XØRꞸ 2
E Rebeca o mⱥpⱥ o mꞹbʼꞹ e Jehová
E Rebeca me mi nee e Jehová. O xira e Rebeca mi chju̱u̱ Isaac, angeze xo mi nee e Jehová. Kja ne xiskomꞹ ra xørꞹji ja gua mba̱ra̱ e Isaac e Rebeca, xo ra nuji jinga e Jehová o mⱥjⱥ ma o jñanda kʼo o tsjaa e Rebeca.
Nu jyoo [tata] e Isaac mi chju̱u̱ Abrahán. O ñꞹʼꞹ [nana] mi chju̱u̱ Sara. E Abrahán mi nee ke e Isaac ro chjꞹntꞹbi na xuntʼi kʼꞹ ro sʼiya e Jehová. Pe e Abrahán ñe o pjamilia mi ka̱ra̱ji a Canaán. A Canaán mi ka̱ra̱ ntee kʼꞹ dya mi matʼꞹji e Tsʼita jensʼe Jehová. E Abrahán mi pa̱ra̱kʼo, ngekʼua o ndⱥjⱥ naja o mbɇpji (bʼꞹma o ndⱥjⱥ e Eliezer) ro maa kja nu jñiñi a Harán. ¿Jinga e Abrahán o ndⱥjⱥnu o mbɇpjinte? Kja nu jñiñi a Harán mi ka̱ra̱ o pjamilia e Abrahán. Nujnu, e Eliezer mi søø ro chøtʼꞹ na xuntʼi kʼꞹ ro chjꞹntꞹbi e Isaac.
E Rebeca o pɇpji na punkjꞹ ngekʼua ro unꞹ ndeje yo camello
E Eliezer ñe kʼo ñaja o mbɇpji e Abrahán o mojikʼua a Harán, go mezheji na punkjꞹ paa ngekʼua ro zⱥtʼⱥjinu. O dyɇdyiji dyechʼa camello kʼꞹ mi tu̱sʼꞹji jñonꞹ ñe na punkjꞹ regalo. Pe ¿pje o tsjaa e Eliezer ngekʼua ro chøtʼꞹ na xuntʼi kʼꞹ ro chjꞹntꞹbi e Isaac? Angeze mi pa̱ra̱ ke yo xuntʼi mi pa øbʼꞹji ndeje kja dʼa meje kʼꞹ mi bʼꞹbʼꞹ kja nu jñiñi. Ngekʼua ma go zⱥtʼⱥji a Harán, o mojikʼua ja mi bʼꞹbʼꞹ nu meje. Nukʼua o dyøtꞹ e Jehová o xipji: “Ra zopjꞹ naja xuntʼi ra øtꞹ ra dyakꞹ chʼike ndeje. Ma angeze ra dyakꞹ ndeje ñe ma xo ra unꞹ ndeje yo camello, ra unkʼo nguenda ngeje nu xuntʼi kʼꞹ i juajnꞹ ra chjꞹntꞹbi e Isaac”.
Dʼango o zⱥtʼⱥ e Rebeca kja kʼe meje nu ja mi bʼꞹbʼꞹ e Eliezer. Ne Biblia mama ke e Rebeca mi ma joo a jmii. Kjanu e Eliezer o dyøtꞹ ndeje, o ndꞹrꞹkʼua e Rebeca: “Ja̱a̱, na jotjo ra dakʼꞹ ndeje, xo ra ungo ndeje in camello”. E Rebeca o dyøbʼꞹ na punkjꞹ ndeje kja meje nange yo camello siji na punkjꞹ ndeje. ¡E Rebeca o pɇpji na punkjꞹ! ¿Søø ri jñanda pje na kjaa e Rebeca?... Me go ngentrjo e Eliezer ma o jñanda ja ma pɇpji e Rebeca. ¡E Eliezer o unꞹ nguenda ke e Jehová go mbøsʼꞹ ngekʼua ro chøtʼꞹ kʼe xuntʼi!
E Eliezer o unꞹ yo regalo e Rebeca. Nukʼua e Rebeca o xipji e Eliezer ñe kʼo mi dyoji ro moji kja o ngumꞹ ja mi ka̱ra̱ o pjamilia. Ma o zⱥtʼⱥjinu, e Eliezer o xipji o pjamilia e Rebeca pjekja mi bʼꞹbʼꞹnu, xo o xipji kʼꞹ e Abrahán nge kʼꞹ bi ndⱥjⱥ angeze ro maa a Harán. Xo o xipji pje go kjogꞹ ma o dyøtꞹ e Jehová ngekʼua ro mbøsʼꞹ ro chøtʼꞹ naja xuntʼi kʼꞹ ro chjꞹntꞹbi e Isaac. Ma o dyⱥrⱥji kʼo bi mama e Eliezer, texe o pjamilia e Rebeca me ko mⱥjⱥji. O xipjiji e Eliezer: “Na jotrjoma, e Rebeca søø ra chjꞹntꞹbi e Isaac”.
E Rebeca o maa a Canaán ko e Eliezer, o ma chjꞹntꞹbi e Isaac
Pe ¿pje nge kʼo mi mbeñe e Rebeca? ¿Mi nee ro chjꞹntꞹbi e Isaac? ¿Pje i mange?... Ma o dyønꞹji e Rebeca ma mi nee ro chjꞹntꞹbi e Isaac, angeze o mama: Ja̱a̱, ri nego. ¿Jinga? E Rebeca mi pa̱ra̱ ke e Jehová mi nge kʼꞹ bi ndⱥjⱥnu e Eliezer. Ngekʼua o maa ko angeze o nzhogꞹji a Canaán. Ma go zⱥtʼⱥji a Canaán e Rebeca o chjꞹntꞹbi e Isaac.
E Rebeca o tsjaa kʼo mi nee e Jehová, o dyⱥtⱥ angeze. Ngekʼua e Jehová o mbørꞹ texe yo paa ke go mimi. Dya ngextrjokʼo: angeze o mboxnita e Jesús. Ma xo ri dyⱥtⱥge texe kʼo mama e Jehová, angeze ra mbøxkʼꞹ kʼua ja ba mbøsʼꞹ e Rebeca. Ñe ma xo ri tsjage kʼo na joo e Jehová me ra mⱥjⱥ.
