Mateu 26:1-75
26 Iesui tiꞌatumuꞌe kahu raꞌyn hawyi toꞌe topotmuꞌeria pe
2 -Pyno mukiꞌite eꞌihatꞌok hawyi ti aru aiꞌywania tuwat yne raꞌyn ienuk hap nug hamo mekewat ahewanikaptia saꞌawyꞌi wuat Esituꞌin po pywiat hoꞌopot hap kaipywiat ahenoꞌẽ hap kapiat watetup hap eꞌat nug hamo e. Miꞌi turan Uito Eheykeꞌet ewanikaptia po pe areineꞌen uiꞌauka ariaꞌyp posak etiat hamuat e Iesui.
3 Miꞌi turan paꞌi koꞌi gagnia wywo teꞌeruwaꞌatunug naꞌyn. Wẽtup ok paꞌi poꞌog iwato rakat Kaꞌiwasi e hap het rakat yat pe. Itote yne yne tõꞌẽ tõꞌẽ paꞌi kororia iraniaꞌin wywo.
4 Miꞌi hap tote toꞌoehay toꞌope toꞌope aikotã waku Iesui taꞌatupytyk hawyi taꞌatuꞌauka yt uwe mikuap mo i e hap ete toꞌoehay toꞌoehay.
5 Maꞌato yt naku i som watopytyk ahenuk koro hap eꞌat pe iꞌatuꞌe. Katupono mio tã watunug pote miitꞌin iꞌatupyꞌahak taꞌyn teꞌeropyhuꞌat tukupteꞌen ikyꞌe haria miitꞌin pyꞌasetpe.
6 Miꞌi hawyi Iesui putꞌok e tawa Petania pe temiitꞌin wywo. Miꞌi hawyi tuwehytꞌok Simau yat pe saꞌawyꞌi te wuat hepihi pihi rakat yat pe.
7 Itotiat iꞌatuenuk turan wẽtup ok haryporia tuut mohag hy ikap takat hekat rakat mohag hy wywo. Heiam nu Arapatu kawiat wywo ikahu kahato rakat iꞌewyte ihy ikamhig se kahato rakat wywo. Putꞌok toꞌe hawyi toiꞌokpun yne Iesui asap ete henuk turan.
8 Miꞌi tã haryporia tunug pote hemiitꞌin yt iꞌatuwese i haryporia minug hap ete. -Kan hamo ten toiꞌokpun mesuwat ikamhig se rakat hekat kahato rakat iꞌatuꞌe.
9 -Waku poꞌog miꞌi watiweneru hawyi watum haꞌup yt hekat i rakaria pe iꞌatuꞌe. Yt kat hamo hin i wyti toiꞌokpun howoity rakat iꞌatuꞌe toꞌope hemiitꞌin.
10 Mio tã iꞌatuꞌe hap hawyi Iesui toꞌe iꞌatuepe -Yt eipyꞌahak teiꞌo mana ete katupono wakuap ti uhepe tutunug e. Yt eiwemohit i haryporia minug hap ete e katupono ti ikahu kahato iminug atipuẽti e.
11 -Katupono yt hekat i rakaria ti aru tukupteꞌen wuatꞌi eꞌat pe mesuwat yi tote eiwywo eimipowyro koꞌi wuat maꞌato Uito yt motꞌi i areineꞌen eipyꞌasetpe e temiitꞌin me.
12 Meiũwat haryporia tunug uhete uikuꞌuro hap eꞌyian mete e.
13 Miꞌi tupono areꞌe pywo ti aru meiũran aikowo aikowo mesuwat rotiat miitꞌin wakuat sehay taꞌatuhenoi henoi uheineꞌen hap etiat iꞌewyte taꞌatuhenoi wyti aru aikotã haryporia minug waku uhetiat hap etiat e.
