Mateu 27:1-66
27 Miꞌi hawyi hunete teꞌeruwaꞌatunug paꞌi kororia nagnia koꞌi wywo aikotã waku Iesui taꞌatuꞌauka hap kat hamo torannia akagnia koꞌi wywo.
2 Miꞌi hawyi taꞌatupoꞌi poꞌi raꞌyn Iesui haity wo. Miꞌi hawyi taꞌatuereto raꞌyn wanikaptia porekuat Piratu e hap kape.
3 Miꞌi hawyi tuwanetup hawyi Iuta Iesui maꞌat hat taꞌaipok paꞌi kororia kape toꞌe hamo -Ahatyꞌu raꞌyn uipyꞌa pe uiminug saꞌag Uikaꞌiwat etiat hap paĩ e iꞌatuepe. Ewetat i ro mesuwat saꞌup saꞌag uipo pyi e.
4 Taꞌi atiꞌaparap kahato ti uito. Atum Uikaꞌiwat ehepe yt kat upiat hin i iꞌaparap hat atiweneru e. Miꞌi hawyi taꞌatuwesat Iuta -Pyno koitywy yt urutuwanetup teran hin i raꞌyn ti eminug kape iꞌatuꞌe. Eminug saꞌag ni epe topyhuꞌat uhyt iꞌatuꞌe.
5 Miꞌi hawyi Iuta tiporokpun naꞌyn mekewat saꞌup 30 ape rakat Tupana motypot yat koro pe. Miꞌi hawyi totoiat haꞌup itote hawyi toto tuweꞌauka hamo. Miꞌi hawyi haity wywo tuweꞌutꞌyp kytyt ywaiti hawyi ikuꞌuro.
6 Miꞌi hawyi paꞌi kororia teꞌeroꞌe -Aikotã som mesuwat miit suu saꞌup ete watunug iꞌatuꞌe. Ainapin hap yt naku i watopag miꞌi Tupana motypot yat piat heiam me e iꞌatuꞌe.
7 Teꞌeruwanetup hawyi teꞌeroꞌe -Pyno waku ti watikyiꞌat mekewat yi kamuti nug hat kaipyi miitꞌin yt uwe mikuap i koꞌi syp hamuat iꞌatuꞌe. Miꞌi hawyi taꞌatukyiꞌat mekewat 30 ape rakat saꞌup mo.
8 Miꞌi hawyi miꞌi yi taꞌatusetnug -Miꞌauka suu saꞌup muat mikyiꞌat iꞌatuꞌe. Pyno mesup te miꞌi set topyhuꞌat itote.
9 Pyno aikotã Tupana ehay enoi saꞌawyꞌi wuat hat Ieremia toꞌe hap ewy -Meiũran ti aru ipiit saꞌup taꞌatukat karania upi iꞌauka hap saꞌup hawyi 30 ape waku iꞌatuꞌe ti aru Isareu ywaniaria e.
10 Miꞌi saꞌup mo ti aru taꞌatukyiꞌat mekewat kamuti nug hat eꞌyi Ieremia saꞌawyꞌi miwan me hap etiat tohenoi.
11 Miꞌi hawyi Iesui putꞌok e morekuat yat pe hawyi morekuat tikay kay tuwewowi apo toꞌe hamo -En apo Iuteuria ywania Porekuat sio yt e. Miꞌi pote Iesui toꞌe -En mio tã ere.
12 Miꞌi hawyi morekuat pe teꞌeroꞌe paꞌi kororia nagnia -Meiũ Miit yt naku i kahato rakat iꞌatuꞌe. Maꞌato Iesui yt tiꞌatuwesat hin i raꞌyn mio tã iꞌatuꞌe iꞌatueso tepiat pykai.
13 Miꞌi hawyi morekuat toꞌe Iesui pe -Mio tã iꞌatuꞌe ti epe Uhyt ewanikaptia e. Etikuap apo yt naku i iꞌatuꞌe ti epiat pe Uhyt e.
