Mateu 28:1-20
28 Miꞌi hawyi Sapatu eꞌat tokosap hawyi mukiꞌite mytuꞌu eꞌat pe hunete ihatꞌok turan tuwat Maria Matarena hawyi wẽtup Maria Iesui syp hap kapiat teꞌerahaꞌat hamo.
2 Miꞌi hawyi putꞌok iꞌatuꞌe turan yi hurukꞌe kahato katupono Tupana mipoꞌoro atipy kaipywiat raꞌyn putꞌok e nu wato kawiat okenhypꞌok hamo. Toimorem mekewat heꞌokenhyp hap hawyi taꞌapyk heꞌokenhyp hap tote nu wato tote.
3 Imehit kahato hẽtyhot kahato aikotã merepꞌe hap ewy. Hesokpe ti ikytsig kahato nukara kytsig hap ewy.
4 Miꞌi pote suraraꞌin itotiaria teꞌerokenꞌẽ kahato ipupi toꞌotyryꞌi kahato ipupi genꞌẽ pono. Miꞌi hawyi hewo yi upi map haria ewy.
5 Miꞌi pote toꞌe Tupana mipoꞌoro Mariaꞌin me -Yt eweikenꞌẽ teiꞌo e. Worohoꞌokuap eipe Iesui piit kat haria ariaꞌyp posak etiat miꞌauka kat haria ti eipe e.
6 Maꞌato yt uwe i raꞌyn meiũpe topũꞌẽ pe e. Tuwẽtem naꞌyn guꞌuro pyi Iesui aikotã yian mete tohenoi hap ewy raꞌyn toineꞌen i raꞌyn paĩ e. Miꞌi pote eweĩꞌẽ ro meikowo ipuꞌẽ kape eiwehaꞌat hamo e atipy kaipywiat suut hat manaꞌin me.
7 Miꞌi hawyi toꞌe i iꞌatuepe -Koitywy eweiwat ro meremo ipotmuꞌeria piat henoi hamo. Iwẽtem iraꞌyn guꞌuro pywiat hap enoi iꞌatuepiat hamo. Toto raꞌyn tetama Karireia kape. Miꞌi tote ti eweipuẽti aru eweiꞌe ro ipotmuꞌeria pe Yt eweiwaure o uiꞌe hap e atipy kaipywiat Tupana mipoꞌoro manaꞌin me.
8 Mio tã e hawyi tuwat raꞌyn meremo Mariaꞌin. Ikohyeput raꞌyn teꞌerokenꞌẽ popuo maꞌato iꞌewyte taꞌatuwepiit kahato wywo tuwat meremo ipotmuꞌeria piat henoi hamo.
9 Miꞌi turan iꞌatukohyeput nuat iwat turan Iesui tiꞌatupuẽti muap tote -Manaꞌin ariot iraꞌyn e. -Mimi iꞌatuꞌe hawyi iꞌatuporokaꞌat ipy ete imotypot hap wywo.
10 -Manaꞌin yt eweikenꞌẽ teiꞌo e maꞌato eweiwat ro uiwyriaꞌin eikywytꞌin me henoi hamo -Waku eweiꞌaipok aheꞌyi Karireia kape iraꞌyn. Miꞌi tote watoꞌopuẽti e. Waku uiꞌe hap ewy eweiꞌe ewehenoi uhemiitꞌin me. Miꞌi hawyi tuwat i ikohyeput i raꞌyn taꞌatuhenoi hamo.
11 Miꞌi turan suraraꞌin ikohyeput raꞌyn tawa wato Ierusarẽi kape. Miꞌi hawyi taꞌatuhenoi raꞌyn yne yne itote taꞌatukosap hap aikotã aikotã hap paꞌi kororia pe.
