Mateu 9:1-38
9 Miꞌi hawyi Iesui teke raꞌyn yara pe hawyi taꞌaipok iraꞌyn yꞌy sakpo tetawa kape iraꞌyn.
2 Miꞌi turan taꞌatuerut wẽtup ok yt ipoĩꞌam kuap i rakat heꞌyni pe. Miꞌi kape Iesui tehaꞌat hawyi toꞌe -Taꞌi uimohey kahato ti eipe e. Miꞌi hawyi toꞌe yt ipoĩꞌam kuap i rakat pe. -Taꞌi uhaꞌyru e. Yt erekenꞌẽ hin i kat tupono koitywy uimohey hap emowaku raꞌyn. Iꞌewyte eminug saꞌag tuweityk taꞌyn.
3 Miꞌi turan iraniaꞌin woꞌonapin kuap sese haria teꞌeroꞌe teꞌeruwanetup hawe. -Taꞌi meiẽwat miit wyti ihay saꞌag kahato Tupana ete iꞌatuꞌe taꞌatupyꞌa pe.
4 Maꞌato Iesui tikuap iꞌatuwanetup hawiat teꞌeroꞌe hap. -Kat poteĩ eiwanetup koꞌi koꞌi neꞌi mesuwat uiminug ete.
5 Kat are kat are som poꞌog yt niatpo i yt hewyry kuap rakat pe sio eminug saꞌag wyti tuweityk taꞌyn are sio epoĩꞌam no hawyi ewyry ro are.
6 Pyno atimoherep taꞌyn ehepe uwe uito hap. Uito Miitꞌin Ykeꞌet sese areineꞌen pote atimoherep taꞌyn uhesaika hap mesuwat yi tote miitꞌin minug saꞌag hep hamuat. Mio tã toꞌe hawyi toꞌe raꞌyn yt hewyry kuap i rakat pe -Epoĩꞌam no hawyi etiꞌokpoi ro eꞌyni hawyi ereto ro eꞌyat kape.
7 Miꞌi hawyi ipoĩꞌam naꞌyn hawyi toto raꞌyn toꞌyat kape.
8 Miꞌi hawyi karãpe miitꞌin teꞌerehaꞌat raꞌyn iminug kapiat hawyi teꞌerokenꞌẽ kahato raꞌyn. Miꞌi hawyi iꞌatuwepiit kahato raꞌyn Tupana kape. Miꞌi hawyi mio tã iꞌatuꞌe -Taꞌi toineꞌen tuete hesaika kahato hap miitꞌin moehãite hamuat iꞌatuꞌe.
Iesui Tikay Kay Raꞌyn Mateu Iwywo Ereto Hamuat
9 Miꞌi hawyi Iesui tuwẽtem iraꞌyn itote pyi hawyi toto muap upi turan toipuẽti wẽtup ok saꞌup poreraꞌat miitꞌin kaipywiat hat mekewat het Mateu e hap. Miꞌi toipuẽti apyk pe aiũpe toiporeraꞌat saꞌup miitꞌin kaipyi hap tote. Miꞌi hawyi Iesui toꞌe Mateu pe -Toꞌiro uhupi Mateu. Mio tã e hawyi meremo ipoĩꞌam hawyi toto raꞌyn hupi.
10 Wãtymꞌi turan Iesui toto raꞌyn Mateu yat kape tenuk iwywuat hamo. Miꞌi turan itote typyꞌi kahato miitꞌin kaipywiat saꞌup sat haria. Iꞌewyte iraniaꞌin tõꞌẽ yt nakuat i nug haria yt naku i nug hap etiat miitꞌin mikuap kahato koꞌi. Miꞌiria teꞌerenuk Iesui wywo iꞌewyte hemiitꞌin wywo.
11 Miꞌi turan tukupteꞌen iraniaꞌin woꞌomuꞌe haria itote. Miꞌiria teꞌerehaꞌat miꞌi hap kape hawyi apo iꞌatuꞌe Iesui emiitꞌin me -Kat poteĩ eimuꞌe hat tenuk mekewat saꞌup poreraꞌat haria wywo iꞌatuꞌe. Iꞌewyte iraniaꞌin yt naku i sese rakaria wywo iꞌatuꞌe.
12 Maꞌato Iesui tikuap apo iꞌatuꞌe hap hawyi toiꞌatuwesat -Taꞌi uwe ihãite rakaria yt ikat kuap i mohag nug haria maꞌato iꞌahuu rakaria tikat kuap mohag nug haria.