14 Maꞌato Iesui ipoꞌinik neꞌi. Yt kat e hin i toiꞌatuwesat mio tã e haria. Miꞌi hawyi morekuat tuwanetup kahato kat pote yt toiꞌatuwesat i hap kape.
15 Pyno yne anu pe mekewat ienuk wato hap turan morekuat tiporenotem wẽtup ok woꞌopyhik hawyi miitꞌin mowepiit hamo taꞌatumikyꞌesat ewy.
16 Mekewat eꞌat pe toineꞌen woꞌopyhik hawe yt nakuat i sese rakat Parapa e hap.
17 Miꞌi hawyi morekuat tiꞌatukay kay miitꞌin hawyi toꞌe -Uweĩ waku mesuwat anu atiputsit wẽtup ok aimipyhik e. Uweĩ eweikyꞌesat apo e. Pyno waku apo atiporenotem mekewat Iesui Tupana mipoꞌoro eiporekuatno e hap sio mekewat Parapa e hap e.
18 Katupono Piratu tikuap iꞌatuwemoehayꞌywyi hap tuwanetup hawe Iuteuria akag yt tikyꞌesat i miitꞌin tuwat Iesui kape hap.
19 Miꞌi hawyi Piratu taꞌapyk teꞌamyap tote aikope morekuaria toꞌe hap miitꞌin wakuat sio yt hap kuap hap tote. Miꞌi turan iharyꞌi tuwehay poꞌoro teꞌaito kape -Yt etunug saꞌag neiꞌo mekewat Iesui wakuat ete toꞌe hap. Ahatyꞌu kahato uimuꞌetu wuat miꞌi hap e. Pyno uheꞌaito epohep to merep Miꞌi Miit ete e.
20 Miꞌi hawyi paꞌi kororia nagniaꞌin teꞌeroꞌe miitꞌin me -Pyno waku watiputsit Parapa hawyi waku watiꞌauka Iesui eweiꞌe ro morekuat pe iꞌatuꞌe miitꞌin pyꞌasetpe. -Mio tã eweiꞌe ro morekuat pe iꞌatuꞌe.
21 Miꞌi hawyi morekuat Piratu toꞌe iꞌatuepe -Pyno ewehenoi ro uwe waku atiputsit woꞌopyhik hawiat e. Miꞌi hawyi -Waku Parapa iꞌatuꞌe.
22 Miꞌi hawyi toꞌe i -Aikotã are aru atunug mekewat Eiporekuat nuat Tupana Mipoꞌoro ete e. Mio tã e pote iꞌatuehay pirik wo -Etiꞌauka ro ariaꞌyp posak etiat hamo iꞌatuꞌe.
23 Mio tã iꞌatuꞌe pote -Kat hamo kat iminug saꞌag poꞌypyi ten atiꞌauka e morekuat. Miꞌi hawyi taꞌatuehay haty wo -Erehay ium no epiat iꞌauka ariaꞌyp posak etiat hap iꞌatuꞌe.
24 Miꞌi hawyi Piratu tuwanetup hawe toꞌe -Tuꞌuka irane apo paĩ e. Miꞌi hawyi morekuat toꞌe temiitꞌin me -Eweheꞌerut yꞌy uiweposei miitꞌin ehamuat hamo e. Taꞌatuheꞌerut hawyi tuweposei wuatꞌi miitꞌin ehamo. Tuweposei haype toꞌe -Areposei meiũ meiũwat Miit wakuat auka hap suu yt atikyꞌesat i uipo ete pote e. Iꞌauka hap eipo piat toineꞌen e.
25 Miꞌi hawyi teꞌeroꞌe -Yt eete i ti aru uhyt iꞌatuꞌe uruete urumepytꞌin ete aru iꞌatuꞌe. Taꞌi Iesui auka hap ti aru uruete uhyt iꞌatuꞌe.
26 Miꞌi hawyi Parapa toiputsit woꞌopyhik hawyi tutum iꞌatuepe. Miꞌi hawyi toipoꞌoro tesuraraꞌin Iesui pok pok hamo. Taꞌatupok pok hawyi morekuat toiat raꞌyn Iesui tesuraraꞌin po pe iꞌauka ariaꞌyp posak etiat hamo.
