Ma tu̱u̱ na ntee me sichʼi kja in mꞹbʼꞹji. Ngekʼua ne Biblia mama ke ma ri tu̱ji nge nzakja dʼa kʼꞹ me ꞹngꞹzꞹji (1 Corintios 15:26). Kja nu xørꞹ 27, bi pa̱ra̱ ke e Jehová ra ngꞹxkꞹji ngekʼua dya kja ra tu̱ji. ¿Pje ra kjogꞹma ko yo ntee kʼꞹ a ndu̱ji? Kja ne xørꞹ ri pjechi kʼo me na joo kʼo ra tsjaa e Jehová: angeze ra xosꞹ me na punkjꞹ ntee ngekʼua me ra mⱥji rga minji ñe dya kja ra ndu̱ji. ¡Ra yepe ra mimi kʼo a nrru̱u̱! ¿Na kjuana ra kjogꞹkʼo? ¿Ja ra kjogꞹkʼo, ajensʼe maxke kja ne Xoñijomꞹ?

1. ¿Pje ra tsjaa e Jehová ko yo in pjamilia yo a ndu̱u̱?

Jehová me nee ra xosꞹ yo a ndu̱u̱. Na bʼɇzo ke o mimi mi jingua, kʼꞹ mi chju̱u̱ Job mi enchʼe kja o mꞹbʼꞹ ke ma ro nrru̱u̱, e Diosi dya ro jyombeñe ma ro bʼꞹbʼꞹ “kja nu Trʼoʼo” nu ja ro dyøgꞹji. O xipji Mizhokjimi: “Ri matrʼkꞹgø ñe nutsʼkø ra trjꞹntrʼkʼꞹ” (xørꞹ Job 14:​13-15).

2. ¿Pjenga ri pa̱ra̱ji ke kʼo a nrru̱u̱ ra yepe ra mimiji?

Ma e Jesús o mimi kja ne Xoñijomꞹ, e Mizhokjimi o mbøsʼꞹ ro søø ro xosꞹ kʼo a bi nrru̱u̱. Ngekʼua e Jesús o xosꞹ na tsʼixutrʼi kʼꞹ mi ɇdyi 12 kjɇɇ ñe o trʼii na nʼanxu (Marcos 5:​41, 42; Lucas 7:​12-15). Xo e Lázaro kʼꞹ mi jobi e Jesús, o ndu̱u̱. Zø a bi kjogꞹ nziyo paa ke bi ndu̱u̱ ñe bi dyøgꞹji, e Jesús o xosꞹ. Ma o nguarꞹ o dyøtꞹ e Diosi, o mapjꞹ na jensʼe: “¡Nutsʼkʼe Lázaro, pedyege atjii!”. “Nukʼua e Lázaro kʼꞹ ya bi ndu̱u̱ o mbedyekʼua”, ¡ñe go mintrjo na yeje! (Juan 11:​43, 44). ¿Ja gi kjijñige ke go zøʼø o familia ñe kʼo o jobi e Lázaro?

3. ¿Ra yepe ra nangaji in pjamilia kʼꞹ a nrru̱ji?

Ne Biblia mama ke “ra teʼe k’o ya ndu̱u̱” (Hechos 24:15). Kʼo ntee kʼo o xosꞹ e Jesús dya go moji a jensʼe (Juan 3:​13). Angezeji me go mⱥji kʼꞹ nrro go minji na yeje kja ne Xoñijomꞹ. Xo akjanu dya kja ra mezhe kʼꞹ e Jesús ra xosꞹ me na punkjꞹ ntee kʼo a nrru̱u̱ ngekʼua ra minji na yeje kja ne Xoñijomꞹ kʼꞹ me rga zøø. Angeze o mama ke “texeji ra mbesʼeji kʼua ja tʼøgꞹji”—kʼꞹ nee ra mama, texe kʼo mbeñe Mizhokjimi—ra yepe ra minji, xo ra nangaji kʼo ntee kʼo go ndu̱ji zø nudya dya kjo xi mbeñe kjo mi ngeji (Juan 5:​28, 29).

 TEXE YO JÑAA KE ME NI MUBI RA PA̱RA̱JI

4. Kʼo go tsjaa e Jesús ñetse ke søø ra xosꞹ yo a ndu̱u̱

Xi ri pa̱ra̱ pje go tsjaa e Jesús ngekʼua ro mbøsʼꞹ e Lázaro kʼꞹ mi jobi. Xørꞹbi Juan 11:14 ñe 38-​44, ñe ri chjꞹrꞹbi yo trʼønꞹ yo ba e̱je̱:

• ¿Pjenga ri manji ke e Lázaro bʼemi a bi ndu̱u̱? (Jñanrrabi ne versículo 39).

• Ma e Lázaro a bi maa ajensʼe ma go nrru̱u̱, ¿ma joo ke e Jesús nrro ro tsjapꞹ ro nzhogꞹ kja ne Xoñijomꞹ?

Jñanrrabi ne VIDEO.

5. ¡Na punkjꞹ ntee kʼo a nrru̱u̱ nrro ra yepe ra minji!

Xørꞹbi Salmo 37:29 ñe ri chjꞹrꞹbi ne trʼønꞹ nu ba e̱je̱:

• ¿Ja ra minji texe kʼo ntee kʼo ra xosꞹ Mizhokjimi?

E Jesús ra xosꞹ kʼo ntee kʼo mi matrʼꞹji e Jehová; xo ñe na punkjꞹ kʼo dya mi pa̱ra̱ji angeze. Xørꞹbi Hechos 24:15 ñe ri chjꞹrꞹbi ne trʼønꞹ nu ba e̱je̱:

• Ma ra yepe ra mimi yo a ndu̱u̱ ¿kjo gi nee ri jñanrrage?

• ¿Ja ga mbøsʼꞹji ra sɇchiji ñe ra zøji na joo yo o tata e Phelicity kʼꞹ pa̱ra̱ji ke yo a ndu̱u̱ ra minji na yeje?

 KʼO YA RO NUJI

Ne Biblia mama ke me na punkjꞹ yo a nrru̱u̱ ra minji na yeje. Jehová nee ra xosʼꞹ yo a nrru̱u̱, a unꞹ zɇzhi e Jesús ngekʼua ra tsjaa ke ra nangaji yo a nrru̱u̱.

Pje gi mbeñege

• ¿Pjenga ri pa̱ra̱ji ke e Jehová ñe e Jesús me nebi ra xosʼꞹbi yo a nrru̱u̱?

• ¿Ja ra minji texe yo ntee ke ra xosʼꞹ Mizhokjimi: ajensʼe, maxke kja ne Xoñijomꞹ? ¿Pjenga gi kjijñige akjanu?

• ¿Pje nge kʼo pjøxkʼꞹge ri kreo ke yo in pjamilia ke a ndu̱ji ra yepe ra minji?