13 Pyno waku eweiwat hawyi eweikatꞌi katꞌi ikuap ehepiat hamuat kat e som mekewat miwan saꞌawyꞌi wuat aimuꞌe hawiat hap e. -Pyno atikyꞌesat wyti miitꞌin woꞌokyꞌe haria wo tukupteꞌen hap katupono eihũria emiium uhepiat hap sese neꞌi yt ehewaku i. Kat pote ariot mesuwe yi kape yt nakuaria i kape. Yt ariot i wyti uito waku rakat e haria kape.
14 Mio tã e turan putꞌok iꞌatuꞌe Iesui kape woꞌosetꞌok hat Iuwãu potmuꞌeria. Miꞌi hawyi apo iꞌatuꞌe -Mehin iꞌatuꞌe kat tupono som uruto iꞌewyte seko moherep haria teꞌeremosyꞌat kahato Tupana motypot hamo iꞌatuꞌe.
15 Mio tã iꞌatuꞌe pote Iesui tiꞌatuwesat -Pyno eweipuẽti aten waku woꞌokyiꞌat hap kapiat turan iꞌatuꞌarot neꞌi iꞌatupyꞌasetpe raꞌyn woꞌokyiꞌat hanuaria turan pote arewanetup turan yt hin i maꞌato karãpe eꞌat putꞌok e raꞌyn iꞌatuehaytuwy iꞌatupyꞌasetpyi turan ti aru pywo teꞌeremosyꞌat raꞌyn uhemiitꞌin.
16 Pyno yt uwe i ti imog kuap sokpe pakup sepok wo neꞌi tesokpe potꞌi hiotꞌe rakat mog maꞌato sokpe pakup wo neꞌi etimog hiotꞌe rakat sokpe potꞌi pote poꞌog neꞌi hiotꞌe sokpe.
17 Iꞌewyte yt uwe i ti iwo teran sapo hy pakup heiam ipe kawiat potꞌi pe neꞌi. Maꞌato uwe iwo sapo hy pakup heiam potꞌi pe neꞌi pote meremo heiam iꞌapokꞌe raꞌyn hawyi tuwoꞌopun naꞌyn sapo hy hawyi heiam yt naku i raꞌyn iꞌapokꞌe raꞌyn yt hãpyk i inug hap kaipyi maꞌato waku ti sapo hy pakup watopag heiam ipakup we yn waku. Miꞌi pote yn wyti yt watimosatek kuap i sakpo hy iꞌewyte heiam yt iꞌapokꞌe kuap i.
Haryporia Iꞌahuu Rakat Huu Wo Pytꞌok E Raꞌyn
18 Mio tã e Iesui ihay miitꞌin kapiat turan wẽtup ok Iuteuria akag putꞌok e hawyi tuwepỹꞌãtutuk Iesui motypot hamo hawyi toꞌe -Mehin mio uhakiꞌyt uimikyꞌe kahato ikuꞌuro raꞌyn maꞌato ereto uhupi hawyi ereponug ipiit ete hawyi ti aru uhakiꞌyt tuwehymut iraꞌyn guꞌuro pyi hap atimohey e haty wo Iesui pe.
19 Miꞌi hawyi Iesui toto raꞌyn hupi maꞌato hemiitꞌin tuwat wy iwywo.
20 Miꞌi turan haryporia 12 anu raꞌyn huu wato hap toineꞌen tuwete rakat tokosap Iesui ewowi hewatꞌypmo hawyi totemig naꞌyn hesokpe ẽpe ete.
21 Miꞌi hawyi tuwanetup hawe mio tã e -Are an hesokpe yn atemig pykai apo mesup waku raꞌyn uhete an e.
22 Temig hawyi Iesui tuwemorem hawyi taꞌakasa raꞌyn haryporia kape hawyi toꞌe -Pyno eremowepiit ro uhakiꞌyt katupono ti ehãite iraꞌyn. Kat pote ti uimohey epiat hap kaipyi wyti ehãite iraꞌyn. Mio tã e turan meremo ihãite iraꞌyn haryporia.
23 Miꞌi hawyi Iesui timoehãite haryporia hawyi toto raꞌyn mekewat woꞌomuꞌe haria akag yat kape. Miꞌi turan Iesui taꞌakasa itote piꞌã potiat pypyꞌe haria akuara py haria kape. Miꞌi hawyi ihaꞌat poꞌog turan miitꞌin sem itote kat iꞌatuꞌe kat iꞌatuꞌe itote toꞌope toꞌope.
24 Miꞌi hawyi Iesui toꞌe itotiaria pe -Eweinoꞌẽ yne ro meiũpe pyi e. Katupono yt ikuꞌuro i rat piꞌã hin maꞌato toket neꞌi rat e.
