Uwe asom Ieuwa.
Tupana Ehay piat iwesat hap
Ieuwa ti rat Tupana sese toig̃neꞌen. Torānia nug̃ hat wyti miꞌi. (Iesui Aru E Hap 4:11) Tupana Ehay moherep haria Aparãu hawyi Muisei taꞌatumontypot Ieuwa iꞌewȳte Iesui wy. (Ienesi 24:27; Esutu 15:1, 2; Iuwãu 20:17) Miꞌi toig̃neꞌen Tupana sese ȳt wentup ywania sese yn hamoꞌi maꞌato yne mesūwat yi wato hap oktān. — Saumu 47:2.
Tupana Ehay henoi Tupana set sese wentup ok takat Ieuwa yn e. (Esutu 3:15; 6:6) Sehay Ieuwa e hap hebraico pusu puo aikotā̃ tuwenug̃ yne kuap tomikyꞌesat koꞌi wo e hap ewy miotā̃ iꞌatuꞌe wemūꞌe kahato haria. Mesūwat sehay hampȳk kahato kat pote Ieuwa wyti torānia kat koꞌi saꞌawynug̃ hat hawyi tutunug̃ yne tomikyꞌesat koꞌi ewy. (Isaia 55:10, 11) Iꞌewȳte Tupana Ehay aipowȳro watikuap Ieuwa hawyi towat wakuat woꞌokyꞌe hap etiat wy. — Esutu 34:5-7; Iruka 6:35; 1 Iuwãu 4:8.
Hebraico pusu puo mītꞌīn taꞌatuwan Tupana set meketā̃ יהוה (aipusu puo mesūwat sehay watiwan YHWH e hap). Meketā̃ taꞌatuwan hap wyti Tetragrama e hap. Miꞌi hawyi wemūꞌe haria taꞌatuporerokosap mesūwat sehay aipusu puo hamo kotā̃ taꞌatuꞌe Ieuwa e hap. Korā̃ ȳt watikuapꞌi aikotā̃ iuteuria taꞌatuhuꞌat Tupana set iꞌatupusu potꞌi puo. Watipuenti kuap Tupana set Ieuwa e hap popera Tupana Ehay Satere Mawe Pusu Puo 2017 piat minug̃ hawe. a
Kat pote asom ȳt watikuapꞌi aikotā̃ me hebraico potꞌi rakat puo Tupana set suꞌat hap.
Hebraico pusu potꞌi rakat puo mītꞌīn taꞌatuwan sehay koꞌi senug̃ha koꞌi wȳwoꞌi. Maꞌato hebraico pusu suꞌat haria taꞌatumowempāp turān taꞌatukuap aikowan senug̃ha koꞌi waku taꞌatuhuꞌat. Maꞌato Tupana Ehay wan haria taꞌatuwan kahu miwan ahyt koꞌi hebraico pusu puo hawyi (miꞌi koꞌi wyti Tupana Ehay Iesui Yian miat) iuteuria teꞌeruwanentup saꞌag̃ Tupana set sese suꞌat hap ete. Miꞌi pote karāmpe teꞌeruwẽpowat Tupana Ehay turān taꞌatuꞌywyk Tupana set sese Tupana e hap upi. Kurin upi kurin upi iꞌatuminug̃ tuwehytpok miꞌi pote mītꞌīn hotꞌokꞌeꞌi poꞌog̃ Tupana set sese suꞌat hap. b
Iraniaꞌīn wemūꞌe haria wanentup hawe iuteuria taꞌatuhuꞌat Tupana set Yahweh iꞌatuꞌe. Maꞌato iraniaꞌīn teꞌeruwanentup tuweupi. Kotā̃ e hap. Miwan weꞌokpoꞌi Rolo do Mar Morto e hap puo Tupana set Iao e. Iraniaꞌīn Grego pusu potꞌi rakat wan haria Iae sio Iabeʹ sio Iaoueʹ iꞌatuꞌe. Maꞌato neig̃ watikuap aikotā̃ me iuteuria taꞌahuꞌat Tupana set sese. c
Mītꞌīn eso hap koꞌi Tupana set etiat
Heso hap. Nimuat miwan ahyt koꞌi pe ȳt tuwemoherepꞌi Ieuwa e hap.
Sehay pȳwo piat. Tehay puo pyi Tupana timoherep toset 7 miu wo sio poꞌog̃. d Maꞌato iraniaꞌīn mītꞌīn taꞌatuhep Ieuwa e hap Tupana Ehay pyi hawyi taꞌatuwan Tupana e hap sio Aikaꞌiwat e hap.
Heso hap. Ȳt kat hamoꞌi Tupana tipehik toset.