Iuta Henoi Paꞌiria Pe Iesui Maꞌat Hamuat Hap Etiat
14 Miꞌi hawyi ti wẽtup ok hemiit 12 ok hap Iuta Ikarioti saꞌyru toto raꞌyn paꞌi kororia kape henoi hamo.
15 -Kat aru Iesui puẽti hap saꞌup ewetum uhepe ahenoi ehepiat ipytyk hamo pote e. Miꞌi hawyi Iuta pe taꞌatuium 30 ape Iesui enoi hap saꞌup mo.
16 Miꞌi hawyi Iuta tuwanetup aikotã waku tutunug imaꞌat hamuat hap ete. Toikat kahato aikotã miat ipytyk hamuat.
Iesui Toineꞌen Topotmuꞌeria Wywo Man U Hap Eꞌat Turan
17 Miꞌi turan man teneg u hap owakai te iraniaꞌin hemiitꞌin apo iꞌatuꞌe -Aikope som waku watunug meiũ aheman teneg u hap iꞌatuꞌe. Aikope aru watenuk iꞌatuꞌe.
18 Miꞌi hawyi Iesui toꞌe -Pyno eweiwat ro tawa wato kape e. Putꞌok eiꞌe hawyi ti aru eweipuẽti wẽtup ok miit itote e. Miꞌi pe ewehenoi -Urukaꞌiwat eꞌat ti putꞌok e raꞌyn eweiꞌe o e. Uikuꞌuro hamuat eꞌat yt pya hin i raꞌyn wyti e ti Aikaꞌiwat eweiꞌe e. Miꞌi pote ti tenuk teran temiitꞌin wywo eꞌyat pe eweiꞌe o mekewat man u hamo getap kaꞌiwat pe e.
19 Miꞌi hawyi tuwat raꞌyn Iesui ehay wywo tuwat hawyi aikotã Iesui mienoi ewy yne raꞌyn taꞌatupuẽti. Miꞌi hawyi taꞌatuporokpun itote ienuk hap imikyꞌesat ewy raꞌyn.
20 Miꞌi hawyi wãtym i turan Iesui toineꞌen apyk pe mesa ypyke towyriaꞌin 12 ok takaria wywo teꞌerenuk hamo.
21 Miꞌi hawyi iꞌatuenuk turan Iesui toꞌe -Pywo pe ti areꞌe wẽtup ok ti meiũpe aiwywuat hat uimaꞌat hat uiꞌauka hanuat e.
22 Mio tã e pote ipotmuꞌeria teꞌeruwanetup kahato hawyi atunik kahato raꞌyn haty kahato iꞌatuete mio tã e hap ihay. Miꞌi hawyi apo iꞌatuꞌe -Pyno uito apo e wẽtup ok i uito i apo e iꞌatuꞌe.
23 Miꞌi hawyi Iesui toꞌe -Taꞌi mekewat uiwywuat man puka miꞌu moĩ miat hat wyti aru uiꞌauka kary hat e iraniaꞌin me Iuta etiat.
24 Taꞌi tohenoi yne ti raꞌyn saꞌawyꞌi miwan me aikotã aru Eheykeꞌet auka hamuat etiat e. Maꞌato ti aru mekewat uimaꞌat hat Tupana tiꞌuhu kahato e. Poꞌog yt naku i pe aru topyhuꞌat e. Taꞌi poꞌog teneke yt karãpe i tuwemoherep mesuwat yi totiat e. Poꞌog waku yt karãpe i toineꞌen e.
25 Miꞌi hawyi tokosap taꞌyn Iuta iraniaꞌin saipepe toꞌe hamo -Uito apo emaꞌat hanuat uikaꞌiwat e. Miꞌi hawyi Iesui tiwesat -Taꞌi eꞌe hap ewy mehin e Iesui.
Man U Hap Iesui Guꞌuro Hap Etiat Watetup Hamuat
26 Miꞌi hawyi Iesui tat man hawyi waku e Tupana pe hawyi toipik pik taꞌyn. Miꞌi hawyi tutum temiitꞌin me hawyi toꞌe -Ewetat ro mesuwat man mehinꞌin e. Ewetuꞌu ro miꞌi ti uipiit e.