25 Mio tã e Iesui hawyi tuwenoꞌẽ yne raꞌyn itote pyi hawyi Iesui teke raꞌyn mekewat akipy pe piꞌã hin ieineꞌen hap kape hawyi toipopytyk hawyi toimopoĩꞌam iraꞌyn piꞌã hin ikuꞌuro rakat.
26 Miꞌi tã hap Iesui minug ni taꞌatukuap yne raꞌyn mekewat yi wato hap oktan.
27 Miꞌi hawyi Iesui toto iraꞌyn mekewat woꞌomuꞌe hat akag yat pyi turan muap tote typyꞌok yt ihapytig i rakaria iꞌatuwẽpapꞌi Iesui ewatꞌypmo pyi haty wo Iesui kape -Morekuat Tawi saipepiat erehaꞌat ro uruewowi urukyꞌe hap wywo iꞌatuꞌe.
28 Miꞌi hawyi Iesui teke wẽtup netap we raꞌyn hawyi ti meimuẽwat yt ihapytig i rakaria tokokaꞌat raꞌyn hewowi. Miꞌi hawyi apo e Iesui iꞌatuepe -Eweimohey apo uhepiat eimoehãite kuap hap e hawyi taꞌatuwesat -Taꞌi uruimohey kahato epiat urumoehãite kuap hap urukaꞌiwat iꞌatuꞌe.
29 Miꞌi hawyi Iesui timig naꞌyn iꞌatueha koꞌi hawyi toꞌe -Pyno uimohey ehepiat hap ewy ti topyhuꞌat waku raꞌyn eheha koꞌi e.
30 Miꞌi hawyi meremo iꞌatuehapytig naꞌyn hawyi Iesui tiꞌatunapin -Uhytꞌiꞌin yt uwe pe teiꞌo ewehenoi uiminug eimoehapytig hap e haty wo tomimoehãite koꞌi pe.
31 Maꞌato tuwat hawyi wuatꞌi puo taꞌatuhenoi mekewat yi wato hap oktan Iesui minug taꞌatuhenoi miitꞌin me.
32 Miꞌi hawyi tuwat iraꞌyn mekewat getap wyi turan iraniaꞌin terut wẽtup ok miit yt ihay kuap i rakat Iesui kape ahiag ipiit piat rakat.
33 Miꞌi hawyi Iesui tisopo raꞌyn mekewat ahiag miit piit pyi hawyi ihay iraꞌyn. Miꞌi pote itotiaria miitꞌin sem teꞌeruwanetup kahato hawyi teꞌeroꞌe -Taꞌi yt karãpe i ti wataꞌakasa meke tã rakat ewywuat aiꞌywania Isareu etama pe iꞌatuꞌe.
34 Maꞌato iraniaꞌin Wariseuria ti teꞌeroꞌe toꞌope -Taꞌi ahiagnia akag koro esaika hap wo ti meiẽwat miit tiꞌatusopo ahiagnia iꞌatuꞌe.
Iesui Tiꞌatukyꞌe Kahato Miitꞌin Howosat Rakaria
35 Miꞌi hawyi Iesui toto wuatꞌi tawa koꞌi kape miitꞌin muꞌe tehay wuat hamo. Iꞌewyte yne Tupana motypot yat pe teke iꞌatumuꞌe hamo. Toiꞌatumuꞌe kahato tehay wakuat ete. Iꞌewyte tohenoi henoi kahato toieineꞌen morekuatno hap yt pya i raꞌyn hap etiat. Iꞌewyte toimoehãite kahato torannia aikotã aikotã iꞌahuu rakaria.
36 Miꞌi hawyi Iesui haꞌat miitꞌin sem ewowi tepiat iꞌatukyꞌe kahato hap wywo. Tohatyꞌu kahato topyꞌa pe hawyi toꞌe -Taꞌi meimewuaria tukupteꞌen aikotã aihũria Uweiria yt uwe miꞌapykok koꞌi i ewywuaria hoꞌopot pe tukupteꞌen paĩ e.
37 Miꞌi hawyi toꞌe topotmuꞌeria pe -Typyꞌi kahato te yt watiꞌatumuꞌe i te mesuwat yi totiaria katupono ti mikoi ypia iwato kahato wen maꞌato ipotpap mikoi sat atunug hanuaria ti yt typyꞌi hin i e.
38 Miꞌi pote uiwyriaꞌin ewehẽtup to haty wo mekewat mikoi ypia wato Kaꞌiwat pe -Etipoꞌoro ro poꞌog emiit ipotpap mikoi ywa atunug hanuaria eweiꞌe ro e.
