhik pe iꞌatuꞌe. Karapeĩ yt kat i uruipomeꞌeg epe apo iꞌatuꞌe aru Morekuat koro pe.
45 Miꞌi hawyi ti aru toiꞌatuwesat -Taꞌi haꞌawyte ti uimohey haria yt iꞌatuꞌyat i eipyꞌasetpiat turan iꞌewyte iꞌatupyhik piat turan iꞌatuweꞌyꞌutui turan iꞌatuesyꞌat turan iꞌatuꞌahuu turan yt eweiꞌatupowyro hin i miꞌiria uimohey haria ihakyꞌeꞌi rakaria e.
46 Pyno miꞌiria wyti aru tuwehytꞌok taꞌyn hoꞌopot aat kaꞌap hap kape. Iraniaꞌin waku nug uhepiat haria uhemiitꞌin piat pomeꞌeg eharia tuwehytꞌok aru wuatꞌi eꞌat piat ieineꞌen hap sese kape e Iesui ahepe topotmuꞌeria pe Uriweiria ypia yityꞌok tote.
