Tiaku 1:1-27
1 Uito Iesui ywyt sese Tiaku. Iesui ti uheꞌykeꞌet sese are. Pyno meiũ uito Tiaku uimiwan atipoꞌoro ehewowi. Uito ti Tiaku Tupana eropat hat iꞌewyte Aikaꞌiwat Aipotypot Iesui eropat hat uito are. Koitywy atipoꞌoro uiꞌe hap torannia kape Tupana mepytꞌin aimepuo aimepuo yi wato hap oktan tukupteꞌen hap kape.
2 Uiwyriaꞌin karãpe putꞌok e ahete aikotã aikotã mikyryꞌi hap hoꞌopot hap ahãꞌãg hap miꞌi pote waku watuwehum kahato Tupana kape.
3 Miꞌi hap watunug mote poꞌog ihãite ahepiat imohey hap. Miꞌi hawyi wahaty sepap neꞌi raꞌyn karãpe wẽtup ok kaipyi raꞌyn ahãꞌãg hap putꞌok e turan.
4 Waku yt watuwemig i ahãꞌãg hap pupi. -Waku arakosap aru hoꞌopot hap sakpo watoꞌe yn waku yn aipyꞌa pe. Miꞌi hap watunug motꞌi pote Iesui mohey haria wo kahato watoineꞌen hãpyk sese rakat hap ete. Wahupit kuap wahoꞌopot hap ahãꞌãg hap pote ti hekat kahato rakaria ewy watoineꞌen Tupana wanetup hawe.
5 Karãpe yt watikuap i kat som waku watunug hãpyk takat ahãꞌãg hap putꞌok e turan miꞌi hap eꞌat pe waku wahẽtup kahato wuatꞌi kuap sese hat Tupana kape. Miꞌi hawyi aikotã waku hamuat tohenoi kahato ahepe towese popuo aimuꞌe yt ahatyꞌi hatyꞌi popuo hin i ainapin Tupana.
6 Imohey kahato hap wywo yn waku wahẽtup aimoweꞌeg hamuat wahẽtup Tupana pe. Yt naku i wahẽtup Tupana pe imohey ran hap wywo. Maꞌato karãpe wahẽtup imohey ran hap wywo neꞌi pote ahehay yt aiwesat i wyti aru imohey ran nywo neꞌi wahẽtup wote. Yt naku i imohey hap kowoꞌi kowoꞌi aiwanetup hap mywo wahẽtup. Maꞌato miꞌi hap wywo wahẽtup pote watopyhuꞌat aikotã yꞌy hyemyi piat ewy neꞌi aiwanetup hap. Aikowo aikowo wasere wato upi hap ewywuat watoineꞌen aiwanetup hawe imohey hap upi. Yt naku i are.
7 Aikowo aikowo neꞌi imohey hap aiwanetup hawe pote yt naku i kahato watopyhuꞌat katupono atimohey kahato Tupana watoꞌe iraniaꞌin me maꞌato yt pywo pe i katupono typy ihay rakat ewy watoineꞌen aiwanetup hawe.
8 Karãpe wahẽtup Tupana kaipyi aimikyꞌesat koꞌi maꞌato yt watomohey kahato i hap wywo pote typy ehay rakat ewy watoineꞌen. Yt naku i watoꞌe Tupana pe -Woromohey En Tupana wen maꞌato yt atikuap i sio etum aru uimiẽtup sio yt watoꞌe pote kowoꞌi kowoꞌi watomohey typy wanetup haria watopyhuꞌat. Miꞌi hap ewy wahẽtup pote aimiẽtup yt heremo hin i Tupana wanetup hawe. Miꞌi pote yt tutum kuap i aimiẽtup Tupana tuwekaipyi.
9 Karãpe watomohey Iesui hawyi hoꞌopot kahato hap topyhuꞌat ahete katupono iraniaꞌin yt imohey i haria yt iꞌatuwese hin i ahete -Yt naku i kahato eipe iꞌatuꞌe ahepe. Miꞌi hawyi ahehakyꞌeꞌi kahato hap toineꞌen ahete. Miꞌi pote yt naku i aiwanetup hap yi kape are. Yt naku i watuwemoti imohey hap ete katupono Tupana wanetup hawe waku pe watoineꞌen.
10 Hekat rakaria miitꞌin mimotypot koꞌi tukupteꞌen mesuwarote iꞌatuꞌe maꞌato Tupana wanetup hawe imohey haria hekat rakaria ewy tukupteꞌen katupono yne Tupana watnuat toineꞌen imohey haria po pe. Miꞌi tupono waku hekat rakaria mesuwarote aito pote waku watuwehum Tupana kape are maꞌato yt naku i watuwehum ahekat ete -Uito poꞌog uhekat watoꞌe aiwanetup hawe. Waku paa e haria wo watopyhuꞌat ahekareꞌen koꞌi ete katupono ikuꞌuro irane miꞌiria hekat rakaria pykai. Miꞌi hawyi aikuꞌuro hawyi yt kat i ahekat mesuwarote. Taꞌi aheineꞌen hap mesuwarote ipohyt koꞌi ewy kahato. Aat hakup kahato hawyi igag ipohyt hawyi iteneg naꞌyn hawyi ikuꞌuro.
