Jehová nee ke ra pa̱ra̱ji o pjamilia kʼꞹ bʼꞹbʼꞹ ajensʼe. Nzakja yo anxe, ke xo ngeji o “trʼiji Mizhokjimi” (Job 38:7). ¿Pje mama ne Biblia pje kjaji yo anxe? ¿Pjøsʼꞹji yo ntee? ¿Texeji ngeji o pjamilia e Diosi?

1. ¿Kjo ngeji yo anxe?

Ma dya bʼe mi bʼꞹbʼꞹ ne Xoñijomꞹ e Jehová otrʼꞹ o dyⱥtrʼⱥ yo anxe. Nzakja angeze ngeji espíritu ngekʼua dya søø ra janrraji, ñe ka̱ra̱ji ajensʼe (Hebreos 1:​14). Ka̱ra̱ji na punkjꞹ millón yo anxe ñe nrre dʼaja angezeji dya chjenji (Apocalipsis 5:​11). Angezeji “kjaji kʼo mama angeze [Jehová] i ⱥtrʼpⱥji o jñaa” (Salmo 103:​20). Mi jingua, e Jehová bo mbejñe yo anxe ngekʼua ro xipjiji yo ntee kʼo mi nee angeze ñe ro mbøsʼꞹji o jñiñi. Yo padya, yo anxe pjøsʼꞹji yo cristiano yo na kjuana ngekʼua ra chøtrʼꞹji yo ntee yo nee ra mba̱ra̱ji Mizhokjimi.

2. ¿Kjo ngeje e Satanás ñe yo demonio?

Janzi kʼo o anxe e Jehová dya kja bo nee bo dyⱥtⱥji. Kʼꞹ otrʼꞹ o tsjaa akjanu ngeje kʼꞹ “ni chju̱u̱ Satanás kʼꞹ dya joo. Ngeje kʼꞹ ompꞹ texe yo ka̱ra̱ kja ne xoñijomꞹ” (Apocalipsis 12:9). E Satanás mi nee ro manda yo dyaja ngekʼua o dyompꞹ e Adán ñe e Eva, akjanu bo bʼꞹbʼꞹ kjo ro dyⱥtⱥ angeze. Xo bo tsjaa ke janzi anxe dya kja go dyⱥtⱥji Mizhokjimi. Nukʼo anxekʼo ni chju̱ji demonio. E Jehová o pjongꞹ kʼo anxekʼo ajensʼe. O zⱥtʼⱥji kja ne xoñijomꞹ, e Jehová ra chjotꞹyo (xørꞹ Apocalipsis 12:​9, 12).

3. ¿Ja ga dyønkꞹjidya e Satanás ñe yo demonio?

E Satanás ñe yo demonio ompꞹji na punkjꞹ ntee ko ne espiritismo, akjanu ñaji ko angezeji. Nzakja bʼꞹbʼꞹ ntee yo janrraji nu horóscopo, yo paa nuji yo astrólogo, ñe yo ra xiji pje ra kjogꞹ axojñi ñe ma nee ra xiji yo dya pa̱ra̱ji, ñe ra ndispiji ma sødyɇji, ñe poji ko yo sɇrø. Bʼꞹbʼꞹ ntee ke ma sødyeji paa nuji yo sañimɇ ngekʼua ra nrrisʼiji. Ñe bʼꞹbʼꞹ yo xiji ke søø ra ñaji ko yo a ndu̱u̱. Pe e Jehová xitsiji: “Dya ri maa ñuji yo zopjꞹ yo añima ni ri maa dyønꞹji yo manji pje ra kjogꞹ axojñi” (Levítico 19:​31). Nangeje angeze nee ra mbøkꞹji ngekʼua dya pje ra tsjakꞹji e Satanás ñe yo demonio, nangeje angezeji me ꞹmbꞹji e Jehová ñe nee ra tsjakøji kʼo na sʼoo.

 TEXE YO JÑAA KE ME NI MUBI RA PA̱RA̱JI

6. Dya ri su̱u̱ pje ra tsjakʼꞹ e Satanás ñe yo demonio

E Satanás manda yo demonio. Pe yo anxe yo ⱥtⱥji e Diosi, kʼꞹ mandayo nge nu arcángel Miguel je xo ni chju̱u̱ akjanu e Jesús. ¿Me na zɇzhi e Miguel? Xørꞹbi Apocalipsis 12:​7-9 ñe ri chjꞹrꞹbi yo trʼønꞹ yo ba e̱je̱:

• ¿Kjo mazi na zɇzhi: E Miguel ñe o anxe, maxke e Satanás ñe yo demonio?

• ¿Gi kjijñige ke yo ⱥtⱥji e Cristo ra zu̱ji e Satanás ñe yo demonio?

Dya ri su̱ge pje ra tsjakʼꞹ e Satanás ñe yo demonio. Xørꞹbi Santiago 4:7 ñe ri chjꞹrꞹbi ne trʼønꞹ nu ba e̱je̱:

• ¿Pje ri tsjage ngekʼua dya pje ra tsjakʼꞹ e Satanás ñe yo demonio?

 KʼO YA RO NUJI

Yo anxe ke ⱥtⱥji e Diosi pjøxkꞹji. E Satanás ñe yo demonio me ꞹmbʼꞹji e Jehová, kjaji ke yo sɇrø ra dyompꞹ yo ntee.

Pje gi mbeñege

• ¿Pje kjaji yo anxe ngekʼua ra mbøsʼꞹji yo ntee ra mba̱ra̱ji e Jehová?

• ¿Kjo ngeje e Satanás ñe yo demonio?

• ¿Pjenga na joo ri pjøtpꞹ nguenda texe kʼo ni ñeje kja e Satanás ñe yo demonio?