27 Miꞌi hawyi hesuraraꞌin tioto raꞌyn Iesui morekuat koro yat kape. Miꞌi hawyi taꞌatuꞌatukay kay yne morekuat esuraraꞌin temiitꞌin sese Iesui kape.
28 Miꞌi hawyi Iesui esokpe taꞌatuhep yne hawyi morekuat esokpe wato ihup takat ipiit pe taꞌatupag.
29 Miꞌi hawyi taꞌatupiꞌig morekuat eꞌamatap ewywuat morekuat painug hap ewy hehu rakat maꞌato taꞌatumikyryꞌi hap neꞌi miꞌi tã taꞌatunug. Taꞌatupag Iesui akag me haty rakat. Iꞌewyte wy taꞌatupag ariaꞌyp ipo pe. Miꞌi hawyi teꞌeruwepỹꞌãtutuk taꞌatuwekyryꞌi haype. -Ereineꞌen motꞌi ro mesuwat yi tote uruporekuatno Iuteuria Porekuatno iꞌatuꞌe taꞌatuehay mikyryꞌi hap.
30 Kuitu kuitu iꞌatuꞌe Iesui ete. Miꞌi hawyi ipo piat ariaꞌyp taꞌatusat hawyi miꞌi wo taꞌatuꞌahyk ahyk iꞌakag ete.
31 Taꞌatumikyryꞌi kahu raꞌyn hawyi taꞌatuhep i raꞌyn taꞌatumipag morekuat esokpe ihup takat. Miꞌi hawyi taꞌatupag iwat hesokpe sese i raꞌyn. Miꞌi hawyi itote pyi taꞌatueroto iꞌauka hamuat kape raꞌyn.
32 Miꞌi turan wẽtup ok miit taꞌatupuẽti muap tote tawa Sireneu kaipywiat Simau e hap het rakat. Miꞌi pe teꞌeroꞌe -Eheꞌereto ro meiũwat Miit eꞌariaꞌyp posak iꞌatuꞌe tope.
33 Miꞌi hawyi putꞌok iꞌatuꞌe yityꞌok tote Iesui wywo yityꞌok Miit Akag Kag ewywuat iꞌatuꞌe hap het rakat tote maꞌato iꞌatupusu puat Koukota e hap het rakat tote.
34 Miꞌi hawyi itote taꞌatuium Iesui pe sapo hy puo mohag haty monik hamuat hap nop takat. Toterep hawyi toikuap hawyi yt tutuꞌu i poꞌog neran.
35 Miꞌi hawyi taꞌatuhep hesokpe koꞌi ipiit pyi. Miꞌi hawyi taꞌatuꞌateg ipo ete ipy ete ariaꞌyp posak ete. Miꞌi hawyi hesokpe taꞌatumoꞌẽ teran hawyi teꞌeruwemahara aikotã waku hesokpe taꞌatumoꞌẽ hamuat haype.
36 Miꞌi hawyi apyk iꞌatuꞌe suraraꞌin yt taꞌatukyꞌesat i iraniaꞌin neꞌi ihep ariaꞌyp posak pyi Iesui hap haype. Miꞌi pote suraraꞌin tiꞌapykok kahato teꞌerahaꞌat kahato.
37 Miꞌi hawyi taꞌatumiwan taꞌatupehik Iesui apy tote ikuasa haria ehay wywuat -Meiũ ti Iesui Aiporekuat koro. Meiũ ti Iesui Iuteuria Porekuat koro e hap.
38 Miꞌi hawyi iꞌewyte taꞌatupehik iꞌatuꞌariaꞌyp posak ete typyꞌok seroꞌok e haria wẽtup ok ipo ran kai wẽtup ok ipo sese kai tukupteꞌen taꞌatupehik.
