Tiaku 2:1-26
2 Uiwyriaꞌin aipotypot koro Iesui ti wuatꞌi mimotypot nuat topyhuꞌat. Miꞌi tupono ti waku watiꞌatumotypot iraniaꞌin. Yt naku i uimiꞌairoria yn i miitꞌin watiꞌatukyꞌe. Maꞌato Aikaꞌiwat tiꞌatukyꞌe yne miitꞌin torannia hap ewy waku watiꞌatukyꞌe yne. Yt naku i watiꞌairo aiwyriaꞌin iꞌatuekat hap upi iꞌatuwepainug hap upi neꞌi are. Yt naku i watiꞌatukyꞌe aiꞌywania koꞌi yn.
2 Karãpe aiwoꞌomuꞌe hawe tuut wẽtup ok miit hekat rakat wuatꞌi iwat toĩ tuwepainug hesokpe ikahu ipuꞌiãpiat imehit. Iꞌewyte tuut wy wẽtup ok yt hekat i rakat hesokpe saꞌag wywo tuut.
3 Miꞌi hawyi watoꞌe hekat rakat pe -Uiwy kahato en. Waku eraꞌapyk mesuwe eꞌamyap ikahu rakat rote maꞌato miꞌi hawyi yt hekat i rakat pe -Pyno waku en itote yꞌam me ro ereineꞌen sio yi tote ro eraꞌapyk watoꞌe hap kaipyi Aiꞌywot Tupana aikuap.
4 Uiwyriaꞌin yt naku i watimohit hatek takaria yt hekat i rakaria. Maꞌato watimohit miitꞌin yt hekat rakaria i yt uwe wat i mimotypot koꞌi yt hekat i rakaria pote meremo Tupana tikuap aiminug yt naku i hap. Tupana tiꞌatukyꞌe yne aito sio aipiit ikahu sio yt. Sio ahesokpe ikahu sio yt kat i ahesokpe toiꞌatukyꞌe torannia aitoria topyꞌa pe. Waku Tupana ewy watiꞌatukyꞌe torannia miitꞌin sio hekat rakat sio yt. Waku watiꞌatukyꞌe iraniaꞌin Tupana aikyꞌe hap ewy. Miitꞌin ekat kyewi hap neꞌi watiꞌairo aiwyriaꞌin mote -Uito poꞌog e hat ewy watoineꞌen Tupana wanetup hawe katupono watikyꞌe miitꞌin iꞌatukat kyewi hap wywo neꞌi. Wẽtup kyꞌe hamo yn waku watiꞌatukyꞌe miitꞌin sio morekuaria sio miit emiit koꞌi.
5 Pyno ewetum no ehewaure kaꞌa uhepe uimikyꞌe koꞌi. Yt eweikuap i te apo aikotã Tupana tiꞌairo kahato yt hekat i rakaria Iesui mohey kahato hanuaria wo hap. Poꞌog toiꞌairo ihakyꞌeꞌi rakaria temiit no tetama piatnuaria wo iraniaꞌin kai katupono saꞌawyꞌi toꞌe -Uhemiit sese wyti aru tukupteꞌen miit emiit haria wo karãpe arepyhuꞌat Wuatꞌi Miitꞌin Morekuat Koro mesuwarote e Tupana miwan me saꞌawyꞌi. Mio tã toꞌe hap ewy raꞌyn ti mesup te toiꞌairo temiitꞌin no miit yt uwe mikuap ewywuat koꞌi i yt uwe mikyꞌe ewywuat koꞌi i e. Miꞌiria pe ti -Worohoꞌoꞌairo eipe miitꞌin porekuaria wo uimohey sese haria eiperia pote e. Worohoꞌonug eipe morekuat no yne mesuwat yi tote e hatek takaria pe tokyꞌe sese haria pe. Worohoꞌomoesaika uimohey kahato hap wywo wuatꞌi nug hamo e Tupana tomohey haria pe.
