Nu Reino e Diosi a na mandadya. Dya kja ra mezhe ra tsjaa yo me na joo kja ne Xoñijomꞹ. Jñanrra pje ra tsjaa o Reino e Diosi ñe pje søø ri tsjage ngekʼua ri minkʼe ma ra zⱥdʼⱥ texe yo me na joo.

1. ¿Pje ra tsjaa nu Reino e Diosi ngekʼua ra ka̱ra̱ji na joo kja ne Xoñijomꞹ ñe dya kja ra kjogꞹ yo na sʼoo?

Kja nu guerra kʼꞹ ni chju̱u̱ Armagedón, e Jesús—nu Rey kja o Reino Mizhokjimi—ra chjotꞹ yo na sʼonte ñe yo gobierno kja ne xoñijomꞹ (Apocalipsis 16: ​14, 16). Akjanu ra zⱥdʼⱥ yo mama ne Biblia: “Xe na tsʼinrrajme, yo na sʼonte dya kja ra bʼꞹbʼꞹji” (Salmo 37:​10). Ko o Reino Mizhokjimi, e Jesús ra tsjaa ke ra ka̱ra̱ji na joo kja texe ne Xoñijomꞹ ñe dya kja ra kjogꞹ yo na sʼoo (xørꞹ Isaías 11:4).

2. ¿Ja rga minji ma ra manda o Reino e Tsʼitajensʼe kja ne Xoñijomꞹ?

Ma ra manda o Reino e Tsʼitajensʼe kja ne Xoñijomꞹ, “yo na jonte ra nga̱ra̱ji kja ne xoñijoma, ñe angezeji ra mimiji texe yo paa” (Salmo 37:​29). ¡Tsjijñi ja rga minkʼøji ma texe yo ntee ra tsjaji yo na joo, ra sʼiyaji e Jehová ñe ra sʼiyaji o minteji! Dya kjo ra zødye ñe dya kjo xi ra nrru̱u̱. ¿Eko me na joo ma ra kjogꞹyo?.

3. ¿Pje ra tsjaa o Reino e Diosi ma a ra chjotꞹ yo na sʼonte?

Ma a ra nguarꞹ ra chjotꞹ yo na sʼonte, e Jesús ra manda kja ne Xoñijomꞹ 1.000 kjɇɇ. Kja yo kjɇyo, yo 144.000 ke ra mandaji ko angeze ra mbøxkꞹji ngekʼua dya kja ra pɇsiji pekado. Ma ra nguarꞹ yo 1.000 kjɇɇ, ne Xoñijomꞹ a me rga zøø ñe texe yo ntee me ri to̱jiaji nangeje ⱥtⱥji e Jehová. Nukʼua e Jesús ra nzhopkʼꞹ nu reino kʼꞹ nu Tata, Jehová. Ñe o trju̱u̱ e Mizhokjimi me ra jyatrʼꞹ (Mateo 6:​9, 10). Akjanu texe ra mba̱ra̱ji ke e Jehová me na joo ga manda ñe pjørꞹ yo matrʼꞹ angeze. Nudyakʼua e Jehová ra chjotꞹ e Satanás ñe yo demonio, ñe texe kʼo dya nee ja ga manda angeze (Apocalipsis 20:​7-​10). Texe kʼo me na joo kʼo ra tsjaa o Reino e Diosi dya kja ra nguarꞹ.

 TEXE YO JÑAA KE ME NI MUBI RA PA̱RA̱JI

4. Nu Reino e Palesito ajensʼe ra chjotꞹ yo gobierno kja ne xoñijomꞹ

“Yo bʼɇzo dya mandaji na joo, kjapꞹji ra supjre o minte” (Eclesiastés 8:9). Ko o Reino, e Jehová ra jokꞹ texe yo na sʼoo yo kjaji yo gobierno kja ne xoñijomꞹ.

Xørꞹbi Daniel 2:​44 ñe 2 Tesalonicenses 1:​6-8, ñe ri chjꞹrꞹbi yo trʼønꞹ yo ba e̱je̱:

• ¿Pje ra tsjaa e Jehová ñe nu Trʼii, Jesús, ko yo gobierno yo manda kja ne xoñijomꞹ ñe yo ntee yo ⱥtⱥji?

• Kʼo a gi pa̱rge ja ga nge e Jehová ñe e Jesús ¿ja ga mbøxkʼꞹyo ri unꞹ nguenda ke ma jꞹ̱bi nguenrra na joo ga tsjabi?

5. E Jesús nge na Rey kʼꞹ me na joo

Kʼꞹ nge Rey kja o Reino Mizhokjimi, e Jesús ra mbøsʼꞹ yo ntee ngekʼua ra nga̱ra̱ji me na joo kja ne xoñijomꞹ. Jñanrrabi ne VIDEO ngekʼua ri unꞹ nguenda ke e Jesús nee ra mbøsʼꞹ yo ntee ñe ke e Mizhokjimi o unꞹ zɇzhi ngekʼua ra søø ra tsjayo.

Kʼo o tsjaa e Jesús ma o mimi kja ne Xoñijomꞹ ñetse pje ra tsjaa o Reino Mizhokjimi ma ra manda kja ne Xoñijomꞹ. Jñanda yo mama ne Biblia kʼꞹ ra zⱥdʼⱥ ñe mbeñe, ¿pje nge kʼo gi nee ri ñuge? Xørꞹbi texe yo texto nu ja ba e̱je̱ yo ra tsjaa o Reino Mizhokjimi.

6. Ma ra manda o Reino Mizhokjimi, ra mimiji me na joo

 KʼO YA RO NUJI

Nu Reino e Diosi ra tsjaa texe kʼo me na joo. Ra tsjaa ke nrrexe ne xoñijomꞹ me rga zøø, ke ra nga̱ra̱ ntee kʼo me ra jonteji ñe ra matrʼꞹji e Jehová texe yo paa.

Pje gi mbeñege

• ¿Pje ra tsjaa nu Reino e Diosi ngekʼua texe yo ntee ra respetaoji o trju̱u̱ e Jehová?

• ¿Pjenga ri kreoji ke o Reino e Diosi ra tsjaa kʼo mama ne Biblia?

• Kʼo ra tsjaa o Reino e Diosi, ¿pje nge kʼꞹ mazi gi nee ri jñanrrage?