39 Miꞌi hawyi hepiok haria iꞌatuehay mikyryꞌi kahato.
40 -Erehakyeraꞌat ro erehakyeraꞌat ro meiẽpe pyi iꞌatuꞌe. Tupana motypot yat atomoma hawyi atunug myẽꞌym eꞌat yn e hat meiẽ iꞌatuꞌe. Pywuat Tupana Saꞌyru sese pote ti aru eraꞌapyk meiẽpe pyi ewewi ariaꞌyp posak pyi iꞌatuꞌe.
41 Iꞌewyte paꞌi kororia nagnia ehay enoi haria teꞌeruwemokoꞌi mokoꞌi hewowi.
42 -Iraniaꞌin ti toiꞌatuehakyeraꞌat kuap iꞌatuꞌe maꞌato tuwewi ti yt tuwehakyeraꞌat kuap hin i iꞌatuꞌe. Maꞌato iraniaꞌin teꞌeroꞌe -Pywuat eꞌapyk ariaꞌyp posak tote pywiat pote ti ren meremo pywo rasig Isareu ywania Porekuat nuat watoꞌe iꞌatuꞌe.
43 Taꞌi heso kahato ti --Tupana atimohey e maꞌato pywo Tupana Saꞌyru pote ti ren tuut Tupana ariaꞌyp posak pywiat ihakyeraꞌat hamo iꞌatuꞌe taꞌatuehay mikyryꞌi hap.
44 Iꞌewyte mipehik iꞌywyt piat seroꞌok e haria teꞌeroꞌe wy taꞌatuehay mikyryꞌi hap.
Iesui Ikuꞌuro Raꞌyn
45 Miꞌi hawyi atposake pyi iꞌypyryp hap putꞌok e wãtym i kape.
46 Miꞌi hawyi iꞌypyryp we Iesui tuwatka haty wo atpo sake ran turan -Uhetupana kat poteĩ uiꞌatoiat En e. Maꞌato towat topusu puo -Erui Erui irama sapatani e.
47 Mio tã e pote meimuẽ puaria teꞌeroꞌe -Mio ti Eria saꞌawyꞌi wuat Tupana ehay enoi hat raꞌyn toikay kay topowyro hamo iꞌatuꞌe.
48 Miꞌi hawyi ariaꞌyp hit ãpo ete taꞌatupoꞌi amukiusuꞌap ewywuat hawyi taꞌatupuka ihy haiug nakat pe miꞌi hawyi taꞌatuium teran Iesui kape.
49 -Waku wahekatup mio apuru tuut Eria ipowyro hamo sio yt iꞌatuꞌe.
50 Miꞌi hawyi Iesui kak e tokuꞌuro haype hawyi ipyhu tekꞌe raꞌyn hawyi ikuꞌuro sese raꞌyn. Tutum naꞌyn toieineꞌen hap.
51 Miꞌi hawyi Tupana motypot yat pe mekewat sokpe Tupana eꞌokipy ete hiotꞌe raꞌyn ywaiti pyi yi kape. Iꞌewyte wy yi hurukꞌe itote. Miꞌi turan nu koꞌi itotiat iꞌapak pakꞌe raꞌyn.
52 Iꞌewyte woꞌosyp hap iꞌahiotꞌe raꞌyn yi tyryꞌe pote Iesui ikuꞌuro turan. Miꞌi hawyi tukupteꞌen i raꞌyn guꞌuro pyi saꞌawyꞌi wuat Tupana mohey sese rakaria.
53 Miꞌi hawyi miꞌiria Iesui ewy tukupteꞌen i raꞌyn guꞌuro pywiat hawyi tuwat tuwat Tupana etawa Ierusarẽi kape teꞌerumoherep itotiaria miitꞌin kapiat hamo.
54 Iesui ikuꞌuro turan wẽtup ok suraraꞌin akag tesuraraꞌin nywo teꞌeraꞌakasa yne aikotã aikotã ikuꞌuro hap kape yi tyryꞌe hap kape. Miꞌi hawyi teꞌerokenꞌẽ kahato hawyi teꞌeroꞌe -Taꞌi meiũ ti Tupana Saꞌyru sese iꞌatuꞌe.
