XØRꞸ 28
Unꞹge pøjø e Jehová ñe e Jesús kʼo o tsjabi ngekʼua ro ngꞹxkʼꞹ
¿Ja gi søge ma dʼa in jobi tatrʼkʼꞹ kʼo me na joo? Bʼꞹma me gi mⱥjⱥ ñe gi nee ke angeze ra unꞹ nguenda ke me gi nuu na joo kʼo go dyakʼꞹ. E Jehová ñe e Jesús o chatrʼkꞹji kʼo me na joo: o ngontrʼkꞹji in nzhubꞹ. Ra nuji pje ra kjaji ngekʼua ra ñetse ke ri unꞹji pøjø kʼo o tsjabi.
1. ¿Pje ra kjaji ngekʼua ra unꞹji pøjø e Diosi ñe e Cristo kʼo o tsjabi ngekʼua ro ngꞹxkꞹji?
Ne Biblia mama ke kʼo “ra ñenchʼe o mꞹbʼꞹ angeze”—e Jesús—dya ra ndu̱ji, ra bʼꞹbʼꞹtjoji (Juan 3:16). ¿Ja ga ñetse ke ri enchʼeji kja in mꞹbʼꞹji e Jesús? Dya ngextrjo ma ra kreoji angeze, xo ñe ma pje nge kʼo ri negøji ñe kʼo ri kjaji (Santiago 2:17). Texe kʼo ri kjaji ñe kʼo ri manji ñetse ke ri enchʼeji kja in mꞹbʼꞹji e Jesús, akjanu mazi ri joji ko angeze ñe nu Tata Jehová (xørꞹ Juan 14:21).
2. ¿Pje ma paa kʼꞹ me ni mubi søø ra unꞹji pøjø e Jehová ñe e Jesús?
Kʼe xomꞹ ma ro ndu̱u̱ e Jesús bo xipji kʼo o discípulo ja rgua unꞹji pøjø kʼꞹ angeze ro nrru̱u̱ ngekʼua ro ngꞹxkꞹji. O mama ke ra mbeñeji kʼe paa kʼꞹ me ni mubi, ne Biblia mama ke ni chju̱u̱ “la Cena del Señor,” o ra Mbeñeji ma go nrru̱u̱ e Jesús (1 Corintios 11:20). E Jesús bo xipji kʼo apostole ro mbeñeji kʼe pakʼꞹ—akjanu texe yo cristiano yo na kjuana—ro mbeñeji ke e Jesús go nrru̱u̱ akjanu ro søø ro ngꞹxkꞹji. Ngekʼua e Jesús go mama: “Dya ri jyombeñe ri tsjagejinu, ngekʼua ri mbenzgøji” (Lucas 22:19). Ma ri maa kʼe paa ma ri mbeñejme ma go nrru̱u̱ e Jesús ra ñetse ke me gi unꞹ pøjø kʼꞹ angeze ñe e Jehová me sʼiyazꞹji.
TEXE YO JÑAA KE ME NI MUBI RA PA̱RA̱JI
Xi ra nuji pje ra kjaji ngekʼua ra unꞹji pøjø kʼo o tsjabi e Jehová ñe e Jesús. Xo ra nuji pjekja me na joo ra mbeñeji kʼe paa ma go nrru̱u̱ e Cristo.
3. Ma kjo pjøxkꞹji ri nee ra unꞹji pøjø
Mbeñe ke a na tsjꞹnrrkʼꞹtsʼꞹ kja nrreje, ñe o e̱je̱ kjo go nee pjongꞹtsʼꞹ. ¿Rgui jyombeñe dabadiji ja ba mbøxkʼꞹ kʼe ntee? ¿Maxke rgui jyodʼꞹ ja rgui unꞹ pøjø?
Nuzgøji ri tu̱mpꞹji in vida e Jehová. Xørꞹbi 1 Juan 4:8-10 ñe ri chjꞹrꞹbi yo trʼønꞹ yo ba e̱je̱:
-
¿Pjenga me na joo kʼꞹ e Jesús o ndu̱u̱ ngekʼua ro ngꞹxkꞹji?
-
Ma gi kjijñi kʼo o tsjabi e Jehová ñe e Jesús ngekʼua ro ngꞹxkʼꞹge ¿ja gi søge?
¿Pje ra kjaji ngekʼua ra unꞹji pøjø e Jehová ñe e Jesús kʼo o tsjabi ngekʼua ro ngꞹxkꞹji? Xørꞹbi 2 Corintios 5:15 ñe 1 Juan 4:11 xo ñe 5:3. Ma ri kjuarꞹbi ri xørꞹbi nzi dʼa versículo, ri chjꞹrꞹbi ne trʼønꞹ nu ba e̱je̱:
-
¿Ja rga unꞹji pøjø e Jehová ñe e Jesús kʼo o tsjabi ngekʼua ro ngꞹxkꞹji?
4. Ra kjaji ja ba tsjaa e Jesús
Xo ni jyodʼꞹ ra xⱥkⱥji e Jesús. Xørꞹbi 1 Pedro 2:21 ñe ri chjꞹrꞹbi ne trʼønꞹ nu ba e̱je̱:
-
¿Ja rga ñetse ke gi kjage kʼo o tsjaa e Jesús?