27 Miꞌi hawyi totat ihy kuiꞌa piat hawyi waku e Tupana pe. Miꞌi hawyi toimoꞌẽ temiitꞌin me hawyi toꞌe iꞌatuepe -Eiweꞌyꞌu ro e.
28 Miꞌi ti uhuu aat hap miitꞌin mowehik Tupana etiat hamuat yn iꞌatuminug saꞌag moweityk Tupana piat hamuat e.
29 Miꞌi hawyi ti aru yt karamuo i raꞌyn aresapohyꞌu eiwywo mesuwe maꞌato meiũran aru karãpe Uiꞌywot topyhuꞌat Morekuat nuat turan aresapohyꞌu iraꞌyn eiwywo e.
30 Miꞌi hawyi Teꞌeruwepy hawyi tuwat raꞌyn Uriweiria ypia eꞌyityꞌok kape.
Peteru Iesui Maꞌat Hap Etiat
31 Miꞌi hawyi putꞌok iꞌatuꞌe itote hawyi toꞌe Iesui iꞌatuepe -Taꞌi mesuwat ewãtym ti aru uiꞌatoiat yne eipe. Eiwesytpok ti aru aikowo aikowo aikotã miwan me toꞌe hap ewy -Atiꞌahyk hawyi ikuꞌuro iꞌatukaꞌiwat hawyi ihũria tuwesytpok yne kowoꞌi kowoꞌi e. Mio tã e hap ewy ti aru mesup ewãtym uiꞌatoiat yne raꞌyn eipe e.
32 Maꞌato areineꞌen i raꞌyn guꞌuro pyi hawyi ti aru worohoꞌopuẽti i raꞌyn yi Karireia pe e. Eheꞌyian me areto. Miꞌi hawyi ti aru itote raꞌyn watoꞌopuẽti e.
33 Miꞌi pote Peteru toꞌe -Uito aru yt karamuo hin i aremoti epupi e. Yne iraniaꞌin eꞌatoiat pykai uito yt karamuo hin i aru woroꞌatoiat En e Peteru.
34 Miꞌi pote Iesui toꞌe -U paĩ mesuwat ewãtym ti aru -Yt atikuap i raꞌyn Iesui ere e myẽꞌym muat waipaka ehay eꞌyian mete.
35 -Taꞌi yt hin i aru e maꞌato uiꞌauka ti aru ewywo ekai te areineꞌen e. Iꞌewyte iraniaꞌin hemiitꞌin Peteru ehay ewy te teꞌeroꞌe Iesui pe.
36 Miꞌi hawyi putꞌok taꞌatuꞌe mikoi ypia Kesemani e hap tote hawyi toꞌe topotmuꞌeria pe -Eweiꞌapyk to meiũpe. Uito kuepuo areto Tupana wywuat uhehay hamo e.
37 Miꞌi hawyi totioto Peteru iꞌewyte typyꞌok Sepeteu saꞌyruꞌin yt pya i iraniaꞌin kai. Itote hawyi tohatyꞌu kahato topyꞌa pe. Tuwanetup hoꞌopot hap kape yn.
38 Itote iwanetup hap yt he hin i raꞌyn. Iꞌarot yn toineꞌen. Miꞌi hawyi toꞌe topotmuꞌeria myẽꞌym ok takaria pe -Taꞌi ahatyꞌu hap porap uiꞌauka e. Paa uiꞌe hap e. Miꞌi tupono o ewehẽtup Tupana kape e. Waku ewehehaꞌat ro e Iesui myẽꞌym ok takaria pe.
39 Miꞌi hawyi toto porapꞌi hawyi poragꞌe yi tote tewapuo hawyi toꞌe -Uiꞌywot e etat kuap meikowat kuiꞌa uipo pyi pote waku wen maꞌato yt pote atuꞌu emikyꞌesat ewy e Iesui Toꞌywot pe.