55 Miꞌi turan tukupteꞌen haryporiaꞌin iwywuat hewyry rakaria ikuꞌuro hap kapiat akasa haria pya pywiat sehaꞌat haria. Miꞌiria ti saꞌawyꞌi tõꞌẽ Iesui upi yi Karireia kaipyi Iesui powyro hamo hewyry te turan.
56 Itote toineꞌen mekewat yi Matarena kaipywiat Maria e hap het rakat. Iꞌewyte wẽtup ok Maria Sepeteu saꞌyruꞌin Tiaku hawyi Iuse ty toineꞌen iꞌatuwywo.
Iesui Syp Hap Etiat Woꞌosyp Hap Ipakup Takat
57 Miꞌi turan aat minꞌe irane raꞌyn turan mekewat Iesui potmuꞌe hekat rakat putꞌok e mekewat tawa Arimateia kaipywiat Iuse e hap. Miꞌi ti Iesui mohey hat toineꞌen
58 Iuse putꞌok e itote morekuat Piratu wywo ihay hamo. Mio tã toꞌe -Atiꞌasyp irane raꞌyn ti Iesui piit e. Atikyꞌesat Iesui piit etum uhepe isyp hamo e. Miꞌi pote Piratu temiitꞌin suraraꞌin me toꞌe -Ewetum soke meiẽwat ipiit mekewat miit pe e.
59 Miꞌi hawyi toto hewowi hawyi toihep taꞌyn mekewat ariaꞌyp posak ete pyi Iesui piit hawyi toipoꞌi poꞌi sokpe pakup ikytsig nakatno.
60 Miꞌi hawyi totopag ipiit mekewat towat woꞌosyp hap nu kaꞌa pe ipakup takat pe. Miꞌi hawyi tohewahik nu wato wo. Miꞌi hawyi waku yne raꞌyn iheg me raꞌyn hawyi toto iraꞌyn.
61 Itote ti Maria Matarena iꞌewyte mekewat wẽtup Maria tukupteꞌen. Teꞌeraꞌakasa yne katupono miꞌiria teꞌeraꞌapyk yt pya i ipuꞌẽ kai.
62 Miꞌi hawyi Saputu eꞌat eꞌihatꞌok pe teꞌeruwaꞌatunug paꞌi kororia woꞌomuꞌe haria morekuat Piratu wywo.
63 Mio tã iꞌatuꞌe -Mekewat gaꞌatpuat urumiꞌauka heso rakat wytig toineꞌen ne turan mio tã e -Myẽꞌym eꞌat areineꞌen guꞌuro pe hawyi ti aru areineꞌen i raꞌyn e iꞌatuꞌe.
64 Miꞌi hap uruikuap pote uruhenoi kahato teran epe iꞌatuꞌe. Pyno waku etimoheg kahato mekewat iꞌasyp hap suraraꞌin wywo myẽꞌym eꞌat kape suraraꞌin tiꞌapykok kahato iꞌatuꞌe. Maꞌato yt kat i iꞌapykok haria pote ti ren meiũran wãtym muo tõꞌẽ ipotmuꞌeria hereto hamo taꞌatuꞌe haype. Miꞌi pote ti ren iwẽtem naꞌyn hawyi teꞌeroꞌe miitꞌin me -Meiẽ tuwẽtem naꞌyn guꞌuro pyi iꞌatuꞌe. Maꞌato miꞌi tã raꞌyn taꞌatunug hawyi ti ren poꞌog heso hap topyhuꞌat ahepe saꞌawyꞌi wuat heso hap kai iꞌatuꞌe.
65 -Pyno waku suraraꞌin koꞌi etiꞌatupoꞌoro mekewat misyp apykok hamo e. Waku eweimoheg eimikyꞌesat oktan e Piratu paꞌi kororia pe.
66 Miꞌi hawyi okenhyp iheg nakat nu wo toineꞌen wen maꞌato miꞌi pykai yi og hap iheg nakat ewy taꞌatunug nu wato ete.