E Jesús mi sʼiya o Jñaa e Diosi, mi jichi kʼo ntee yo mama ne Biblia ñe mi pjøsʼꞹji.
5. Ri Mbeñejme kʼe paa ma o nrru̱u̱ e Cristo
Ma gi nee ri pa̱ra̱ pje bo kjogꞹ kʼe otrʼꞹ paa ma e Jesús bo jmurꞹ ko o discípulo ngekʼua ro ñonꞹji, kʼe jñonꞹ kʼꞹ xiji la Cena del Señor, xørꞹbi Lucas 22:14, 19, 20. Kjanu ri chjꞹrꞹbi yo trʼønꞹ yo ba e̱je̱:
-
¿Pje go kjogꞹ kʼe xomꞹ kʼꞹ e Jesús o ñonꞹ ko o discípulo?
-
Ne trjomechʼi ñe ne vino ¿pje mbenzgøji? (Ñubi yo versículo 19 ñe 20).
E Jesús mi nee ke o discípulo tsjɇma tsjɇma ro mbeñeji kʼe paa ke go nrru̱u̱. Ngekʼua yo testigo e Jehová tsjɇma tsjɇma ri jmurꞹjme ngekʼua ra mbeñejme ma go nrru̱u̱, ñe ri kjajme ja ba tsjaa angeze. Ma i nee ri pa̱rge pje ri kjajme kʼe paa ke ri mbeñejme ma go nrru̱u̱ e Jesús, jñanrrabi ne VIDEO. Kjanu ri chjꞹrꞹbi ne trʼønꞹ nu ba e̱je̱:
-
¿Pje ri kjaji kʼe paa ke ri mbeñeji ma go nrru̱u̱ e Jesús?
Nu trjomechʼi ñe nu vino mbenkøji nu cuerpo ñe o kjii e Jesús. Nu trjomechʼi nge nzakja nu kuerpo e Jesús kʼꞹ dya mi pɇsʼi pekado, ke o nrru̱u̱ ngekʼua ro ngꞹxkꞹji. Ñe nu vino nge nzakja o kjii.
BʼꞸBʼꞸ KʼO MANJI: “Ngextrjo ni jyodʼꞹ ri kreo e Jesús akjanu ra salbatsʼꞹ”.
-
¿Ja rga mbøxkʼꞹ yo mama Juan 3:16 ñe Santiago 2:17 ngekʼua ri jichi kʼe ntee ke xi ni jyodʼꞹ pje xi ra kjaji?
KʼO YA RO NUJI
Ri unꞹji pøjø e Jesús ma ri enchʼeji kja in mꞹbʼꞹji kʼo o tsjaa ngekʼua ro ngꞹxkꞹji ñe ma ri jmurꞹji kʼe paa kʼꞹ ri Mbeñeji ma go ndu̱u̱.
Pje gi mbeñege
-
¿Ja ga ñetse ke ri enchʼeji kja in mꞹbʼꞹji e Jesús?
-
¿Gi nee ri unꞹ pøjø e Jehová ñe e Jesús kʼo o tsjabi ngekʼua ro ngꞹxkʼꞹtsʼꞹ? ¿Ja rgi tsjaa?
-
¿Pjenga dya ri jyɇzi ri jmurꞹ kʼe paa kʼꞹ ri Mbeñeji ma go ndu̱u̱ e Jesús?
XE SØØ RI PA̱RA̱
Dyⱥrⱥ pje pjøxkꞹji ra kjaji kʼꞹ ri pa̱ra̱ji ke e Jesús o ndu̱u̱.
Xi ri pjechi pje nge ne fe ñe pje ri tsjaa ngekʼua ra ñetse ke gi pɇsʼi.
“Ra enchʼeji kja in mꞹbʼꞹji ke e Jehová ra tsjaa kʼo mama” (La Atalaya, octubre de 2016)
Ma o mba̱ra̱ na nrrinxu ja ga mbøxkꞹji kʼꞹ e Jesús o nrru̱u̱, nu kʼo o tsjaa ke ro zøʼø na joo. Xørꞹ kʼo mama angeze “Me ri søgø na joo, chjenjui ke ro mimi na yeje ñe dya kja ri søxi”.
“Ja ba mbøsʼꞹji ne Biblia” (La Atalaya, 1 de agosto de 2011)
Jñanrra pjenga dya nrra na punkjꞹ ntee siji nu trjomechʼi ñe nu vino kʼe paa ma ri Mbeñejme ma o nrru̱u̱ e Jesús.
Puede que también le interese
KʼO ME ØNꞸJI
¿Ja ga kjaa ne curso bíblico kʼꞹ unꞹji yo testigo e Jehová?
Kja ne curso interactivo søø ri xørꞹge ne Biblia kʼꞹ gi nege. Dya pje ri tsjontrʼꞹ. Søø ri zojnꞹge kja ne curso texe ni pjamiliage ñe yo ntee yo gi joge.