40 Miꞌi hawyi taꞌaipok i raꞌyn temiitꞌin myẽꞌym ok takaria kape. Miꞌi hawyi toiꞌatupuẽti iꞌatuket turan neꞌi raꞌyn. Miꞌi hawyi toꞌe Peteru pe -Yt ehẽtup kuap i apo wẽtup eꞌora i wyti e.
41 Eweꞌeg wo o. Ehẽtup o Tupana kape emoesaika kahato o eiãꞌãg hap pupi Taꞌi atikuap ti etikyꞌesat kahato Tupana mikyꞌesat nug hap maꞌato ti yt putꞌok e i esaika hap inug hamo e
42 Miꞌi hawyi taꞌaipok Toꞌywot kapiat tehay hamo hawyi toꞌe -Uiꞌywot yt etihep kuap i pya uikai meikowat kuiꞌa uipo pyi hoꞌopot hap pote waku atuꞌu emikyꞌesat ewy e.
43 Miꞌi hawyi taꞌaipok i raꞌyn temiitꞌin kape. Miꞌi turan teꞌeroket i raꞌyn. Yt mehit iꞌatuꞌe kuap i sese raꞌyn yt teꞌeroket teran i pykai.
44 Miꞌi hawyi taꞌaipok i raꞌyn myẽꞌym mo raꞌyn tehay Tupana kapiat hamo. Miꞌi hawyi iꞌewyte te toꞌe toꞌywot pe.
45 Miꞌi hawyi taꞌaipok i temiitꞌin kape. Miꞌi turan iwyriaꞌin teꞌeroket i raꞌyn. Miꞌi hawyi toꞌe -Uiwyriaꞌin pyno eweiket rẽ apo e. Putꞌok e raꞌyn ti koitywy uimaꞌat hat. Eheykeꞌet ti koitywy yt nakuaria i po pe raꞌyn topyhuꞌat.
46 Eiꞌãpeꞌokꞌam no katupono ti uimaꞌat hat tuut raꞌyn e temiitꞌin me.
Iesui Maꞌat Hap Hawyi Suraraꞌin Taꞌatuereto Hamuat
47 Mio tã e turan Iuta putꞌok e raꞌyn. Tõꞌẽ tõꞌẽ Iuta upi typyꞌi kahato ariaꞌyp akun koꞌi wywo kyseꞌyp koꞌi wywo Iesui kape ipok pok hamo. Miꞌiria Paꞌi kororia nagnia akag koꞌi miꞌatupoꞌororia Iesui sat hamo tõꞌẽ Iuta wywo.
48 Katupono saꞌawyꞌi ti Iuta tiꞌatumuꞌe muꞌe suraraꞌin yian mete -Putꞌok uiꞌe hawyi ti aru Iesui raꞌyn atiꞌãpysig e iꞌatuepe. Miꞌi turan o ewetopytyk taꞌyn e.
49 Miꞌi hawyi putꞌok toꞌe hawyi tokosap Iesui kape hawyi toꞌe -Wãtym Uimuꞌe hat e. Miꞌi hawyi ti toiꞌãpysig naꞌyn.
50 Miꞌi pote Iesui -Pyno etunug o aikotã saꞌawyꞌi wuat emienoi hap ewy paꞌi kororia pe e. Miꞌi hawyi taꞌatupytyk taꞌyn Iesui.
51 Miꞌi pote wẽtup ok ipotmuꞌe iꞌyatypiat hat tekyseꞌyp towape pyi totekyi hawyi wẽtup ok paꞌi emiit toiꞌahape hep taꞌyn.
