Nu ja ka̱ra̱ kʼo espíritu go bʼꞹbʼꞹ kʼo dya go nee go dyⱥtⱥji e Mizhokjimi
Ma e Satanas go tsjapꞹ ke dʼa lai ro zopjꞹ e Eva, xo akjanu angeze dya go nee go dyⱥtⱥ e Mizhokjimi
Texe kʼo espíritu o kʼo anxe ke o dyⱥtrʼⱥ e Jehová ma jonteji. Nakʼua dʼa anxe go tsjatsjɇ. Nujnu bo nge e Satanas o Uxua nu Diablo. E Satanas mi nee ke trexe yo tree kʼo bʼꞹnji kja ne Xoñijomꞹ ro sʼiyaji angeze ke nange a e Yose Jehová. Akjanu go kjogꞹkʼo:
Kja kʼe jardín Eden, mi bʼꞹbʼꞹ na punkjꞹ xiza ke mi unꞹji lulu ke me ma kjimi. E Jehová go xipjibi e Adán ñe nu suu e Eva ke mi søø ro sibi texe kʼo lulu kʼo ro nebi. Xo go xipjibi ke mi bʼꞹbʼꞹ dʼa xiza ke dya ro sibi in lulu. Ke ma ro sibi kʼe lulu, ro nrru̱bima (Génesis 2:9, 16, 17.)
Dʼa nu paa ma e Eva mi bʼꞹntsʼɇ dʼa kʼijmi go zopjꞹ. Kʼo na kjuana nge ke dʼa kʼijmi dya søø ra jñaa; bo nge e Uxua ke go tsjapꞹ ke kʼe lai go jñaa. E Satanas go xipji e Eva ke ma ro sii kʼe lulu ke bi xipji e Tsiʼtajensʼe ke dya ro sii, e Uxua go xipji ke ma ro sii ro chjenjui nzakja e Mizhokjimi. Xo go xipji ke dya ro nrru̱bi. Nujyo mi nge yeje mbɇchjine. Zø je ma kjanu e Eva go kreo kʼo go xipji e Uxua i go sii kʼe lulu. I ma go chebi e Adán, bo unꞹ i xo go siikʼꞹ(Génesis 3:1-6.)
Kʼo go kjogꞹ ñetse ke e Stanas dya ⱥtⱥ Kjimi i me na mbuechjine. Go xipji e Eva ke dya ro nrru̱bi ma dya ro tsjapꞹ nguenda e Diosi. Nukʼo dya ma kjuana. E Eva go nrru̱u̱ ñe e Adán. Zø e Stanas dya go nrru̱u̱ma, a ra zⱥdⱥ in paa ma ra nrru̱u̱ nangeje bo tsjaa nzhubꞹ. Nadya ke xi bʼꞹntrjo na ompꞹ yo ntee nangeje nge na mbuechjine i xo kjaapꞹ ke yo ntee dya ra dyⱥtⱥji e Tsʼitajensʼe.(Juan 8:44.)
Xo na punkjꞹ anxe dya go dyⱥtⱥji Kjimi
Dya go mezhe ma go bʼꞹbʼꞹ na punkjꞹ sʼoanxe. Nujyo anxe go nuji ke mi bʼꞹbʼꞹ na punkjꞹ nrrinxꞹ ke me ma jmixtjoji kja ne Xoñijomꞹ i go nee go dyobʼꞹji ko nukʼo. Ngekʼua go mbɇzhiji ntee ke bo ngeji bʼɇzo ngekʼua ro søø ro mimiji kja ne Xoñijomꞹ. I nuʼma go tsjapꞹji o suu kʼo nrrinxꞹ ñe go jñʼeji nrrenxe kʼo go neji. Nujyo dya mi nee e Mizhokjimi kʼo bo tsjaaji.(Génesis 6:1, 2; Jude 6.)
Yo sʼoanxe ke o e̱ji kja ne Xoñijomꞹ go dyobʼꞹji ko kʼo nrrinxꞹ ke o juajnuji
Texeyo go tsjaa ke ro bʼꞹbʼꞹ na punkjꞹ nrrꞹmꞹ kja ne Xoñijomꞹ. O suu yo anxe o musʼꞹji trʼii kʼo me manrraji i me ma sʼonteji. Nujyo mi xiji guema mi potri ntrʼee i pje kʼo nrre mi ponaji. Akjanu kja texe ne Xoñijomꞹ go bʼꞹbʼꞹ na punkjꞹ chuu I me ma sʼonteji, ngekʼua e Jehová go xotrꞹ texekʼo ma go tsjapꞹ go e̱je̱ dʼa trjadyebʼe i go nrru̱u̱ trexe go ma sʼonte i o bʼedyi dya go nrru̱u̱ji.(Génesis 6:4, 11; 7:23.)
