Kja nu kjɇɇ 2022, kja texe ne Xoñijomꞹ nu merio ke o sʼodʼꞹji yo xundaro bo ngeji 2,24 billones de dólares. Texeyo o kjogꞹ ma Rusia o tsjapꞹ chu̱ʼu̱ a Ucrania. Kja nu zana abril nu kjɇɇ 2023 nu informe ke go dyopjꞹ nu SIPRI, nu Stockholm International Peace Research Institute (Instituto Internacional de Estudios para la Paz de Estocolmo), mama kʼo o kjogꞹ kja nu kjɇɇ 2022:

•   Kja Europa nu merio ke o sʼodʼꞹji yo xundaro nu kjɇɇ 2023 xe o jñusꞹji nu 13%. Kʼe kjɇɇ nge kʼo mazi go sʼodʼꞹji merio yo xundaro a Europa nzikja go sʼodʼꞹji kja nu Guerra Fría.

•   “Kʼo merio ke go sʼodʼꞹji a Rusia xe o jñusꞹji 9,2 %”. Ngekʼua Rusia dya kja ngeje nu quinto país kja texe ne Xoñijomꞹ kʼꞹ mazi sʼodʼꞹ merio ma kjaa chu̱ʼu̱, nudya ngeje nu tercero.

•   Estados Unidos ngeje nu otrʼꞹ país kʼꞹ mazi sʼodʼꞹ merio ma tsʼaa chu̱ʼu̱: “de texe yo merio ke sʼodʼꞹ yo xundaro kja texe ne Xoñijomꞹ, kja Estados Unidos sʼodʼꞹji nu 39%”.

 “Nange yo trʼajñiñi sʼodʼꞹji merio ngekʼua ra dyⱥtrʼⱥji ko yo ra pjatrʼꞹji yo ntee ma ra chu̱ji, yo ntee yo padya me søxiji pje ra kjogꞹ yo paa yo ba e̱je̱”, nge kʼo go mama nu doctor Nain Tian, coautor de nu infome nu SIPRI.

 Ne Biblia ya bi mama ke yo potencia mundial ro chu̱ji yo padya. Pe xo xitskøji ja rga ka̱rgøji na joo.

•   Ne Biblia mama ke ri ka̱rgøji kja yo paa yo ni nguarꞹ (Daniel 8:19).

•   Kja nu libro de Daniel ju̱sʼꞹ ke yo paa yo ri ka̱rgøjidya yo potencia mundial ro potka ꞹmbꞹji. Nujyo potencia ro potka “jyombʼꞹji chu̱ʼu̱”, ro chu̱ji kjo nge kʼꞹ nda ma zɇzhi. Ñe ma ro chu̱ji ro sʼodʼꞹji na punkjꞹ yo o “tesoro”, kʼꞹ ngeje nu merio (Daniel 11:40, 42, 43).

 Ma xi gi nee ri pa̱ra̱ ja ga kjaa ne profecía ke mama ne Biblia, jñanrra ne video: Ja ba zⱥdʼⱥ kʼo nⱥdʼⱥ kja Daniel 11.

•   Ne Biblia mama ke e Mizhokjimi ra kjuatꞹ nrrexe yo gobierno ngekʼua dya kja ra mandaji kja ne Xoñijomꞹ. “E Mizhokjimi ajensʼe ra ñʼesʼe naja kʼꞹ ra manda kja o reino, dya ra nguarꞹ rga manda. Kʼe reino ra chjotꞹ texe kʼo dyaja reino. Dya kjo xe ra bʼꞹbʼꞹ kʼꞹ ra manda, ngextrjo o reino Mizhokjimi ra manda” (Daniel 2:44).

•   Dya kja ra mezhe nu paa ma e Jehová a ra tsjaa ke ra ka̱rgøji na joo, yo ntee dya søø ra tsjajikʼo. ¿Ja ra tsjayo? Ko o Reino, ke ngeje na gobierno a jensʼe ra chjotꞹ texe yo na sʼonte ñe ra juatrʼꞹ trjexe yo arma (Salmo 46:8, 9).

 Ma sido gi nee ri pa̱ra̱ pje ra tsjaa o Reino Mizhokjimi xørꞹ ne artículo “El Reino de Dios traerá ‘paz en abundancia’”.