11 Pywo ipohyt ewy kahato hekat rakaria tukupteꞌen. Mesup hekat kahato rakaria tukupteꞌen miꞌi hawyi mukiꞌite satek hap eꞌat pe hawyi ihakyꞌeꞌi kahato rakaria wo tukupteꞌen ipohyt teneg ewy. Karãpe Tupana ainug hekat rakatno miꞌi pote waku watuwehum kahato ahekat nug hat Tupana ete. Iꞌewyte karãpe yt ahekareꞌen kahato i hap putꞌok e ahete waku watuwehum kahato wy Aimowepiit hat Tupana ete are katupono watikuap yt ahekat kaipyi i aimowepiit sese hap tuut. Waku watoꞌe -Taꞌi ahekat mesuwarotiat ipohyt ewy waku watoꞌe mesup. Ikahu kahato tig wen maꞌato mukiꞌite toto raꞌyn. Miꞌi hap ewy ahekat yt toineꞌen motꞌi hin i waku watoꞌe ahatek hap eꞌat pe mesuwe.
12 Maꞌato uwe uwe tepiat hoꞌopot turan te hakyꞌeꞌi turan yt iwaure i imohey hap miꞌi hat ti Tupana mimowaku wo toineꞌen iꞌewyte Tupana mimowepiit kahato wo topyhuꞌat wuatꞌi eꞌat pe katupono hoꞌopot hap sakpo gosap hat toineꞌen imohey hat. Miꞌi hat pe Tupana toꞌe aru -Uikyꞌe hat sese en e. Miꞌi pote woromoieineꞌen kahato wuatꞌi eꞌat pe e yt tewaure i haria pe.
13 Karãpe ahãꞌãg hap toineꞌen ahete yt naku i nug hamuat miꞌi pote yt naku i watoꞌe aipyꞌa pe -Tupana ti uhãꞌãg kahato yt naku i nug hamo yt naku i watoꞌe katupono Tupana yt ahãꞌãg kuap i saꞌag nug hamo i. Iꞌewyte yt wahãꞌãg kuap i Tupana saꞌag nug hap ete aito.
14 Aiwanetup hap mikyꞌesat saꞌag kaipyi ti tuwẽtem ahãꞌãg saꞌag nug hamuat hap. Aimikyꞌesat saꞌag aipyꞌa piat aimaꞌat hamuat topyhuꞌat aikotã ewamiri miat hãꞌãg hap ewy. Aimikyꞌesat ahãꞌãg kahato yt naku i nug hamuat. Wahãꞌãg hawyi watopyhuꞌat aimaꞌat hawe aikotã hapiri topyhuꞌat ewamiri pe hap ewywuat.
15 Aimikyꞌesat saꞌag koꞌi ahepiat iꞌaparap hap toineꞌen. Aiwanetup saꞌag hap aikotã aikotã waku watunug aru aiminug saꞌag ainug yt naku i nug haria sese katupono meremo watuwat aiwanetup saꞌag hap koꞌi upi. Watunug aimikyꞌesat saꞌag koꞌi hawyi saꞌag nug haria wo raꞌyn watopyhuꞌat Tupana wanetup hawe. Miꞌi hawyi Tupana uiꞌapiheg hap yn topyhuꞌat aiwanetup hawe.
16 Yt naku i watuwemaꞌat uiwyriaꞌin are. Yt naku i watunug aimikyꞌesat saꞌag. Waku watoiat aimikyꞌesat koꞌi yt naku i nug neran hap koꞌi.
17 Tupana ti hẽtyhot kahato rakat ewy toineꞌen. Tupana ti aat nug hat waty nug hat iꞌewyte wuatꞌi waikiru nug hat wyti Miꞌi. Tupana yne wakuap nug hat. Yt kat hin i saꞌag Tupana tunug. Yne imienoi koꞌi hãpyk yn naꞌyn. Ewaty aat yt hẽtyhot motꞌi i ahowawi. Hẽtyhot rakirẽ yt raꞌyn tuereto aat waty waikiru koꞌi wen maꞌato Tupana sese yt miꞌiria tominug koꞌi yt ewywuat hin i toineꞌen. Tupana ti poꞌog poꞌog aipowyro hat tominug aat waty waikiru koꞌi kai. Miꞌi ti poꞌog poꞌog ipotpap aat kaꞌap wyti aipoityro hamuat. Yt kat saꞌup i watum pykai tutum yne yne ahepe tekat koꞌi aimowepiit hamuat koꞌi. Hẽtyhot aat kaꞌap Tupana.
18 Tehay pywuat sese wo ainug tomepytꞌin koꞌi. Miꞌi hawyi aito watopyhuꞌat Tupana mowepiit kahato haria aikotã aimikoi pakup haat rakat aimowepiit hap topyhuꞌat. Miꞌi hap ewy aito Iesui mohey haria watopyhuꞌat Tupana mowepiit hanuaria wo sese katupono -Poꞌog poꞌog uimikyꞌeria eipe torannia uiminug koꞌi kai e Tupana ahepe tosaꞌyruꞌin me tosakiꞌytꞌin me.