6 Eiperia yt hekat i rakaria pote hekat rakaria eimohit reran neꞌi. Yt naku i taꞌatunug hekat rakaria. Taꞌatuꞌatukyꞌesat wyti eiweteweru taꞌatuepiat hap yn taꞌatukyꞌesat. Miꞌi hawyi yt ewehaꞌup nug i raꞌyn eiweteweru hap hawyi ti ehereto raꞌyn suraraꞌin kape eiꞌapiheg hamo. Yt ewenug neiꞌo miꞌiria ewy neꞌi are.
7 Aipotypot Iesui set mohit kahato haria wyti hekat rakaria. Yt iꞌatuweꞌeg hin i miꞌiria katupono Tupana ahetꞌok Iesui set upi. Yt kat set i poꞌog Iesui set kai ikahu rakat ahepe. Iesui ti Aikaꞌiwat koro maꞌato yt taꞌatumotypot hin i Aikaꞌiwat.
8 Saꞌawyꞌi Aipotypot Iesui aimuꞌe tehay pywuat sese wo. Mio tã e -Waku watiꞌatukyꞌe kahato iraniaꞌin aiwekyꞌe kahato hap ewy e ahepe ainapin hap sese.
9 Pyno waku watunug Aikaꞌiwat koro ainapin hap ewy yn waku watunug. Waku watiꞌatukyꞌe torannia miitꞌin aiwekyꞌe hap ewy. Maꞌato wahoꞌokyꞌe miitꞌin hekat hap upi ikahu hap upi miꞌi pote Aimuꞌe hat ainapin hat ehay pun haria wo watopyhuꞌat. Miꞌi hawyi yt nakuaria i wo watopyhuꞌat Tupana wanetup hawe. Waku watiꞌatukyꞌe torannia miitꞌin watuwekyꞌe kahato hap ewy e ahepe.
10 Tupana tikyꞌesat kahato watunug wuatꞌi tepiat ainapin hap maꞌato watiꞌaparap wẽtup ainapin hap miꞌi hawyi yt naku i nug haria wo raꞌyn watoineꞌen. Wẽtup yn aimiꞌaparap hawyi yt naku i watopyhuꞌat Tupana wanetup hawe katupono wẽtup ainapin hap pe toineꞌen yne Tupana piat ainapin hap wẽtup sehay pe -Aikotã eweiꞌatukyꞌe iraniaꞌin eiwekyꞌe hap ewy e hap. Miꞌi hap yt watunug i mote watiꞌaparap yne Tupana piat ainapin hap koꞌi.
11 Katupono saꞌawyꞌi te Tupana ainapin miwan me -Yt eweipohari teiꞌo wẽtup ok iharyꞌi ete heꞌaito ete e. Iꞌewyte toꞌe -Yt eweiꞌauka teiꞌo miit e tomiwan nu kawiat puretig etiat. Miꞌi hawyi yt watipohari i wẽtup ok iharyꞌi ete heꞌaito ete maꞌato watiꞌauka wẽtup ok hawyi Tupana woꞌonapin hap watiꞌaparap kahato katupono miit auka hatno raꞌyn watopyhuꞌat raꞌyn.
12 Maꞌato ahowawi Tupana ihaꞌat kahato sio watunug imikyꞌesat ewy sio yt hap kape yn. Tupana ihaꞌat ahowawi sio watiꞌatukyꞌe iraniaꞌin aiwekyꞌe hap ewy. Miꞌi tupono waku watiꞌatukyꞌe miitꞌin Iesui ewy. Waku aiweꞌeg wo aiminug koꞌi kai ahehay koꞌi kai sio miitꞌin kyꞌe hap toineꞌen aikai Iesui mikyꞌesat ewy sio yt Iesui mikyꞌesat ewy i watunug hap koꞌi.
