Tiaku 3:1-18
3 Uiwyriaꞌin eiweꞌeg wo o -Uito poꞌog torannia kawiat woꞌomuꞌe hat eiꞌe hap wywo katupono miitꞌin muꞌe haria kape yn Tupana poꞌog ihaꞌat sio taꞌatumuꞌe hap ewy taꞌatunug sio yt teꞌeropyhuꞌat sio taꞌatunug taꞌatuepiat miitꞌin napin hap ewy sio yt hap kape tehaꞌat kahato Tupana. Maꞌato yt watunug i ahepiat miitꞌin napin hap miꞌi pote poꞌog aiꞌapiheg hap topyhuꞌat aipotmuꞌeria kai katupono yt watunug i Tupana ainapin hap koꞌi pote miꞌi pote ti -Typy ihay haria eipe e aru ahepe Tupana mekewat eꞌat pe karãpe Tupana timoherep yne miitꞌin me uwe waku uwe yt naku i hap airo hap eꞌat pe. Miꞌi tupono waku perupꞌi puo watiꞌatumuꞌe miitꞌin are. Waku watoꞌe aiwanetup hawe -Yt hãpyk i ahenoi pote atiꞌaparap kahato Tupana pe waku watoꞌe aipyꞌa pe.
2 Pyno torannia aito iꞌaparap haria watoineꞌen. Maꞌato ahehay wo ahẽku wo yt watiꞌaparap i pote yt karãpe i saꞌag nug hatno watoineꞌen katupono aipyꞌa piat aiwanetup hap moherep hap ahehay topyhuꞌat. Karãpe yt watiꞌaparap i ahehay wo pote hãpyk pe kahato watoineꞌen aheineꞌen hap tote. Ahehay hãpyk takat watunug kuap pote watuwepoꞌoro kuap yne aipiit wakuap nug hamo.
3 Aihũ Kawaru wẽ sakpo watikytyt saity hawyi miꞌi ete watimohãpyk aikotã hewyry aimikyꞌesat ewy hamo. Kurin kat ete pyi watimoewyry aihũ iwato sese pykai.
4 Iꞌewyte aheꞌyara iwato kahato rakat pykai watimohãpyk kahato yꞌy puo apokuita kurin kat no. Miꞌi hawyi aimikyꞌesat ewy toto aheꞌyara iwato kahato pykai. Imohãpyk hap kurin hetuꞌa pe toineꞌen wen maꞌato totomoesaika kuap yne wasere wato pykai waku ahewyry.
5 Miꞌi hap ewy ahẽku topyhuꞌat kurin aipiit kai mekewat saity aihũ Kawaru wẽ sakpuat ewy mekewat imohãpyk hap kurin hetuꞌa piat aheꞌyara etiat hap ewy. Taꞌi ahẽku ti yt iwato i pykai -Uito poꞌog torannia kai watoꞌe ahẽku hit no. Iꞌewyte aikotã aria hit taꞌat go iwato rakat rote igag nakat rote hap ewy meremo aria iwato kahato topyhuꞌat itote. Miꞌi hap ewy ahẽku hit kaipyi iwato kahato saꞌag tuwenug.
6 Ahehay saꞌag ni aiwanetup hap maꞌat kuap hat toineꞌen. Aimaꞌat hat kahato ti rat ahẽku. Woꞌoeremopusu hap tuwẽtem ahẽku pyi aiwoꞌomaꞌatꞌi maꞌatꞌi hamo. Aikotã aria ahekareꞌen wuk hap ewy ahehay toineꞌen. Ahehay aikotã mekewat saꞌag nug hat eiam wyti aria wato yn toineꞌen. Ahehay saꞌag ahẽku kaipywiat miitꞌin wuk hap ewy topyhuꞌat. Ahehay wo miitꞌin maꞌat hap topyhuꞌat katupono aheineꞌen hap mokoꞌi mokoꞌi hap aiwanetup hap pyi tuwẽtem ahẽku pyi are. Taꞌi aimohun hap wyti ahehay saꞌag.
7 Taꞌi watikuap kahato haiwot rakaria gaꞌapy piaria moperupꞌi aihũ wuat hap iꞌewyte weitaria aihũ wo atimoperupꞌi kuap iꞌewyte topyhuꞌat hewyry rakaria aihũ wo watunug. Iꞌewyte piraria watimoperupꞌi kuap aito.
8 Maꞌato miꞌi pykai ahẽku yt watimoperup i kuap i katupono ahẽku miitꞌin auka kuap hap topyhuꞌat. Ahehay wo watimaꞌat kuap kahato miitꞌin. Moĩ haiwot rakat ewy ahẽku toineꞌen katupono miꞌi wo watiꞌatuꞌuka kuap miitꞌin aimimaꞌat koꞌi.