52 Miꞌi pote Iesui toꞌe -Etopag i ro ekyseꞌyp ewope pe mehin e temiit Peteru pe. Katupono uwe uwe tuwepyk miꞌi hat wyti miitꞌin mipoepyk wo hawyi ikuꞌuro rakatno topyhuꞌat e. Uwe uwe tiꞌauka miit miꞌi miit miitꞌin miꞌauka wo aru topyhuꞌat e.
53 Katupono atikyꞌesat pote ti yt niatpo hin i ahẽtup Uiꞌywot kape uipowyro hamuat. Miꞌi hawyi meremo tõꞌẽ uipowyro hamo poꞌog typyꞌi atipy piaria uiꞌapykok hamuat e.
54 Katupono saꞌawyꞌi te uiꞌauka hamuat yn taꞌatuhenoi miwan me. Miꞌi pote yt ahẽtup i atipy kape uipowyro hamuat atipy piaria sem e.
55 Miꞌi hawyi Iesui toꞌe õꞌẽ haria pe -Kat hamoĩ eweĩꞌẽ uhewowi kyseꞌyp koꞌi wywo ariaꞌyp akun koꞌi wywo. Pyno seroꞌok e hat apo Uito. Miꞌi pote apo eweĩꞌẽ uhewowi. Saꞌawyꞌi te kue areineꞌen wuatꞌi eꞌat pe Tupana motypot yat pe eimuꞌe hamo maꞌato kue eipe yt kat eweiꞌe hin i. Yt uipytyk i eipe paĩ e.
56 Maꞌato eweikuap katupono uipyhik taꞌyn eipe mesup e. Pyno ahenoi ehepe. Taꞌi saꞌawyꞌi te wuaria Tupana ehay enoi haria henoi henoi meikotã hamuat hap yn. Miꞌi hawyi iꞌatuꞌe taꞌatumiwan me hap ewy raꞌyn meiũ e. Miꞌi hawyi ti ipotmuꞌeria ikohyeput raꞌyn Iesui yatypepyi taꞌatuꞌatoiat yne.
57 Miꞌi hawyi ipytyk haria tioto raꞌyn Iesui paꞌi koro sese Kaꞌiwasi e hap yat kape. Aikope tukupteꞌen iwan miat Tupana ehay enoi haria kape nagnia ehay enoi haria teꞌeruwaꞌatunug hap kape.
58 Peteru toto hewatꞌypmo wen maꞌato pya iꞌatukai yt heremo i. Miꞌi hawyi putꞌok e mekewat paꞌi wato yat ete hawyi tokosap iꞌyat pyhyp hap surara eꞌokenꞌypy kape. Miꞌi hawyi taꞌapyk itote paꞌi kororia emiitꞌin ywytpe. Taꞌakasa teran aikotã taꞌatunug Iesui ete hap kape.
59 Miꞌi hawyi itote paꞌi kororia tikat kahato sehay saꞌag yne kaipyi nagnia woꞌonapin haria wywo. Miꞌi hawyi yt pywo pe hin i taꞌatukuasa saꞌag iꞌauka hamuat hap.
60 Maꞌato yt aikotã me hin i taꞌatupuẽti sehay saꞌag Iesui etiat. Katupono taꞌatuhenoi yt toꞌoꞌewyꞌewy i. Miꞌi pote yt toꞌosatꞌi iꞌatuwanetup hap koꞌi. Miꞌi turan ni maꞌato putꞌok iꞌatuꞌe typy ok henoi hanuaria hawyi teꞌeroꞌe
61 -Taꞌi meiẽwat Miit wyti ihay uruehamo -Atipugha ti aru meiẽwat Tupana motypot yat e ti iꞌatuꞌe. Miꞌi hawyi myẽꞌym eꞌat pe yn hawyi atimopoĩꞌam i e iꞌatuꞌe.
62 Mio tã iꞌatuꞌe pote paꞌi koro ipoĩꞌam naꞌyn hawyi toꞌe Iesui pe -Yt etiꞌatuwesat i apo mio tã iꞌatuꞌe pykai e.
63 Maꞌato yt kat e hin i. Miꞌi hawyi paꞌi koro toꞌe i -Ehenoi ro Tupana Saꞌyru En hap Miitꞌin Porekuat nuat hap sio apo yt e.