13 Tupana piat miitꞌin apiheg hap eꞌat putꞌok e raꞌyn turan miꞌi hap eꞌat pe wyti yt kat i raꞌyn Tupana kai iꞌatuehakyꞌeꞌi hap meimuẽ waria miitꞌin yt ehakyꞌeꞌi kuap i haria ete. Maꞌato iraniaꞌin woꞌohakyꞌeꞌi kuap haria kape yt kat i hin i aru iꞌatuꞌapiheg hap topyhuꞌat katupono Tupana tuwehum woꞌohakyꞌeꞌi kuap haria ete.
14 Pyno uiwyriaꞌin yt naku i ti ahehay wo yn watomohey Iesui katupono yt watomoherep i ahepiat imohey hap miitꞌin me aiminug wakuap koꞌi miꞌi pote ti yt kat hamo i ahehay se -Uito atimohey kahato Tupana watoꞌe. Uito ti Iesui mohey hat sese aiꞌe hap toineꞌen aikai hawyi yt kat i aiminug wakuap koꞌi miitꞌin kyꞌe hap moherep hamuat aikai miꞌi pote ti yt kat i Iesui mohey hap sese toineꞌen aipyꞌa pe maꞌato heso rakaria wo watoineꞌen iraniaꞌin wanetup hawe iꞌewyte Tupana wanetup hawe.
15 Karãpe putꞌok e aiꞌyat pe hatek takat Iesui mohey hat yt imiꞌu i rakat yt hesokpe i rakat hawyi yt kat i watum tope maꞌato wahenoi Tupana pe yn -Pyno waku mehin mana ahẽtup aru Tupana pe eipowyro hamuat watoꞌe yt kat i watum pykai -Tupana aru epoi mehin mana watoꞌe yt kat i miꞌu watum pykai.
16 Maꞌato yt kat i watum mote yt karãpe i taꞌatumohey ahehay -Uruto ti Iesui mohey kahato haria aiꞌe hap. Tupana eipainug watoꞌe yt kat i sokpe ium wywo iꞌatupowyro hamo hawyi yt taꞌatumohey i ahehay -Uruimohey kahato Iesui aiꞌe hap.
17 Miꞌi tã watunug pote yt watomoherep hin i iꞌatuepe ahepiat Iesui mohey sese hap are. Miꞌi pote heso rakaria wo watoineꞌen iꞌatuwanetup hawe iꞌewyte Tupana wanetup hawe. Uiwyriaꞌin ikuꞌuro rakat nem kahato rakat yt ikahu hin i toineꞌen. Yt uwe mikyꞌesat ewy hin i toineꞌen aikotã iꞌokpuk nem nakat ewy watoineꞌen aitoria Iesui mohey haria yt hegyiꞌat i rakaria aito hawyi.
18 Miꞌi hawyi teꞌeroꞌe iraniaꞌin ahepe -Maꞌato tukupteꞌen ni Iesui mohey haria yt kat i taꞌatuminug wakuap koꞌi e haria. Miꞌi hawyi eheso kahato are iꞌatuepe katupono Iesui mohey hap sese kaipyi tuwẽtem wuatꞌi waku nug hamuat koꞌi are. Yt pote yt kat i Iesui mohey sese hap aikai are iꞌatuepe. Uito ti atimoherep uhepiat Aikaꞌiwat mohey hap miitꞌin kyꞌe hap wywo are.
19 -Uruto ti uruimohey kahato Tupana iꞌatuꞌe uhepe iraniaꞌin. Uruimohey sese Tupana wẽtup yn toineꞌen iꞌatuꞌe uhepe. Pyno waku miꞌi tã watomohey iꞌatuepe wen maꞌato eiweꞌeg wo o katupono iꞌewyte ahiag timohey kahato wy wẽtup yn Tupana toineꞌen hap tokenꞌẽ popuo. Ahiagnia timohey Tupana toineꞌen hap wen maꞌato yt Tupana mikyꞌesat ewywuat nug hin i haria wo tukupteꞌen. Ahiagnia taꞌatumohey saꞌag pykai.