9 Ahehay saꞌag ahẽku pyi guꞌuro hy ewy toineꞌen katupono -Waku kahato en watoꞌe Aiꞌywot Aikaꞌiwat Tupana pe wen maꞌato miitꞌin me -Motoro meiũpepyi aria wato kape watoꞌe saꞌag ahewanikaptia pe miitꞌin me Tupana minug toiãꞌãkap koꞌi pe. Ahẽku wo -Waku kahato En Tupana watoꞌe miꞌi hawyi mekewat ahẽku wo watiꞌatukuasa Tupana minug miitꞌin koꞌi. Yt naku i kahato miꞌi tã are.
10 Wẽtup ahehay pyi tuwẽtem Tupana motypot hap iꞌewyte wẽtup ahehay pyi tuwẽtem miitꞌin mohit hap. Yt naku i ti rat miꞌi tã are. Are paĩ yt aiweꞌeg hin i ahẽku moperupꞌi hap ete aito. Aiwemoti hap kahato ahehay.
11 Yresa pyi yt karamuo i yꞌy tuwẽtem he rakat nop takat wẽtup kaꞌa pyi yn. Miꞌi hap ewy yt naku i ahehay he rakat ahehay nop takat ahẽku pywiat.
12 Iꞌewyte yt karãpe i Pakuꞌa yp kaipyi hewo muse sat neꞌi. Iꞌewyte yt karãpe i hewo Warana yp kaipyi Wasaꞌi sat neꞌi. Iꞌewyte yresa ihy nop takat yt tum kuap i aimiꞌu he rakat.
Yt Naku I Watuuka Aiwoꞌope Aimuꞌe Hap Etiat
13 Miꞌi hap ewy kahato yt naku i ahehay saꞌag yt Tupana Paꞌãu mikyꞌesat ewy i ahẽku wo. Waku watunug wakuat yt kat i aiwemotypot hap wywo. Miꞌi hap ewy waku aheineꞌen hap he rakat ewy aiminug woꞌowese hap wywo yt kat i -Uito poꞌog aiꞌe hap aiwanetup hawe. Waku yne ahehay wakuap wo watimoherep aiweꞌeg hap imotypot hamuat.
14 Karapeĩ watoꞌoehayꞌywyi hawyi yt kat i aiwoꞌowese hap aikai topyhuꞌat. Miꞌi pote yt kan hamo i -Uito ti poꞌog iraniaꞌin kai watoꞌe neꞌi. Maꞌato miꞌi tã mote watuwemaꞌat neꞌi.
15 Karapeĩ watuꞌuka aiwoꞌope Tupana piat aimuꞌe hap kaipyi miꞌi pote yt weꞌeg hin haria wo i watopyhuꞌat. Karãpe watoꞌoehayꞌywyi aiwoꞌope watopyhuꞌat iraniaꞌin yt imohey i haria ewy neꞌi. Aikotã ahiag potmuꞌeria ewy watoineꞌen. Aikotã taꞌatumikyꞌesat yn nug haria ewy watopyhuꞌat. Yt naku i kahato watuꞌuka aiwoꞌope Tupana piat aimuꞌe hap kaipyi. Miꞌi tã watunug mote yt karãpe i Tupana mimuꞌeria watopyhuꞌat maꞌato ahiag potmuꞌeria watoineꞌen.
16 Karãpe watoꞌoehayꞌywyi aiwoꞌope -Uito ti poꞌog eikai aiꞌe hap aipyꞌa piat kaipyi miꞌi hawyi meiũran wanikaptia wo watopyhuꞌat itote hawyi aiwoꞌomaꞌatꞌi maꞌatꞌi hap yt ikahu hin i rakat topyhuꞌat aiwoꞌopiat. Yt naku i are.
17 Maꞌato Aiꞌywot atipy piat iweꞌeg sakpo toineꞌen. Miꞌi ti aimuꞌe kahato aipyꞌa pe toweꞌeg hap yt ahiag wat ewywuat hin i. Mio tã e ahepe -Pywuat kahato eweikupteꞌen no Uiꞌewy e ahepe. Woꞌowese haria wo ro eweikupteꞌen e. Woꞌokyꞌe haria wo woꞌopowyro haria wo woꞌowesat kahu hanuaria uiꞌewy o eweikupteꞌen o e ahepe. Waku woꞌokyꞌe hap moherep hanuaria wo eweikupteꞌen e ahepe. Waku wakuat nug haria wo eipe e. Waku yt wẽtup ok i miit mohit hanuaria wo eweikupteꞌen no e ahepe. Waku yt typy ehay rakaria wo eweikupteꞌen e. Waku toꞌoꞌewyꞌewy wuatꞌi miitꞌin kyꞌe haria wo eweikupteꞌen e ahepe aimuꞌe kahato hat atipy piat Aiꞌywot.
18 Watikoi aikope aimikoi wakuat pote waku kahato hẽtyt hawyi maꞌato yt pote yt kat i aimiꞌu wakuat watipuẽti aru hat hawyi. Miꞌi hap ewy kahato woꞌokyꞌe hap watikoi hawyi aiwoꞌowese hap toineꞌen aru aiwoꞌope hawyi aimowepiit hap toineꞌen aiwoꞌope. Miꞌi hawyi hewo kahato aru waku hap ahete aimiꞌu he kahato hap ewy aimikoi he hap ewy.
