¿A nrru̱u̱ dʼa in pjamilia? Ma o kjogꞹtsʼꞹ akjanu bʼꞹma gi nee ri pa̱ra̱ “¿Kjo xe bʼꞹbʼꞹtrjo? ¿Ra sⱥⱥ na paa ke ra janrragø na yeje?”. Kja ne xørꞹ ñe kʼꞹ ba e̱je̱ ra trjꞹrꞹji yo trʼønꞹyo jango ga mama kja ne Biblia.

1. ¿Pje kjogꞹ ma ri tu̱ji?

E Jesús o mama ke ma ri tu̱ji chjenjui ma ri i̱ji̱ ke dya pje ri søji. ¿Pjenga ma ri tu̱ji chjenjui ma ri i̱ji̱? Ma me na jyꞹꞹ o trʼi̱ji̱ dʼa ntee dya pa̱ra̱ kʼo kjogꞹ nu ja bʼꞹbʼꞹ. Ma kjo tu̱u̱ dya ja søʼø na ꞹꞹ ñe dya kja pje supjre. Ne Biblia mama “kʼo ya nrru̱u̱ dya kja pje pa̱ra̱ji” (xørꞹ Eclesiastés 9:5).

2. ¿Ja ga mbøxkꞹji kʼꞹ ra pa̱ra̱ji pje kjogꞹzꞹji ma ri tu̱ji?

Na punkjꞹ ntee su̱ji ra ndu̱ji, xo su̱ji pje ra tsjapꞹji kʼo a nrru̱u̱. Ma kjogꞹtsʼꞹge akjanu, yo mama ne Biblia søø ra mbøxkʼꞹ ri søʼø na joo. E Jesús o mama: “Ma ri pa̱ra̱ji kʼꞹ na kjuana, ra tempkʼeji librema” (Juan 8:​32). Ne Biblia dya mama ke yo ntee ri pɇsʼiji na alma kʼꞹ dya tu̱u̱, jango ga jizhiji yo religión. Ma ri tu̱ji dya kja ri supjreji. Yo a nrru̱u̱ dya kja pje pa̱ra̱ji, dya søø ra tsjakꞹji kʼo na sʼoo. Ngekʼua dya na joo ra xørpꞹji, ra matrʼꞹji, maxke pje nrre ra kjaji ngekʼua dya ra ꞹdʼꞹji.

Bʼꞹbʼꞹ ntee ke kjijñiji ke søø ra ñaji ko yo a ndu̱u̱, nukʼo dya na kjuana. Nzakja a ro nuji, “kʼo ya nrru̱u̱ dya kja pje pa̱ra̱ji”. Yo demonio kjaji ke yo ntee ra kreoji ke ñaji ko yo a ndu̱u̱. Ngekʼua yo ntee ke manji ke ñaji ko yo a ndu̱u̱ na ñaji ko yo demonio. Ma ri pa̱ra̱ji kʼo kjogꞹzꞹji ma ri tu̱ji dya kja søø ra dyonkꞹji yo demonio. E Jehová xitsiji ke dya ra jodʼꞹji ra ñaji ko yo a ndu̱u̱, pa̱ra̱ ke ma ra kjaji akjanu dya ra bʼꞹnji na joo (xørꞹ Deuteronomio 18:​10-12).

3. Yo kjogꞹ ma ri tu̱ji

Kja texe ne xoñijomꞹ na punkjꞹ ntee nʼaño ga kreoji kʼo kjogꞹzꞹji ma ri tu̱ji. Dya texe yo kreoji na kjuana.

• Nu ja gi menzumꞹge ¿pje kreoji ma tu̱u̱ na ntee?

 4. Ma ri pa̱ra̱ji kʼo kjogꞹzꞹji ma ri tu̱ji dya kja ri su̱ji

Ma ri pa̱ra̱ji yo kjogꞹzꞹji ma ri tu̱ji dya kja ri su̱ji pje ra tsjakꞹji yo a nrru̱u̱. Xørꞹbi Eclesiastés 9:​10 ñe ri chjꞹrꞹbi ne trʼønꞹ nu ba e̱je̱:

• Yo a ndu̱u̱, ¿søø ra tsjakꞹji yo dya joo?

Ma ri pa̱ra̱ji yo na kjuana ke jizhi ne Biblia yo kjogꞹzꞹji ma ri tu̱ji, dya kja ri kreoji ke ni jyodʼꞹ ra respetaoji kʼo a nrru̱u̱, maxke pje nrre ra kjapꞹji ngekʼua dya pje ra tsjakꞹji. Xørꞹbi Isaías 8:19 ñe Apocalipsis 4:​11, ñe ri chjꞹrꞹbi ne trʼønꞹ nu ba e̱je̱:

• ¿Ja gi kreoge ke ga zøʼø e Jehová ma kjo matrʼꞹ yo a ndu̱u̱ ñe jodʼꞹ ke angezeji ra mbøsʼꞹji?

5. Kʼꞹ ri pa̱ra̱ji pje kjogꞹzꞹji ma ri tu̱ji kjakꞹji ra søji na joo

Na punkjꞹ ntee jichiji ke ma ra ndu̱ji ra maa supjreji nangeje ra ngontrʼꞹji texe kʼo na sʼoo kʼo go tsjaji ma xi mi bʼꞹnji. Ma ri pa̱ra̱ji ke dya kjo ra supjre ma ri tu̱ji, ni ri ngeje kʼo ntee kʼo o tsjaa kʼo me na sʼoo, kjakꞹji ra søji na joo. Xørꞹbi Romanos 6:7 ñe ri chjꞹrꞹbi ne trʼønꞹ nu ba e̱je̱:

• Jango ga mama ne Biblia, yo a nrru̱u̱ a ngontrʼꞹji texe kʼo na sʼoo kʼo go tsjaji. Nuʼma, ¿i kjijñige ke yo a ndu̱u̱ xi na supjreji ngekʼua ra ngontrʼꞹji kʼo na sʼoo kʼo bo tsjaji ma xi mi bʼꞹnji?

Ma ri pa̱ra̱ji na joo ja ga ngeje e Jehová, dya kja ri kreoji ke angeze kjapꞹ ra supjreji yo a ndu̱u̱. Xørꞹbi Deuteronomio 32:4 ñe 1 Juan 4:8, ñe ri chjꞹrꞹbi yo trʼønꞹ yo ba e̱je̱:

• Nzakja mama yo versículo, ¿na Diosi ke me sʼiyazgøji, ra tsjapꞹ me ra supjre yo a nrru̱u̱?

• ¿Gi kreoge ke kʼꞹ ri pa̱ra̱ji kʼo kjogꞹzꞹji ma ri tu̱ji pjøxkꞹji ra søji na joo? ¿Pjenga?

 KʼO YA RO NUJI

Ma kjo tu̱u̱, kjuarꞹ o vida. Yo a ndu̱u̱ dya kja supjreji ñe dya kja pje søø ra tsjakꞹji.

Pje gi mbeñege

• ¿Pje kjogꞹ ma ri tu̱ji?

• ¿Pjenga dya kja ri su̱ji ma ri pa̱ra̱ji kʼo kjogꞹzꞹji ma ri tu̱ji?

• Ma ri pa̱ra̱ji kʼo kjogꞹzꞹji ma ri tu̱ji ¿ja ga mbøxkꞹji ra søji na joo?