20 Yt kan hamo i -Atomohey kahato Tupana watoꞌe hawyi yt kat i watunug wakuap miitꞌin me. Miꞌi tã watunug pote -Heso kahato rakaria eipe iꞌatuꞌe iraniaꞌin ahepe teꞌeruwanetup hawe. Ahehay wo yn watomohey Iesui pote yt aiweꞌeg hin i aito.
21 Watikuap taꞌyn aikotã saꞌawyꞌi te ahaꞌaseꞌi Aparãu tunug nu kawiat heiam aikope aihũ watiwuk Tupana mowepiit hamuat hap ewy. Miꞌi hap tote toiporokpun tosaꞌyru Isaki iꞌauka hamo Tupana piat ipoꞌoro hap ewy. Miꞌi hawyi miꞌi tã iminug kapiat tehaꞌat howawi Tupana hawyi -Waku kahato rakat en Aparãu e Tupana tope. Eminug kaipyi mesup atikuap sese raꞌyn uimohey hat sese en e Tupana tope.
22 -Waku en Tupana katupono ahaꞌaseꞌi pot timoherep tepiat Tupana mohey hap tominug wo. Imohey hap toimoherep kahato wuatꞌi pe tominug wo. Toꞌokupitu kahato imohey hap iminug koꞌi. Iꞌe hap tutunug hap kaipyi Tupana tikuap tomohey hap sese ahaꞌaseꞌi pot Aparãu saꞌawyꞌi.
23 Aikotã Tupana toꞌe saꞌawyꞌi hap ewy -Uiwy kahato ti en Aparãu e. Uimohey hat sese ti en e. Hãpyk kahato rakat en uiwanetup hawe uiwy e Tupana tope.
24 Uiwyriaꞌin imohey hap toineꞌen ahehay pe yn mote Tupana yt aimohãpyk kuap i katupono uiminug wakuap kaipyi yn watimoherep kuap Tupana mohey hap sese toineꞌen aipyꞌa pe. Maꞌato yt kat i imohey hap moherep hap aikai waku nug hap koꞌi miꞌi pote yt toineꞌen i Iesui mohey hap sese aikai maꞌato heso rakaria wo watopyhuꞌat aito.
25 Saꞌawyꞌi mana Irapi timoherep kahato Tupana mohey tepiat hap katupono toiꞌatuporereke toꞌyat pe typy ok surara Isareu ywania Tupana mipoꞌoro koꞌi sepiok e hanuaria. Miꞌiria pe mana Irapi timoherep muap wẽtup iꞌatupopy hamuat migꞌi wo toimoherep iꞌatuehakyeraꞌat hap katupono iraniaꞌin surara tikat miꞌiria iꞌatuꞌuka hamo. Miꞌi hap ewywuat mana Irapi tunug hawyi Tupana tikuap taꞌyn tomohey hat raꞌyn toineꞌen hap. Miꞌi hawyi toiehakyeraꞌat mekewat haryporia yt iweꞌeg i rakat wuatꞌi ihainiaꞌin wywuat ieineꞌen hat pykai.
26 Pywo ti rat uhekatuwyria yt kat i aipaꞌãu pote yt kat hamo i aipiit katupono ikuꞌuro raꞌyn. Aheha piat toto hawyi -Ikuꞌuro sese raꞌyn iꞌatuꞌe. Miꞌi hap ewy ti yt kat i miitꞌin powyro hap Iesui mohey hap moherep hap aikai hawyi ikuꞌuro rakat ewy raꞌyn watoineꞌen yt iwese rakat ewy i yt kat nug hat wo i raꞌyn watoineꞌen. Yt watimoherep Iesui piat miitꞌin kyꞌe hap iraniaꞌin me ahegyiꞌat hamo pote yt kan hamo i watoꞌe hatek takaria pe -Uruimohey kahato Iesui watoꞌe aiꞌe hap.
