Ra xⱥkⱥji e Jesús. . .
RA JUENTSʼEJI
E Jesús dya mi pɇsʼi nzhubꞹ, ngekʼua dya o supjre trʼexe yo nrrumꞹ yo ri kjogꞹji yo ntrʼee. Angeze me ma jonrre, ngekʼua me mi pjøsʼꞹ yo ntee ko trʼexe o mꞹbʼꞹ. Dya ngextjo go unꞹ kʼo mi jyodʼꞹji, angeze xi go nee go mba̱ra̱ pje xi mi bʼɇtspiji. Go tsjaakʼo, nangeje me mi juentsʼe trʼexe kʼo ntrʼee. Søø ra pjechiji kʼo xo go tsjaa e Jesús kja yo capítulo 32, 37, 57 i 99.
RA KJAPꞸJI NGUENDA NRREXE YO NTEE
Trexe kʼo trʹee—kʼo trʼii, kʼo xutrʼi i kʼo lande—mi søji na joo ma mi ñaji ko e Jesús nangeje angeze me mi kjapꞹ nguenda i dya mi nzhese. Ma go jñanrraji e Jesús, ke texe mi kjapꞹ nguenda yo ntrʼee, me mi zøji na joo i mi neeji ro chɇzhiji ko angeze. Ra janrraji ja ma kjapꞹ nguenda nrrexe kʼo ntee kja yo capítulo 25, 27 i 95.
PAMA PAMA RA OTꞸJI MIZHOKJIMI
E Jesús pama pama mi otꞹ e Yose ko trexe o mꞹbʼꞹ, ma mi bʼꞹbʼꞹtsjeje i xo ñe ma mi matrʼꞹji Kjimi. Memi zopjꞹ e Jehová, i dya ngextjo ma mi ñona. Ma mi kjaa oración e Jesús, me mi unꞹ pøjø nu Tata, i ñe me mi otꞹ ke ro mbøsꞹ ma pje kʼo ro tsjaa. Ra nuji kʼo go kjogꞹ kja yo capítulo 24, 34, 91, 122 i 123.
OTRʼꞸ RA PJØSʼꞸJI YO DYAJA
Go bʼꞹbʼꞹ ja nzi paa ke e Jesús mi nee ro soya, ma go unꞹ nguenda ke mi bʼꞹbʼꞹ kʼo mi jyodʼꞹ ro mbøsʼꞹ dya go soya. Dya mi otrʼꞹ mi kjaa kʼo mi nee. Ngekʼua yo ri ⱥtⱥji Kjimi xo ra kjaajiakjanu. Ra nuji ne cualidad kja yo capítulo 19, 41 i 52.
RA PERDONAOJI YO DYAJA
E Jesús dya ngextjo o jizhi ke ra perdonaojiyo trʹee, angeze xo go tsjaa ga akjanu ko kʼo in discípulo i ñeje ko kʼo dyaja ntee. Ra nuji jaba tsjaayo, kja yo capítulo 26, 40, 64, 85 i 131.
RA PɆPIJI E YOSE KO TEXE IN MꞸBʼꞸJI
Ne Biblia mama kʼo profecía ke ro kjogꞹ, nzakja ke na punkjꞹ yo Judío dya ro neeji e Jesús, i kʼo me mi ꞹnbꞹji ro mbotrʼꞹji. Zøje gua kjogꞹ akjanu e Jesús bo pɇpji na punkjꞹ, go jichi nrra na punkjꞹ ntee kʼo mama ne Jñakjimi. Akjanu jitsʼkoji kʼo ra kjaaji ma ri kjogꞹji na punkjꞹ nrrumꞹ. Ra kjijñiji kʼo mama yo capítulo 16, 72 i 103.
DYA RA KJAPꞸJI NRRA NA NOZGOJI
E Jesús dya mi pɇsʼi nzhubꞹ nzakjazgoji, me ma jonte, me mi pjechi na punkjꞹ, me mi pa̱ra̱ e Yose, ni ri dʼa ntee søø ra chenjui ja ma kjaa angeze, zø je ma kjanu dya mi nzhese, me mi pjøsʼꞹ texe kʼo ntee. Søø ra pjechiji kʼo go tsjaa e Jesús kja yo capítulo 10, 62, 66, 94 i 116.
DYA TSʼI RI ꞸDʼꞸ
Ma kʼo apóstole ñe kʼo dyaja trʹee dya mi kjaji kʼo a bi jizhi e Jesús, angeze dya mi ꞹdʼꞹ dabadiji. E Jesús mi yepe mi jichi kʼo dya mi meyaji, ngekʼua akjanu ro søø ro chɇzhiji a jmii e Jehová. Ra nuji jagua tsjaakʼo e Jesús kja yo capítulo 74, 98, 118 ñe 135.
