E Jehová nee ke nrrexe yo ntee ra tsjaji orasion, nee ra dyⱥrⱥ pje ra xipjiji (Salmo 65:2). Pe yo ntee kʼo kjaa kʼo na sʼoo nzakja kʼo bʼɇzo kʼo pⱥrⱥ nu male, e Jehová dya ⱥrⱥ ma pje ra øtꞹji (1 Pedro 3:7). Nzakja mi jingua ma kʼo israelita mi kjaa kʼo ma sʼoo, e Jehová dya mi soʼo na joo ngekʼua ma pje mi øtꞹji dya kja mi kjotrʼpꞹ ñiʼi kʼo mi manji. Xorꞹge kja Isaías 1:15; 55:7.

Jñanrra ne video ¿Escucha Dios todas las oraciones?

Ma ra kjaji orasion ngeje e Jehová kʼꞹ ra zopjꞹ ra øtꞹji (Mateo 4:10; 6:9). Ri xipji e Jehová ra dyⱥtkⱥ por o trʼii e Jesucristo angeze go unꞹ o bida por nutsʼkoji (Juan 14:6). E Jehová dya nee ke ri zopjꞹ kja na xiskuama nu kʼo ri dyøtꞹ, dya xo nee ke ri yepe ri yepe yo jñaa yo ri xipji. Xorꞹge kja Mateo 6:7; Filipenses 4:6, 7.

Ma ri dyøtꞹ Mizhokjimi zo dya ri ñage na jensʼe angeze ra dyⱥtkʼⱥ (1 Samuel 1:12, 13). Ma ra ñonꞹji, ma ra i̱ji̱, ma pje kjogꞹzꞹji kʼo na sʼoo, angeze nee ke ra zopjꞹji ra xipji pje ri kjaji ñe jaga kjaa kʼo ri soji. Ngekʼua dya ri jyɇzi ra kjogꞹ na paa ke dya ri ñaa ko e Jehová. Xorꞹge kja Salmos 55:22; Mateo 15:36.

Nudya na punkjꞹ ntee dya kreoji Mizhokjimi, ma gi xipjiji ke e Mizhokjimi Jehová ra tsjaa ne Xoñijomꞹ me rga zøø dya kreojikʼo, me trjenkʼeji. Bʼꞹma ma gi ⱥrge ga kjanu dya gi soge na joo (2 Timoteo 3:1, 4; 2 Pedro 3:3, 13). Pe ka̱ra̱ ntee kʼo mimi  jaga nee Mizhokjimi, ma i̱ pa̱rge ntee ga kjanu, jyodʼꞹgekʼo ri ñaji ngekʼua xo ri tsjage kʼo na joo jaga tsjaji angezeji. Xorꞹge kja Hebreos 10:24, 25.

Ngekʼua na joo ri mage ja jmurꞹjikʼo, angezeji kjaji kʼo go tsjaa e Jesús. Akjanu xo ri pjechi ri tsjage kʼo na joo jaga nee e Jehová. Xorꞹge kja Romanos 1:11, 12.

Ne Biblia mama pje go tsjaa e Jehová mi jingua, ma ri xorꞹge ri pa̱rge jaga kjaa angeze. Kja ne Biblia e Jehová xitsigoji jaga nee ke ra minji. Jmanchʼa jmanchʼa ri zopjꞹge ne Biblia ñe pama pama dya ri jyombeñe ri tsjage orasion, ga kjanu ri unꞹ nguenrra ke e Jehová me nezgoji, ri unꞹ nguenrra angeze pjechi na punkjꞹ. Xorꞹge kja 1 Timoteo 4:15, 16.

Ma ri tsjage kʼo mama e Mizhokjimi angeze ra mbøxkʼꞹ. Pama pama gi ñonꞹji ngekʼua na zetsʼi xo ga kjanu dya ri jyɇzi ni ri na paa ri zopjꞹ ne Biblia ñe ri tsjijñi jarga mbøxkʼꞹ yo ri xorꞹ. Xorꞹge kja Mateo 4:4; Hebreos 11:1, 6.

E Jehová sʼiyazgoji, pjøxkꞹji ngekʼua ra nuji kʼe paa ma ra tsjaa ne Xoñijomꞹ me rga zøø (Salmo 91:1, 2, 7-10). E Jehová jitsʼkoji pje ra kjaji ngekʼua ra minji na joo, ra pjorꞹji in bida ñe ra mⱥji rga minji. Xorꞹge kja Salmo 73:27, 28; Santiago 4:4, 8.