XØRꞸ 2
Ri sʼiyagebi nrrexe yo paa
“Mizhokjimi ya ñechʼpʼe e bʼɇzo e ndinxu, ngekʼua dya ra xokꞹ e bʼɇzo.” (Mateo 19:6)
E Jehová dya nee ke ri dyompꞹ ni suge o ni xira (Miqueas 6:8). Ngekʼua, xipjige ni suge o ni xira ke me ki nege, akjanu ra mba̱ra̱ kʼꞹ dya ri dyompꞹ zo ja ri nzhodʼꞹ, zo ja ri bʼꞹnkʼe. Ga kjanu mazi ra netsʼege.
Yo padya, na punkjꞹ ntee kʼꞹ ya chjꞹntꞹji dya kjapꞹji nguenda o suu o nu xira. Xørꞹ yo mamaba ngekʼua ri pa̱rge ja rgi minkʼe na joo ko ni suu o ni xira, akjanu dya ri jyambꞹbi.
1 RI JYODʼꞸ NRRAJME NGEKʼUA RI BʼꞸNKʼE KO NI SUGE O NI XIRA
NE BIBLIA MAMA GA KJABA: “Ni jyodʼꞹ kʼꞹ ri juankʼeji nu kʼꞹ xe nda na joo” (Filipenses 1:10, NTD). Nu kʼꞹ xe nda na joo kʼꞹ ri tsjage nge kʼꞹ ri pjørꞹ ni suu o ni xira, ga kjanu ri bʼꞹbʼꞹgebi na joo.
E Jehová nee ra jñantrʼkʼabi kʼꞹ me ri mⱥkjebi rgi minkui, ngekʼua na joo ke ri tsjapꞹge nguenda ni suu o ni xira (Eclesiastés 9:9). E Jehová nee kʼꞹ ri pjørꞹ na joo ni suge o ni xira ñe dya nee ke ri tsjapꞹ ra søxꞹ o mꞹbʼꞹ (1 Corintios 10:24). Xipji ni suge o ni xira ke me ki nege, kʼꞹ dya bʼꞹbʼꞹ na ntee nzakja angeze.
TSJAGE KʼO MAMABA:
-
Zo ra bʼꞹbʼꞹ na punkjꞹ pje ri tsjage, dya ri jyombeñe ni suu o ni xira, ri juajnꞹ na nrrajme kʼꞹ ri ñabi
-
Ma gi mbeñe gi bʼꞹntsjɇ, dya nge ga kjanu, nudya i ñʼekje ni suu o ni xirage
2 PJØNGUENRRA JA RGI TSJIJÑIGE
NE BIBLIA MAMA GA KJABA: “Ma kjo kʼo ra jñanda naja ndinxu y ra ngijñi kja o mꞹbʼꞹ ra tsjabi kʼꞹ na sʼoo, zo dya ra juntabi, chjentkjui kʼꞹ ya ri tsa̱ja̱ o ndinxu, ya tsjaa na sʼoo ko angeze kja o mꞹbʼꞹmakʼꞹ” (Mateo 5:28). Ma ri tsjijñi ri tsjaa kʼo na sʼoo ko dʼa nrrinxu o dʼa bʼɇzo, ixi chjenjui kʼꞹ a gui dyompꞹ ni suge o ni xira kja in mꞹbʼꞹge.
E Jehová mama ke ri pjønguenda ja ga ngijñi in mꞹbʼꞹge (Proverbios 4:23; Jeremías 17:9). Ngekʼua ri pjørꞹge na joo kʼo gi janrra (Mateo 5:29, 30). Tsjage nzakja nu kʼo go tsjaa e Job kʼꞹ go mimi mi jingua, angeze go mama kʼꞹ dya ro jñanrra dyaja nrrinxu ngekʼua ro tsjaa kʼo na sʼoo (Job 31:1). Ngekʼua dya ga joo ke ri jñanrrage yo skuama, kja televisión ñe kja Internet yo ngerga, yo obʼꞹji ga tsjaji kʼo na sʼoo. Dya ri pensa ri tsjaa kʼo na sʼoo ko dʼa nrrinxu kʼꞹ dya nge ni suge, o dʼa bʼɇzo kʼꞹ dya nge ni xira.
TSJAGE KʼO MAMABA:
-
Zo ja ri nzhonkʼe, ri xipji yo ntee dya kja gi dʼatsjɇ, gi sʼikje ni suge o ni xira ñe ke gi nege na punkjꞹ
-
Nutsʼkʼe bʼɇzo, ma ra xitsʼi ni suu dya ri jobi dʼa nrrinxu, ri tsjapꞹ nguenda, xo ñetsʼkʼe ndinxu ri tsjagekʼo