19 Uiwyriaꞌin waku wyti watuwewaure kaꞌa kahato aimuꞌe haria mienoi kape. Waku watuwanetup kahato hawyi waku aiweꞌeg ahehay. Yt naku i iũteꞌen hap wywo. Yt naku i aipyꞌahak hap wywo neꞌi watiwesat aiwy are. Yt etiwaure teiꞌo miꞌi hap nug hamuat. Uiwyriaꞌin waku ehewaure kaꞌa kahato aimuꞌe haria ehay kape. Waku watuwanetup kahato. Waku aiweꞌeg hap wywo ahehay yt kat i iũteꞌen hap wywo. Yt naku i aipyꞌahak hap wywo watiwesat iũteꞌen. Yt etiwaure teiꞌo miꞌi hap nug hamuat. Uiwyriaꞌin waku ehewaure kaꞌa kahato aimuꞌe haria ehay kape. Waku watuwanetup -Uimuꞌe o uiwy e hap yn aiwanetup hawe waku watoꞌe.
20 Tupana tikyꞌesat kahato wyti hãpyk takat yn miꞌi tupono ti aiwoꞌopyꞌahak hap kaipyi neꞌi yt watunug kuap i Tupana mikyꞌesat ewywuat koꞌi.
21 Waku ti watoiat yne yne aiminug yt naku i hap koꞌi iꞌewyte yne aheko saꞌag nug hap koꞌi. Miꞌi hawyi ti waku watuwewaure kaꞌa kahato Tupana ehay kape paa aiꞌe hap wywo yn katupono Tupana yn ahehakyeraꞌat kuap tehay wo. Miꞌi pote -Uimuꞌe kahato ro ehay nug hamo waku watoꞌe Tupana pe. Tupana etikoi kahato o ehay uiwanetup hawe waku watoꞌe. Yt naku i aheko saꞌawyꞌi wuat ewywuat ahewaire waire nug hap.
22 Yt naku i ti ahewaure kaꞌa wo yn watuwewanetup Tupana ehay kape. Ahewaure pe yn Tupana ehay toineꞌen mote ti aiwemaꞌat hap yn toineꞌen katupono ihay watunug hap kaipyi Tupana mikyꞌesat wy. Toikyꞌesat kahato aheko towat ewy hap toikyꞌesat. Toikyꞌesat tehay hẽtyt rakat ewy hap aimikoi ewy hap toikyꞌesat. Tomikyꞌesat nug hepiat hap wyti toikyꞌesat.
23 Yꞌy kape watehaꞌat aipaꞌãu kape watuwepiok kahato aipaꞌãu kape. Aikotã aipiit aikotã aipainug hap aikotã aikahu hap watehaꞌat aipaꞌãu yꞌy piat kape. Maꞌato watehaꞌat kahu hawyi wato i raꞌyn hawyi meremo watiwaure raꞌyn aikotã ahowapy aikotã hap.
24 Miꞌi hap ewy ti Tupana ehay watikuap saꞌag hawyi wato hawyi watiwaure raꞌyn watikuap saꞌawyꞌi rakirẽ wuat pykai.
25 Maꞌato ahewaure kaꞌa kahato Tupana ehay kape -Atikuap teran kahato ehay watoꞌe Tupana pe hawyi watuwewaure kaꞌa kahato Tupana piat ainapin hãpyk takat kapiat hawyi watuwemuꞌe kahato hawyi watikuap kahato inug hamuat hap. Watunug Tupana mikyꞌesat ewy hawyi Tupana aimowepiit kahato aiminug upi katupono watunug iꞌe hap ewy kahato hawyi aipoityro kahato yne aiminug ete.
26 Karãpe yt waĩ watoꞌe i ahehay saꞌag hap miitꞌin ete miꞌi pote yt kan hamo i -Tupana mohey kahato hat uito watoꞌe katupono wemaꞌat haria wo i watoineꞌen. Yt kan hamo i ahehay miitꞌin muꞌe hap ete katupono taꞌatukuap typy ihay rakaria aito hawyi ahehay Tupana ete ihay se wen maꞌato ahehay iraniaꞌin ete yt naku i katupono sehay iꞌewyte saꞌag tuwẽtem aiwẽ pyi wy.
27 Uwe uwe yt ity i yt iꞌywot i rakat powyro hap kaipyi Aiꞌywot atipy piat Tupana tikuap kahato tomohey hat sese pywo sio yt hap. Uwe uwe hiwuria powyro hap koꞌi toikuap aito tomohey hat sese pywo sio yt hap e. Uwe uwe hatek takaria powyro hap koꞌi toikuap tomohey hat sese pywo sio yt hap e. Karãpe iraniaꞌin ahãꞌãg yt naku i nug hamo maꞌato yt watuwat i iꞌatuꞌe hap upi -Uito Iesui mohey hat pote yt atunug neran i te watoꞌe. Mio tã watoꞌe hawyi Aiꞌywot atipy piat tikuap kahato aito tomohey sese haria wo raꞌyn aikuap are.