Kʼo anxe kʼo bi pezhiji ntee go nzhogꞹji nuja mi ka̱ra̱ji ma mi anxeji; i dya go nrru̱nji. I xo go jñꞹnpꞹji nguendakʼo, e Jehová dya kja go jyɇziji ke ro minji kjo kʼo anxe ke ma jonteji. E Jehová dya kja ro jyɇziji ke ro pjexiji ntee. Ma ra sⱥjⱥ ke paa ma ra ñumpꞹ nguenda texe yo nasʼonte e Jehová xo ra mbøtrʼꞹ texeyo (2 Peter 2:4; Jude 6.
E Uxua mi bʼꞹbʼꞹ ajensʼe i bo pjongꞹjinu
E Uxua ñe ko in sʼoanxe o pjongꞹji a jensʼe
Kja nu kjɇɇ 1914 go bʼꞹbʼꞹ dʼa chu̱ʼu̱ ajensʼe. Kja o jñaa e Mizhokjimi kja nu Revelación mama kʼo go kjogꞹ: “Kjanu o tsjaa kʼua na chu̱ʼu̱ a jensʼe; Miguel [mi nge e Jesús ke ya bi nanga na yeje] ñe kʼo anxe Mizhokjimi kʼo mi dyoji [jontee] o chu̱ji ko kʼe kʼijmi [e Uxua o Satanas]. Me mi chu̱ʼu̱ kʼe kʼijmi ñe kʼo anxe kʼo mi dyoji kʼe kʼijmi [sʼonte]. Pero kʼe kʼijmi ñe kʼo o anxe, dya pje mi søø ro ndo̱jo̱ji. Nukʼua dya kja sⱥjⱥji ro nga̱ra̱ji a jensʼe. Kjanu o pjongꞹji a jensʼe kʼꞹ e kʼijmi kʼꞹ ngeje e trakʼijmi kʼꞹ ya me mezhe. Nukʼꞹ, ni chju̱ʼu̱ Satanas kʼꞹ dya jo. Ngeje kʼꞹ onpꞹ texe yo ka̱ra̱ kja ne Xoñijomꞹ. Nukʼꞹ o pjongꞹji a jensʼe ko texe kʼo o anxe angeze [sʼonte]. O zⱥtʼⱥji kja ne Xoñijomꞹ”.
¿Pje go kjogꞹma? Nu o Jñaa e Yose mama: “Nudya, ¡mⱥjⱥgueji dya, texetsʼꞹgueji in ka̱ra̱ji a jensʼe. Na ngeje ya pjongꞹji a jensʼe e Satanas!”. Yo anxe ke na jonteji mi søø ro mⱥjⱥji nange e Satanas ñe ko sʼoanxe dya kja mi ka̱ra̱ji a jensʼe. nadya ¿pje ro kjogꞹ ko yo ntee ke yo ka̱ra̱ kja nu xoñijoma? O Jñaa e Tsʼitajensʼe mama: “Pero me ra sufrido texe yo ka̱ra̱ kja ne Xoñijomꞹ ñe texe yo ka̱ʼa̱ kja yo ndeje. Na ngeje e Satanas kʼꞹ dya jo ya zøbꞹ a ma kʼua, kʼua ja in ka̱ra̱gueji. Ya me ꞹdꞹ na punkjꞹ na ngeje pa̱ra̱ na jo kʼꞹ dya kja ra mezhe pa kʼꞹ xe sø ra tsja texe kʼo na sʼo, o mama a kjanu kʼꞹ bi ñeje a jensʼe”.(Revelación 12:7-9, 12, Nu O̱ Jña Mizhocjimi nu mama ja ga cja e Jesucristo, ro junsʼꞹ kʼua jaga opjꞹjidya.)
Ja̱a̱, e Uxua ñe yo sʼoanxe me onpꞹji i kjapi kʼo na sʼoo texe yo ntee ke ka̱ra̱ji kja ne Xoñijomꞹ. Nujyo sʼoanxe xo xiji yo demonio. Nujyo dya ⱥtⱥji e Diosi. Me na sʼonteji.