Ȳtꞌi. Mītꞌīn inug̃ sese iaꞌag̃kap koꞌi Tupana Ehay piat sehay koꞌi papiro hawyi pergaminho hesaikaꞌi rakaria puo pykai taꞌatuꞌywykꞌi sehay koꞌi.

 Wemūꞌe haria ipuenti kahato raꞌyn Tupana Ehay piat iaꞌag̃kap koꞌi potꞌi rakaria. Iraniaꞌīn teꞌeruweupi toꞌope iaꞌag̃kap nug̃ haria taꞌatuꞌaparap sehay koꞌi ete pote. Maꞌato weupi hap koꞌi ȳt kahatoꞌi. Maꞌato wemūꞌe haria ipuenti iraniaꞌīn weupi hap koꞌi iwatoꞌīn nakaria. Iraniaꞌīn taꞌatuꞌywyk kahato sehay koꞌi teꞌeruwepyi iꞌatuwanentup hap koꞌi etiat wan hamo ȳt Tupana wanentup hap koꞌiꞌi etiat. Erehaꞌat o kotā̃ e hap koꞌi.

1.   Kotā̃ e iraniaꞌīn popera koꞌi pe 1 Iuwãu 5:7 tote — Tupana hawyi Sehay Wakuat hawyi Tupana Paꞌãu wentup awy yn tukupteꞌen iꞌatuꞌe. Maꞌato iaꞌag̃kap koꞌi potꞌi poꞌog̃ rakaria pe katꞌi mesūwat sehay. Iaꞌag̃kap nug̃ haria taꞌatupag̃ mesūwat sehay iꞌatuepopera koꞌi pe. a Miꞌi pote korā̃ wuaria Tupana Ehay pe mesūwat sehay koꞌi katꞌi.

2.   Iaꞌag̃kap koꞌi potꞌi poꞌog̃ rakaria pe karānia wo neꞌi Tupana set sese tuwemoherep. Miꞌi pykai korā̃ wuaria Tupana Ehay apuksīt haria taꞌatuhep Tupana set sese iꞌatuepopera kaipyi iꞌewȳte taꞌatuwan Aikaꞌiwat e hap sio Tupana e hap Tupana set wo hamo.

 Korā̃ te wemūꞌe haria ipuenti sese popera piat iaꞌag̃kap koꞌi miꞌi pote ȳt niatpoꞌi taꞌatupuenti miꞌaparap koꞌi hamo. b Teꞌeruwemūꞌe iꞌatumipuenti koꞌi hawyi aikotā̃ meig̃ miꞌi hap aipowȳro watipȳwo poꞌog̃ Tupana Ehay ete hamo.

•   Tupana Ehay Iesui Yian Miat hap etiat wemūꞌe hat William Henry Green e hap het rakat kotā̃ e — Tupana Ehay piat iaꞌag̃kap nug̃ haria taꞌatupotpap nug̃ hampȳk kahato popuo e.

•   Tupana Ehay Iesui putꞌokꞌe hawyi hap etiat wemūꞌe hat Frederick Bruce e hap het rakat kotā̃ e — Korā̃ wuaria mītꞌīn taꞌatupȳwo kahato popera koꞌi nimuaria ete. Maꞌato Tupana Ehay ete taꞌatupȳwo kahatoꞌi. Maꞌato hoꞌokup kahato Tupana Ehay piat iaꞌag̃kap koꞌi. Miꞌi koꞌi aimūꞌe korā̃ te Tupana Ehay piat sehay koꞌi aikotā̃ saꞌawyꞌi wuat ewy e.

•   Sir Frederic Kenyon e hap het rakat kotā̃ e — En hoꞌokup Tupana Ehay pote etipȳwo kuap ewat epopera piat sehay koꞌi nimuat kahato pykai sehay seseria wyti Tupana kaipywiat e.

•   Tupana Ehay piat iaꞌag̃kap nug̃ haria Iesui yian miaria hawyi Iesui putꞌokꞌe hawyi ieig̃neꞌen haria taꞌatuꞌywykꞌi sehay koꞌi saꞌawyꞌi wuaria Tupana mohey haria miꞌaparap koꞌi etiat.  c (Numeru 20:12; 2 Samueu 11:2-4; Karasia 2:11-14) Iꞌewȳte teꞌereꞌiaꞌag̃kap nug̃ iꞌatueywania miꞌaparap koꞌi etiat. (Oseia 4:2; Marakia 2:8, 9; Mateu 23:8, 9; 1 Iuwãu 5:21) Tupana Ehay piat iaꞌag̃kap nug̃ haria iꞌatupotpap hampȳk kahato popuo taꞌatuwan yne. Miꞌi hap heremo iꞌatuepiat Tupana Ehay montypot kahato hap.

•   Iꞌewȳte Tupana Ehay Tupana sese kaipyi pote aikotā̃ me kuapꞌi toiꞌaro mītꞌīn tehay ywyk hamo. d (Isaia 40:8; 1 Peteru 1:24, 25) Tupana tikyꞌesat nimo pyi korā̃ te torānia mītꞌīn tehay mowempāp teꞌeruwepowȳro hamo hap. (1 Kurintiu 10:11) — Yne Tupana e hap miwan miat saꞌawyꞌi wuat toig̃neꞌen aimūꞌe hamo aiꞌarōt hap hep aimoesaika kahato imohey hap ete. — Humanu 15:4.

•   Iesui hawyi topotmūꞌeria taꞌatuhoꞌomūꞌe mītꞌīn popera ahyt Tupana Ehay Iesui Yian Miat hap puo pyi. Miꞌiria taꞌatupȳwo iaꞌag̃kap nug̃ haria taꞌatuꞌywyk hinꞌi sehay koꞌi Tupana Ehay piat. — Iruka 4:16-21; Pot. 17:1-3.