12 Miꞌi hawyi teꞌeruwaꞌatunug naꞌyn paꞌi kororia nagnia woꞌonapin haria wywo aikotã watoꞌe aru watunug taꞌatuꞌe hamo. Miꞌi hawyi suraraꞌin me teꞌeroꞌe -Pyno waku ewetunug uruꞌe hap ewy hawyi watum saꞌup iwato kahato ehepe iꞌatuꞌe suraraꞌin me.
13 Waku mio tã eweiꞌe -Wãtym muo urutoket kai te ipotmuꞌeria teroꞌok neꞌi Iesui piit eweiꞌe o iraniaꞌin me. Miꞌi pote aru saꞌup watum iwato kahato ehepe iꞌatuꞌe nagnia suraraꞌin me.
14 Maꞌato morekuat tikuap hawyi uruto urutukupteꞌen eiꞌe hap mopywuat hamuat. Miꞌi hawyi yt ipyꞌahak neꞌi ehete iꞌatuꞌe.
15 Miꞌi hawyi waku iꞌatuꞌe suraraꞌin hawyi haꞌup taꞌatusat raꞌyn. Miꞌi hawyi ti taꞌatumaꞌat raꞌyn miitꞌin -Taꞌi ipotmuꞌeria teroꞌok ti Iesui piit uruket kai iꞌatuꞌe torannia pe. Mio tã e hap ti mesup te topyhuꞌat koran te mio tã iꞌatuꞌe Iuteuria toꞌope.
Iesui Henoi Aikotã Waku Tuwat Mytyyp Oktan Sehay Wakuat Enoi Hamuat
16 Miꞌi hawyi ti ipotmuꞌeria 11 ok takaria tuwat raꞌyn yi Karireia kape mekewat saꞌawyꞌi wuat yityꞌok kape aikope saꞌawyꞌi Iesui toꞌe -Meiũran ti aru waku eweĩꞌẽ i mesuwe uiwẽtem iraꞌyn guꞌuro pywiat hawyi e hap kape.
17 Miꞌi hawyi putꞌok taꞌatuꞌe itote i raꞌyn hawyi teꞌeraꞌakasa i raꞌyn taꞌatukaꞌiwat Iesui kape. Miꞌi hawyi teꞌeruwehum kahato taꞌatumotypot kahato Iesui. Taꞌatumohey kahato maꞌato wẽtup ok wẽtup ok imohey ran.
18 Miꞌi hawyi Iesui tuut iꞌatuewowi hawyi iꞌatupyꞌasetpe toineꞌen heremo kahato. Miꞌi hawyi toꞌe itotiaria pe -Koitywy Tupana tum yne raꞌyn tesaika hap uhepe e. Miꞌi hawyi Wuatꞌi Miitꞌin Porekuat koro wo areineꞌen atipy pe iꞌewyte mesuwat yi tote e.
19 Miꞌi pote koitywy worohoꞌopoꞌoro eipe wuatꞌi ywania muꞌe hamo e. Miꞌi pote koitywy atimoꞌẽ raꞌyn ehepe uhesaika hap uhemiitꞌin pakup nug uhepiat hamo e. Eweiꞌatumuꞌe ro miꞌiria uiꞌe yne hap nug hamo iꞌewyte eweiꞌatusetꞌok uimohey pakup i haria Uiꞌywot set upi uhet upi Tupana Paꞌãu set upi e.
20 Waku yne saꞌawyꞌi wuat ahenoi ehepiat hap ewy miitꞌin muꞌe hamuat e. Miꞌi hawyi eimimuꞌeria uimohey haria atikyꞌesat yne uhehay nug haria wo teꞌeropyhuꞌat e. Miꞌi tupono eweiwat ro iraniaꞌin ywania yne muꞌe hamo areꞌe wen maꞌato miꞌi turan ti aru yt eiweran i eweiwat. Katupono Uito ti aru areto wy eiwywo aikope aikope eweiwat hap upi eipowyro hatno wuatꞌi eꞌat pe ikahuro hap putꞌok e hap kape. Areineꞌen eiwywo wuatꞌi eꞌat pe e Iesui ahepe temiitꞌin me.
