Nzakja ro nuji kja ne xørꞹ 13, e Diosi dya nuu na joo texe yo religión. Pe me mⱥjⱥ ma ri kjaji jango ga nee angeze. ¿Pje ma “religión” nuu na joo o kjo nge “kʼo ix na kjuana matrʼꞹ Mizhokjimi” jango ga nee angeze? (Santiago 1:​27). Ra nuji yo mama ne Biblia.

1. ¿Pje go dyakꞹji e Diosi ngekʼua ra pa̱ra̱ji ja rga matrʼꞹji angeze?

Kja ne Biblia ri tøtrʼꞹji ja ga nee e Diosi kʼꞹ ra matrʼꞹji. E Jesús o xipji e Diosi: “In Jñage jichiji kʼꞹ in nege” (Juan 17:​17). Bʼꞹbʼꞹ religión yo dya jizhiji yo mama ne Biblia, mazi kjaji kʼo kreoji ñe kʼo mama yo ntee. E Jehová nee ke ra ⱥtⱥji texe kʼo xitsiji (xørꞹ Marcos 7:9). Me mⱥjⱥ ma ri køtrʼpꞹji ñiʼi yo xitsiji kja ne Biblia ñe yo konsejo kʼꞹ dʼakꞹji.

2. ¿Ja ga nee e Jehová ke ra matrʼꞹji?

Nge e Jehová kʼꞹ o dyⱥkⱥgøji, ngekʼua ngextrjo angeze ra matrʼꞹji (Apocalipsis 4:​11). Nuyo nee ra mama ke ngextrjo angeze ra sʼiyaji ñe ra matrʼꞹji, dya ra matrʼꞹji yo tsʼita ñe yo tsʼinana (xørꞹ Isaías 42:8).

Ma ri manji ri matrʼꞹji e Jehová ra kjaji “kʼua ja nzi ga nee angeze kʼo na joo” (Romanos 12:1). Nuyo nee ra mama ke ra minji ja ga nee angeze. Nzakja kʼo a chjꞹntꞹ, ma sʼiyaji e Jehová respetao nu xira o nu suu. Xo ra jɇziji kʼo na sʼoo nzakja dya ra sꞹtʼꞹji trju̱sʼꞹ, droga ñe dya ra ti̱ji. a

3. ¿Pjenga ra jmurꞹji ko yo ntee ke ⱥtⱥji e Jehová?

Ma ri jmurꞹji ngoma ngoma søø ra matrʼꞹji e Jehová, “ra matrʼꞹ e Jehová [...] ma ri jmurꞹ” (Salmo 111:​1, 2). Ri kjaji akjanu ma ri to̱ji yo tjo̱jo̱ (xørꞹ Salmo 104:​33). E Jehová me sʼiyazꞹji ngekʼua xitsiji ke ra jmurꞹji, nangeje pa̱ra̱ ke ma ra kjaji akjanu nuyo ra mbøxkꞹji ra minji na joo texe yo paa. Xo ñe ma ri jmurꞹji pjøxkꞹji ra søji na joo ñe xo ri kjaji ke yo dyaja ra zøji na joo.

 TEXE YO JÑAA KE ME NI MUBI RA PA̱RA̱JI

4. Dya na joo ke ra xørpꞹji yo tsʼita

5. Ma ngextrjo e Jehová kʼꞹ ra matrʼꞹji, dya kja ra kjaji yo kjaa yo religión yo dya na kjuana

 6. Ri matrʼꞹji e Diosi ma ri jmurꞹji kja kongregación

Ma ri to̱nji ñe ri unꞹji na jñaa ma ri jmurꞹji ri matrʼꞹji e Jehová, ñe ri potka søji na joo. Xørꞹbi Salmo 22:​22 ñe ri chjꞹrꞹbi yo trʼønꞹ yo ba e̱je̱:

• ¿Ja ga mbøxkʼꞹ yo jñaa ke unꞹji ma ri jmurꞹji?

• ¿Gi nee ri xampja ngekʼua ri unꞹ na jñaa ma ri maa kja reunión?

7. E Jehová me nee ke ra jichiji yo ntee yo ri pa̱ra̱gøji

Ri jyodʼꞹ ja rgi jichi yo ntee yo mama ne Biblia. Xørꞹbi Salmo 9:1 ñe 34:​1, ñe ri chjꞹrꞹbi ne trʼønꞹ nu ba e̱je̱:

• Texe kʼo a bi pjechige kja ne Biblia, ¿pje gi nee ri jichige yo ntee?

 KʼO YA RO NUJI

Me mⱥjⱥ Mizhokjimi ma ngextrjo ri matrʼꞹji angeze, ma ri to̱njo̱ji ñe ri unꞹji na jñaa ma ri jmurꞹji, ñe ma ri jichiji yo ntee yo a ro pjechiji.

Pje gi mbeñege

• ¿Ja ri tøtrʼꞹji ja ga nee e Diosi ke ra matrʼꞹji?

• ¿Pjenga ngextrjo ra matrʼꞹji e Jehová?

• ¿Pjenga ni jyodʼꞹ ra matrʼꞹji e Jehová ko yo ntee ke ⱥtⱥji angeze?