Sehay pȳwo piat. Tupana Paꞌãu puo pyi Tupana tiporereto ihaig̃niaꞌīn taꞌatuwan het tehay pe hamo hawyi toset suꞌat sese hap Tupana tikyꞌesat mītꞌīn piat hap (Isaia 42:8; Iueu 2:32; Marakia 3:16; Humanu 10:13) Ieuwa ipyꞌahak kahato temītꞌīn moꞌakag̃ꞌia haria ete. Miꞌiria taꞌatumoꞌakag̃ꞌia temītꞌīn waure wo tukupteꞌen hamo Tupana set sese kai. — Ieremia 23:27.
Heso hap. Aikotā̃ iuteuria minug̃ ewy waku watihep Ieuwa e hap Tupana Ehay pyi.
Sehay pȳwo piat. Iraniaꞌīn iuteuria wan haria taꞌatuhuꞌat hinꞌi Tupana set. Miꞌi pykai wen ȳt taꞌatuhepꞌi Tupana set Tupana Ehay iaꞌag̃kap iꞌatuminug̃ wuat kaipyi. Ieuwa ȳt tikyesatꞌi watunug̃ aikotā̃ mītꞌīn eko saꞌag̃ ewy. — Mateu 15:1-3.
Heso hap. Ȳt watikuapꞌi aikotā̃ me iuteuria piat Tupana set sese suꞌat hap pote ȳt kat hamoꞌi Tupana set tuwemoherep Tupana Ehay pe.
Sehay pȳwo piat. Miotā̃ e haria teꞌeruwanentup hawe wuatꞌi pusu suꞌat haria taꞌatuhuꞌat Tupana set sese toꞌoꞌewy iꞌatuꞌe. Maꞌato Tupana Ehay henoi nimo kahato raꞌyn Tupana montypot haria wuatꞌi ywaniaria taꞌatuhuꞌat mītꞌīn set koꞌi teꞌeruweupi.
Kotā̃ e hap. Isareu piat akag̃ Iusue e hap het rakat etiat. Saꞌawyꞌi wuaria Iesui mohey haria taꞌatuhuꞌat Iusue set Yehohshuʹaʽ iꞌatuꞌe. Maꞌato grego suꞌat haria Iesousʹ iꞌatuꞌe. Tupana Ehay pe hoꞌokup Iusue set hebraico hawyi grego pusu koꞌi puo. Miꞌi hap timoherep Iesui mohey haria taꞌatuhuꞌat mītꞌīn het koꞌi iꞌatupusu puo. — Iesui Potmūꞌeria 7:45; Epereu 4:8.
Miꞌi hap ewy Tupana set suꞌat hamo. Neig̃ watikuap aikotā̃ saꞌawyꞌi wuaria Tupana mohey haria taꞌatuhuꞌat Tupana set pykai waku Tupana set sese tuwemoherep tehay pe aikotā̃ tomikyꞌesat oktān ewy.
a Popera Tupana Ehay Satere Mawe pusu puo 2017 piat minug̃ hawe mītꞌīn taꞌatuporerokosap Tupana set IEUWA e hap taꞌatuwan. Miꞌi hap ewy tuwemoherep iraniaꞌīn pusu puo. Kotā̃ e hap. Anu 1530 pe William Tyndale toiꞌapuksīt Tupana Ehay inglês pusu puo. Hepopera pe toiwan Iehouah e hap Tupana set wo hamo. Mōtꞌi kahato hawyi mītꞌīn taꞌatuꞌywyk aikotā̃ taꞌatuwan hap miꞌi pote taꞌatuꞌywyk aikotā̃ taꞌatuwan Tupana set hap wy.
b Popera Nova Enciclopédia Católica e hap Typuatꞌi minug̃ Volume 14 página 883 hawyi 884 pe kotā̃ e — Isareu ywania tuwẽtem Esitu tote pyi hawyi ȳt taꞌatuhuꞌatꞌi poꞌog̃ Ieuwa e hap maꞌato ADONAI iꞌatuꞌe iꞌewȳte ELOHIM iꞌatuꞌe e popera pe.
c Etikuap terān poꞌog̃ pote erehaꞌat o Apêndice A4 O nome divino nas Escrituras Hebraicas e hap kape popera Tradução do Novo Mundo das Escrituras Sagradas português pusu puo hawe.
d Erehaꞌat o popera Léxico Teológico do Velho Testamento e hap Typuatꞌi minug̃ página 523 hawyi 524 kape.
Etimowempāp kuap poꞌog̃
POPERA A SENTINELA E HAP
Uwe asom Tupana.
Watikuap Tupana etiat hap puo pyi yn iwyꞌok wo watoig̃neꞌen kuap. Aikotā̃ meig̃ miꞌi hap watunug̃ kuap.
TUPANA EHAY PIAT WEMŪꞌE HAP KOꞌI
Eremūꞌe o uruwȳwo
Eremūꞌe Tupana Ehay etiat wemūꞌe hat wȳwo kat saꞌupꞌi.