¿Pje kjaa e Uxua ñe texe yo sʼonrrajma me nee ra dyopjꞹji yo ntee? Neeji ke ra ⱥtⱥjiyo, neeji ke ra kreoji in mbuechjineji, i ke ra kjaaji texe kʼo dya nee e Jehová. I pje kʼo nrre kjaapji kʼo ya nrru̱u̱ nzakja yo mbaxkua.

Ma ra nrru̱u̱ i bʼedyiji me sichkiji kja i mꞹbʼꞹji dya ri søji na joo me ti gueji. Xo akjanꞹ e Jesús ma o nrru̱u̱ e Lazaro ke mi jobi, “nukʼua o gueʼe e Jesús”.​(⁠Juan 11:⁠35, Nu O̱ Jña Mizhocjimi nu mama ja ga cja e Jesucristo, ro junsʼꞹ kʼua jaga opjꞹjidya.)

Bʼꞹbʼꞹ yo pje nrre kjapji kʼo ya nrru̱u̱ nrre nʼaño ga kjaaji nzi dʼa ñiñi kja texe ne xoñijomꞹ. Zø bʼꞹbʼꞹ kʼo kjaaji ke nu jñakjimi dya mama ke rga sʼoo. Zø bʼꞹbʼꞹ kʼo dya ga joo ke kjapji yo añima ke nu jñakjimi dya mamakʼo. Nzakja kʼo manji ke yo a nrru̱u̱ xi bʼꞹntrjoji i xi søø ra jñanrraji yo in bʼedyiji ke ka̱ra̱jiba kja ne xoñijomꞹ. Yo velatorio, me gueñeji rga søji i pje kʼo nrre kjapji yo añima I kjaaji texeyo nange su̱ji ke ra ꞹdꞹ nu espíritu de nu añima. Ja ga mama e Yose “kʼo ya nrru̱u̱ dya kja pje pa̱ra̱ji”, yo kjaa texeyo, na kjapꞹji nguenda yo in mbuechjine e Satanas.​(⁠Eclesiastés 9:⁠5.)

Xi bʼꞹbʼꞹ kʼo costumbre ñe kʼo ceremonia ke nrre kjapji yo a nrru̱u̱, nee ra manji ke ni jyodʼꞹ ke ra pjøsʼꞹji yo a nrru̱u̱ i ma jiyo bʼꞹma ra tsjaaki kʼo na sʼoo. Bʼꞹbʼꞹ kʼo país ke kjapji dʼa trjambaxkua i pje nrree potpꞹji i ñe kʼo ofrenda, kjapjiyo 40 paa o dʼa kjɇɇ ma ya nrru̱u̱ kʼe ntee, eñe kjapjiyo ngekʼua ra mbøsꞹ kʼe añima ke ra sⱥtrʼⱥ nuja kⱥrⱥ kʼo espíritu. Kʼo xe nrre kjaaji pⱥspʼⱥji jñonꞹ, pare o kʼo pje nrre mi siji kʼo ya nrru̱u̱.

Texe kʼo kjaaji nge in mbuechjine ke nee e Satanás ke ra tsjapji yo ya nrru̱u̱. ¿Ra nuu na joo e Jehová ma ra kjaaji yo costumbres ke jizhi yo demonio? ¡Jiyo!​(⁠2 Corintios 6:​14-18).

Yo ri ⱥtⱥji Kjimi dya pje kjapji kʼo ya nrru̱u̱, i dya xo ri nee ra kjaaji kʼo nee e Satanas. Kʼo ri kjaaji nge, me ri mⱥji rga pjøsteji yo ntee yo xi bʼꞹntrjo, ngekʼua ra mba̱ra̱ji kʼo nee e Jehová ke ra kjaaji. Ri pa̱ra̱ji ke ma dʼa ntee ra nrru̱u̱ ngextrjo e Jehová søø ra mbøsʼꞹ kʼe ntee.​(⁠Job 14:​14, 15.)

Bʼꞹbʼꞹ tree kʼo ñajitsʼe ko demonio, i bʼꞹbʼꞹ kʼo jodʼꞹji yo brujo, yo sɇrø o yo sañimɇ, ngekʼua ra zopjꞹji yo demonio. Texeyo ngeje nu espiritismo. Nzakja nu vudú, nu brujería, nu magia, nu buenaventura, i ke ra ñaji kʼo yo ya nrru̱u̱, texeyo nge espiritismo.

Ne Biblia mama ke dya ga joyo ma mama: “Dya ri dyoji yo ntee [. . .] yo mama pje ra kjogꞹ axojñi, ni yo kjaa magia, ni yo mama ma ra kjogꞹ kʼo na joo o kʼo na sʼoo, ni yo sɇrø, o yo sañimɇ yo kjapꞹ kʼo na sʼoo yo ntee, ni yo zopjꞹ yo añima. Nangeje Jehová me ꞹmbꞹ yo kjaa akjanu”.​(⁠Deuteronomio 18:​10-12.)

¿Pjekjaa mama e Jehová ke dya ga joo texe yo kjaayo?

Kʼo xitsʼiji ra mbøxkꞹji, e Jehová jitsiji ke texe kʼo pje nrre kjaa kja yo espiritismo. Angeze me sʼiyazꞹji i nee ra mbøsꞹ yo ntee, nange pa̱ra̱ ke texe kʼo kjaa espiritismo ra tsjapꞹji yo na sʼoo yo sʼonrrajma o yo sʼoanxe.

Kʼo go kjogꞹkʼo ko e Nilda, angeze mi ngeje dʼa médium espiritista a Brasil. Kʼo sʼoanxe go tsjapji ko me ma sʼoo. Mama angeze: “Kʼo sʼoanxe [. . .] mi kjaakʼo rgo kjaagø kʼo na sʼoo, mi kjaagø kʼo mi manji kʼo mi neeji. Ndajmetrjo dya mi kjinkjo, i ndajme a ma kjinkjo, go zinziji kja hospital nange a bi sodꞹ in pjeñegø. Yo sʼoanxe dya mi jɇzgiji sido mi kjakji kʼo na sʼoo i go sodꞹ in pjeñe. I pje kʼo nrre ro sigø ngekʼua ro søgø na joo, i sii na punkjꞹ pare i pjekʼo nrre ro sꞹtrʼꞹ. Nukʼo go mezhe na punkjꞹ kjɇɇ”.

Nakʼua, e Jehová go mbøsꞹ ñe yo in testigo kja ne xoñijomꞹ, e Nilda o jyɇzi kʼo demonio, i nudya me mⱥjⱥ ga mimi na joo i ya na joo o pjeñe. Angeze o mama: “nudya ri xikø trexe yo tree ke dya ra neeji ra jyodʼꞹji ni ri dʼa tsʼi ndajme yo espiritismo [me na sʼooyo]”.