64 Miꞌi hawyi toꞌe Iesui paꞌi koro pe -Mio tã eweiꞌe mehin e. Taꞌi meiũran ti aru eiwaꞌakasa Miitꞌin Ykeꞌet Tupana po sese kai mekewat poꞌog hesaika rakat po sese kai hawyi tuut atipy kaipyi ywyhig me e.
65 Mio tã e pote paꞌi koro tuwekamisa wato hiot hawyi toꞌe i -Taꞌi heso kahato ti Tupana ete tuwepehik pehik topyꞌahak haype e. Pyno koitywy watikuap kahato raꞌyn sese heso hap. Taꞌi tuwekuasa kahato raꞌyn ti tehay wo. Ahehamo kahato raꞌyn tuwemaꞌat sese raꞌyn. Pyno watikuap taꞌyn koitywy. Toran naꞌyn ahehay e paꞌi koro iraniaꞌin me.
66 Mio tã toꞌe hawyi apo e iraniaꞌin me -Pyno aikotã watoꞌe aru koitywy meiũwat Miit ete e. Miꞌi hawyi taꞌatuwesat -Taꞌi mio tã e hat auka potiat neꞌi waku iꞌatuꞌe.
67 Miꞌi hawyi kuitu iꞌatuꞌe Iesui owa ete. Taꞌatuꞌahyk taꞌatupo wo. Iraniaꞌin howapetek taꞌatupopep mo.
68 -Pyno koitywy pywuat Tupana Mipoꞌoro En pote ehenoi ro uwe uwe piat ewapetek haria set koꞌi iꞌatuꞌe.
69 Miꞌi turan Peteru taꞌapyk mekewat getap eꞌokenypyke. Miꞌi hawyi wẽtup ok makuptia paꞌi koro eropat hat putꞌok e Peteru ete -An e worokuap kahato en. Iesui emiit yi Karireia piat e.
70 Miꞌi pote Peteru tiwesat -Yt uito i rat e. Yt atikuap i ehay e.
71 Miꞌi hawyi Peteru toto mekewat okenꞌypy wato kawiatnuat og kape mekewat haryporia hit yatypepyi. Miꞌi hawyi itote wẽtup ok i raꞌyn iꞌatueropat hat rẽ haryporia toꞌe towyriaꞌin me -Atikuap ti uito meiẽwat e. Mekewat tawa Nasare piat turan wuat Iesui wywuat ieineꞌen hat wyti e.
72 Miꞌi hawyi Peteru toꞌe itotiaria pe -Yt rat e yt atikuap i ti uito Miꞌi Miit e.
73 Miꞌi hawyi iraniaꞌin tokokaꞌat Peteru kape hawyi teꞌeroꞌe -Taꞌi uruikuap ti en. En ni wyti wẽtup ok Iesui potmuꞌe iꞌatuꞌe katupono yi Karireia piaria ehay ewy ehay iꞌatuꞌe.
74 Mio tã iꞌatuꞌe pote toiꞌatuwesat saꞌag neꞌi raꞌyn -Yt atikuap i ti uito Miꞌi Miit e. Uheso pote aru waku raꞌyn Tupana uiꞌapiheg e. Maꞌato meremo yt uheso i rat toꞌe hawyi waipaka ihay raꞌyn.
75 Miꞌi pote so hotꞌokꞌe raꞌyn Iesui ehay kape -Waipaka ehay eꞌyian mete ti aru -Yt atikuap i Miꞌi Miit ere raꞌyn uhepiat pe myẽꞌym mo e Iesui hap kape iwatetup taꞌyn. Miꞌi hawyi tuwepik taꞌyn itote pyi tuwak kahato raꞌyn Peteru tominug saꞌag hap upi.
