Miꞌitā̃. Tupana Ehay henoi kahato Tupana toig̃neꞌen hap ete. Tupana Ehay aipowȳro kahato watimohey Tupana toig̃neꞌen hap ete. Ȳt nakuꞌi watipȳwo religião piaria sehay koꞌi ete maꞌato waku watimohey kuap watuwemūꞌe watuwanentup Tupana toig̃neꞌen hap kape hawyi yn. (Humanu 12:1; 1 Iuwãu 5:20) Erehaꞌat o kat e Tupana Ehay miꞌi hap etiat.

•   Yne aimiꞌakasa koꞌi hampȳk kahato. Mesūwat yi hawopy weig̃neꞌen haria wo. Miꞌi hap puo pyi heremo torānia nug̃ hat toig̃neꞌen hap. Tupana Ehay toꞌe — Netap koꞌi mītꞌīn tunug̃ maꞌato Torānia Nug̃ Hat ri Tupana e. (Epereu 3:4, TNM) Iraniaꞌīn wemūꞌe kahato haria ipuenti waku kahato mesūwat sehay ete. a

•   Airānia watikuap kahato terān kat pote watoig̃neꞌen hap hawyi kat hamo watoig̃neꞌen. Asuwe aimikuap terān koꞌi tukupteꞌen ne aiwanentup hawe waku pe watukupteꞌen pykai. Miꞌi hap etiat Tupana Ehay henoi airānia watikuap kahato terān Tupana hawyi watimontypot terān miꞌi. Miꞌi hap wyti aikotā̃ hesyꞌat kahato hap ewy. (Mateu 5:3;Iesui Aru E Hap 4:11) Aipyꞌa piat aimikuap terān hap puo pyi heremo Tupana toig̃neꞌen hap. Tupana toig̃neꞌen hawyi ainug̃ meketā̃ pote toikyꞌesat kahato ahepiat tokuap hap.—Mateu 4:4.

•   Tupana Ehay pe hoꞌokup kahato aru e hap koꞌi. Miꞌi koꞌi nimuat kahato pykai teꞌeremoherep yne aikotā̃ Tupana Ehay henoi hap ewy. Miꞌi hap heremo kahato aru e hap koꞌi wyti tūt mīt hesaika poꞌog̃ aikai hat kaipyi.—2 Peteru 1:21.

•   Tupana Ehay wan haria ikuap poꞌog̃ ciência etiat koꞌi iꞌatuetempu piat ieig̃neꞌen haria kai. Kotā̃ e hap. Nimo raꞌyn mītꞌīn teꞌeruwanentup miat koꞌi okpe tote mesūwat yi toig̃neꞌen iꞌatuꞌe. Maꞌato Tupana Ehay toꞌe — Mesūwat yi Tupana tunug̃ ȳt kat roteꞌi e. (Io 26:7, TNM) Iꞌewȳte Tupana Ehay henoi — Mesūwat yi ti iꞌawerepꞌa e. (Isaia 40:22) Iraniaꞌīn teꞌeruwanentup Tupana Ehay wan haria ikuap miꞌi hap etiat Tupana iꞌatumoweꞌeg̃ pote iꞌatuꞌe.

•   Iraniaꞌīn taꞌatupuentiꞌi apo e hap koꞌi etiat iwesat hap koꞌi pote taꞌatupȳwoꞌi Tupana toig̃neꞌen hap ete. Maꞌato Tupana Ehay tiwesat apo e hap koꞌi. Kotā̃ e hap — Tupana woꞌopotkyꞌe hat hawyi hesaika kahato torānia kai toig̃neꞌen pote kat pote asom wahoꞌopot. Kat pote asom mītꞌīn tunug̃ kahato saꞌag̃ koꞌi hawyi — uhereligião kaipyi iꞌatuꞌe.—Titu 1:16.