XØRꞸ 16
¿Pje go tsjaa e Jesús ma bo e̱je̱ kja ne Xoñijomꞹ?
Ma yo ntee mbeñeji e Jesús, manji nge na tsʼilele kʼꞹ ni jyodʼꞹ ra mbørꞹji, na profeta kʼꞹ me pa̱ra̱ o na bʼɇzo kʼꞹ ñetse ke a ra ndu̱u̱. ¿Gi kreoge ke ma ra xørꞹji na joo texe kʼo o tsjaa ma go bʼꞹbʼꞹba kja ne Xoñijomꞹ ra søø ra pa̱ra̱ji na joo ja ga nge angeze? Kja ne xørꞹ ra nuji kʼo me na joo kʼo o tsjaa e Jesús ñe ja ga mbøxkʼꞹgeyo.
1. ¿Pje ma bʼɇpji o chɇchpiji e Jesús?
Kʼe bʼɇpji kʼꞹ o chɇchpiji e Jesús ke ro tsjaa, nge ke ro jichi kʼo ntee ke “ni jyodʼꞹ ra dyⱥtⱥji Mizhokjimi, nangeje nge kʼꞹ manda” (xørꞹ Lucas 4:43). Mi jichi kʼo ntee ke e Mizhokjimi ro ñʼeme na reino o gobierno kʼꞹ ra kjuatꞹ texe yo nrrumꞹ ke ri pɇsʼiji. a Jñii kjɇɇ nrre e Jesús dya go jyɇzi go jichiyo a texe kʼo ntee (Mateo 9:35).
2. ¿Pje jitsʼkøji kʼo milagro kʼo o tsjaa e Jesús?
Ne Biblia mama ke e Mizhokjimi o mbøsʼꞹ e Jesús ro “tsjaa kʼo me na nojo” (Hechos 2:22). Nzakja ko o zɇzhi e Mizhokjimi, e Jesús o tsjaa ke ro juɇme na trʼadyebʼe, o uiñi na punkjꞹ ntee, o jokꞹ kʼo mi sødyɇ ñe o xosꞹ kʼo a bi ndu̱ji (Mateo 8:23-27; 14:15-21; Marcos 6:56; Lucas 7:11-17). Ko kʼo milagro kʼo o tsjaa e Jesús ixko ñetse ke bi mbejñe Mizhokjimi. Xo jitsiji ke e Jehová me na zɇzhi, ke ngextrjo angeze søø ra kjuatꞹ texe yo nrrumꞹ yo ri kjogꞹjidya.
3. Kʼua ja ba mimi e Jesús ¿pje jitsʼkøji?
E Jesús mi ⱥtⱥ e Jehová kja texe kʼo mi xipji (xørꞹ Juan 8:29). Dya go jyɇzi go tsjaa kʼe bʼɇpji kʼꞹ bi chɇchpi nu tata zø mi bʼꞹbʼꞹ ntee ke me mi nuji na ꞹꞹ ñe go mbøtrʼꞹji. Nuyo jitsʼkøji ke xo søø ra ⱥtⱥji Mizhokjimi zø ra kjogꞹji nrrumꞹ kʼo me na sʼɇzhi. Akjanu yo ri sꞹtʼꞹji e Jesús søø ra kjaji “ke tju̱rꞹ ja kʼo nzi ba tsjaa” angeze (1 Pedro 2:21).
TEXE YO JÑAA KE ME NI MUBI RA PA̱RA̱JI
Ra nuji ja ma nⱥdʼⱥ e Jesús o Jñaa Mizhokjimi ñe ja ma tsjaa kʼo milagro.
4. E Jesús mi nⱥdʼⱥ kʼo me na joo
E Jesús go nzhodʼꞹ me na je̱e̱ ngekʼua ro maa jichi kʼo ntee o Jñaa Mizhokjimi zø kja kʼo ñʼii nu ja mi kjogꞹ mi jⱥrⱥ xijomꞹ. Xørꞹbi Lucas 8:1 ñe ri chjꞹrꞹbi yo trʼønꞹ yo ba e̱je̱:
-
¿E Jesús ngextrjo mi jizhi nu ja mi ka̱ra̱ na punkjꞹ ntee ngekʼua ro dyⱥrⱥji kʼo mi mama?
-
¿Pje nrre go tsjaa e Jesús ngekʼua ro chøtrʼꞹ kʼo ntee?
E Tsʼitajensʼe bo mama ke kʼe Mesías ro nⱥdʼⱥ kʼo me na joo. Xørꞹbi Isaías 61:1, 2 ñe ri chjꞹrꞹbi yo trʼønꞹ yo ba e̱je̱:
-
¿Ja ba tsjaa e Jesús yo mama ne profecía?
-
¿Gi kjijñige ke yo padya yo ntee xo ni jyodʼꞹ ra dyⱥrⱥji yo jñayo?
