XORU̸ 17
E Jesús o jichi yo ntee pje mi ngeje o Reino e Mizhokjimi
E Jesús o jichi na punkju̷ jñaa, mi nee ke yo ntee ro pjechiji pje mi ngeje o Reino e Mizhokjimi ngekʼua pama pama mi jichi yo ntee
¿PJEKJA o e̱je̱ba kja ne Xoñijomu̷ e Jesús? E Jesús o mama: “Ni jyodʼu̷ ra maa zopju̷ yo ntee yo dʼadyo jñaa o Reino e Mizhokjimi. Nge kʼu̷ bi nrra̷ka̷go Mizhokjimi ra kjago” (Lucas 4:43, NM). Nziyo jñaa yo ra nujiba kʼu̷ o jichi e Jesús yo ntee pje ra tsjaa o Reino Mizhokjimi. Pama pama e Jesús mi jichi yo ntee pje nge o Reino Mizhokjimi.
1. E Jesús ra mbe̷zhi Rey. E Jesús o mama mi ngeje kʼe Mesías (Juan 4:25, 26). Xo mama kʼu̷ mi ngeje kʼe Rey kʼu̷ bi mama kʼe profeta Daniel. E Jesús o xipji kʼo apóstole: “Ma ya ndo ri nuevo ne xoñijomu̷ ñe ajensʼe [...] ra mimigo nuja ra mandago. Xo ñetsʼkʼeji [...], na kjuana kʼu̷ ri xitsʼkʼoji xo ri mimigeji nuja ra mandago” (Mateo 19:28). E Jesús o xipji o discípulo: “Janzitrjotsʼu̷ji”. Nukʼo, nee ra mama bʼu̷bʼu̷ ntee ñe kʼo apóstole ra maa mandaji ko e Jesús. E Jesús go mama: Ri tsja̱ja̱go “dyaja ndenchju̷ru̷”. Nukʼo nee ra mama ke kʼo nzhenchju̷ru̷kʼo, nrro mi nʼaño nteekʼo (Lucas 12:32; Juan 10:16).
2. Ma ra manda nu Reino e Mizhokjimi. Ra ñetsʼe ke kja kʼe jardín Edén e Satanás o mama bʼechjine. Ra ñetsʼe ke na kjuana kʼo mama Mizhokjimi: ngextrjo angeze ra mandazgoji, ñe nrrexe ra a̷ta̷ji ra respetaoji (Mateo 6:9, 10). Ma ra tsjaa Rey e Jesús kja o Reino e Mizhokjimi, me ra sʼiya yo ntee, ra mbosʼu̷ jama tsjaa ma mi bʼu̷bʼu̷ kja ne xoñijomu̷; dya mi juajnu̷ kjo nge kʼu̷ ro sʼiya, mi jichi yo bʼe̷zo, yo nrrinxu, mi jichi kʼo ntee kʼo me mi ju̷̱u̷̱ji merio, ñe kʼo dya pje mi ju̷̱u̷̱ji. Zo e Mizhokjimi o pejñe ro mbosʼu̷ ngextrjo kʼo israelita, xo go mbosʼu̷ kʼo samaritano ñe yo ntee kʼu̷ nrro mi nʼaño nación. E Jesús dya mi kjaa jama tsjaa kʼo ntee kʼo pje nrre mi pjezhi kʼo paakʼo.
3. O Reino Mizhokjimi dya ra manda jaga nee e Satanás. E Jesús o mimi kʼo paa kʼo ma zezhi. Kʼo judío dya mi neeji kʼe rey kʼu̷ mi mandanu, mi romano. Na nu paa yo ntee mi nee ro tsjapu̷ji rey e Jesús, angeze dya go nee (Juan 6:14, 15). E Jesús o xipji na gobernador: “Nutsʼkʼo, dya nzakjazgo kʼo dyaja jmu kʼo manda kja ne Xoñijomu̷” (Juan 18:36). E Jesús o xipji kʼo o discípulo: “Dya pje in kjaji kʼua janzi ga tsjaa kʼo dya ejmezu̷” (Juan 15:19). O xipji o discípulo dya ma joo kʼu̷ ro tsjaji chu̱ʼu̱ para ro mbotrʼu̷ ntee, ni para ro ñanu̷aji e Jesús (Mateo 26:51, 52).
“Mi nzhodʼu̷ e Jesús texe kja kʼo jñiñi, ñe kja kʼo ndajñiñi, mi [xopu̷ ntee] [...]. Mi [xipji] jarba manda nu kʼu̷ bi ñeme Mizhokjimi ajensʼe.” (Mateo 9:35)
4. Ma ra manda e Jesús, me ra sʼiya yo ntee. E Jesús o mama ke ro tsjapu̷ ro soya o mu̷bʼu̷ yo ntee (Mateo 11:28-30). E Jesús o jichi yo ntee pje ro tsjaji ma ro mbe̷sʼiji nrrumu̷, o xipji dya ro ngijñiji jargua mbe̷sʼiji na punkju̷ merio, o jichi jargua nga̱ra̱ji na joo, xo ñe jargua tsjapu̷ji ngekʼua me ro ma̷ja̷ji (Mateo yo capítulo 5 a 7). E Jesús me ma jonte, me mi sʼiya kʼo ntee. Ma punkju̷ ntee kʼo dya pje mi ju̷̱u̷̱, mi jodʼu̷ji e Jesús, mi paa nuji, mi pa̱ra̱ji e Jesús ro mbosʼu̷ji. ¿Kjo dya nge ga kjanu na rey kʼu̷ ri negoji?
E Jesús o mbosʼu̷ na punkju̷ ntee, o tsjaa milagro, nge yo ra tsjaa ma ra manda kja o Reino Mizhokjimi. Moo ra nuji pjenga go tsjaa milagro.
(Nu kʼo gua e̱je̱ba xo ri jyodʼu̷ kja yo libro Mateo, Marcos, Lucas ñe Juan.)
