Mꞹ a gui chjꞹntꞹge, nudya ni suge o ni xirage nge in pjamilia. Zo me gi nege ni tata ñe ni nana, nudya, kʼꞹ me ri ñege nge kʼe ntee kʼꞹ gui chjꞹntkui. Pe ra bʼꞹbʼꞹ ntee kja in pjamiliage kʼꞹ dya ra ngijñiji ga kjanu, dya ra nuji na joo yo i kjage, o dya ra nee ja gi minkʼebi. Pe ma ri xørꞹgebi ne Biblia ri pa̱rgebi pje ri tsjagebi ngekʼua ri sʼiyagebi ñe dya ri chu̱gebi ko in pjamilia.

NE BIBLIA MAMA GA KJABA: “Ri respetaogeji nin tataji ñejni mamaji” (Efesios 6:2). Zo a gi sʼikje ni suge o ni xira, pɇski ri nege ko texe in mꞹbʼꞹ ni tata ñe ni nana, xo pɇski ri respetaogekʼo. Xo ñe ni suge o ni xira pɇski ra mbøsʼꞹ o nana ñe o tata. Ne Biblia mama ke “ma ra sʼiyaji yo nin minteji, dya ra mbidiaji”, ngekʼua dya ri mbɇkuɇ ma ni suge o ni xira ra mama ra ma zengua o tata ñe o nana, o ra ma mbøsʼꞹ (1 Corintios 13:4; Gálatas 5:26).

TSJAGE KʼO MAMABA:

• Dya ri mama: “In pjamiliage dya nezgo” o “In nanage dya nuu na joo yo ri kjago”

• Ja rgui soge ma rgui ngetsʼkʼe ro tsjakʼꞹjikʼo

NE BIBLIA MAMA GA KJABA: “Yo bʼɇzo ra zogꞹ o tata ñe o nana, kjanu ra minkui ko nu suu ngekʼua ra natrjo ntee nza ga yejebi” (Génesis 2:24). Zo a gui chjꞹntꞹge, bʼꞹma ni tata ñe ni nana ra mbeñebi kʼꞹ dya i pa̱rge ja rgi minkʼe ko ni suu o ni xira ñe ra nee ra xitsʼi yo ri tsjage.

Ma ra kjogꞹ ga kjanu, ri ñage ko ni suu o ni xira ri ñubi pje ri xipjibi, pe ma pje ri xipjigebi ni tata ñe ni nana ri jonte rgi ñagebi, dya ri tsjapꞹbi ra mbɇkuɇbi (Proverbios 15:1). Ri mimige na joo ko in pjamiliage ñe ko o pjamilia ni xira o ni suge, dya ri tsjatsjɇ kʼꞹ me na notsʼꞹ, ri tsjage na jonte, ri pɇspʼi paciencia, ri sʼiya (Efesios 4:2).

TSJAGE KʼO MAMABA:

• Ma ri jñanrra ke ni toge o ni nzha̱ʼa̱ ga xipji ni suge o ni xira ja rgi minkui, ri ñagebi na joo ri ñubi pje ri tsjabi pe dya ri chu̱bi

• Ma ni pjamilia nee ra mandatsʼkʼebi, na joo ke ri ñagebi ri nubi pje ri tsjagebi