Ndeze ma kja mi tsʼitʼi e Samuel mi pɇpji kja nu tabernáculo, xo ma mimi bʼɇxtjonu. Kja kʼe tabernáculo nge nu ja mi paa kʼo ntee mi pa matrʼꞹji e Jehová. ¿Gi nee ri pa̱rge jinga o ma mimi bʼɇxtjonu e Samuel? Mo ra xørꞹji kʼo mamaba ngekʼua ra pa̱ra̱ji pje o kjogꞹ, pe otrʼꞹ ra nuji kjo mi ngeje o ñꞹʼꞹ e Samuel. O ñꞹʼꞹ mi chju̱u̱ Ana.

E Ana mi nee ro ñʼeje na tsʼitʼi, pe dya mi muxtʼi. Ngekʼua dʼa nu paa o dyøtꞹ e Jehová ba xipji: “Mizhokjimi Jehová, pjøxkꞹgo”. Xo go xipji: “Ma ri pjøxkꞹgo ra musʼꞹ na tsʼitʼi, ra tⱥjⱥ ra ma pɇpji kja nu tabernáculo xo ra ma mimi bʼɇxtjonu”. E Jehová o dyⱥtⱥ kʼo bi mama e Ana, o mbøsʼꞹ ngekʼua ro musʼꞹ na tsʼilele. E Ana o jñuspʼꞹ Samuel o tsʼilele. Ma e Samuel mi ɇdyi jñii o nziyo kjɇɇ, e Ana o zidyi kja kʼe tabernáculo ngekʼua ro mbɇpi e Mizhokjimi. E Ana o tsjaa kʼua ja nzi ba xipji e Jehová.

Nu mbøkjimi mi chju̱u̱ Elí, angeze mi otrʼꞹ axojñi kja kʼe tabernáculo. E Elí mi ñʼeje yeje trʼatʼi, angezebi xo mi pɇpjibi kja nu tabernáculo. Nu kʼo mi pɇpji kja kʼe tabernáculo mi jyodʼꞹ ro pjørꞹji ja rgua mimiji, nangeje ja mi pɇpjiji mi poji yo ntee mi pa matrʼꞹji e Jehová. Pe e Samuel mi janda kʼo ma sʼoo kʼꞹ mi kjabi o tʼii e Elí. ¿E Samuel o tsjaa kʼo ma sʼoo nzakja ko o tʼii e Elí? ¿Pje i mange?... Iyo, e Samuel o tsjaa kʼo mi nee e Jehová, dya o jyɇzi o tsjaa kʼo bi jichi o jyote ñe o ñꞹʼꞹ.

Ma o mba̱ra̱ e Elí ke o tʼii mi kjabi kʼo na sʼoo, ¿pje ni mbe kʼo ro tsjaa?... ¡Ja̱a̱! Pɇski ro guɇnchʼi o tʼii, dya kja ro jyɇzi ro pɇpjibi kja nu tabernáculo, pe e Elí dya pje mi xipji yo o trʼii. Ma e Jehová o unꞹ nguenda ke dya pje mi kjaa e Elí, o mbɇkuɇ na punkjꞹ, o mama ro zꞹbʼꞹ e Elí ñe kʼo o tʼii.

Na nu xomꞹ ma ya ma i̱ji̱tjo e Samuel o dyⱥrⱥ kjo mi nⱥmbʼⱥ o trju̱u̱, mi xipji: “¡Samuel!”, mi embe. O nangꞹ e Samuel, dabadiji o maa ja mi bʼꞹbʼꞹ e Elí, pe angeze o xipji e Samuel: “Dya ro matʼkʼꞹ”. Na yeje  ba kjogꞹ akjanu. Kjanu nrro o dyⱥrⱥ e Samuel kjo mi matrʼꞹ, nrro o maa ja mi bʼꞹbʼꞹ e Elí. Nukʼua e Elí o xipji: “Ma nrro ri dyⱥrⱥ kʼꞹ ra matʼkʼꞹ, ri xipji: Ri bꞹnkʼoba Jehová, ri ⱥtkʼⱥ”. Ma e Samuel o tsjaa kʼo bi xipji e Elí, e Jehová o xipji: “Ri xipji e Elí ke ra sꞹbʼꞹgo angeze ñe o pjamilia nange o tsjaji kʼo na sʼoo”. ¿Pje o tsjaa e Samuel? ¿O xipji e Elí kʼo bi mama e Jehová?... Zo mi su̱u̱ e Samuel, o ma xipji e Elí texe kʼo bi mama e Jehová. Ma o kjogꞹ yo paa, e Mizhokjimi o zꞹbʼꞹ e Elí ñe kʼo yeje o tʼii o ndu̱ji.

Nutsʼkoji søø ra kjagoji kʼua ja nzi o tsjaa e Samuel. Zo go jñanda kʼo na sʼoo kʼo mi kjaji kʼo ñaja ntee, angeze o tsjaa kʼo mi nee e Jehová. Natsʼkʼe, ¿xe ri tsjage kʼo mama e Jehová nzakja e Samuel? Ma ri dyⱥtⱥ ñe ri tsjage kʼo mama e Jehová, angeze ra mⱥjⱥ xo ra mⱥjⱥ ni jyoo ñe ni ñꞹʼꞹ.