XØRꞸ 8
E Josías o juajnꞹ na joo kjo ro joji
¿Søø ra kjagoji kʼo nee e Jehová?... Na punkjꞹ ntee manji ke na sʼɇzhi ra kjaji kʼo mama e Yose, pe ne Biblia mama ke texezꞹji søø ra kjaji kʼua ja ga nee angeze. Ne Biblia mama ke mi jingua mi bʼꞹbʼꞹ na tʼii kʼꞹ mi chju̱u̱ Josías, angeze o tsjaa kʼo mi nee e Jehová. E Josías o juajnꞹ na joo kjo ro joji, nujyo ntee, o mbøsʼꞹji ro tsjaa kʼo na joo. Mo ra xørꞹji pje o tsjaa e Josías ñe kjo mi joji.
Nu jyoo e Josías mi chju̱u̱ Amón, angeze nge kʼꞹ mi manda a Judá. E Amón mi kjaa kʼo na sʼoo, mi xørpꞹ yo tsʼita. Ma go ndu̱u̱ e Amón, kʼo ntee o juajnꞹji e Josías ngekʼua ro manda a Judá. ¿Gi pa̱rge janzi kjɇɇ mi ɇdyi e Josías ma o mbꞹrꞹ o manda a Judá? ¡Jñinchotjo kjɇɇ! ¿O tsjaa kʼo na sʼoo e Josías kʼua ja nzi o tsjaa o jyoo?... Iyo, angeze o tsjaa kʼo na joo.
E Sofonías o xipji yo ntee kʼꞹ dya ma joo kʼꞹ ro xørpꞹji yo tsʼita
Ndeze ma kja mi tsʼitʼi e Josías, angeze mi nee ro tsjaa kʼo mi mama e Jehová. Ngekʼua o jyodʼꞹ kjo mi sʼiyaji e Jehová ngekʼua ro joji. Nujyo ntee o mbøsʼꞹji ngekʼua ro tsjaa kʼo mi nee e Jehová. ¿Kjo nge kʼo mi joji e Josías?
Naja kʼꞹ mi jobi e Josías mi ngeje kʼe profeta Sofonías. Angeze pɇski ro xipji yo ntee kʼo mi ka̱ra̱ a Judá: “Ma ri sido ri xørpꞹji yo tsʼita, ri pɇsʼiji nrrumꞹ”. ¿Pje o tsjaa e Josías ma o dyⱥrⱥ kʼo mi mama e Sofonías? ¿O tsjapꞹ nguenda? Ja̱a̱. E Josías dya mi kjaa nzakja kʼo ntee kʼo mi xørpꞹ yo tsʼita, angeze ngextjo mi matʼꞹ e Jehová.
E Josías xo mi jobi e Jeremías. Nza ga yejebi dya nda mi jyanjui yo kjɇɇ kʼꞹ mi ɇdyibi. Ma mi tʼibi bʼɇchi mi bʼꞹbʼꞹbi. Nzayejebi xo mi potka pjøstebi ngekʼua ro mbɇpibi e Jehová. E Josías ñe e Jeremías me mi jobi na joo, ngekʼua ma o ndu̱u̱ e Josías, e Jeremías o dyopjꞹ na tjo̱jo̱ nu ja mi ñetsʼe ja ma zoʼo.
E Jeremías ñe e Josías mi potka pjøstebi ngekʼua ro mbɇpibi e Jehová
¿Pje jitsʼkoji kʼo o tsjaa e Josías?... Ndeze ma kja mi tsʼitʼi, mi nee ro tsjaa kʼo mi nee e Jehová. Ngekʼua o juajnꞹ na joo kjo ro joji, o jyodʼꞹ yo ntee kʼꞹ mi neji e Jehová. Natsʼkʼe, ¿i nee ri tsjaa kʼo nee e Jehová? Ma i nee ri tsjage kʼo nee angeze, ri jyodʼꞹge ntee kʼo sʼiya e Jehová ngekʼua ri joji.