5. Kʼo go jizhi e Jesús pjøxkꞹji na punkjꞹ
Dya ngextrjo go nⱥdʼⱥ o Reino Mizhokjimi, e Jesús xo go jitsiji ja rga mimiji. Ra janrraji janzi jñaa kʼo go mama kja nu Sermón del Monte. Xørꞹbi Mateo 6:14, 34 ñe 7:12, ñe ri chjꞹrꞹbi yo trʼønꞹ yo ba e̱je̱:
-
¿Pje ma konsejo go unꞹba e Jesús?
-
¿Gi kjijñige ke yo konsejo søø ra mbøsʼꞹdya yo ntee?
6. E Jesús go tsjaa na punkjꞹ milagro
E Jehová o mbøsʼꞹ e Jesús ngekʼua ro tsjaa na punkjꞹ milagro. Ra nuji dʼaja, xørꞹbi Marcos 5:25-34 ma jiyo jñanrrabi ne VIDEO. Kjanu ri chjꞹrꞹbi yo trʼønꞹ yo ba e̱je̱:
-
Nzakja bi ñuu kja ne video, ¿pje mi kjijñi ne nrrinxu ke mi sødyɇ?
-
Ne milagronu, ¿pje nge kʼo mazi gustatsʼꞹ?
Xørꞹbi Juan 5:36 ñe ri chjꞹrꞹbi ne trʼønꞹ nu ba e̱je̱:
-
Kʼo milagro kʼo go tsjaa e Jesús, ¿pje go ñetse?
¿Mi pa̱rge?
Texe yo ri pa̱ra̱ji ja ma kjaa e Jesús, ja gua mimi ñe pje go tsjaa ma mi bʼꞹbʼꞹ kja ne xoñijomꞹ, ba e̱je̱ kja yo libro yo xiji Evangelios—nzakja Mateo, Marcos, Lucas ñe Juan—ma ra xørꞹjiyo ra tsjakꞹji me ra kentrjoji.
-
MATEO
nge nu otrʼꞹ go dyopjꞹ na yo Evangelio. Nu ja go dyopjꞹ kʼo mi jizhi e Jesús, ñe pje ra tsjaa o Reino Mizhokjimi.
-
MARCOS
ne Evangelio nu go dyopjꞹ dya nrra na nojo. Me na joo texe kʼo go mama.
-
LUCAS
go dyopjꞹ ke me na joo ra kjaji oración ñe ke e Jesús me mi juentse kʼo nrrinxu.
-
JUAN
go dyopjꞹ ja ga nge e Jesús, ba e̱je̱ kʼo go tsjaa ko kʼo mi jobi ñe kʼo dyaja ntee.
BʼꞸBʼꞸ KʼO MANJI: “E Jesús ngextrjo mi nge dʼa bʼɇzo kʼꞹ me ma jonte”.
-
¿Pje gi mange?
KʼO YA RO NUJI
E Jesús o nⱥdʼⱥ o Reino Mizhokjimi, o tsjaa milagros ñe go dyⱥtⱥ e Jehová.
Pje gi mbeñege
-
¿Pje ma bʼɇpji o tsjaa e Jesús ma go mimi kja ne Xoñijomꞹ?
-
¿Pje ri pjechiji ko yo milagro ke o tsjaa e Jesús?
-
Kʼo go jizhi e Jesús, ¿pje jitsʼkøji?
XE SØØ RI PA̱RA̱
¿Pje mi nⱥdʼⱥ e Jesús ma mi jichi kʼo ntee?
“¿Ja ma nuu e Jesús o Reino Mizhokjimi?” (La Atalaya, 1 de octubre de 2014)
Jñanrra pjenga ri manji ke kʼo milagro kʼo o tsjaa e Jesús na kjuana go kjogꞹkʼo.
“Kʼo milagro kʼo o tsjaa e Jesús: ¿pje jitsʼiyo?” (La Atalaya, 15 de julio de 2004)
Xørꞹ ja ba potꞹ o zakꞹ na bʼɇzo ma o pjechi ke e Jesús dya go tsjaa kʼo mi netsʼe.
Jñanrra pje go tsjaa e Jesús ma bo mimi kja ne xoñijomꞹ.
“Ja ba mimi e Jesús kja ne xoñijomꞹ” (Ne Biblia. Traducción del Nuevo Mundo, apéndice A7)
a Kja yo xørꞹ 31 a 33 xi ri pjechi pje nge o Reino Mizhokjimi.
Puede que también le interese
KʼO ME ØNꞸJI
¿Ja ga kjaa ne curso bíblico kʼꞹ unꞹji yo testigo e Jehová?
Kja ne curso interactivo søø ri xørꞹge ne Biblia kʼꞹ gi nege. Dya pje ri tsjontrʼꞹ. Søø ri zojnꞹge kja ne curso texe ni pjamiliage ñe yo ntee yo gi joge.
