Miꞌitā̃. Tupana Ehay ȳt henoiꞌi ciência etiat koꞌi yn maꞌato hampȳk kahato tohenoi ciência etiat koꞌi turān. Korā̃ erehaꞌat kuap kotā̃ e hap koꞌi miꞌi hap etiat. Tupana Ehay piat mienoi ciência e hap etiat hawyi nimuaria mītꞌīn mimohey koꞌi tuweupi kahato.

•   Torānia saꞌawynug̃ hat ri Ieuwa. (Ienesi 1:1) Maꞌato kotā̃ e hap nimuaria mītꞌīn teꞌeruwanentup hawe — Mesūwat yi hawyi atipy piaria tuwemoherep iũteꞌen iꞌatuꞌe. Papironia totiaria teꞌeruwanentup hawe — Mesūwat yi totiaria atipy piaria yne teꞌeruwemoherep tupanaria yꞌy upiaria minug̃ kaipyi iꞌatuꞌe. Hawyi iraniaꞌīn teꞌeruwanentup hawe — Mesūwat yi tẽtem iwato kahato rakat supiꞌa kaipyi iꞌatuꞌe.

•   Mesūwat yi totiaria hawyi atipy piaria hampȳk popuo tukupteꞌen Tupana tiꞌatunug̃ miꞌi hap nug̃ hamo pote. (Io 38:33; Ieremia 33:25) Maꞌato mītꞌīn tuwanetup ran. Iꞌatuwanentup hawe yne wemoherep hap koꞌi tupanaria kaipyi tūt. Iꞌewȳte mītꞌīn mimosoꞌopot koꞌi wy.

•   Mesūwat yi ȳt kat roteꞌi toig̃neꞌen. (Io 26:7) Mītꞌīn teꞌeruwanentup mesūwat yi toig̃neꞌen hũria koꞌi iwatoꞌīn nakaria okpe tote.

•   Yꞌy taꞌam atipy kape hawyi taꞌaipok iꞌaman hap puo pyi. Iꞌaman mutꞌe yꞌy wato koꞌi. (Io 36:27 hawyi 28; Ekeresiasi 1:7; Isaia 55:10; Amui 9:6) Maꞌato nimo kahato raꞌyn Keresia totiaria teꞌeruwanentup yꞌy mesūwat yi ywytꞌokpy piaria mutꞌe yꞌy wato koꞌi. Iꞌatumimohey koꞌi ȳt pȳwo peꞌi maꞌato taꞌatumohampȳk anu 1800 hawyi yn.

•   Yityꞌok koꞌi teꞌeremowato sio teꞌeremowatoꞌi kuap. Iꞌewȳte nimo kahato raꞌyn iraniaꞌīn yꞌy pe tukupteꞌen. (Saumu 104:6 miꞌi hawyi 8) Maꞌato nimuaria mītꞌīn teꞌerewanentup yityꞌok koꞌi iwatoꞌīn nakaria teꞌerepyhuꞌat karāmpeꞌi teꞌereꞌywyk.

•   Waku aipīt pitꞌok aiꞌahū pupi. Isareu piat woꞌonãpin hap koꞌi Ieuwa kaipywiat sese tiꞌatunãpin kan waku taꞌatunug̃ taꞌatuꞌereto ikuꞌuro rakat hawyi kat pote waku iꞌahū rakaria tukupteꞌen pya ihaig̃te rakaria pyi hamo iꞌewȳte taꞌatuꞌasyp ium koꞌi hamo. (Irewitiku 11:28; 13:1-5; Teturonamia 23:13) Maꞌato Isareu ywania e tempu turān Esitu totiaria taꞌatupen satek tote mohag̃ ium puo.

 Ȳt. Aiwemūꞌe Tupana Ehay etiat hap timoherep Tupana Ehay hampȳk kahato tohenoi ciência e hap etiat turān. Erehaꞌat o iraniaꞌīn mītꞌīn e hap koꞌi hawyi Tupana Ehay piat sehay hampȳk takat.

 Heso hap. Tupana Ehay henoi Tupana tunug̃ mesūwat yi hawyi torānia itotiaria 6 eꞌāt 24 horas turanuaria rakat ete.

 Sehay pȳwo piat. Tupana Ehay henoi Tupana tunug̃ mesūwat yi maꞌato ȳt tohenoiꞌi karāmpe hap. (Ienesi 1:1) Ienesi hag̃a 1 henoi 6 eꞌat koꞌi etiat maꞌato ȳt tohenoiꞌi 24 hora turān teꞌeropyhuꞌat sio poꞌog̃. Kotā̃ e hap Tupana Ehay henoi Tupana tunug̃ mesūwat yi hawyi atipy wentup eꞌāt ete. — Ienesi 2:4

 Heso hap. Tupana Ehay henoi Tupana tunug̃ mopep koꞌi āt nug̃ hap eꞌyj̃an mete. Maꞌato miꞌitā̃ mote aikotā̃ me kuapꞌi inug̃ kuap fotossíntese iꞌatuꞌe. — Ienesi 1:11, 16.

 Sehay pȳwo piat. Tupana Ehay henoi Tupana tunug̃ āt mopep koꞌi nug̃ hap eꞌyj̃an mete. (Ienesi 1:1) Saꞌawyꞌi wuat eꞌāt ete āt eꞌariãnty putꞌokꞌe yi tote maꞌato kurin. Maꞌato myẽꞌym eꞌāt ete āt eꞌariãnty putꞌokꞌe kuap yi tote. Miꞌi pote tuwemoherep taꞌyn fotossíntese e hap. (Ienesi 1:3-5 kape, mi’i hawyi 12, 13) Maꞌato miꞌi hawyi yn mesūwat yi totiaria tehaꞌat kuap āt atipy pe. — Ienesi 1:16

 Heso hap. Tupana Ehay henoi āt tiꞌapypueri mesūwat yi iꞌatuꞌe.

 Sehay pȳwo piat. Kotā̃ e Ekeresiasi 1:5 — Āt taꞌam hawyi taꞌapyk minꞌe hawyi tuwẽtem ne aikope pyi tuwẽtem hap upi te mug̃kite miꞌitā̃ te e. Mīt mesūwat yi totiat tehaꞌat kahato āt kape hawyi toiwan mesūwat sehay. Miotā̃ e pykai wen toikuap mesūwat yi tiꞌapypueri āt hap.

 Heso hap. Tupana Ehay henoi mesūwat yi hampȳk iꞌatuꞌe.

 Sehay pȳwo piat. Tupana Ehay ȳt henoiꞌi mesūwat yi aikotā̃ quadrado ewy. (Iesui Potmūꞌeria 1:8) Tupana Ehay henoi āt wẽtem hap āt minꞌe hap hawyi āt posak hap etiat mesūwat yi oktān hap etiat enoi hamo. — Isaia 11:12; Iruka 13:29.

 Heso hap. Tupana Ehay henoi hampȳkꞌi iꞌawerepꞌa rakat auri wuat morānia hap ete iꞌatuꞌe.

 Sehay pȳwo piat. 1 Morekuaria 7:23 hawyi 2 Koronika 4:2 henoi yꞌy eiam nug̃ hap ete. Miꞌi ete ipy pya hap poꞌog̃ wentup mīt typore hap oktān maꞌato ewyry iꞌawerepꞌa hap upi pote 9 mīt typore hap ewy. Meketā̃ hap Tupana henoi iuteuria ikuap poꞌog̃ hamo. Sio taꞌatumorānia tuweupi aimorānia hap kai.